Nunallaani Maligaliqijikkut

Nunallaat Maligaliqijikkut havagvia atuqpagait Inuit Inuudjuhiini Aturniqaqtut imaatut ikajuqhugit nunallaat pivallianirmun pitquhikkut ihuaqtut ahiagut maligaliqijikkut auladjutainun ihuaqhautikhangit maligaliqijikkut ajuqhautainik. Tamna havagvia ikajuqtaillu pinahuarutingit kivgaqtutaitlu nunallaani tunijhijut maniliqtuutikhanik nunallaani-ittut maligaliqijikkut havaakhat ukunatitut ihuinaaqtailinirmut ikajurnirlmiku ajuqhaqtitauvakhimajunut ihuinaaqtut.

Nunallaani maligaliqijikkut hanaqidjutikhangit ilaujut:

• Mamihainirmut Ihuarhaidjutikhamut Atuqtakhat
• Mamittirutikhat Maligaliqijikkut Pinahuarutit
• Ilagiiktunun Pimmaarluktaujunut Ikajuutainun Pinahuarutit
• Ajuqhaqtitauvakhimajunut Ikajuutiit
• ihuinaaqtailiqinikkut

 

Mamihainirmut Ihuarhaidjutikhamut Atuqtakhat

Tamna Mamihainirmut Ihuarhaidjutikhamut Atuqtakhat ikajuutauvaktuq inungnik ihuinaaqhimajunut ajuqhautiqaqpakhimajut ihuinaarnikkut havaqatigiplugit Nunalaani Maligaliqijikkut Katimajiit ihuaqhautikhanik ajuqhaqhimajut ihuinaarnirmit ihuatqijamik ikajutikhanik nunalaani.

 

Nunallaani Maliqaliqijikkut Ikajuqtikhat Havaktit (CJOWs) ukuallu Nunallaani Maligaliqijikkut Katimajiit ikajuqpaktait Mamihainirmut Ihuarhaidjutikhamut Atuqtakhat nunamingni.

 

CJOW-kut tunijaujut ikajuqtaujukhanik hapkunanga PILIIHIMANIN uvalu Inungnut ihuinarunminut Ikajuutikhat Kanata. Pittaaqtut imaa 'nuutiqtauniaqtut' ihuinaarnikkut kuatirnikkut havauhiit taimaa mamihainirmut ihuarhaidjutikhamut uuktuutikhait havaktautilugit.

 

Havaarijat ukua Nunallaani maligaliqijikkut Katimajiit ihuarhiffaaqtakhat inuk ihuinaaqhimajuq tapkununnga ajurhaqtitaujunut ihuinaaqtumit unalu nunallaani tigumiaqtiujut aturnikhanik ihuaqhainirmut qanuriliurutingit unalu Inuit Inuudjuhiini Aturniqaqtut ihuarhaijamingni aannirutinga ihuarqhautikhaniklu igiamilu aanirninnga nunallaani.

 

Atauttit nunallaat Nunavunmi piqaqtut Nunalaani Maligaliqijikkut Katimajiit, kitut kivgaqtuqtut tamainun ukiuqaqtun, taijauhimajunik mikhaagun Inulramiit uvalu inirnikhat atauttini nunallaani.

 

Iliturittiarumaguvin mikhaagun Mamihainirmut Ihuarhaidjutikhamut Atuqtakhat, hivajarlugit nunangni CJOW.

 

Mamihainirmut Maligaliqijitkut naunaiqhimajuq ihuaqhaidjutikharnik ajuqhautigivaktainik ihuinaarutikkut. Aturninnga mamihainirmut maligaliqijikkut ikajuqtaujuq uumannga tuniqhaininnganik uumannga Ihuinaaqtunik Naunaitkutingit Kanatami, tamna Inulramiit Ihuinaaqtut Maligaq, tamna Ajuqhaqtitauvakhimajunut Maligat Pilaarutingit Maligaq, unalu Itiqtauviit unalu Maliqajakhaqaqtut Annigumik Maligaq.

 

Mamihainikkut-pihimajut atuqtakhatik ihuaqhautikhat ihuinaarnikkut-pidjutaujut ajuqhautit nunallaani nalaumajut hapkununga Inuit inuudjuhiini aturniqaqtut uvalu pitquhikkut Inuit ihumagijainik maligaliqinirmun. Mamihainirmut maligaliqijikkut tunihijut Nunavunmiunut pidjutikharnik ihuaqhaidjutikharnik piqatigiiktunut ajuqhautiqaqpakhimajut talvuuna ihuinaaqtut hulidjutanik taima allamik talvani ihuinaaqtunik maligalijitkut atuqtakhat.

