ᓄᓇᕗᒻᒥ ᖃᑦᑎᕆᔨᒃᑯᑦ ᐊᖓᔪᖅᑳᒻᒪᕆᖓᑕ ᑎᑎᕋᕐᕕᖓ
ᖃᓄᐃᓕᐅᓲᖑᖕᒪᖔᑦᑕ
ᓄᓇᕗᒻᒥ ᖃᑦᑎᕆᔨᒃᑯᑦ ᐊᖓᔪᖅᑳᒻᒪᕆᖓᑕ ᑎᑎᕋᕐᕕᐊᓂ ᑲᒪᒋᔭᖃᓲᑦ ᐃᑭᑦᑐᖃᓕᕌᖓᑦ ᐃᒡᓗᕐᔪᐊᓂᒡᓗ ᐊᑦᑕᕐᓇᖅᑐᒧᐊᖅᑎᑦᑎᑦᑕᐃᓕᒪᕙᒃᖢᑎᑦ. ᑎᑎᕋᕐᕕᖕᒥᐅᑕᑦ ᓴᖅᑭᑎᓲᑦ ᐊᑐᐊᒐᕐᓂᒃ, ᒪᓕᒐᕐᓂᒃ ᐱᓕᕆᐊᒃᓴᓂᒡᓗ ᐅᔾᔨᕆᔭᐅᓕᖅᑎᑦᑎᓇᓱᒃᖢᑎᒃ ᐊᑐᓕᖅᑎᑦᑎᓇᓱᒃᖢᑎᒡᓗ ᑐᙵᕕᐅᔪᓂᒃ ᐊᒻᒪᓗ ᐱᐅᓯᐅᔪᓂᒃ ᐃᑭᑦᑕᐃᓕᒪᑎᑦᑎᓂᕐᒧᑦ. ᐅᖃᐅᔾᔨᒋᐊᖅᐸᒃᑭᕗᒍᑦ ᐱᓕᕆᐊᖑᔪᓕᒫᓄᑦ ᐊᒻᒪ ᐃᓱᒫᓘᑎᓄᑦ ᐃᒡᓗᓄᑦ ᐊᒻᒪ ᐃᑭᑦᑕᐃᓕᑎᑦᑎᓂᕐᒧᑦ.
ᐅᑯᓂᖓ ᑲᒪᒋᔭᒃᓴᖃᖅᑐᒍᑦ:
- ᐅᔾᔨᕆᔭᐅᓕᖅᑎᑦᑎᒃᑲᓐᓂᖅᐸᒃᖢᑕ ᐊᑐᖅᑎᑦᑎᕙᒃᖢᑕᓗ ᐃᒡᓗᕐᔪᐊᓂᒃ ᐃᑭᑦᑕᐃᓕᒪᓂᕐᒧᓪᓗ ᖁᐊᖅᓵᕐᓇᖅᑕᐃᓕᒪᓂᕐᒥᒃ.
- ᐅᖃᐅᔾᔪᐃᕙᒃᖢᑕ ᐊᔾᔨᒌᙱᑦᑐᓂᒃ ᒐᕙᒪᓂᒃ ᐃᒡᓗᕐᔪᐊᒧᑦ ᐃᑭᑎᑦᑎᓂᕐᒧᓪᓗ−ᐊᒃᑐᐊᓂᓕᖕᓄᑦ ᐃᓱᒪᒋᔭᒃᓴᓂᒃ, ᐃᓚᒋᔭᐅᓪᓗᓂ ᐃᑭᑎᑦᑎᑦᑕᐃᓕᒪᓂᕐᒧᑦ ᓴᐳᔾᔨᓯᒪᓂᖅ.
- ᐱᓕᕆᖃᑎᖃᖅᖢᑎᒃ ᖃᑦᑎᕆᔨᐅᖃᑎᖏᓐᓂᒃ ᓄᓇᕗᓕᒫᒥ.
