ᐅᖃᐅᓯᕐᒧᑦ ᖁᕕᐊᓲᑎᖃᕐᓂᖅ 2024
ᐄᐳᕈ ᐅᖃᐅᓯᕐᒧᑦ ᖁᕕᐊᓲᑎᖃᕐᓂᖅ ᑕᖅᑭᕆᔭᖓ, ᖁᕕᐊᓲᑎᖃᕐᓂᖅ ᐃᓄᐃᑦ ᐅᖃᐅᓯᖏᓐᓂᒃ ᐃᓕᖅᑯᓯᖏᓐᓂᒡᓗ ᓄᓇᕗᒻᒥ!
ᐃᓄᒃᑐᑦ ᐃᓕᓐᓂᐊᕐᓂᕐᒧᑦ ᓇᒧᙵᐅᕙᓪᓕᐊᓂᕆᔭᐅᔪᖅ ᐃᓂᖃᖅᐳᖅ ᑭᒃᑯᓕᒫᓄᑦ. ᖃᓪᓗᓇᐅᔭᕈᓐᓇᙱᒃᑲᓗᐊᕈᕕᑦ ᐅᕝᕙᓘᓐᓃᑦ ᓯᕗᓪᓕᖅᐹᒥ ᐅᖃᐅᓯᕐᓂᒃ ᐃᓕᓐᓂᐊᕋᓗᐊᕈᕕᑦ, ᑐᙵᓱᒃᑎᑉᐸᑦᑎᒋᑦ ᖁᕕᐊᓲᑎᖃᕐᓂᐊᕐᓗᓯ ᐃᓄᒃᑐᑦ ᐅᖃᐅᓯᕐᒥᒃ ᐃᓕᖅᑯᓯᑦᑎᓐᓂᒡᓗ ᑕᒪᑐᒪᓂ ᑕᖅᑭᕐᒥ ᐊᕐᕌᒍᓕᒫᕐᓗ.
ᑕᒪᑐᒪᓂ ᐊᕐᕌᒍᒥ ᐱᔾᔪᑕᐅᓂᐊᖅᑐᖅ "ᓇᑦᑎᖅ". ᓇᑦᑎᖅ ᐊᑑᑎᖃᖅᓯᒪᒻᒪᕆᒃᐳᖅ ᐃᓄᖕᓄᑦ ᐊᕐᕌᒍᒐᓵᓗᖕᓄᑦ. ᓂᕿᑦᑎᐊᕙᐅᕗᑦ ᓴᓇᔭᐅᕙᒃᖢᑎᒡᓗ ᐱᐅᒻᒪᕆᒃᑐᓂᒃ ᐊᒻᒪ ᐊᐅᓚᑦᑎᐊᖅᑐᓂᒃ ᐊᓐᓄᕌᓂᒃ. ᑲᔪᓯᐊᖏᓐᓇᖅᑐᒥᒃ ᐊᖑᓇᓱᒃᐸᖕᓂᖅ ᐅᔾᔨᕐᓇᖅᓯᑎᑦᑎᕙᓪᓕᐊᖏᓐᓇᖅᐳᖅ ᓴᙱᒃᑎᒋᐊᖅᑎᑦᑎᕙᒃᖢᓂᓗ ᐃᓕᖅᑯᓯᑐᖃᕐᓂᒃ, ᐊᑐᖅᑕᐅᕙᒃᑐᑐᖃᕐᓂᒃ, ᓇᖕᒥᓂᕐᓗ−ᐱᓕᕆᔪᓐᓇᕐᓂᕐᒥᒃ.
ᑕᒪᑐᒪᓂ ᐊᕐᕌᒍᒥ, ᐃᓕᖅᑯᓯᓕᕆᔨᒃᑯᑦ ᓴᖅᑭᑦᑎᓛᕐᒪᑕ ᐃᓄᖕᓄᑦ ᐃᑲᔫᑎᒃᓴᓂᒃ ᓇᓗᓇᐃᖅᓯᔪᓂᒃ ᐱᔭᕆᑐᔪᓂᒃ ᑕᐃᒎᓯᕐᓂᒃ ᐊᒻᒪ ᐱᔭᕆᑐᔪᓂᒃ ᓴᖅᑭᑉᐸᓪᓕᐊᔪᓂᒃ ᓇᑦᑎᕋᓱᖕᓂᕐᒥᒃ ᐊᒻᒪ ᐱᓕᕆᐊᖑᓯᒪᔪᓂᒃ.
