ᐱᖏᖕᓇᖅᑐᓕᕆᔨᑦ ᐸᖅᓴᐃᔨᓪᓗ

ᐱᖏᖕᓇᖅᑐᓕᕆᔨᒃᑯᑦ ᐸᖅᓴᐃᔩᓪᓗ: ᖃᓄᐃᓕᐅᕆᐊᖃᕐᒪᖔᑦ

ᐱᖏᖕᓇᖅᑐᓕᕆᔨᒃᑯᑦ ᐸᖅᓴᐃᔩᓪᓗ ᐊᑭᓕᖅᓱᖅᑕᐅᙱᒃᑲᓗᐊᖅᖢᑎᒃ ᐱᔨᑦᑎᕋᖅᑎᐅᔪᑦ ᐊᑐᐃᓐᓇᐅᑎᑕᐅᔪᑦ ᓄᓇᕘᓕᒫᒥ ᓄᓇᓕᖕᓂ.

ᑕᒪᕐᒥᒃ ᓄᓇᓖᑦ ᓇᖕᒥᓂᖅ ᐱᖏᖕᓇᖅᑐᓕᕆᔨᖃᖅᑐᑦ ᐱᔭᒃᓴᖃᖅᑎᑕᐅᕙᒃᑐᓂ ᓄᓇᕗᒻᒥ ᑐᐊᕕᕐᓇᖅᑐᓕᕆᔨᒃᑯᓐᓂᑦ (NEM) ᐱᔭᕆᐊᖃᒻᒪᕆᒃᑎᑕᐅᔪᓂ ᓄᓇᕗᓕᒫᒥ. ᐱᓕᕆᖃᑎᒌᖑᔪᑦ ᐃᑲᔪᖅᐸᒃᑐᑦ ᓇᖕᒥᓂᖅ ᑭᓯᐊᓂ ᑐᓂᔭᐅᕙᒃᑐᑦ ᑮᓇᐅᔭᓂᑦ ᓄᓇᕗᒻᒥ ᑐᐊᕕᕐᓇᖅᑐᓕᕆᔨᒃᑯᓐᓂᑦ ᐊᑭᓕᖅᓱᕆᐊᓖᑦ ᐊᑭᓕᐅᑎᖏᓐᓄᑦ ᓲᕐᓗ ᓂᕿᓄᑦ, ᐅᖅᓱᐊᓗᖕᒧᑦ, ᐱᖁᑎᓄᓪᓗ ᓴᓇᔭᐅᒃᑲᓐᓂᕆᐊᖃᖅᑐᓄᑦ.

ᑐᓴᖅᑎᑦᑎᔾᔪᑕᐅᕙᒃᑐᑦ ᐱᖏᖕᓇᖅᑐᓕᕆᔨᒃᑯᓐᓄᑦ ᐱᒋᐊᒐᔪᒃᑐᑦ ᓄᓇᓕᖕᓂᑦ. ᐱᓕᕆᖃᑎᒌᖑᔪᑦ ᑐᓴᖅᑎᑕᐅᓇᔭᖅᑐᑦ ᐊᓯᐅᖅᑲᔪᒥᑦ ᐃᑲᔪᖅᑎᒌᓂᒡᓘᓐᓃᑦ, ᖃᐅᔨᑎᑦᑎᓂᐊᖅᖢᑎᒡᓗ ᓄᓇᕗᒻᒥ ᑐᐊᕕᕐᓇᖅᑐᓕᕆᔨᒃᑯᓐᓂᑦ.