 

 

Mamittirutikhat Maligaliqijikkut Pinahuarutit

Mamittirutikhat Maligaliqijikkut Pinahuarutit (TJP) havaqatigivakgtait ihuinaaqtut ihumagilluariangit qanuriliurutingit ihuinaaqtunik pitquhingit, hapkuat ihumamikkut aaniarutilgit, ipiraillailaqidjutinut ajuqhautiqaqtut, nunalitkaqhimajut, unalu naglikhaaqpakhimanirmik ihuinaaqtunut kuatiqtunut havauhiat.

Taman Pinahuarut piqaqtuq malrungnik ilaujukhangnik aadjikiiktumik anginiqaqtuk:

• munaqhiliqiijinit pidjutaujuq ikajuqtiqaqhutik ihumaliqinikkut uqaudjijunin, munaqhit, ajuittiaqtunlu ihumakkut munaqhijullu, unalu
• pitquhikkut ilaujut tapkua tunihijut ikajuutinik nunallaani uqaudjinin uvalu Inuit Inirnikhat uvalu ilihaqtitiblutik pitquhikkut hulilukaarutinik (imaa hanalrutiliurnikkut, kuvjinirmik iqalukhiurutikhanik, maniqqami aulaaqhutik, miqhurnirmik ilihaqhutik).

Tamna pinahuaruti piqaqtuq pingahunik uukturvikhanik ahiagut mamihaidjutikhanik:

• apirhuqtautinagit upautidjutikhat havaktaujuq Piliihimatkunin,
• kinguani-apiqhuutit havaktauhimajut hapkunanga Inungnut ihuinarunminut Ikajuutikhat Kanata, uvalu
• hivuagut-tuhaqtitautinagit qanuriliuqtauniariakhanik upautidjutikhat havaktauhimajut Maligaliqijikkut Katimajiinin.

Mamittirutikhat Maligaliqijikkut pinahuarutit ikajuqpaktut inungnik mamihaqtitlugit tuniplugit ikajuutikhainik piffaariangini qanurunaaqhimaittumik nunaqatimingnut unalu Inuit pitquhirmingnik kinaujaakhamingniklu ajurhaqtitaujuq nuutiqtaugamik nunagiliqtamingnut. Tamna pinahuarut tikinnahuaqtakhait imailiurutik:

• ikiklijumiqtitijaangat ihuinaaffaarnaittumik Nunavunmi,
• ikiklijumirutikharnik auladjutikharnik Inuinnarnik ihuinaaqhimajunik ajuqhaqtitauvakhimajunut ihuinaarnikkut maligaliqidjutikkut atuqtakhait,
• amigaigjuumirlugit pivikhanik maligaliqinirmun uvalu pitquhikkut ihuaqtut kiudjutit ihuinaarnirmun uvalu ihuinaarnikkut idjuhiit,
• amigaigjuumilugit ihuaqtumik ilauniq ihuinaaqtunik ajuqhaqtitauvakhimajunut ihuinaaqtunik maligaliqijikkut havauhiat,
• amigaigjuumilugit pivikhanik uumunnga ihumamitigut aanniarutilgit ikajuutikhat Nunavunmiunut,
• ihuaqhijuumirlugit nunallaani hakugingniit uvalu aktilaangitigut imaa hakugikhijuumirlugit nunallaani hivuliqhuqtit uvalu timiqutaujutlu qajangnaitumik uvalu aanniarnaitumik Nunavunmi.

Piliuqhimajuq 2021, pinahuaruti aulajuq hamani Iqaluktuuttiaq unalu Arviat.

 

Ilagiiktunun Pimmaarluktaujunut Ikajuutainun Pinahuarutit

Ilagiiktunun Pimmaarluktaujunut Ikajuutikhat Maligaq (FAIA) atuqtauliqhimajuq 2008. Maligaq pidjutaujuq tunihijami Nunavunmiut ihuaqutikhainik tamaini inuudjuhirmi ikajuriamingni atungitaanganilu ilagiiktunun pimmaarluktaujunut ihumagilugit ihariagijaujut aanningitaagani, ajurnaittunik ihuaqtuniklu aulanirnik nalaumajunik Inungnit aturniqaqtunik. Ihumagijaujuq pidjutauvlunilu FAIA atungitaangani mikhivaalirianganilu qanuriningit pimmaarluktaujunut.