ᐊᔾᔨᐅᙱᑦᑐᑦ ᖃᐅᔨᓴᖅᑕᐅᓛᖅᑐᑦ ᐃᖃᓗᖕᓂ ᑕᕐᕆᔭᕐᕕᖕᒥ ᕿᓯᖕᓂᒃ ᐱᕙᒌᔭᖅᑎᓪᓗᒋᑦ; ᐊᔪᕈᓐᓃᖅᑕᐅᖃᑦᑕᖅᑐᑦ ᑭᖑᕚᕇᓄᑦ ᐊᒻᒪᓗ ᓴᖅᑭᔮᖅᑎᑦᑎᓂᐊᖅᑐᑦ ᐱᖓᓱᓂᒃ ᓄᓇᓕᖕᓂᒃ, ᐃᖃᓗᖕᓂ, ᑭᒻᒥᕈᒻᒥ ᐊᒻᒪᓗ ᑭᙵᕐᓂ. ᖃᐅᔨᓴᖅᑕᐅᖃᑦᑕᓛᖅᑐᑦ ᐄᐳᕈ 8, 10, 12, 16, 18, 19, 22, 24, ᐊᒻᒪ 26- ᒥ, ᒪᒃᐱᖅᓯᒪᓛᖅᖢᑎᒡᓗ ᐅᓪᓛᒃᑯᑦ 9:00-ᒥ ᐅᓪᓛᒃᑯᑦ 12:00-ᒧᑦ ᐅᓐᓄᒃᓴᒃᑯᑦ, ᐊᒻᒪ ᐅᓐᓄᒃᓴᒃᑯᑦ 1:30-ᒥ 4:30-ᒧᑦ ᐅᓐᓄᒃᓴᒃᑯᑦ.
ᑕᕐᕆᔭᕐᕕᖕᒥ ᑕᕐᕆᔭᖅᑎᑦᑎᔪᒃᓴᑦ: (ᐃᑲᕐᕋᓄᑦ ᐱᖓᓱᓄᑦ)
- ᓇᐃᑦᑐᖅ ᑕᕐᕆᔮᒃᓴᖅ – ᑲᒦᒃ ᑕᑯᒃᓴᐅᑎᑦᑎᓂᖅ – ᐃᓚᖓ 1 4−ᖑᓪᓗᑎᒃ
- ᑕᕐᕆᔮᒃᓴᖅ − ᐃᓚᖓ 1 3−ᖑᓪᓗᑎᒃ
ᓄᖅᑲᖓᑲᐃᓐᓇᕐᓂᖅ
- ᓇᐃᑦᑐᖅ ᑕᕐᕆᔮᒃᓴᖅ – ᑲᒦᒃ ᑕᑯᒃᓴᐅᑎᑦᑎᓂᖅ – ᐃᓚᖓ 2 4−ᖑᓪᓗᑎᒃ
- ᑕᕐᕆᔮᒃᓴᖅ − ᐃᓚᖓ 2 3−ᖑᓪᓗᑎᒃ
- ᓇᐃᑦᑐᖅ ᑕᕐᕆᔮᒃᓴᖅ – ᑲᒦᒃ ᑕᑯᒃᓴᐅᑎᑦᑎᓂᖅ – ᐃᓚᖓ 3 4−ᖑᓪᓗᑎᒃ
ᓄᖅᑲᖓᑲᐃᓐᓇᕐᓂᖅ
- ᓇᐃᑦᑐᖅ ᑕᕐᕆᔮᒃᓴᖅ – ᑲᒦᒃ ᑕᑯᒃᓴᐅᑎᑦᑎᓂᖅ – ᐃᓚᖓ 4 4−ᖑᓪᓗᑎᒃ
- ᑕᕐᕆᔮᒃᓴᖅ − ᐃᓚᖓ 3 3−ᖑᓪᓗᑎᒃ
ᐃᖃᓗᖕᓂ ᑕᕐᕆᔭᖅᑎᑦᑎᔪᒃᓴᑦ: ᐄᐳᕈ 8, 18 − 26, 2024
ᑭᒻᒥᕈᒻᒥ ᑕᕐᕆᔭᖅᑎᑦᑎᔪᒃᓴᑦ: ᐄᐳᕈ 10, 19 ᐊᒻᒪ 22, 2024
ᑭᙵᐃᑦ ᑕᕐᕆᔭᖅᑎᑦᑎᔪᒃᓴᑦ: ᐄᐳᕈ 12, 16, ᐊᒻᒪ 24, 2024
ᓇᑦᑎᑐᑦ ᐱᔾᔪᑕᐅᔪᖅ ᑕᒧᓗᒐᒃᓴᑦ ᐊᑐᐃᓐᓇᐅᑎᑕᐅᓂᐊᖅᑐᑦ ᑐᓐᓂᖅᓱᐃᕌᕐᔪᒃᓗᓯᒃᓗ. ᐊᔾᔨᓕᐅᕆᕝᕕᒃᑕᖃᓛᕐᒥᔪᖅ, ᖃᐃᖁᔭᐅᓯᒪᔪᓪᓗ ᑎᓕᐅᖅᑕᐅᕗᑦ ᐊᑐᖁᔭᐅᓪᓗᑎᒃ "ᐊᐅᐸᖅᑐᖅ ᓇᑎᕌᓗᒃ, ᓇᑦᑎᐅᑉ ᐊᑐᖅᑕᖓ". ᖃᐃᖁᔭᐅᓯᒪᔪᖅ ᐊᔾᔨᙳᐊᑦᑎᐊᕙᐅᓛᖑᔪᖅ ᓵᓚᒃᓴᕐᓂᐊᖅᑐᖅ.