ᐊᓯᐊᒍᖔᖅ, ᓄᓇᕗᒻᒥ ᑐᐊᕕᕐᓇᖅᑐᓕᕆᔨᒃᑯᑦ ᖃᐅᔨᑎᑕᐅᓇᔭᖅᑐᑦ ᒫᓃᑉᐳᖔᕈᑎᒥᑦ (ᐊᑐᐃᓐᓇᐅᑎᑕᐅᔪᑦ ᓄᓇᕗᒻᒥ ᑐᐊᕕᕐᓇᖅᑐᓕᕆᔨᒃᑯᓐᓂᑦ ᓄᓇᓕᓕᒫᓂ) ᖃᐅᔨᑎᑦᑎᓇᔭᖅᑐᑦ ᐱᖏᖕᓇᖅᑐᓕᕆᔨᒃᑯᑦ ᐱᓕᕆᖃᑎᒌᖏᓐᓂᑦ ᑕᐃᑲᓂ ᓄᓇᓕᖕᓂ ᐸᖅᓴᐃᓂᐊᖅᑎᓪᓗᒋᑦ.

ᓄᓇᕗᒻᒥ ᑐᐊᕕᕐᓇᖅᑐᓕᕆᔨᒃᑯᑦ ᐋᖅᑭᒃᓯᓚᐅᖅᑐᑦ ᓇᖕᒥᓂᖁᑖᓂ ᓄᓇᕗᒻᒥ ᐋᖅᑭᒃᑕᐅᔪᒥ ᐱᖏᖕᓇᖅᑐᓕᕆᔨᒃᑯᓐᓄᑦ ᐱᓕᒻᒪᒃᓴᕐᓂᕐᒧᑦ ᐱᓕᕆᐊᒃᓴᒥᑦ ᐱᓕᒻᒪᒃᓴᖅᑎᑦᑎᔨᖃᓕᖅᖢᑎᒡᓗ ᓄᓇᕗᒻᒥ ᔮᓄᐊᕆ 2020−ᒥᑦ. ᐱᓕᒻᒪᒃᓴᕐᓂᐅᔪᖅ ᓯᕗᓪᓕᖅᐸᐅᔪᖅ ᓄᓇᕗᒻᒧᑦ ᖃᖓᑦᑕᖅᑎᑕᐅᓯᒪᔪᑎᒍᑦ ᑕᒻᒪᕇᒃᑯᑎᑎᒍᑦ ᐊᒻᒪᓗ ᓇᒃᓴᑲᑦᑕᕐᒥ InReach−ᒥᑦ.

ᐊᑐᓂ ᐱᓕᕆᖃᑎᒌᑦ ᖃᖓᑦᑕᖅᑎᑕᐅᓯᒪᔪᑎᒍᑦ ᑕᒻᒪᕇᒃᑯᑎᑖᕐᓗᑎᒃ ᐊᒻᒪᓗ ᓇᒃᓴᑲᑦᑕᕐᒥ InReach−ᒥᑦ ᐱᓕᕆᐊᒃᓴᐅᔪᒥ ᐱᔭᕇᖅᓯᒍᑎᒃ. ᓄᓇᕗᒻᒥ ᑐᐊᕕᕐᓇᖅᑐᓕᕆᔨᒃᑯᑦ ᐱᖁᑎᖃᖅᑎᑦᑎᔨᐅᓪᓗᑎᒃ ᐊᑐᓂ ᐱᓕᕆᖃᑎᒌᖕᓂ ᑲᑎᖅᓱᖅᓯᒪᔪᓂ "Go Bags"−ᒥ ᐊᑎᓕᖕᒥᑦ ᒪᑯᐊᓗ (ᓯᓂᒡᕖᑦ, ᐋᓪᓕᐊᑦ, ᖃᐅᓯᕋᓗᐊᖅᖢᑎᑦ ᐃᑭᔭᑦᑐᑦ ᐃᒃᑭᑏᑦ, ᓱᐴᔫᖅ, ᐊᐅᓪᓛᖅᑐᖅᓯᐅᑎᑦ ᓂᖅᖠᐅᕈᑎᑦ, ᖃᐅᒻᒪᖅᑯᑎ, ᑕᕐᕋᖅᑑᑎ, ᐃᖑᕇᑦ, ᓴᕕᖕᓂᑦ, ᐳᐊᕐᕆᑎᒥ, ᓂᒡᓕᓱᐃᑦᑐᓂᑦ, ᐳᐊᓗᒃᑲᓐᓂᕐᓂ ᓇᓴᕐᓂᓪᓗ).  ᓄᓇᕗᒻᒥ ᑐᐊᕕᕐᓇᖅᑐᓕᕆᔨᒃᑯᑦ ᐱᓕᕆᑲᑕᕈᓘᔭᖅᓯᒪᔪᑦ ᐊᑐᐃᓐᓇᐅᑎᑦᑎᕙᓪᓕᐊᓪᓗᑎᒃ ᓄᑖᓂᑦ ᐱᓕᕆᔾᔪᑎᒃᓴᓂᑦ ᐱᓕᒻᒪᒃᓴᕈᑎᓂᒡᓗ ᓄᓇᕘᓕᒫᒧᑦ ᑲᔪᓯᕙᓪᓕᐊᖏᓐᓇᕐᓂᐊᖅᖢᑎᒡᓗ.

