Uqauhirmut Quviahuutiqarniq 2024
Qitiqqautijuq una Uqausirmut Quviasuutiqarniq tatqiqhiutaa, quviahuutaa Inuktut uqauhinganun pitquhianullu Nunavunmi!
Inuktut ilihautaa iniqaqtuq tamainnut inungnun. Atauhirmik uqauhiqaraluarlutit inirniqhaanguvlutit ilihalihaaqtutinluuniin hivullirmik Inuktut tainiinik, quviahuutigiqujaffi Inuktut uqauhianik pitquhirlu piqatigiluta uvani tatqiqhiunmi tamainilu ukiuni!
Uvani ukiumi pidjutigijaat "nattiq". Nattiq akhut ikajuutauhimajuq Inuinnaujunun taimaa thousands-ni ukiuni. Nirijuminaktuq niqiqhaq miqhuqtauvlunilu pinniqtunun ihuaqtumik aturianginullu aannuraanun. Ihuaqtumik anguniarut atuqhimmaaqtaat ikajuutigivlugu hakugikhijuumiutauvlunilu pitquhirmun, ilitquhiq, inmikkullu pittaarutikhainun.
Uumani ukiungani, Pitquhiliqijitkut piliuliqtait inungnun ikajuutikhat naunaiqhugu ajurnaktun tainiit ajuiqhimajaillu pihimajunun nattiqhiurnikkut hanaqidjutainullu.
Tautuktittiniaqtun talvani Astro Theatre Iqalungni hanaqidjutainun nattiit amiinik; ajuiqhimajait aallanullu ajuiqhautigivlugu inuuhiudjutimi aallanun pivlugu naunairniaqtaillu pingahut nunallaat, Iqaluit, Kimmirut, Kinngainilu. Tautuktittiniaqtun ukunani ubluni Qitiqqautijuq 8, 10, 12, 16, 18, 19, 22, 24, 26-milu, angmaniaqtun ublaami akun’ngani 9:00-mit 12:00-mun ublaami, unalu ubluummaami akun’ngani 1:30-mit 4:30-mut.
Astro Theatre Ihivriuqhiniq: (Talvunga 3 ikaakninik)
- Mirco Naittumik Piksassuuliurhimajuq – Kamiik Takupkaqtitaujut – Ilangani 1 uumannga 4
- Qun'ngiararhaq Piksassuq – Ilangani 1 haffuma 3
Naittut iluaniittut nutqangallaktut
- Mirco Naittumik Piksassuuliurhimajuq – Kamiik Takupkaqtitaujut – Ilangani 2 uumannga 4
- Qun'ngiararhaq Piksassuq – Ilangani 2 haffuma 3
- Mirco Naittumik Piksassuuliurhimajuq – Kamiik Takupkaqtitaujut – Ilangani 3 uumannga 4
Naittut iluaniittut nutqangallaktut
- Mirco Naittumik Piksassuuliurhimajuq – Kamiik Takupkaqtitaujut – Ilangani 4 uumannga 4
- Qun'ngiararhaq Piksassuq – Ilangani 3 haffuma 3
Iqalungni Ihivriudjutikhangit: Qitiqqautiyuq 8, 18, &26, 2024
KimmirutMi Ihivrudjutikhangit: Qitiqqautiyuq 10, 19, &22, 2024
Kinngait Ihivriudjutikhangit: Qitiqqautiyuq 12, 16, &24, 2024
Nattirmin-pihimajun nirijakhat piniaqtait taktakhaniklu tunihilutik. Piksaliurviqarniaqtullu, upautijullu qaitqujait atimalutik pinniqtunik “Pinniqpiaktunik Tautuktitaujakhanik, Nattirmik Aannuraanik”. Upautihimajuq nakuutqijamik piksaliuqhimajuq akimaniaqtuq taktakhamik.
“Pitquhiliqijitkut aliahuktun tautuktittinahuaqhutik aallatqiinik ilihaidjutikhanun hanaqidjutikhat naunaiqtittumajugu nakuuqpiaktuq piukpun Inuktut uqauhiq. Uumani ukiungani ihumagijaat 'Nattiq', nattiq, naunaitkutigijaqqun havaktauniaqtamun tammaqtaililugu pikpun nakuuqpiaktuq ilitquhiq. Akhut aliahuutigijara tamainnin havaqatigiigutaat akhuurutigivlugu uumunga quviahuutimun pittaariamun niriurutigivlugu naunaittuq pidjutaa Nunavunmiutanun.” – Nan’ngarijaujuq Minista Daniel Qavvik.