"ᐃᓕᖅᑯᓯᓕᕆᔨᒃᑯᑦ ᐊᓕᐊᓇᐃᒍᓱᒃᐳᑦ ᓴᖅᑭᑦᑎᔪᓐᓇᕐᒪᑕ ᖃᔅᓯᑲᓪᓚᖕᓂᒃ ᐃᓕᓐᓂᐊᕐᓂᓕᕆᓂᕐᒧᑦ ᐱᓕᕆᐊᖑᕙᓪᓕᐊᔪᒪᔪᓂᒃ ᓇᓗᓇᐃᖅᓯᔪᓂᒃ ᐃᓄᒃᑐᑦ ᐅᖃᐅᓯᑦᑎᐊᕙᑦᑎᓐᓂᒃ. ᑕᒪᑐᒪᓂ ᐊᕐᕌᒍᒥ 'ᓇᑦᑎᖅ', ᓇᑦᑎᐅᑉ ᕿᓯᖓ, ᓴᖅᑭᔮᖅᑎᑦᑎᕗᖅ ᐊᖏᖅᓯᒪᓂᑦᑎᓐᓂᒃ ᔭᒐᑎᑦᑎᑦᑕᐃᓕᒪᓂᕐᒥᒃ ᐃᑦᑕᕐᓂᓴᖁᑎᑦᑎᓐᓂᒃ. ᐅᐱᒍᓱᑦᑎᐊᖅᐳᖓ ᐱᓇᔪᐃᓐᓇᕐᓂᖏᓐᓄᑦ ᖁᕕᐊᓲᑎᖃᖅᑎᓪᓗᒋᑦ ᐊᔪᕐᓇᙱᑎᑦᑎᔪᓂᒃ ᓂᕆᐅᑦᑎᐊᖅᖢᖓᓗ ᐊᒃᑐᐃᕐᔪᐊᕐᓂᐊᕐᓂᖓᓂᒃ ᓄᓇᕗᒥᐅᓄᑦ." ᐅᖃᓚᐅᖅᐳᖅ ᒥᓂᔅᑕ ᑖᓂᐅᓪ ᖃᕝᕕᒃ.
ᐅᖃᐅᓯᕐᒧᑦ ᖁᕕᐊᓲᑎᖃᕐᓇᐅᑎᓪᓗᒍ ᐊᕐᕌᒍᓕᒫᕐᓗ, ᑭᒃᑯᑐᐃᓐᓇᑦᑎᐊᑦ ᐃᓄᒃᑐᑦ ᐅᖃᓪᓚᖃᑦᑕᖁᕙᕗᑦ ᐃᓚᒥᖕᓄᑦ, ᐱᖃᓐᓇᕆᔭᒥᓄᑦ ᐊᒻᒪ ᐃᖅᑲᓇᐃᔭᖃᑎᒥᓄᑦ ᑲᔪᓯᑎᓪᓗᒍᓗ ᐅᖃᐅᓯᕐᒧᑦ ᐊᔪᙱᑕᓯ. ᐃᓄᒃᑐᑦ ᐅᖃᓪᓚᓕᕌᖓᑦᑕ, ᐃᑲᔪᖃᑦᑕᖅᐳᒍᑦ ᐅᖃᐅᓯᕗᑦ ᐃᓕᖅᑯᓯᕗᓪᓗ ᓴᙱᔫᑎᓪᓗᒋᑦ.
ᐃᓕᓐᓂᐊᕐᓂᓕᕆᔨᒃᑯᑦ
ᖃᐅᔨᒪᕖᑦ ᐃᓕᓐᓂᐊᕐᓂᓕᕆᔨᒃᑯᑦ ᓴᖅᑭᑦᑎᓯᒪᓕᕐᑐᑦ 700-ᓂ ᐃᓕᓐᓂᐊᕐᑎᑦ ᐅᖃᓕᒫᒐᒃᓴᖏᓐᓂᑦ ᐃᓕᓐᓂᐊᑎᑦᓯᔨᓄᓪᓗ ᐃᑲᔫᑎᑦᓴᓂᑦ ᐃᓄᒃᑎᑐᑦ, ᐊᒻᒪᓗ 500−ᑲᓴᐃᑦ ᐅᖃᓕᒫᒐᐃᑦ ᐃᓕᓐᓂᐊᑎᑦᓯᓂᕐᒧᓪᓗ ᐃᑲᔫᑎᑦᓴᐃᑦ ᐃᓄᐃᓐᓇᖅᑐᓐ?
