COVID-19 Qalagjuarnikkut GN-kunnin Nutaamik Tuhaqtidjutaa - Januali 5, 2021

COVID-19 Qalagjuarnikkut GN-kunnin Nutaamik Tuhaqtidjutaa - Januali 5, 2021

Hivuliqtiup nutaaq-tuhaqtitakhaa:

Ublaakkut. Nakuujumik unaguiqhiqpagungnarhijuhi qajangnaittumiklu haalatiimik.

Ublumi, piqangittuq nutaanik aannialaqidjutinik COVID-19 Qalagjuarnirnikkut Nunavunmi, tukilik aulahimangittugun 0-mi aannialaqihimajunik. Atauttimun amigaitilaangit inuit munarijaujut ublumimun 5738ngjut. 431 inuit tadja munarijaujun. 265 Nunavummiut tadja nakuuhijut aannialaqidjunmit.

Inngumajunga unniutiliraffi tallimat (5) Nunavunmiutat huiqhimaliqtun COVID-19 Qalagjuarnirmin. Hitamat taapkunani inungni pihimajaa aannialaquti Hivuraani Kanadami, piniarungnarhijuqlu huirutait titiraqtauniaqtun tahapkunani nunani.

Pidjutigiplugu Nunavut Kavamanga, tujuqtatka nagligiqpiarutivun hakugigutikhallu ilainnun, ilannainnun nunallaanginnullu. Una aannialaquti naglighaarutaujuq piqpiarutaujuqlu - hugingittuq kinaujaakharnik hulijaarharniklu. Taimaatun apirivaktavun tamaita maliquplugin inungnun aanniaqtailinikkut qanuriliurutikhat ubluq tamaat. Uarlugin algatin. Atimaluni matumik. Inungnin ahiqpaatpaklutin. Aihimalutin aannialaqiliqtutun iliguvin. Ilvin tamaillu haningni qajagilugin.

Tadjagu, Dr. Patterson ilitturipkarniaqtaa Nunavutim kapuutikhakkut tuniurhainikkut hivunikhaa. Utaqqitqujagin havaktilluta talvunga kapurhidjutikhanun amigaitqijaujunun inungnun pittaarutikkut. Amigaitpiaqtun havagutikhat ilaujun, utaqqijukhaujugullu naamajukhanik kapuutikhanik pijaami tamainnun inirninun nunallaaniittuni.

Iqaumaluhi kapuutikhat maligaungittuq, kihimi qajangnaittuq nakuujuqlu, taimaalu nakuutqijaujuq ikajuutikhaqput talvunga COVID-19 Qalagjuarnirmun. Nakuutqijaujuq pijaami ilingnun taapkununga pilimaittunun. Una piujuq nunallaakkut tamainnullu atauttikkut aanniaqtailidjutinun.

Quviahugitti Nutaami Ukiumi; pipkaqtillaqqut 2021 nakuuqppiarutimun. Nunavut, nakuuqpiaqtumik havaktutin akiraqtuqhugu COVID-19 Qalagjuarniq ublumimun, kihimi hiamitihimaniq nutqalaangittuq. Havaqatigiikhimmaaqta pipkainikkut nunakput aanniaqtailinikkut qajangnainnikkullu.

Atanilluaq Inungnun Aanniaqtailinikkut Havaktimin nutaaq tuhaqtitakhaa:

Ublaakkut,

Ippakhaani, Nunavut pijuq hivulliqpaanik kapuutikhanik tujuutinik. Tissaipa 30mi, 3000 havauhiqtuutikhat uumani Moderna kapuutikhani tujuqtaujun Iqalungnun ukuallu aallat 3000 Kangiqlinirmun.  Una angijuq naunaitkutit talvani Nunavutip Apqutikhaani unalu quviahuutigijaqqut. Havauhikkut kapuqtirutikhat pijun ihumangnik, kihimi akhuurhaqtatka amigaittuni Nunavunmiut pijaaqtun kapurhiquplugin. Tadja nakuutqijaujuq hapummidjutikhaq Nunavunmiut pijaaqtaa uumannga COVID-19 Qalagjuarnirmin. 

Una Moderna kapuutikhaq pitquihimajuq malruuknik kapivikhanik naliinnik 28ni 30niluunniit ubluni qaangiqhimajunik hivulliqpaamin. Hivuliqpaat 6000 havauhiqtuutikhat kapuutikhani pipkaqtinniaqtaatigun kapurlugin 3,000 Nunavunmiut. Una pipkainiaqtuq ihagiajijajun havauhiqtuutikhat hailihimajun taimaatun tukliit tujuqtaujukhat kapuutikhanik niriuktaujun qakugu uumani tatqiqhiutimi, kinguvaqtitpata. 