ᐃᓚᒋᔭᐅᖃᑕᐅᔪᒪᒍᕕᑦ ᐱᖏᖕᓇᖅᑐᓕᕆᔨᓄᑦ ᓄᓇᓕᒋᔭᕐᓂ, ᖃᐅᔨᒋᐊᕐᕕᒋᓗᒋᑦ ᐱᖏᖕᓇᖅᑐᓕᕆᔨᒃᑯᑦ ᑭᒡᒐᖅᑐᐃᔨᖏᑦ ᕼᐋᒻᒪᓚᒃᑯᔅᓯᓐᓂᑦ.

ᓄᓇᕗᒻᒥ ᑐᐊᕕᕐᓇᖅᑐᓕᕆᔨᒃᑯᑦ ᖁᔭᓕᓯᒪᔪᑦ ᐱᖏᖕᓇᖅᑐᓕᕆᔨᓂᑦ ᐱᓕᕆᕐᔪᐊᖏᓐᓇᕐᓂᖏᓐᓄᑦ ᐊᖏᖅᓯᒪᓂᖏᓐᓄᓪᓗ ᐱᔨᑦᑎᕋᕈᒪᓪᓗᑎᒃ ᓄᓇᓕᖏᓐᓂᑦ.

ᑐᓴᕆᐊᕐᕕᐅᑕ: 

ᓄᓇᕗᒻᒥ ᑐᐊᕕᕐᓇᖅᑐᓕᕆᓂᕐᒧᑦ ᐊᐅᓚᑦᑎᓂᖅ
ᓄᓇᓕᓐᓂ ᒐᕙᒪᒃᑯᓐᓂᓪᓗ ᐱᔨᑦᓯᕋᖅᑎᒃᑯᑦ
ᓄᓇᕗᑦ ᒐᕙᒪᒃᑯᑦ
ᑎᑎᖅᑲᓂᐊᕐᕕᒃ 1000 ᐅᕗᖓ 700
ᐃᖃᓗᐃᑦ, ᓄᓇᕗᑦ
X0A 0H0
ᓱᒃᑲᔪᒃᑯᑦ: (867)979-4221
ᐃᕐᖐᓐᓈᖅᑕᐅᑦ: @email

ᑐᐊᕕᕐᓇᖅᑐᖃᖅᐸᑦ ᐊᑭᖃᙱᑦᑐᒃᑯᑦ ᐅᖃᓗᒡᕕᒋᔭᒃᓴᑦ ᐃᑲᕐᕋᓄᑦ 24−ᓄᑦ: 1-800-693-1666ᑐᐊᕕᕐᓇᖅᑐᒃᑯ ᐱᔨᑦᑎᕋᖅᑎᑦ ᑭᐅᑲᑕᓲᑦ ᐃᑲᕐᕋᓄᑦ 24-ᓄᑦ: 1-867-979-6262