ᐊᖏᕐᕋᒻᒥ ᐃᓕᓐᓂᐊᕐᓂᖅ (www.angirrami.com) ᐃᑭᐊᖅᑭᕕᒃᑯᑦ ᐃᓕᓐᓂᐊᕐᓂᓕᕆᓂᕐᒧᑦ ᐃᑲᔫᑎ ᐃᑲᔪᕐᓂᕐᒧᑦ ᐃᓚᒌᓂᑦ ᐃᑲᔪᖅᑐᖃᑦᑕᖅᑐᑦ ᕿᑐᕐᖓᖏᓐᓂᑦ ᐃᓕᓐᓂᐊᕐᓂᕐᒧᑦ ᐊᖏᕐᕋᒻᒥ, ᓇᒻᒥᓂᖅ ᐅᖃᐅᓯᖓᓂᑦ. ᕼᐊᓐᓇᓚᐃᑦ ᐃᓄᒃᑐᑦ, ᖃᓪᓗᓈᑎᑐᑦ, ᐅᐃᕖᑎᑐᓪᓗ ᐃᑲᔫᑎᑦᓴᐃᑦ ᐃᑭᐊᖅᑭᕕᖓᓂ, ᐃᓚᖃᖅᑐᑦ ᐅᖃᓕᒫᒐᐃᑦ, ᓂᐱᒥᒃ ᑐᓵᓗᓂ ᐅᖃᓕᒫᒐᐃᑦ, ᑎᑎᕋᐅᔭᖅᓯᒪᔪᑦ ᑕᕐᕆᔮᒃᓴᑦ, ᖃᐅᔨᕚᓪᓕᕈᑎᒃᓴᑦ ᐱᓕᕆᐊᒃᓴᐃᑦ, ᐊᒻᒪᓗ ᐅᖃᐅᓯᓕᕆᓂᕐᒧᑦ ᐃᓕᓐᓂᐊᒐᒃᓴᓂᒃ.
ᐅᖃᐅᓰᑦ ᐱᙳᐊᕈᑏᑦ ᐊᒻᒪᓗ ᑎᑎᕋᕆᐅᖅᓴᐅᑏᑦ ᖁᕕᐊᓇᖅᑐᑦ, ᐃᓄᐃᑦ ᐅᖃᐅᓯᖓ ᖃᕆᑕᐅᔭᒃᑯᑦ ᐱᕙᓪᓕᐊᑎᑕᐅᔪᑦ ᐃᓕᓐᓂᐊᕐᓂᓕᕆᔨᒃᑯᓐᓄᑦ ᖃᐅᔨᑎᑦᓯᓂᕐᒧᑦ ᐊᑐᖅᑎᓄᑦ ᐃᓄᐃᑦ ᐅᖃᐅᓯᖓᑕ ᐅᖃᐅᓯᖏᓐᓂᑦ ᐃᓄᒃᑎᑑᓕᖓᔪᓂᒃ ᑎᑎᕋᖅᓯᒪᔪᓂᑦ. ᑖᒃᑯᐊ ᖃᕆᑕᐅᔭᒃᑯᑦ ᐱᔭᐅᔪᓐᓇᖅᑐᑦ ᐊᑭᖃᙱᑦᑐᒥ ᐅᕙᙵᑦ Apple and Google Play app stores.
ᐅᖃᐅᓯᓕᕆᓂᕐᒧᑦ, ᐊᑐᕐᕕᑦᓴᕐᓄᑦ ᐅᖃᓕᒫᒐᖃᕐᕕᓐᓂᑦ, ᐊᖓᔪᖅᑳᕆᔭᐅᔪᑦ ᑲᑎᙵᐅᖅᑐᓄᓪᓗ, ᐃᓕᓐᓂᐊᕆᐅᖅᓴᔪᓕᕆᔨᕗᑦ ᐃᓄᐃᑦ ᐅᖃᐅᓯᖓ ᐃᓕᖅᑯᓯᖓᓗ ᑮᓇᐅᔭᖃᖅᑎᑦᓯᓂᕐᒧᑦ ᓴᖅᑭᔮᖅᑎᑦᓯᔪᖅ ᐅᖃᕈᓐᓇᑦᓯᐊᕐᓂᕐᒧᑦ ᐃᓄᒃᑐᑦ ᖃᐅᔨᒪᓂᖃᕐᓂᕐᒧᓪᓗ ᐃᓄᐃᑦ ᐃᓕᖅᑯᓯᖓᓂᑦ ᓄᑕᖅᑲᓄᑦ ᐊᕐᕌᒍᓕᓐᓄᑦ 0-ᒥ 6-ᒧᓄ.
