GNkut unalu Sakku Investments sainiqtuk aulapkaijaami una Kivallirmi Akuniraaluk Munarivik
Kangiqliqniq, Nunavut (May 1, 2024) – Ublumi Nunavut Kavamanga (GN) ilauqatigijaa Sakku Investments Corporation, pivallianikkut havagvia uumani Kivallirmi Inuit Katimajiinni, unalu paannarijaa Embassy West Senior Living (Inirnikhani Najurvia) aliahuutigiplugu sainiutaa uvani qulini-ukiuqaqtumi aulapkaijaami nutaaq Kivallirmi Akuniraaluk Munarivik Kangiqlinirmi.
Hivulliqpaami Nunavutim inniani, piqarnialiqtuq qanurittuujumik-tallimamik hivituniqaqtumik munarivingmik aulapkaqtitauliqtukhamik nunaptingni. Una quulliqpaaq munarvikhaq ikajuqtait Inirnikhat ukunani angijuni aanniaqtailinirmun ihariagijainnun, ilaujullu ihumagliliqtun, pipkainikkut taapkuat ajuqhaqtun pijaanginni ihariagijaujuni munaridjutinik nunaptingni. Una 24nik-igliqaqtuq havagutijaujuq iliurarnirnun Inuit pitquhikkut havagutainnik pinahuarutimingni, ilaujullu hailihimapkaiplutik niqainnarnik, pitquhikkut huliluqaarutinik, uqauhikkut aturutinik, pipkainikkullu tamaita pidjutait munaridjutikkut ihumagittiaqtait Inuit itquhiit.
“Sainiutaa uumani kaantraakmi naunaiqtaa aullaqtirnianik nakuuqpiaqtunik munaridjutikhanik uvani hivituniqaqtumik munarivingmik Kangiqlinirmi angijuqlu havaguti pittaarutiptingni pipkainirnun inirninguliqtuni ihumagittiarutikkut piqpiarutimik,” uqaqtuq Minisgta Aanniaqtailinirmun John Main. “Quviahuktunga uqarhugin Sakku Investments Corporation unalu Embassy West Senior Living paannariiktukkut tuniudjutimi munaridjutikhanik Nunavunmin inirnikhanun nunaptingni.”
“Sakku quviahuktuq pigami uuktuqvikhamik ilaupkainikkut nakuuqpiaqtunik munaridjutikhanik ikajuutiqaqhuni Inuinnarnin Inirnikhanin, ilaujullu niqainnarnik, uqaqatigiigutinik Inuktitut, pitquhikkut katimadjutinik, ukunani aliagijaimangni hulilukaarutinik,” uqaqtuq Sakku Investments Corporation Atanngujaq David Kakuktinniq.
Nappaqtirnia igluqpakhami GNkunnin havaktaujuq iniqtaujukhaqlu nunguliqqat aujaq 2024mi. Atuqtipkailirnia pihungujuq, piniaqtuq imaakiaq pingahuni tatqiqhiutini. Una pipkaijuq iliurarutainnik havaktini aulapkaidjutainnik, havakhuni aulapkaidjutikhakkkut upalungaijarnirnik naunaijarnirnik igluqpaut piutainnik hanalrutainniklu, taimaa pipkainirmun qajangnaittukkhakkut ilaulirutikhainnun Inirnikhaptingnun.