- ᓯᕗᓕᖅᑎᐅᓗᑎᒃ, ᐊᐅᓚᑦᑎᓗᑎᒃ ᐊᒻᒪ ᐊᑐᐃᓐᓇᐅᑎᑦᑎᓗᑎᒃ ᒐᕙᒪᒃᑯᑦ ᐱᓕᕆᕝᕕᖏᓐᓂᑦ, ᕼᐋᒻᒪᓚᒃᑯᓐᓂ ᐊᒻᒪ ᐃᓄᖕᓂᑦ ᐊᑑᑎᖃᑦᑎᐊᖅᑐᓂᑦ ᐱᓕᕆᐊᖃᕐᓂᕐᒥᑦ ᐃᒡᓗᓕᐅᓂᕐᒧᑦ ᐊᒻᒪ ᐃᑭᑦᑐᓕᕆᓂᕐᒧᑦ ᐊᑦᑕᕐᓇᖅᑕᐃᓕᒪᓂᕐᒥᑦ.
ᐊᑦᑕᕐᓇᖅᑕᐃᓕᒪᓂᕐᒧᑦ ᐃᑲᔫᑎᒃᓴᑦ
ᑐᑭᓯᐊᓗᒋᑦ ᖃᓄᐃᓕᐅᕆᐊᖃᕐᒪᖔᑦ ᐃᑭᑦᑐᖃᖅᑎᓪᓗᒍ ᐱᒋᐊᕈᑎᓪᓗᐊᑕᐅᔪᖅ ᐃᑭᑎᑦᑎᑦᑕᐃᓕᒪᓂᕐᒥᒃ. ᐱᒻᒪᕆᐅᕗᖅ ᐋᖅᑭᒃᓯᓂᐊᕐᓗᑎᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᐸᕐᓇᐅᑎᔅᓯᓐᓂ ᖃᓄᐃᑦᑐᖃᓚᐅᙱᓐᓂᖓᓂ; ᐱᑎᑦᑎᑦᑕᐃᓕᒪᓂᖅ ᐱᒻᒪᕆᐅᕗᖅ ᐃᓚᑎᑦ ᐊᑦᑕᕐᓇᖅᑐᒦᖁᓇᒋᑦ.
ᐃᑭᑎᑦᑎᑦᑕᐃᓕᒪᓂᕐᒧᑦ ᐸᕐᓇᐅᑎᓕᐅᕐᓗᑎᑦ
ᐃᓚᒌᓕᒫᑦ ᐃᑭᑦᑕᐃᓕᒪᓂᕐᒧᑦ ᐱᕙᒌᔭᖅᓯᒪᔪᓂᒃ ᐸᕐᓇᒃᓯᒪᕙᒌᕆᐊᖃᖅᐳᑦ ᐃᑭᑦᑐᖃᓕᕐᓂᖅᐸᑦ ᑐᐊᕕᕐᓇᖅᑐᖃᕐᓂᖅᐸᓪᓘᓐᓃᑦ. ᑖᓐᓇ ᐃᓚᐅᑎᑦᑎᔪᖅ ᖃᐅᔨᒪᓗᓂ ᖃᓄᐃᓕᐅᕆᐊᖃᕐᒪᖔᑦ ᐃᑭᑦᑐᖃᖅᑎᓪᓗᒍ, ᑭᓇᒧᑦ ᖃᐅᔨᒋᐊᕈᓐᓇᕐᒪᖔᑦ ᓂᕈᐊᕐᓗᓂᓗ ᑲᑎᕝᕕᐅᓂᐊᖅᑐᒥᒃ ᐃᓂᒃᓴᒥᒃ ᖃᑕᙳᑎᒌᑦ ᐊᕕᒃᑲᔭᕐᓂᖅᐸᑕ.
ᐊᔪᕈᓐᓃᖅᓴᕐᓗᑎᑦ ᐊᓂᕝᕕᒋᓂᐊᖅᑕᕐᓂᒃ ᖃᐅᔨᒪᓕᕐᓗᒋᓪᓗ ᐊᓂᕝᕖᑦ ᐃᒡᓗᕈᓯᓕᒫᓂᒃ ᐊᖏᕐᕋᔅᓯᓐᓂ. ᖃᐅᔨᒪᓗᑎᑦ ᖃᖓ ᓄᖅᑲᕆᐊᖃᕐᒪᖔᑦ, ᓇᑎᕐᒧᐊᕆᐊᖃᕐᒪᖔᑦ, ᐊᒻᒪ ᐊᒃᓴᑳᒋᐊᖃᕐᒪᖔᑦ.