ᐃᓕᓐᓂᐊᕐᓂᓕᕆᔨᒃᑯᑦ ᐊᑐᐃᓐᓇᐅᑎᑦᓯᔪᖅ ᑮᓇᐅᔭᖃᖅᑎᑦᓯᓂᕐᒧᑦ ᐃᓕᓴᖅᓯᓂᖅ (ᓄᓇᕗᒻᒥ ᐅᖃᐅᓯᓕᕆᔩᑦ ᑲᑎᒪᔨᖏᑦ) ᐃᑲᔪᖅᑐᐃᓂᕐᒧᑦ ᑲᔪᓯᑎᑦᓯᓂᕐᒧᑦ ᐃᓐᓇᕐᓂᑦ ᐅᖃᔨᒫᕈᓐᓇᑦᓯᐊᕐᓂᕐᒧᑦ ᐱᓕᕆᐊᑦ. ᐃᓕᓴᖅᓯᓂᖅᒧ ᐱᓕᕆᐊᑦ ᐃᓚᖃᖅᑐᖅ ᐊᔪᙱᑕᖃᕐᓂᕐᒧᑦ ᐱᕙᓪᓕᐊᑎᑦᓯᓂᕐᒧᑦ ᓴᖅᑭᔮᖅᑎᑦᓯᓂᕐᒧᑦ ᑕᒪᒃᑮᓐᓂᒃ ᐱᖅᑯᓯᕐᒥ ᐃᓕᖅᑯᓯᖃᕐᓂᕐᒧᓪᓗ-ᑐᙵᕕᖃᕐᓂᕐᒧᑦ ᐃᓕᓐᓂᐊᕐᓂᕐᒧᑦ. ᓂᕿᓕᕆᒥᒃ (ᐱᖅᑯᓯᓂᑦ ᓂᕿᓕᐅᕐᓂᕐᒧᑦ ᐃᓕᖅᑯᓯᕐᓂᑦ ᐱᓕᕆᔾᔪᓯᕐᓂᑦ), ᐊᒪᐅᓯᐅᖅᑎᑦᓯᓂᕐᒧᑦ (ᐊᒪᐅᑎ ᒥᖅᓱᕐᓂᖅ), ᒥᑭᔪᓂ ᐊᐅᓚᐅᓯᕆᓂᕐᒧᑦ ᓴᓇᓂᖅ, ᐊᒻᒪᓗ ᖃᒧᓯᐅᕐᓂᖅ (ᖃᒧᑎᓕᐅᕐᓂᖅ), ᐱᓕᒻᒪᑦᓴᕐᓂᕐᒧᑦ ᐋᖅᑭᑦᓯᒪᓂᖃᖅᑐᓂ ᐃᓅᓯᖃᕐᓂᕐᒧᑦ ᐅᑭᐅᖅᑕᖅᑐᒥ.
ᐃᓕᑦᑎᒃᑲᓐᓂᕈᒪᕖᑦ? ᐅᕗᖓᓗᑎᑦ: https://gov.nu.ca/education.
ᐃᖅᑲᓇᐃᔭᖅᑐᓕᕆᔨᒃᑯᑦ
ᐃᓚᒋᑦᓱᒍ ᐱᓕᕆᖃᑎᒌᓐᓂᖅ/ᐃᑲᔪᖅᑎᒌᓐᓂᖅ - ᐱᓕᕆᖃᑎᒌᓐᓂᖅ ᐊᑕᐅᓯᕐᒧᑦ ᐱᔾᔪᑕᐅᔪᒧᑦ, ᒐᕙᒪᒃᑯᑦ ᓄᓇᕗᒻᒥ (GN) ᐊᖏᖅᓯᒪᓂᖃᖅᑐᖅ ᐃᑲᔪᖅᑐᕐᓂᕐᒧᑦ ᐃᖅᑲᓇᐃᔭᖅᑎᓂᑦ ᐊᑐᕐᓂᕐᒧᑦ ᐃᓄᒃᑐᑦ ᐅᖃᐅᓯᖅ ᐊᑐᖅᑕᐅᓗᓂ ᒐᕙᒪᒃᑯᑦ ᐃᖅᑲᓇᐃᔭᕐᕕᖏᓐᓄᑦ.
ᐃᓄᒃᑐᑦ ᐅᖃᐅᓯᖏᓐᓂᑦ ᐱᔪᒪᓕᖅᑎᑦᓯᔾᔪᑎ ᐱᓕᕆᐊᒃᓴᖅ ᑎᓕᐅᕆᓂᖅ ᐃᖅᑲᓇᐃᔭᖅᑎᓂᑦ ᐊᑐᕐᓂᕐᒧᑦ ᐅᓄᖅᓯᑎᑦᓯᓂᕐᒧᓪᓗ ᐃᓄᒃᑐᑦ ᐅᖃᐅᓯᖏᓐᓂᑦ ᐊᔪᙱᑕᖃᕐᓂᕐᒧᑦ ᐃᖅᑲᓇᐃᔭᕐᕕᒻᒥᑦ.