Ataani FAIA, piqaqtuq hitamanik hanaqidjutikhat hailijutt:

• Amigakhuutiqaqqan Aanniqtailinikkut Atuqqujaujut (EPOs)
• Nunallaat Hatumiarnikkut Atuqqujaujut (CIOs)
• Ikajuutikhamut Atuqqujaujut
• Akiliuhiarutikhamut Atuqqujaujut

Nunallaat Maligaliqijikkut Havagviata Ilagiiktut Pimmarlungnikkut Ikajuutit Pinahuarutit munaqhijut pijaangini tapkua Nunavunmiut pijaangini hapkua maliktakhait atauttini nunallaani tamaini Nunavunmi. Nunallaani Maliqaliqinikkut Ikajuqtikhat Havaktit (CJOW) uvalu Nunallaat Maliqaliqijit Ajuittiaqtut atan'ngujat munaqhijut ikajuutinik uvalu ikajuqhugit ukuat hanaqidjutit ihumagiplugit EPOs ukuallu CIOs.

 

Amigakhuutiqaqqan Munaridjutikhanik Atuqqujaujut

Amigakhuutiqaqqan Munagijukhanik Atuqqujaujut (EPOs) nunalaani kuatiliqijunik atuqqujauhimajut taima tunijaangat munagqhidjutikhanikik inungnun ilagiiktunutlupimmaarluktaunirmit amigaqhuutiqaqqan.

Uuktuutikhat haffuminga EPO havaktaujukhat Maligaliqijikkunut, kitut apiqhittaaqtut atuqtaujukhanik ihuaqhautikhanik ilaujutlu:

• tadjakaffuk ahinungaqtitaujuq pimmarluktuq inuk ilami igluanit
• tamna pimmarluktiujuq inuk iqhitaaqtaungituq uvaluuniin uumilguhainaqhuni ilingnun uvaluuniin aalanun ilaminut
• tamna pimmarlukniq inuk tugaaqhimangituq uvaluuniin aktuqhimaitumik ilingnun uvaluuniin aalat ilatit, imaatun ahinungaublutik ilangnin iglungnin uvaluuniin havagvingnin
• tunihipltik ilingnut tadjakaffuk munaqhidjutikharnik nutararnik
• tadjakaffuk hapummidjutikhat nanminirijatin inuup tamajainniklu tamajat

Nunallaani Maliqaliqinikkut Ikajuqtikhat Havaktit (CJOWs) ikajuqtaaqtait uuktuqtut ukununga EPO havagutimi.

Uuktuqtut kiujutluuniit imaatut 14-nik ukiuqaqtukhat angajukhiulutikluuniit.

 

Nunallaat Hatummiarnikkut Atuqqujaujut

Nunallaat Hatumiarnikkut Atuqqujaujut (CIO) inungnun kuatirvingnit pitqujaujut tapkua ilaujut uqaudjinikkut ihuaqhaijangini nakuungitut uvalu pimmarlungnikkut idjuhiit humi ilagiit piqatigiingnikkut atuqtaujut. Uqaudjijit, ilaujut Inirnikhat, naunaiqtauhimajut uvalu upalungaijautit iliuraqtauhimajut uqautigijaangini ajuqhautit.

 

Kuatliqijinit Maliqqatqujaujut / Uqarvigijakharingitat Atuqqujaujut

Nunallaani Maliqaliqinikkut Ikajuqtikhat Havaktit ikajuqtaaqtut uuktuutikhanik tahjaqtaujukhanut Bond.

Kuatliqijinit Maliqqatqujaujut qanuritut kuatiqtinit aturiaqaqtut inungmik "pihimaitumik nakuujumiklu inuujuhirmik" pipkailunilu qanurininginik hivajangitaagani ilingnut nutaqqanutluniit hanianungaulimaittut iglungnut imaaluuniit havagvingnut. Aadjikkingittuk ukuak EPO ukualu CIOs, qatangutiriit inuuqatiriigutiqangitut aturiaqaqtut uukturiangani Kuatliqijinit Maliqqatqujaujut.

 

Ikajuqtaujukhanut

Ikajuqtikhaqaqtuq ilagiiktunut pimmarlungnirmun tamainni nunallaani Nunavunmi.

Aturuvin pimmarluktaunirmik uvaluuniin uumilguhaaqtaunirmik, hivajaqtaaqtatit nunangni Piliihimatkut.

Naunaiqhittiarumaguvit nunangni Pallihimatkut, takulugu:

https://www.rcmp-grc.gc.ca/detach/en/find/NU#wb-cont

Hivajaqtaaqtatillu nunagijarni Nunallaani Maligaliqijikkut Ikajuqti Havakti ikajuqtaujarni uukturiarni uminga EPO, Nunallaat Hatumiarnikkut Maligakhait CIO unaluuniit naunaiqhittiarumaguvit atugakharnik qanuriliurutikhanik pimmarlungnirmun unalu uumilruhaaqtauguvit. Hiamitiqtaulimaittuq ikajuqtikhat hailijut Qablunaatun Inuktitutlu.