ᐳᐃᒍᖅᑕᐃᓕᒋᑦ ᖃᓄᖅ ᐃᑭᑎᑦᑎᑦᑕᐃᓕᒪᔪᓐᓇᕐᒪᖔᑦ. ᖃᐅᔨᒪᓗᑎᑦ ᖃᓄᐃᓕᐅᕆᐊᖃᕐᒪᖔᑦ − ᐋᖅᑭᒃᓯᓗᑎᑦ ᐃᑭᑦᑐᖃᓕᖅᐸᑦ ᐊᓂᕝᕕᒃᓴᒧᑦ ᐸᕐᓇᐃᓯᒪᕙᒌᕐᓗᓯ ᐊᓂᕝᕕᓕᒫᑦ ᐃᒡᓗᕈᓯᓕᒫᓂ ᐊᖏᕐᕋᔅᓯᓐᓂ ᖃᐅᔨᒋᐊᖏᓐᓇᐅᔭᕐᓗᑎᓪᓗ ᑭᖑᓪᓕᖅᐹᒥ ᖃᑕᙳᑎᖏᑦ ᐊᓂᑎᓪᓗᒋᑦ ᐃᒡᓗᔅᓯᓐᓂ. ᓂᖅᖠᐅᕈᑕᐅᕙᒃᑐᓕᒫᑦ ᖃᒥᙶᖅᑐᐃᓐᓇᐅᕙᑦ? ᑕᓗᐃᓪᓗ ᐊᓪᓚᕈᑎᒃᓴᐃᓪᓗ ᐆᑕᖅᑐᓄᑦ ᐅᖓᓯᒋᔭᐅᔪᒦᒃᑲᓗᐊᖅᐸᑦ? ᐃᓚᑎᑦ ᐱᕙᒌᔭᕐᓗᒋᑦ ᐃᑭᑦᑕᐃᓕᒪᓂᕐᒧᑦ ᑐᑭᖃᕐᒥᔪᖅ ᖃᐅᔨᒪᓗᑎᑦ ᑭᓱᑦ ᐃᑭᑎᑦᑎᔪᓐᓇᕐᒪᖔᑕ ᖃᓄᕐᓗ ᐃᑭᑎᑦᑎᑦᑕᐃᓕᔪᓐᓇᕐᒪᖔᖅᐱᑦ.
ᖃᐅᔨᒋᐊᕐᓗᒋᑦ ᐳᔫᖅᑐᖃᓕᕐᓂᖅᐸᑦ ᖁᖁᐊᕈᑏᑦ ᖃᑦᑎᕈᑏᓪᓗ
ᐃᑭᑦᑐᓄᑦ ᖁᖁᐊᕈᑎᑦ ᖃᑦᑎᕈᑏᓪᓗ ᐊᑐᖅᑕᐅᔭᕆᐊᖃᓪᓚᕆᓲᖑᖕᒪᑕ ᐃᑭᑎᑦᑎᑦᑕᐃᓕᓂᕐᒧᑦ. ᐃᒡᓗᔅᓯᓐᓂ ᑎᑎᕋᕐᕕᔅᓯᓐᓂᓗ ᐱᑎᓪᓗᒋᑦ ᓴᐳᔾᔭᐅᓯᒪᖁᓪᓗᒋᑦ ᖃᐅᔨᓴᖅᑕᐅᑎᒐᔪᒡᓗᒋᓪᓗ ᖃᑦᑎᕆᔨᓄᑦ ᐊᑦᑕᕐᓇᖅᑕᐃᓕᒪᔪᓕᕆᔨᒻᒪᕆᖕᒧᑦ.
ᖃᐅᔨᒪᕖᑦ? ᖃᐅᔨᓴᖃᑦᑕᓪᓗᐊᖅᑕᑎᑦ ᐳᔫᖅᑐᖃᓕᕐᓂᖅᐸᑦ ᖁᖁᐊᕈᑏᑦ ᐊᑕᐅᓯᐊᖅᐸᒡᓗᒍ ᑕᖅᑭᕐᒥ ᐊᓯᔾᔨᖅᐸᒡᓗᒋᓪᓗ ᐹᑕᓖᖏᑦ ᐊᕐᕌᒍᑕᒫᑦ. ᖃᑦᑎᕈᑎᑦ ᖃᐅᔨᓴᖅᑕᐅᖃᑦᑕᕆᐊᓖᑦ ᐊᕐᕌᒍ ᐊᑕᐅᓯᐊᕐᓗᒍ ᐱᓕᕆᔨᒻᒪᕆᖕᒧᑦ.