ᐃᖅᑲᓇᐃᔮᒧᑦ ᐱᕚᓪᓕᕈᑎᒃᓴᐃᑦ ᐱᓕᒻᒪᑦᓴᕐᓂᕐᒧᑦ ᐱᕕᖃᕐᓂᐅᔪᑦ ᐊᑐᐃᓐᓇᐅᑎᑕᐅᒥᔪᑦ ᐃᓄᒃᑐᑦ ᒐᕙᒪᒃᑯᓐᓂᑦ ᓄᓇᕗᒻᒥ ᐃᖅᑲᓇᐃᔭᖅᑎᓄᑦ. ᖃᐅᔨᒋᐊᕐᓗᒍ ᒐᕙᒪᒃᑯᑦ ᓄᓇᕗᒻᒥ ᐅᓪᓗᖅᓯᐅᑎᖓ ᑕᑯᔪᒪᓗᒋᑦ ᒫᓐᓇᐅᔪᖅ ᐱᓕᒻᒪᑦᓴᕐᓂᕐᒧᑦ ᐱᕕᖃᕐᓂᐅᔪᑦ.
ᓇᒃᓯᐅᑎᔪᓐᓇᕐᑕᐃᑦ ᐃᖅᑲᓇᐃᔮᒃᓴᖅᓯᐅᕈᑏᑦ ᑎᑎᖅᑲᒥᓪᓗ ᐃᖅᑲᓇᐃᔭᖅᑐᓕᕆᔨᒃᑯᑦ ᐃᖅᑲᓇᐃᔮᖅᑖᖅᑎᑦᑎᔨᒃᑯᓐᓄ ᓄᓇᕗᒻᒥ ᐃᓕᓴᕆᔭᐅᓯᒪᔪᑎᒍ ᐅᖃᐅᓯᒃᑯᑦ. ᐱᓕᕆᕝᕕᐅᔪᖅ ᑲᔪᖏᖅᓴᐃᕗ ᐊᑐᖃᑦᑕᖁᔨᓪᓗᑎᒃ ᐃᓄᒃᑐᑦ ᐱᓗᐊᕐᑐᒥ ᐅᖃᐅᓯᕐᒧᑦ ᖁᕕᐊᓲᑎᖃᕐᓂᖅ, ᐃᓄᒃᑐᑦ ᐅᖃᐅᓯᖕᒧᑦ ᑕᖅᑭᐊᓂ.
ᐃᓐᓇᐃ ᖃᐃᖁᔭᐅᖃᑦᑕᕐᐳᑦ ᐅᖃᓪᓚᒋᐊᖅᑐᖁᔭᐅᓪᓗᑎᒃ (ᑐᓵᔨᖃᕐᖢᑎᒃ) ᐱᓕᕆᕝᕕᐅᑉ ᐱᓕᒻᒪᒃᓴᓂᖕᒧᑦ ᐱᓕᕆᐊᖏᓐᓄ.
ᓄᓇᕗᒻᒥᐅᑦ, ᓴᖅᑭᔮᖅᑎᑦᓯᑕ ᐃᓄᒃᑐᑦᒥ ᐊᑐᖃᑦᑕᕐᓗᒍ ᖃᐅᑕᒫᑦ!
ᐃᓄᐃᓐᓇᖅᑐᓐ ᒫᓐᓇ ᒪᐃᑯᓵᕝᑯᑦ ᑐᑭᓕᐅᕈᑎᖃᓕᖅᑐᖅ
ᐱᓕᕆᖃᑎᒌᖕᓂᒃᑯᑦ ᑖᒃᑯᓂᖓ ᒪᐃᑯᓵᕝ ᐊᒻᒪᓗ ᓄᓇᕗᒻᒥᑦ ᒐᕙᒪᖓ ᓄᓇᓕᖕᓂ ᒐᕙᒪᒃᑯᓐᓂᓪᓗ ᐱᔨᑦᑎᕋᖅᑎᒃᑯᑦ ᐃᓕᖁᓯᓕᕆᔨᒃᑯᓐᓂᓗ, ᖁᕕᐊᓱᒃᐳᒍᑦ ᓇᓗᓇᐃᔭᐃᓂᕐᒧᑦ ᖁᕕᐊᓇᖅᓂᖅᓴᓂ ᐱᔪᓐᓇᕐᓂᖃᕐᓂᕐᒥᑦ ᐃᓄᒃᑎᑐᑦ ᐅᓯᐅᓯᕐᒥᑦ ᑕᕝᕘᓇ ᒪᐃᑯᓵᕝ ᑐᑭᓕᐅᕈᑎᐊᓂ.