Kapurhiqtuitinikkut parnaqutikput atautikkuuqtittijun turaanganunik kapurutikhanik ukunanilu nunallaami-tamaat kapuqtaujariaqtuqvikhanik.  Turaanganun kapurutikhat pipkainiaqtun munarhinik upautilutik Inirnikhat munariviinnun kapuqtuijaami, taimaalu nunallaani kapuqtaujariaqtuqvikhat pipkaqtauniaqtuqn naliinnik upautiluni kapuqtauvingnun talvuunaluunniit ublukhaliuqhimajunun upaktakhakkut pidjutaani nunallaap. Hivulliqpaat havaktiujun havaktun Inirnikhat munarivingni kapuqtauniaqtullu. Munarhiit munarhitkunnin ikajuqtaulutik havaktinin kaantraakkut munarhinik kapurhivangniaqtun. 

Havauhikkut kapuutikhat aullaqtirniaqtuq uumani havainirmi uvani Inirnikat munarivianni Iqalungni, Januali 6simi. 

Havainirmi Januali 11mi, ublukhaliuqhimajuni-tunnganiqaqtukkut nunallaani-tamaat havauhikkut kapuutikhakkut kapurvighat ukuallu turaangajun kapurvighat Inirnikhat munariviinni aullaqtirniaqtuq Uqhuqtuumi, Iglulingmi, Arviani Iqaluktuuttiamilu. Uqhuqtuuq Igluliklu ihuaqhaqtauhimajun Januali 11mun 12mullu. Arviat ihuaqhaqtauhimajuq Januali 14min 18mun pilimaittuq Sundaymi. Iqaluktuttiaq piniaqtuq Januali 14min 16mun. Nunallaamiutat taapkunani nunallaani aprijaujun hivajaqujauplutik munarhitkunnun piliuriamik kapurhiriaqtuqvighamik.

Arviat ublukhait taimaittuq taimaatun munarhiit havaktun kapurhiriaqtuqvighani avaliinngaaqtukhaujukhauliqqata 14nun ublunik aullaarumik talvannga hiamitirnirmin COVID-19 Qalagjuarnirmin. 

Nunallaani-tamaat kupurhiriaqtuqvikhat amigaittuni piniaqtun igluqpani imatun iliharviit ulapqiviinni nunallanilu katimaviinni, piqarluni maliqujaujunik pipkainikkut inungnin ahiqpaniinnirnik, ihuaqtumik aturutinik matunik aallaniklu PPE-nik pimmarighaqtauhimajuniklu halummarhinikkut maliktakhanik. Munarhitkunni havaktiit havaqatigijait nunallaani paannarijait Uqhuqtuumi, Iglulingmi, Arviani Iqaluktuuttiamilu pipkainikkut maliktakhaqt atuqtauninginnik. 

Aallallu kapurhiriaqtuqvikhat piniaqtun tunnganiqarlutik amigaitilaanginnik kapuutikhanik piniaqtaptiknik hivunikhani kavamatuqatkunnin tujuutainnin ukunanilu avaliiqtauhimajuni kapuutikhanik taapkunannga hivuagun kapuqtaivagvingnin. Nunavut pihimajukhat naamajunik kapuutikhanik tadjamin talvungalu nungulvighaanun March kapuriamik 75%mik inirniinnik, imaakiaq 19,000nik inungnik. 

Ilihimajunga ihumaaluutiqaqpakhimajuq kapuutikkut, kihimi unniutijumajatka tamaita qajangnaittuq, mRNA kapuutit, imaatun Moderna, havaktauhimavaktun avatquhimajunik 20nik ukiuni. Aanniarvingni uuktuutit Moderna-muinnarmun pihimajuq 30,000 ilaujunik taapkunanga aallakkiiktunin inugiangnirnik qanurittunin, ilaujullu Inirnikhat taapkuallu piqariiqhimajunik aanniarutinik qanurittunik. Pipkalimaittaatin COVID-19 Qalagjuarnirmik taapkuallu hulaqutit pidjutit taimaittun niriuqtauvaktun aallanin qujaginnarnin kapuutinin. Hapiruvin pijaakharnik kapuutimik, uqaqtigidjavan munarhitkut uqautdjutikhainnun. 

Kapuutikhak 94%mik nakuuniqaqtuq aannialaqingittaami COVID-19 Qalagjuarnirmik pipkailittaidjutimiklu qajangnaqtunik aannialaqidjutinik talvannga COVID-19 Qalagjuarnirmin. 