Talvani pitillugin Uqausirmut Quviasuutiqarniq tamaat ukiunganilu, pitqujavut inuit tamaat uqarlutik Inuktut ilamingnun, ilannamingnun, havaqatigijamingnullu ilihautigilugu inmik uqauhikkut ajuiqhimajamingnik. Aturaangapta uqaqhuta Inuktut, ikajuqpaktugun uqauhiptiknik pitquhiptikniklu hakugingninginnun.
Havagviat Ilinniaqtuliqijitkut
Ilihimavit Ilinniaqtuliqiyitkut havaktait avatqumayut 700nik ilihaqtut makpiraanginiklu ilihaiyillu ikayuutighait Inukitut, naamavyakturlu 500 ilihaqtut makpiraaghait ilihaillu ikayuutighait Inuinnaqtun?
Angirrami Ilinniarniq (www.angirrami.com) qaritauyami ilihaidjutinun ikayuutikhat ilagiingnun munaqhiyununlu ikayuutikhat nutaqamingnun ilihaidjutikhait aihimavingmingni, inmi uqauhiitigut. Piqaqtuq amigaitunik Inuktut, Qablunaatun, Uiviititunlu ikayuutikhanik talvaniqartiauyaliqidjutmi, ilauyut makpiraat, nipiliuqhimayut makpiraat, piksasiuliuqhimayut, ayungnaitut iliharnirmun hulidjutit, uqauhikullu iliuraqhimayut.
Uqausiit Pinnguarutiit unalu Titirariuqsauti alianaqtut, ilaulukaaqatigiikhutik Inuit uqauhiitigut iliuraqhimayut havaktauhimayut hapkunanga Ilinniaqtuliqiitkunin tapkua iliturhaidjutit atuqtunun Inuit uqauhiitigut tainiinik qaniuyaqpait. Hapkua qaritauyakviliqiyauyut iliurainarialgit akiitumik talvanga Apple unalu Google Play qaritauyakviliqiyauyut situanit.
Talvanga uqauhirnik katimaviani, atuqtukharnik taiguarvingit, angajuqqaangit nutarannuat katimayut, Nutarannuat Ilihalihaaqtut ilihautikhait Inuit uqauhiit Pitquhirniklu maniktaqvikhangit atuquhimaaqtun Inuktut ilihimayainiklu Inuit pitquhingit nutaqqanun ukiulgit 0mi 6mun.
Havagviat Ilinniaqtuliqijikkut tunihimaaqtun maniktaqvikharnik talvunga Ilitaqsiniq (Nunavunmi Taiguarnikkut Katimayiit) ikayugianganik auladjutikharnik iningninun taiguarnikkut titirarnikkullu ilihairutingnik. Ilitaqsiniq ilihairutit ilauyut ayuittiarutikharnik pivalliadjutikharnik naunairutiqaqhimayut tamanganik pitquhingnik ublumimunlu atuqtunik pitquhiliqinikkut aulahimayunik ilihairutingnik. Talvanga niqiliri (pitquhikkut igani uuktuqhimaaqtukharnik), talvunga amausiuqtitsiniq (amautinik miqhungniq), mikiunik ingniqutingnik ihuaqhaidjutikharnik, unalu qamusiurniq (aallialiurniq), allatqiinguyut ayuiqhautikharnik havagiikhimayut inuuhirnik atuqtaunginaqtuni ukiuktaqtumi.
Iliturittiarumavin? Hamungaulutit: https://gov.nu.ca/education.
Havaktuliriiyitkut
Ilaudjutigiplugu Piliriqatigiinniq/ikayuqtigiinniq – havaqatigiittiarnirmun hunamut, Nunavut Kavamanga (GN) aqhuungniaqhimayut ikayurniatigut havaktiit aturniatigut Inuktut Uqauhiat atuqtauluni uqauhik havagviinni.
Taamna Inuktut Uqauhia Atuinnarnahuaqunirmun Pivinga pitquyut havaktiinnut atuqlugu amigaiqyuummiklugitlu Inuktut uqauhiat aturnia havagviinni.
Ayuittiaqhanirmun ilihaiviqhat piinnariaqaqtainlu Inuktut GN kunni havaktiinnut. Talvunggaulutin GN Ilihaiviqhanut Tatqiqhiutaa takuyaami hivuni ilihaqtitauniaqhimayainnik.
Tunihiinnariaqaqtan havagpaqhimayarnik titiqqaanik ikayuutiqhamiklu titiraqhimayarnik Havaktuliriiyitkunnut’ havagtiqhaqhiuqtut havagviannut kituni uqauhiit atuqlutin tahapkunanit Nunavutip ilitariyainnik uqauhiitnit. Havagvia pitquyuq aturniatigut Inuktut talvalluarmi pidjutilluni Uqausirmut Quviasuutiqarniq, Inuktut Uqauhikkut Tatqiqhiutaanni.