ᐃᓄᐃᓐᓇᖅᑐᓐ
ᐃᓄᒃᑎᑐᑦ ᖃᓕᐅᔮᖅᐸᐃᑎᑐᑦ
ᐃᓄᒃᑎᑐᑦ ᐱᐅᓯᕚᓪᓕᖅᓯᒪᔪᑦ ᐅᖃᐅᓯᓕᕆᓂᖅᒧᑦ ᐆᓯᒃᑐᕋᖅᑕᐅᓯᒪᔪᑦ
ᐅᑭᐅᖅ ᐊᑕᐅᓯᕐᒥᑦ ᐊᑯᓂᐅᑎᒋᓕᖅᑐᖅ ᐃᓄᒃᑐᑦ ᐊᑐᐃᓐᓇᐅᑎᑕᐅᓚᐅᖅᑎᓪᓗᒍ ᒪᐃᑯᓵᕝ ᑐᑭᓕᐅᕈᑎᐊᓂ ᐊᒻᒪᓗ ᐱᔾᔪᑎᒃᓴᖏᑦ ᓇᓗᓇᐃᔭᐃᓯᒫᓂᓕᖅᑐᖅ ᐱᓪᓚᕆᐅᓂᖓ ᐊᑑᑎᖃᑦᑎᐊᕐᓂᖓᓗ ᓄᓇᕗᒻᒥᐅᓄᑦ. ᐃᓄᒃᑎᑐᑦ ᓯᕗᓪᓕᖅᐹᕆᔭᐅᑎᓪᓗᒍ ᒪᐃᑯᓵᕝ ᑐᑭᓕᐅᕆᔾᔪᑎᐊᓄᑦ ᒪᑐᐃᖅᓯᓯᒪᕗᖅ ᐱᕕᒃᓴᓂᑦ ᐃᖃᓇᐃᔭᕐᕕᓄᑐᐊᖑᖏᑦᑐᖅ ᑭᓯᐊᓂ ᐊᖏᕐᕋᒥᑦ ᖃᐅᑕᒫᖅᓯᐅᑎᓄᓪᓗ. ᐊᖏᕐᕋᖅᓯᒪᒍᕕᓪᓘᓐᓃ, ᐃᖃᓇᐃᔭᕐᕕᖕᒥ ᐅᕝᕙᓘᓐᓃ ᐃᓕᓐᓂᐊᕐᕕᖕᒥ, ᑖᓐᓇ ᐱᔾᔪᑎᒃᓴᖅ ᐱᕚᓪᓕᕈᑕᐅᔪᖅ ᐃᓄᒃᑎᑐᑦ ᖃᕆᓴᐅᔭᐅ ᐃᑭᐊᕿᕕᖓᒍᑦ ᖃᕆᓴᐅᔭᒃᑯᑦ, ᐅᖃᓘᑎᕋᓛᒃᑯᑦ, ᐅᕝᕙᓘᓐᓃ ᑎᒍᒥᐊᒐᕐᒥᑦ.
ᑲᔪᓯᓂᖃᑦᑎᐊᖅᑐᒥ ᐱᒋᐊᖅᑎᑕᐅᓚᐅᖅᑎᓪᓗᒍ, ᑭᒃᑯᑐᐃᓐᓇᕐᓂ ᑐᓴᕈᒪᓚᐅᖅᒍᐳᒍ ᐃᓱᒪᓕᐊᕆᔭᐅᔪᓐᓇᖅᑐᓂᒃ ᐱᒋᐊᖅᐸᓪᓕᐊᑎᓪᓗᑕ ᑐᒡᓕᐊᓂ ᐱᓕᕆᐊᒃᓴᒥᑦ ᐱᐅᓯᕚᓪᓕᑎᑦᑎᓂᕐᒧ ᐱᔾᔪᑎᒃᓴᖅ. ᑐᑭᓕᐅᕆᔭᐅᑦᑎᐊᕐᓂᖅᓴᓂᒃ ᐃᓄᑦᑎᑐᑦ, ᐊᒻᒪᓗ ᓇᑭᖔᕐᓂᖓᓗ ᖃᓕᐅᔮᖅᐸᐃ ᐃᓄᒃᑎᑐᑦ ᐊᒻᒪᓗ ᐃᓄᐃᓐᓇᖅᑐᓐ, ᖃᓄᐃᓕᖓᓕᕆᔭᖓ ᓇᓗᓇᐃᔭᑦᑎᐊᕈᓐᓇᖅᑕᓯᓪᓗᑎᒍᑦ ᐃᓄᒃᑎᑐᑦ ᐅᖃᐅᓰᑦ ᓄᓇᕐᔪᐊᓕᒫᒥᑦ. ᐃᓄᒃᑎᑐᑦ ᐅᖃᕈᓐᓇᖅᑐᑦ ᐊᑐᖅᓂᖅᓴᐅᑎᓪᓗᒋᑦ ᐊᑐᐃᓐᓇᐅᑎᑦᑎᓂᕐᒥᓪᓗ ᑭᐅᔾᔪᑎᖏᓐᓂᑦ, ᑐᑭᓕᐅᕆᔨ “ᐃᓕᑉᐸᓕᐊᓂᖅᓴᐅᓚᖓᕗᖅ” ᐅᓄᖅᓯᑎᑦᓯᓂᕐᒧᓪᓗ ᐃᓄᒃᑎᑐᑦ ᐊᔪᙱᑕᖃᕐᓂᕐᒧᑦ.