Tadja, Moderna kapuutikhaq angiqtauhimangittuq kitkunnun ataani ukiulgit 18nik kihimi aanniarvingni uuktuutit havaktauliqtun.  Nunavunmiutat ilitturipkarhimaniaqtavun qujaginnaq nutaanik kapuutikhanik pivallialiurutainnik tikittukhani havainirni tatqiqhiutinilu.  Allanik ilitturpkaidjutikhanik mighaagun kapuutikhanik pijukhaniklu kapuriaqtuqvikhanik, takulugu Nunavut Kavamanga qaritaujakkuurutaa takulugulu aanniaqtailinikkut havagviani COVID-19 Qalagjuarnirmun kapuutikkut tautukvighaa. Ukununga kapuutikkut ilitturipkaidjutikhakkut, Nunavunmiut hivajaqtaaqtaa COVID-19 Qalagjuarnirmun hivajautaa pilugulu pijutikhaq uqaqatigijaami munarhimun. 

Uqautigijumajatkalu hivumuunia nunakput pijuq qaangiqhimajuni havainirni nutqaqtinniarhimanikkut hiamitirnianik COVID-19 Qalagjuarnimik. Talvannga Tissaipa 30min, hiamitirniq Kangiqlinirmi nunguttuq taapkuallu kiklikhaqarutit ajurnaivjaktun. Taimaatun hiamitirniit Tikirarjuarmi Arvianilu huli aulajun, tadja piqangittugun aulahimajunik aannialaqihimajunik. Akhuuqtatkat tamaita Nunavunmiutat malikhimmaaquplugin inungnun aanniaqtailinikkut maliktakhat ikajuutijun uvaptiknik aulapkainikkut amigaitilaanginnik qanuriliuqtun ihuaqtumi hivulliurutimi.  

Kingullikkut, ilitarijumajatka tamaita inuit Nunavut Kavamangani taimaatun Haalatiirutikkut Umikhimavangnirmik havakpaktun pipkainikkut qajangnaittumik tunihimanikkut tutquumanikkullu kapuutikhanik, ihuarhaiplutik kapuriaqtuqvikhanik, munariplugin aularaanginnaqtun hiamitirniit taimaalu pipkainikkut tamaita ilitturipkaqtauhimajun. Quana. 

Ilaupluni Nunavut Kavamanga (GN) havagutainnik hapumminikkut Nunavunmiunnik talvannga qajangnarnirmin COVID-19 qalagjuarnirmin, GN-kunni Havakviit atuqtipkaliqtait hapkuat:

Aanniaqtailinikkut Havagvia

Tamainnun nutaanik naunaitkutinik atuqtakhaniklu talvuuna COVID-19 qalagjuarniq Nunavunmi, takulugu una: https://www.gov.nu.ca/health/information/covid-19-novel-coronavirus

Nutangutqijanik naunaitkutikharnik tadja inungnut aanniaqtailinikkut kikliqaqtunun, takulugu una: https://www.gov.nu.ca/health/information/nunavuts-path

Pijukhat Nunallaani Kapuutikkut Kapuriaqtuqvikhat

Inirnikhanun Igluqpak munarhiliqinikkut nunallaani turaanganiaqtut munarhiliqiviuniaqtuq ukuat munarhitkunni havaktiit tahamungaulutik kapurhijaamingni. Munarhitkunnin havaktiit uqaqatiginiaqtait Inirnikhat igluqpait ukununga kapurvighakkut ubluqhiutikhainni ublukhainnilu.

Iqalungni Inirnikhat Najurvia

• Humi: Inirnikhat Najurviani.
• Ublua (Hivulliqpaaq Kapuqtauvia): Januali 6.
• Ublua (Tukliq Kapuqtauvia): Fibjuali 3.

Iglulikmi amigaittunun kapurhiriaqtuqvik

• Humi:  Igloolik Angajukhiit Iliharvia.
• Ublua (Hivulliqpaaq Kapuqtauvia): Januali 11, 12lu. 
• Ublua (Tukliq Kapuqtauvia) Fibjuali 8-9. 
• Ubluqhiutaa: 8:30 ublaami 9mun unnukpa.
• Kapurhiriaqtuqvikhaq Qanurittuq: ublukhaliuqhimajukkut.
• Hivayarlugu 867-934-2100.

Uqhuqtuumi amigaittunun kapurhiriaqtuqvik

• Humi: Qiqirtak Angajukhiinnun Iliharvik. 
• Ublua (Hivulliqpaaq Kapuqtauvia): Januali 11, 12lu.
• Ublua (Tukliq Kapuqtauvia) Fibjuali 8-9.
• Ubluqhiutaa: 8:30 ublaami 9mun unnukpa.
• Kapurhiriaqtuqvikhaq Qanurittuq: ublukhaliuqhimajukkut.
• Hivayarlugu 867-360-7441.