ᖃᐅᔨᒪᒋᐊᕐᓗᑎᑦ ᐃᓐᓇᓕᒫᑦ ᓄᑕᖅᑲᓪᓗ ᐃᓕᑕᖅᓯᐅᒪᒐᓗᐊᕐᒪᖔᑕ ᐃᑭᑦᑐᖃᓕᖅᐸᑦ ᖁᖁᐊᕈᑎᒥᒃ ᖃᐅᔨᒪᓗᑎᒡᓗ ᖃᓄᐃᓕᐅᕆᐊᖃᕐᒪᖔᑦ ᐃᑭᑦᑐᖃᓕᕐᓂᖅᐸᑦ ᑐᐊᕕᕐᓇᖅᑐᖃᖅᐸᓪᓘᓐᓃᑦ. ᑕᒪᓐᓇ ᐃᓚᖃᖅᐳᖅ ᖃᐅᔨᒪᓂᕐᒥᒃ ᓇᓂ ᖃᓂᓛᖑᖕᒪᖔᑦ ᐃᑭᑦᑐᖃᓕᕐᓂᖅᐸᑦ ᐊᓂᕝᕕᒃᓴᒥᒃ ᑐᐊᕕᕐᓇᖅᑐᓄᓪᓗ ᐅᖄᓚᕝᕕᒃᓴᓂᒃ, ᑕᐃᒪᐃᒃᑯᑎᒃ ᐅᖄᓚᔪᓐᓇᕐᓂᐊᕐᒪᑕ ᐃᑲᔪᖅᑕᐅᔪᒪᓗᑎᒃ.
ᖃᖓᒃᑯᑦ ᐃᑲᔪᖅᑕᐅᔪᒪᔪᓐᓇᕐᒪᖔᑦ
ᖃᐅᔨᒪᓗᒍ ᖃᑦᑎᕆᔨᒃᑯᑦ ᓈᓴᐅᑖ ᐃᑭᑦᑐᖃᕋᔭᖅᐸᑦ ᑐᐊᕕᕐᓇᖅᑐᖃᖅᐸᓪᓘᓐᓃᑦ. ᐅᐃᒪᙱᓪᓗᑎᑦ, ᐅᖃᓗᒡᕕᒋᓗᒋᑦ ᑐᕌᕈᑏᓪᓗ ᐅᖃᐅᓯᕆᓗᒍ ᓄᓇᐃᓪᓗ ᓇᓗᓇᐃᒃᑯᑕᖏᑦ. ᑖᓐᓇ ᓈᓴᐅᑎ ᐊᑐᐃᓐᓇᐅᑎᓪᓗᒍ ᐃᓚᒌᓕᒫᑦ ᓇᓂᔪᓐᓇᕐᓂᐊᕐᒪᒍ ᑐᐊᕕᕐᓇᖅᑐᖃᓕᖅᐸᑦ. ᐃᓚᒌᓕᒫᑦ ᐊᔪᕈᓐᓃᖅᓴᖅᑎᓪᓗᒋᑦ ᐅᖃᓘᑎᐅᑉ ᓈᓴᐅᑖᓂᒃ ᖃᑦᑎᕆᔨᒃᑯᓐᓄᑦ ᖃᐅᔨᒪᓗᑎᒡᓗ ᐅᖃᓗᒋᐊᒃᓴᖅ ᐃᑭᑦᑐᖃᓕᕐᓂᖅᐸᑦ ᐃᑭᑦᑐᓄᓪᓗ ᑐᐊᕕᕐᓇᖅᑐᓄᑦ.