"ᐅᐱᒍᓱᒃᐳᖓ ᓱᓕ ᐃᑲᔪᖅᑐᐃᔪᓐᓇᕋᒪ ᓄᓇᕗᑦ ᒐᕙᒪᖓᓂ ᑖᔅᓱᒥᖓ ᐱᒻᒪᕆᐅᔪᒥᒃ ᐱᓕᕆᐊᒃᓴᒥᒃ," ᑭᐊᕕᓐ ᐲᔅᑯ ᐅᖃᖅᑐᖅ, Microsoft ᑲᓇᑕᒥ ᐊᖓᔪᖅᑳᕆᔭᐅᔪᖅ. "ᐃᓄᒃᑎᑐᑦ ᐅᖃᐅᓯᓕᕆᓂᐅᑉ ᐋᖅᑭᒃᓯᒪᓂᖓ ᓄᑖᙳᕆᐊᖅᑕᐅᔪᑦ, ᐅᖃᐅᓯᒃᓴᕆᔭᐅᔪᑦ ᑭᐅᔭᐅᓪᓚᕆᒡᓗᑎᒃ ᓄᓇᓕᖕᓂᙶᖅᑐᓂᑦ, ᐃᓄᐃᓐᓇᖅᑐᓪᓗ ᐃᓚᒋᐊᖅᑕᐅᔪᖅ Microsoft ᑐᑭᓕᐅᕆᔨᓄᑦ ᐃᓄᒃᑐᑦ ᓱᓕ ᑲᔪᓯᑦᑎᐊᕐᓂᐊᖅᐳᖅ ᑭᖑᕚᒃᓴᑦᑎᓐᓄᑦ."
ᐊᓯᐅᑎᑦᑎᑕᐃᓕᒪᓂᖅ ᐃᓄᒃᑎᑐᑦ ᐅᖃᐅᓯᖅᑕᖅ ᐱᓕᕆᔾᔪᑎᒃᑯᑦ, ᐱᔪᒥᓴᐃᓂᖅ ᐊᑐᖃᑦᑕᕐᓂᕐᒥᑦ ᐃᓄᒃᑎᑐᑦ ᐊᑐᐃᓐᓇᐅᑎᑦᑎᓂᕐᓗᑦ ᑭᒃᑯᑐᐃᓐᓇᕐᓄᑦ. ᐃᑲᔪᖅᑐᖅᑕᕗ ᐃᖃᐅᓰᑦ, ᑐᑭᓕᐅᕆᔭᐅᔪᓐᓇᖅᑐᑦ ᐱᔪᓐᓇᕐᓂᓕᒃ ᒪᐅᑯᓵᕝ ᖃᓄᐃᓕᐅᕈᑎᖏᓐᓂ ᐊᒻᒪᓗ ᐱᔪᓐᓇᖅᑎᑦᑎᓂᖅ ᓄᓇᕗᒻᒥᐅᓂ ᐃᓚᓕᐅᔾᔭᐅᖃᑕᐅᓂᕐᒧᑦ ᖃᐅᑕᒫᖅᓯᐅᑎᓄ ᐊᔪᕐᓇᖏᑦᑐᒃᑯᑦ. ᐃᓱᒪᒃᓴᖅᓯᐅᕈᓘᔭᕐᓗᑎᑦ ᐊᒻᒪᓗ ᐅᖃᐅᓯᕆᓗᒋᑦ ᐊᔾᔨᒌᖏᑦᑐᓂᒃ ᐊᑐᕐᓗᑎᑦ ᐃᓄᒃᑎᑐᑦ ᐅᖃᐅᓯᖅ ᒪᐃᑯᓵᕝ ᑐᑭᓕᐅᕈᑎᐊᒍᑦ ᖃᕆᓴᐅᔭᒃᑯᑦ ᓇᓗᓇᐃᔭᕐᓗᒍ #Quviasuutiqarniq, ᐊᑏ!
ᑐᑭᓯᒋᐊᒃᑲᓂᕈᒪᒍᕕᑦ ᐱᓕᕆᐊᕐᒥ, ᐅᕗᖓᕐᓗᑎᑦ: https://news.microsoft.com/en-ca/2022/02/01/government-of-nunavut-preser...
ᐊᑐᕐᓗᒍ ᒪᐃᑯᓵᕝ ᑐᑭᓕᐅᕆᔨ ᐅᕗᖓᕐᓗᑎᑦ: www.bing.com/translator . ᐱᑕᖃᕐᒥᔪᖅ ᒪᐃᑯᓵᕝ ᑐᑭᓕᐅᕆᔨ ᖃᕆᑕᐅᒃᑯᑦ, ᐋᓐᑐᐃᑦ, iOS ᐊᒻᒪᓗ ᖃᕆᑕᐅᔭᒃᑯᑦ ᑎᑎᕋᕈᑎ: ᖃᕆᑕᐅᔭᒃᑯᑦ - ᒪᐃᑯᓵᕝᑯᑦ ᑐᑭᓕᐅᕆᔨ
ᖁᔭᓐᓇᒦᖅᑕᕗᑦ ᐱᓕᕆᐊᒃᓴᓄᑦ ᐃᑲᔪᖃᑦᑕᖅᓯᒪᔪᓕᒫᑦ!
