Sibu Chanza's Story
MAKPIQNIGA TITIRAAMNIT TALOYUAMI NUNAGIYAUYUMI
Tikmiaq tutigiaqmat Taluyuani tikmiaqaqvikmi, takuyakhaq aalagayuuyaaqtuq naahuriyamnit. Nunagiyauyuq aputitut nauvikhaqaginiganik. Ilranaitkaluaqtilugu munaqhi aikhiqtuq uvamnik tikmiaqaqvikmit, uqaqatiriigutikpuk nuutqaqataqtuq nipaingaruutinik, ihumagiyaqaqtiluga akyariami uvamnik uvuga nutaamut inikhamut. Munaqhi qauyiyut uumiga kihiani akutuq nipliqhimaitumik tikinamnuuk kihiani munaqhiqaqvikmut. Ilumut, ajikuhiuqnahuaqhimayara ilituqhaqhimayamnik, qanuriniganut hivuramni, ihumavluga ihuaqtumik ihumaliuqhimakmagaa. Ukua ikpigijutit aulatilugit ihumamni, kigumut qiviaqhimayuga nalunaiyariagani tikmiaq aulagitmagaa ihumaliuqhugalu uhitiriamni utimut ikivigiyamnut.
Taluyuami munaqhiqaqvik piniqtuq qanuriniga hanayaunigani iqluuqpak taja taiyara agilramnik. Havaktuup iglugiya ihuaqtumik inikhauyuq talvaniitaami. Hilaqyuami ayuiqhajutiqaqhuga munaqhiuyaamni, ihivriuqhijut munaqhiqaqvikmik ikpigiyara naamainaqniraqhugu inikhaq. Munaqhiqaqvik ihuaqhaqniga ajikutaqagituq ihuaqhunilu qanuriniganik ikayuutikhat ihariagiyauyut nakuuyumi nunagiyauyumi. Pipkainiganik qanurinigani aaniaqtunik munaqhijutit atuqtut ajikutaa Zimababwe-miut ajikutaa, ilautiaqvigiliqtara qanuqliqaa ikayuutit atuqtitauniginik qilamik. Una taiyauyuq niuvigakhani pigiarutimik munaqhiqaqvikmi inikhami, ila hunaliqaa ihariagiyat talvani inigiyauyumi atuqtauniganik talvanilu igluuqpakmi atautimi. Hulijutit ajikiiktut, uqauhiq kihiani piqaqniginiklu ilaginik atuqtauginaqtut aanairutit. Agilrami munaqhiuyaamik, piqaqtuq amigaijuaqtunik ilitaktanik nunagiyauyumik, atuqtuayunik kagiqhipkaijutiniklu aaniaqtunik munarijutinik. Quviahuktuga piqaqmat agiyumik ikayuutikhamik tamainit aalatqiini kavamani quliriinit ikayuriagani uumani.
Akhaluutituqhuga nunagiyauyumi pulaaqhugilu atuni agilrariyauyuq, atauhiq takuukhautiaqtuq inuuqatiriitiaqnikmik atauhiqmi ikayuqtiriigutinilu. Una ilagiinit pijutiqaqtuq nunagiyauyuq kinaluliqaa qauyimayuq tamainik inuknik. Hivuliqmi, hagutilugit pulaaqtaqhutit, ihumayutit qanuq itqaumaniaqmagaa igluut nahautainik ila qanuq igluut napaqtiqtauniginik nunagiyauyumi. Kihiani ilinariqtuga uqauhirigukni inuup atia, ikayuqturumainaqtut inuit tikuaqtuiyaagani turaaqvikhaqnik iglumut. Nunagiyauyuq qauyimaliavaktuq atiriyaqni ilauniriyaqniklu nunagiyamikni ilranaitutiklu haluuqpakhutik hilami takugaagamitit tatqaani.
Una nunagiyauyuq agunahuaqtinit iqalukhiuqtinilu, takuukhauyuq uumayut amiinik nivigayunik hilami paniqhiqtunik igilraalu igahimaitut Iqalukpiit tuktuulu niriyakhani. “Niriguuk uuhimaitumik, uunayaarutiginiaqtat” uqauhiuyut tuhaqhauyut qaitquijutauyuq niriqatauyaaqni. Niqikhat tamainit niriyauvaktut agilramikni ukunanilu nunagiyauyumi inuknit. Ilariit kituliqaa kaaktitauyuitut. Uumayut pipkaiyut ihariagiyauyunik niqikhanik ila niqainaqnik amiiniklu, atuqtauyunik aumayaaqnaqtunik aanuriaaqariagani taimainigani iijiraalukmi hilaqaqnigani. Amigaitut aqnat miqhuyuktut hanatuqniqtut pualunik, kamiknik, amaarutinik, atigikhaniklu. Tamaita ukua atuqniqatiaqtut!
Iniqtirijutimi, Nunavut ihariahuktut munaqhinik agiyunik uumatiqaqtunik, ilitumainaqtunik, ilihariamilu atuliriagani ilitquhiqmi atuqtunik. Atuqluaqtuq ikayuqturiagani aaniaqtut ihiupkagilugulu una havauhiriyumayat. Ikayuqtuqniq nunani ikayuutauniaqmat agiklivaaliriagani nunagiyauyut ihuaqhivaaliriaganilu inuujuhiuyut. Kinaliqaa ilautquyauyuq atuquiyaagani aulapkakvikhaqaqlugulu aalaguqniginik aaniaqtailiqniqmi havaqatiriiklutiklu pipkaiyaagani qahaktunik, akituvalaagitunik aaniaqtunik munaqhijutinik Nunavumi nungiyauyunut.