ᐊᐱᖅᑯᑎᒃᓴᖃᖅᐲᑦ ᑭᒃᑯᑐᐃᓐᓇᐃᑦ ᖃᑦᑎᕆᓂᕐᒧᑦ ᐃᓕᓐᓂᐊᖅᑎᑕᐅᕙᖕᓂᖏᓐᓄᑦ, ᖃᑦᑎᕆᔨᐅᓂᕐᒧᑦ ᐱᓕᒻᒪᒃᓴᖅᑎᑦᑎᓂᕐᒥᒃ ᐃᑭᑦᑕᐃᓕᒪᑎᑦᑎᓂᕐᒥᒡᓗ? ᐅᖃᓗᒃᕕᒋᓗᒍ ᓄᓇᕗᒻᒥ ᖃᑦᑎᕆᔨᒃᑯᑦ ᐊᖓᔪᖅᑳᒻᒪᕆᖓᑕ ᑎᑎᕋᕐᕕᖓ ᑐᓴᕆᐊᕐᓗᑎᑦ ᐅᕗᖓ 1-844-975-5493.
ᐃᑯᐊᓪᓚᒃᑎᑦᑎᑦᑕᐃᓕᒪᓂᕐᒧᑦ ᐱᓇᓱᐊᕈᓯᖅ
ᐅᑐᐱᕆᐅᓕᕌᖓᑦ ᐱᓇᓱᐊᕈᓯᐅᑉ ᑐᒡᓕᐊᓂ, ᐃᑭᑎᑦᑎᑦᑕᐃᓕᒪᓂᕐᒧᑦ ᐱᓇᓱᐊᕈᓯᖅ ᐊᑐᖅᑎᑕᐅᓲᖑᕗᖅ ᐃᑭᑎᑦᑎᑦᑕᐃᓕᒪᓂᕐᒥᑦ ᐅᔾᔨᖅᓱᖅᐹᓪᓕᖅᑎᑦᑎᓇᓱᐊᖅᖢᑎᒃ ᐃᑲᔪᖅᖢᑎᒡᓗ ᐊᖏᕐᕋᓯ ᐃᓚᑎᓪᓗ ᓴᐳᑎᔭᐅᓯᒪᒐᓗᐊᕆᐊᒃᓴᖏᓐᓂᑦ. ᑕᒪᑐᒪᓂ ᐱᓇᓱᐊᕈᓯᕐᒥ ᐃᓕᑦᑎᔪᓐᓇᖅᐳᑎᑦ ᓄᓇᔅᓯᓐᓂ ᖃᑦᑎᕆᔨᒃᑯᓐᓂ ᐃᑭᑎᑦᑎᑦᑕᐃᓕᒪᓂᐅᑉ ᒥᒃᓵᓄᑦ.
ᐃᑭᑎᑦᑎᑦᑕᐃᓕᒪᓂᕐᒧᑦ ᐱᓇᓱᐊᕈᓯᐅᑎᓪᓗᒍ, ᐃᓚᑎᑦ ᐱᓕᕆᖃᑎᒋᓗᒋᑦ ᐱᔭᕇᖅᓯᓂᕐᒥᑦ ᐃᑭᑦᑕᐃᓕᒪᑎᑦᑎᓂᕐᒧᑦ ᖃᐅᔨᓴᕐᓂᕐᒥᑦ ᐊᖏᕐᕋᔅᓯᓐᓂᑦ, ᐊᑦᑕᕐᓇᑐᐃᓐᓇᕆᐊᓕᖕᓂᑦ, ᐱᕙᓪᓕᐊᑎᑦᑎᓂᕐᒥᓪᓗ ᐊᔪᕈᓐᓃᖅᓴᕐᓂᕐᒥᓪᓗ ᐃᑭᑦᑐᖃᓕᕐᓂᖅᐸᑦ ᕿᒪᒃᓯᔭᕆᐊᖃᕐᓂᕈᔅᓯ ᐸᕐᓇᐅᑎᓂᑦ. ᖃᑕᙳᑎᑎᑦ ᐃᑲᔪᕐᓗᒋᑦ ᖁᓱᙱᓐᓂᖅᓴᐅᓗᑎᒃ ᐃᑭᑦᑐᖃᓕᕐᓂᖅᐸᑦ ᑐᐊᕕᕐᓇᖅᑐᖅᑕᖃᓕᖅᐸᓪᓘᓐᓃᑦ ᐃᓕᑦᑎᓂᒃᑯᑦ ᖃᓄᐃᓕᐅᕆᐊᕐᓂᕐᒥᒃ ᖃᓄᐃᑦᑐᖃᕐᓂᖅᐸᑦ.