Inirniqhaat uqaqtiullualiqpaktut (uqaqtiqaqhutik) pidjutillutik havagviup ilihaiviqhainnik.
Nunavunmiut, aqhuuqhaiqluta atuqlugu ubluq tamaat Inuktut.
Department of Community and Government Services
Inuinnaqtun piinarialaqiyuq uvani Microsoft Numiktirviniktuq
Talvuuna havaqatigiirnikkut Microsoftkut GN-kungitlu Havagviangit Nunalingni Kavamatkunillu Pivikhaqautikkut Pitquhiliqiyitkutlu, quviahuktugut tuhaqtitiyaangat quvianaqtunik atuqtakharnik Inuktut uqauhirnik talvani Microsoftmi Numiktirutmi.
Inuinnaqtun
Inuktitut Qaliujaaqpait
Inuktitut ihuaryumirninga uqauhirnik atuliqtauyuq
Ukiuk naaliqtuq taima Inuktut pigiaqaliqtiluni talvani Microsoftmi Numirutmi hanalrutikharlu naunaiyagiikhimaliqtuq ayungnaitumik akhurnaqtumik atuguminaqhunilu hanalrutikharnik Nunavunmiunun. Inuktut tautuktitihimaaliqtuq talvani Microsoft Numiktirutmi angmaqtitivakhimayuq pidjutikharnik talvaniinaungitumik havagvingmi kihimi aihimavingmi ubluq tamaatlu inuuhiani. Aihimagaluaqtilutit, havaktilutit ilihaqtilutit, una ikayuutighaq anginirhautauniaqtuq atungniranun Inuktitut tamainun Qaritauyakuurutiqaqtunun, hivayautikkut, qaritauyanuakuluuniin.
Inigiikhimayumik ihuaqtumik auladjutikharnik, pivakhimayugut inungnun kiudjutigiyainik ihumagiplugit iliugaipluta hanaqidjutikhaq malrunguyuq ihuaryumirutikharnik taman hanalrutikhaq. Taima piqaqhuni ihuaryumirutikharnik Inuktitut, kangikhidjutikharniklu uminga Inuktitut Qaliujaaqpait Inuinnaqtunlu, ikayugiaqaliqtugut amigairyumirutikharnik tautungnaqtunik Inuktut uqauhingit avatingni nunaqyuaptingni. Amigaitut Inuktitut uqayuktut atulirumigu tunihiniaqtut uqagahamingnik, amigaitunik numiktirut “iliniaqtuq” angikliyuumirniaqtuq Inuktitut ayuiqhautait.
“Nan'nganaqtuq aulahimaaqtumik ikayuqlugit Kavamatkut Nunavunmi haffumuuna aghuungnaqtumun havaaghamun,” uqaqtuq Kevin Peesker, Angiyuqaangat hapkua Microsoft Kanadami. “Nutaanguqtiqhimayut haffumunga Inuktitut uqauhianun atugahat, turaangablugit kiudjutit uqautigiyaitigut nunallaat, ilaliutihimayullu Inuinnaqtun hamunga Microsoft Numiktirutaanun pihimaniaqtuq Inuktut aulahimaaqtumik anaktungnira qaiyuni hivuniptingni.”
Taima tamaqtailinikkut Inuktut uqauhiq talvuuna qaritauyaliqinikkut, atuqhimaaquniaqtavut Inuktut pigiaqarlunilu inungnun tamainun. Ikayuutiqaqtun uqauhivut, tamna numiktirutikhaq atugiaqaqtun naunaiyainiaqtuq talvuuna amigaitunik Microsoftnik hanalrutitigun pigiaqarniarturlu Nunavunmiunun ilautitiyaangat una ubluq tamaat inuuhirmini ayungnaitumik. Havakhimaarluhi iliqatigiikhimaarlugit alatqiinguyut atugiangani Inuktut uqauqhi talvani Microsoft Numiktirutmi talvani tuhaqtitihimaarnirmi aturlugu una hashtagnguyuq #Quviasuutiqarniq, Atti!
Kangihittiarumaguvin havaamun, hamungaulutit: https://news.microsoft.com/en-ca/2022/02/01/government-of-nunavut-preser...
Aturiangani una Microsoft numiktirvianun hamungaulutit: www.bing.com/translator. Piqaqturlu uuminga Microsoft numiktirvianun iliuraqtauhimayuq uvunga Androidmun, iOS uvanilu Windowsmun: Apps - Microsoft Numiktirvianun
Ayuiqharlutin qanuq atugianganik Microsoft Numiktirutinga hamungaulutin:
Quyagiumayahi tamapti havaaqhat aituihimaaqpaktunun!