Arviani amigaittunun kapurhiriaqtuqvik

• Humi: Qitiqliq Iliharvik.
• Ublua (Hivulliqpaaq Kapuqtauvia): Januali 14min 18mun (pilimaittuq Sundaymi). 
• Ublua (Tukliq Kapuqtauvia) Fibjuali 11-15.
• Ubluqhiutaa: 8:30 ublaami – 9 ubluummaat.
• Kapurhiriaqtuqvikhaq Qanurittuq: ublukhaliuqhimajukkut.
• Hivayarlugu 867-850-3100

Iqaluktuttiami amigaittunun kapurhiriaqtuqvik

• Humi: pivikhaq ihumaliuqtaujukhaq
• Ublua (Hivulliqpaaq Kapuqtauvia): Januali 14min 16mun (tamaat).
• Ublua (Tukliq Kapuqtauvia): Fibjuali 11-13.
• Ubluqhiutaa: 8:30 ublaami – 9 ubluummaat.
• Kapurhiriaqtuqvikhaq Qanurittuq: ublukhaliuqhimajukkut.
• Hivayalugu 867-983-4500.

COVID-19 qalagjuarniq aannialiqtut qanurinniit: Jan. 5

COVID-19 qalagjuarniq nunallaani aanniaqtut qaffiutilangit: Jan. 5

Qaujihaqtaujut qaffiujut ublumimut nunallami: Jan. 5

Avaliingaqtut inugiangningit: 

Aullaqhimajun utiqtun naunaijautaa:

Ihariagijauqpiaqtuni Havaktini Tukhirutin:

Talvannga Jan.5min, pilik 10623 tukhirutinik, 5075ngujun ihariagijauqpiaqtuni havaktini tukhirutinik.

Ilinniaqtuliqijikkut Havagvia

K-12 Iliharviit

Talvannga Hivulliunmin, Januali 4, 2021, iliharviit nunallaani titiraqhimajuni ataani nuutirniaqtun hapkununga qanurinninginnun:

• Tikirarjuaq - Qanurinninga 4.
• Rankin Inlet – Qanurinninga 2.

Arviani iliharviit aulahimajun talvani Qanurinninga 4mi. Tamaita aallat Nunavunmi iliharviit talvaniittun Qanurininga 2mi.

Nutaanik ilitturpkaidjutinik nunallaani qanurinninginni takujauttaaqtuq uvani Ilinniaqtuliqijikkut Havagviani qaritaujakkuurutaani: https://gov.nu.ca/education/information/2020-21-opening-plan-nunavut-sc….

Qanurinninga 4 – Tikirarjuaq

• Talvannga Hivulliunmin, Januali 4, 2021, Inugiak Iliharvik Tikirarjuami atuqtipkalirniaqtuaa una Qanurinningani 4mi hulijakhakkut hivunikhaq.
• Inugiak Iliharvik Tikirarjuarmi umikhimahimmaarniaqtuq tuhaatinngagin uumannga Atanilluaq Inungnun Aanniaqtailinikkut Havaktimin.
• Tamaita iliharutikhat Tikirarjuami havaktauniaqtut ungahiktukkut.
• Ilihaijiit iliharvingmilu havaktiit hivajaqattarniaqtait ilihaqtun ilaillu qakugunguhagaangat.

Qanurinninga 2 – Kangiqliniq

• Talvannga Hivulliunmin, Januali 4, 2021, nukarhiinnun iliharviinni Kangiqlinirmi angmarniaqtun ubluq-tamaat, tallimani ubluni havainirmi.
• Talvannga Hivulliunmin, Januali 4, 2021, akulliinnun angajukhiinnullu iliharviit Kangiqlinirmi piqarniaqtun naliinnik iliharvingmiittukkut ungahiktukkulluunniit iliharutinik. Ilihaqtun ilihariaqturniaqtuq 2-3 ubluni atauhirmi havainirmi. Naunaijarhimajun ublukhait ihumaliuqtauniaqtun tamainni iliharvingni Qanuriningani 2mi hulijukhakkut hivunikhami.

Ilihalihaaqtunun Iliharviit Nutaqqiqiviillu

Nutaqqiqiviit Tikirarjuami Arvianilu pitqujauhimajun umikhimahimmaarlutik uumannga Atanilluaq Inungnun Aanniaqtailinikkut Havaktimin.
Uqautainnin Atanilluaq Inungnun Aanniaqtailinikkut Havaktimin, nutaqqiqiviit tamainni Nunauvnmi nunallaani, kihiani Tikirarjuami Arviamilu, angmaqtaaqtun ataani tadja aanniaqtailinikkut aanniqtailinikkullu maligutainni qanuriliurutainnilu.

Nunavunmiutat aanniaqtailidjutait atauttikkut munaridjutigijavun! Itqaumaluhi: uarlugin algatin qaangillu hunani, inungnin ahiqpaniitpaklutit, tuhaalugin uqaudjutait aanniaqtailinikkut havaktinin, aihimalutillu aanniaruvin.