ᐊᑭᓕᖅᓱᖅᑕᐅᙱᖦᖢᑎᒃ ᖃᑦᑎᕆᔨᙳᕆᑦ
ᐊᑭᓕᖅᓱᖅᑕᐅᙱᖦᖢᓂ ᖃᑦᑎᕆᔨᐅᓂᖅ ᐱᔭᒃᓴᑐᐃᓐᓇᕆᙱᑕᑦ, ᑕᐃᒪᐃᑦᑐᓪᓚᕆᐅᒐᕕᑦ. ᖃᑦᑎᕆᔩᑦ ᐊᑭᓕᖅᓱᖅᑕᐅᙱᖦᖢᑎᒃ ᓄᓇᕗᒻᒥ ᓄᓇᓕᖕᓂ ᐃᑭᑦᑐᖃᖅᑎᑦᑎᑕᐃᓕᓲᖑᕗᑦ ᐊᒻᒪ ᑐᐊᕕᕐᓇᖅᑐᖃᓕᕐᓂᖅᐸᑦ, ᐊᒻᒪ ᐃᑲᔪᖅᑐᐃᓪᓗᑎᒃ ᐃᓕᓐᓂᐊᖅᑐᓕᕆᓂᕐᒥᒃ, ᑮᓇᐅᔭᓕᐅᕋᓱᐊᕐᓂᕐᒥᒃ ᐊᒻᒪ ᐊᐅᓚᑦᑎᓂᕐᒥᒃ. ᓄᓇᓕᖕᓂ ᕿᑎᐊᓃᒐᔪᖕᓂᖅᐹᖑᕗᑦ.
ᐊᑭᓕᖅᓱᖅᑕᐅᙱᖦᖢᑎᒃ ᖃᑦᑎᕆᔨᑦ:
- ᐃᑲᔪᕐᓗᑎᒃ ᓄᓇᓕᖏᓐᓄᑦ ᑐᑭᖃᑦᑎᐊᖅᑐᒃᑯᑦ ᐊᑑᑎᖃᑦᑎᐊᖅᑐᒃᑯᓪᓗ.
- ᒪᓂᒻᒪᒡᓗᒋᑦ ᐱᒻᒪᕆᐅᓪᓗᑎᒃ ᑐᐊᕕᕐᓇᖅᑐᖅᑕᖃᖅᑎᓪᓗᒍ ᐱᔨᑦᑎᕋᕐᓂᕆᔭᐅᔪᑦ ᐃᑲᔪᕐᓗᒋᑦ ᐃᓄᐃᑦ ᖁᐊᖅᓵᕐᓇᖅᑐᒦᑦᑐᑦ ᐊᒃᓱᕈᕐᓇᖅᑐᒦᑦᑐᓪᓗ.
- ᐃᓅᓯᓕᒫᒧᑦ ᐱᖃᓐᓇᕆᔭᖅᑖᕐᓗᑎᑦ ᐃᖅᑲᓇᐃᔭᖃᑎᖏᓐᓂᒃ.
- ᐃᓕᑦᑎᓗᑎᑦ ᐊᑦᑕᕐᓇᖅᑕᐃᓕᒪᓂᕐᒥᒃ ᐱᓕᕆᔨᒻᒪᕆᐅᓂᕐᒥᒡᓗ ᐃᑲᔪᕐᓗᖏᑦ ᐊᓯᖏᓐᓄᑦ ᓇᖕᒥᓂᕐᒨᖓᔪᓄᑦ ᐱᓕᕆᔨᒻᒪᕆᐅᓂᕐᒧᓪᓘᓐᓃᑦ ᐋᖅᑭᒃᓯᒪᔪᓄᑦ.
