Inuit Pitquhiitnik Hulidjutikhat (ICSP) Maniqqami Tangmaarviit
Inuit Pitquhiitigut Ajuittiarutikharnik Pinahuarut (ICSP) havaqatiginiaqtait inirnikhat, nunalaani anguniaqtiujut Itiqtauviitlu havaktiit tunijaangat maniqqami-aullaaqhutik hulilukaarutikhainik ihuinaaqhimajut, ilaujut anguniarnirmik hukkut aullavikhanik, iqalukhiurnirmik, tangmaarvikhanik, amijainirmiklu. Havagviat tunivakturlu pitquhikkut ihuaqtunik pinahuarutinik arnanun inulrammiirnunlu ihuinaaqhimajunun uvani Nunavunmi Arnat Itiqtauvianni uvanilu Isumaqsunngittukuvik Inuulrammiit Ihuinaaqtut Itiqtauviat.
Inirnirit itiqtauviit ukualu itiqtauhimajut aulaarviuvaktut tunihijut munaqhidjutikhainik, munariblugit ihuinaaqhimajut apiqhuqtauhimajut itiqtauvingnut ilijauhimajut utaqiuqtulluuniin apirhuqtaujaamingnik kuatirvikhamingnik. Maniqqami Aullaarviuvaktut tunijaublutik pitquhikkut mamihainirmik maniqqami ajuiqhaqtitaublutik ukiuraalungmi.
Iqalungni Inuit Pitquhiitigut Ajuiqhautit Pinahuarutit havaqatigivaktait ihuinaaqtut pivalliajaangini uvalu iliharlutik pitquhikkut ajuiqtakhamingnik uvalu havakhutik hunaliuqhutik imaatun qamutiik, ulu, naulaaq uvalu apuhiunmik havaliurnirmik. Itiqtauhimajut ilihaqtitauvaktut nutaanik imaalu pitquhikkutlu qiniqhianirmik aullaarutikhanik, annakhimanikkut ajuiqtakhainik, anguniarnirmik nirjutinik huradjanik qanuqtullu amiijainirmik qanuqtutlu atuqpauhiinik amirnik. Inuuhirmun ajuiqtakhait ilaujut ilihaqtitijut itiqtauhimajunik ilamingnik uvalu munaqhinirmik nutaqqamingnik. Miqhurnikkut pinahuarutit hailihimajurlu piqalirupta Inuinnarnik havaktikhanik hailihimajunik ilihaudjijukhanik pinahuarutimik arnanun angutinunlu ihuinaaqhimajunun.
Havagviat Maligaliqijikkut quviahukpiaktut uumani pinahuarutimi, aallangajuq Nunavunmut.