Uqarvikhat naunaitkutait CJOW nunangni.

Ikajuqtaujukhanik havangnaidjutaani imaalu havangnaiqqata, hivajarlugit akiittuq 1-844-534-1038

 

Ajuqhaqtitauvakhimajunut Ikajuutikhangit

Ajuqhaqtitauvakhimajunut Ikajuutikhangit hiamitiqtaulimaitut, inungnut-pihimajut ikajurnikkut kivgaqtuutit ihuinaaqtaujunun ningartaunikkutlu. Ikajuutikhat piliuqhimajut pigiamingni ihariagijanginnik tamarmik ajuqhaqtitauhimajunut ihuinaaqtauhimajut – ihumaliurumik uqarlugu qanuriliurutaujuq palliihimanut, qiniqhialutik qanuriliurutikhamingnik kuatirvingnit, qiniqhialutikluniit qanuriliurutikhanik kuatiqtitaukpat.

Ikajuqtaaqtugut qiniqhiaguvit kitunik piumajarnik, tunilutit naunaitkutikharnik, ikajurlutit ihumaliurutikharnik. Pivikharnik Ajuqhaqtitauvakhimajunut Ikajuutikhangit pijunmagumik. Ihumaliurniarunaqhijutit aturumaplugit ilanginik uvaluuniin tamaita ikajuutikhat – piumajarnik ilvit aturlutit. Tamaita ajuqhaqtitauhimajut nakuujumik ikajuqtaujukhat, nagliguhuktumik pittiaqtaulutiklu.

Ajuqhaqtitauvakhimajunut Kivgaqtuidjutikhat ikajuqtaaqtaatit:

• tamainnut naunaitkutikhat maliktakhallu talvuuna ihuinaarutinut maligaliqijikkut atuqtaujukkut
• tunilugit kangiqhidjutikhainik hulidjutinun kitunun pidjutaujunun
• hanaijarlugu Ajuqhaqtitauhimajunut Qanuriliurutaujut Titiraqtamingnik imaalu/imaaluuniit Ajuqhaqtitauhimajunut Atiliurvikhaq iniqtirumagungni atiliurvikhaq
• naunaijarlugit uvalu uqautigilugit ajuittiaqhimajut nunallaani ikajuutikhat
• tunihilutik ihumakkut ikajuutikhainik upalungaijaqtitlutit talvuunarutikharnik kuatirvikkut
• pijaangat manikharnik ikajuutikharnik pigiaqaqtun ajuqhaqtitauvakhimajunut annaktauvakhimajun ihuinaaqtunik

Pivikharnik Ajuqhaqtitauvakhimajunut Ikajuutikhangit imaaluuniit naunaiqhittiarumaguvit uqarvigilugu:

Hivajautaa (akiittuq) 1-866-456-5216

Qaritaujakkut [email protected]

 

Ajuqhaqtitauvakhimajunut Ikajuutikhaq Maniit

Una Ajuqhaqtitauvakhimajunut Ikajuutikhaq Maniit (VAF) taijauhimajuq pidjutinun manik munarijaujuq manikhainin ajuqhaqtitauvakhimajunut akiligakhanun akikhanginnun. Havaktauhimajuq ikajuutikhat nunallaanun-oihimajut havaakhat hulidjutillu tapkua tunihijut kivgaqtuutinik ikajuutikhaniklu aanniqtaujunun ihuinnaarnirmun. Una ilaujuq:

• Ilihaidjutit turaaqhimajut iliturivalianirmun nunallaat ikajuutinun havaktit ihariahungnirmun qanuriniinlu aanniqtaujut ihuinnaarnirmun
• turaangajut kivgaqtuutit tapkua ikajuutaujut aanniqtaujunun ajuqhautikkut kiudjutikkut, inuup ikajuutikhait, qanurinmangaata ikajuutit, ihuinaaqtaujut kangiqhidjutait auladjutillu naunaijautait
• inungnun ilituqhaidjutit kangiqhidjutillu pilaarutainun munarijakhaillu aanniqtaujut, piinarialgit kivgaqtuutit, ihuinaaqtunun malgaliurnirmun auladjutit havauhiillu, ajuaginarlu ajuqhautit ilaijut aanniqtaujunun aihuinaarutikkut,
• qaujihainirmun havaakhat nakuutqiat atuqtaujukhat ihuaqhautikhanik ajuqhaqtitauvakhimajunut aanniqtaujunun ihuinaarutikkut tamainni Kanadami hanaqidjutikhait tapkua nakuutqiat ikajuutaujut Nunavunmiunut aanniqtauhimajut ihuinaarutikkut.