ᐊᑭᓕᖅᓱᖅᑕᐅᙱᖦᖢᑎᒃ ᖃᑦᑎᕆᔨᐅᑎᓪᓗᑎᑦ ᐃᒪᐃᓕᐅᖃᑦᑕᕐᓂᐊᖅᐳᑎᑦ:
- ᑭᐅᕙᒡᓗᑎᑦ ᑐᐊᕕᕐᓇᖅᑐᓄᑦ ᐅᖄᓚᔪᓄᑦ ᒪᑯᓂᖓ ᓲᕐᓗ ᐃᑭᑦᑐᖃᖅᑎᓪᓗᒍ, ᐱᖏᖕᓇᖅᑐᖃᖅᑎᓪᓗᒍ ᐊᒻᒪ ᐋᓐᓂᐊᕕᖕᒥ ᑐᐊᕕᕐᓇᖅᑐᖃᖅᑎᓪᓗᒍ.
- ᐃᓚᐅᖃᑕᐅᕙᒡᓗᓂ ᐱᓕᒻᒪᒃᓴᖅᑐᓂᒃ ᐋᖅᑭᐅᒪᑎᑦᑎᔨᓂᒡᓗ ᐱᓕᕆᐊᖑᓲᓂᒃ ᖃᑦᑎᕆᕝᕕᖕᒥ ᐱᖁᑎᖏᓐᓂᒡᓗ.
- ᐃᓚᐅᕙᒡᓗᓂ ᑭᒃᑯᑐᐃᓐᓇᑦ ᐃᓕᓐᓂᐊᖅᑎᑕᐅᑎᓪᓗᒋᑦ ᐊᒻᒪ ᐃᑲᔪᖅᑐᐃᕙᒡᓗᑎᒃ ᓄᓇᓕᖕᓂ ᐱᓕᕆᐊᖑᑎᑕᐅᔪᓂᑦ.
ᐱᑐᐃᓐᓇᕆᐊᖃᓕᖅᐱᑦ ᐊᑭᓕᖅᓱᖅᑕᐅᙱᓪᓗᑎᑦ ᖃᑦᑎᕆᔨᐅᖃᑕᐅᒋᐊᒃᓴᖅ? ᐅᓪᓗᒥ ᖃᑦᑎᕆᔨᒃᑯᑦ ᐃᒡᓗᖁᑖᓄᐊᕐᓗᑎᑦ.
ᐃᑲᔫᑎᒃᓴᐃᑦ
ᐃᓕᓐᓂᐊᕆᑦ ᖃᓄᖅ ᖃᑕᙳᑎᑎᑦ ᐃᑭᑎᑦᑎᑦᑕᐃᓕᒪᔪᓐᓇᕐᒪᖔᑕ ᖃᓄᕐᓗ ᕿᒫᔪᓐᓇᕐᒪᖔᑦ ᐃᑭᑦᑐᖃᓕᖅᐸᑦ ᑐᐊᕕᕐᓇᖅᑐᖅᑕᖃᖅᐸᓪᓘᓐᓃᑦ ᑖᒃᑯᓇᙵᑦ ᐃᑲᔪᕈᓐᓇᖅᑐᓂᒃ.
- ᓄᓇᕗᒻᒥ ᐃᑯᐊᓪᓚᒃᑕᐃᓕᑎᑦᑎᓂᕐᒧᑦ ᐱᖁᔭᖅ (ᓴᖅᑭᑦᑎᔭᕆᐊᖃᕐᓂᖅ/ᐊᑦᑕᑕᕐᕕᒃᓴᓕᐅᕐᓂᖅ)
- ᓄᓇᕗᒻᒥ ᖃᑦᑎᕆᔨᒃᑯᑦ ᐊᖓᔪᖅᑳᒻᒪᕆᖓᑕ ᑎᑎᕋᕐᕕᖓᓐᓂᑦ ᐊᕐᕌᒍᓕᒫᒧᑦ ᐅᓂᒃᑳᓕᐊᖅ
- ᐊᑦᑕᕐᓇᖅᑕᐃᓕᒪᓂᖅ ᓯᕗᓪᓕᖅ, ᐱᑦᑕᐃᓕᓗᒍ ᐱᐅᙱᓛᖅ
- ᐃᑯᐊᓪᓚᒃᑎᑦᑎᑦᑕᐃᓕᒪᓂᖅ: ᖃᓄᖅ ᐊᑦᑕᕐᓇᖅᑐᒦᙱᑦᑐᓐᓇᕐᒪᖔᑦ