Nunallaat Maliqaliqijit Havagviata tukhiqtut tukhiutinik attautini ukiuni havaakhanun hulidjutinunlu ikajuutikhat haffumuuna Ajuqhaqtitauvakhimajunut Ikajuutikhat Manikhait.

Naunaiqhittiarumaguvit talvuuna Ajuqhaqtitauvakhimajunut Ikajuutikhat Maniit atuqtakhainiklu pivikhanik hapkuninga manikhanik, qaritaujakkut: @email

 

Ilagiinun Kangiqhidjutikkut Havaktiata Havagvia (FILU)

Iilagiinun Kangiqhidjutikhat Havaktiata Havagvia (FILU) tunihijut ikajuutikhainik hapkununga Tammaqhimajut imaalu Inuaqtauimajunut Nunaqaqaaqtut Arnat Arnarutit (MMIWG) ilagiit ihumagijaujut ikajuriangini hapkua ilagiiktun pijaarnikkut pingahuanin-ilaujun kangiqhidjutikhanik mikhaagun tammarhimajuni inuaqtauhimajuniluunniit piqpagijainnun. Aallat ikajuitikhat tunijaujut hapkunanga FILU ilaujut takujaujukhat pitquhikkut aanniaqtailinirmun ikajuutit katimapkailutiklu qitqani ilagiit ukualu aalatqiit naunaitkutinik pihimajut.

Naunaiqhittiarumaguvit talvuuna Ilagiiktunut Naunaitkutikhat Kivgarijainut Havagvingat, qaritaujakkut titirarvigilugu @email

 

Ihuinaaqtailiqinikkut

Ihuinaaqtailiniq qujaginnaq hulidjutikhaq, piniarhimadjuti, atugakhamiluunniit piniarhimajuq mikhilaaqtirnikkut piiqtirnikkulluunniit ihuinaarutinik, ajuqhaqtitauvakhimajunut, piiffaarnikkullu. Nutqaqtitaunahuarniq ilaliutijurlu qanuriliurutikhanik pigiami pipkaidjutijunik ihuinaaqtunik hakugiktirlugu nakuujumik ilauqatauniq nunaptingni.  Uuktuutit ihuinaaqtailinikkut pinahuarutit ilaujut:

• angajuqqaanun pinahuarutit,
• ajuqiqtuijut inulramirnun,
• ningaumanikkut munariniq uqaudjinikkullu,
• aippait pimmarlungnikkut pinahuarutit,
• havaakhanun uvalu ajuiqharnikkut uukturvikhat,
• ihuaqutit aulapkariangani atuqtitpaaliriaganilu unniqtaujangini ihuinaaqtunik,
• qajangnaitikharnik aulapkaidjutikhanun, taimaitunik amigaigjuumilugit qullirnik atuqujaangat qajangnaitikharnik.

 

Ihuinaaqtailinikkut Hanaqidjutit

Tamna Nunavunmi Ihuinaaqtailinikkut Qanuriliurutikhat (2017-2022) uqautigijait hivuliit ihuinaaqtailinikkut ajuqhautit tapkua nunallaat atuqhimajait imaalu havaklugit atuqtaujut pinahuarutit. Nunallaat Maligaliqijikkut havagvia aulahimaaqtut havaqatigiblugit tigumidjutiqaqtut upalungaijaiblutik uvalu havakhugit ihuinaaqtailinikkut pinahuarutit.

Havagvik pivallialiuqtuq ihuinaaqtailinikkut parnaqutikhamik uqaqatigiplugin inungnun. Ukiungani 2013, Nunallaat maligaliqijikkut Havagvia katimapkaijut nunallaani katimapkaiblutik atauttini Nunavutim 25 nunallaani uvalu katimaqatigiblugit inuit aalatqiinik ukiuqaqtut uvalu kangiqhidjutiqaqtut tuhaalugit hunanik inuit uqaqpaktut qanuq ihuinaaqtailinirmun Nunavunmi nunamingnilu.

Nunallaani Maligaliqijikkut kivgaqtuqtit upautihimajut amigaitqijaujut saivanti-faip katimadjutainik uvalu uqaqatigiblugit amigaitut Nunavunmiut ilaujut inulramiit, inirnikhat, haamlatkut hivuliqtit, ihumaaluktut inuit, maligaliqijikkut, Nunalaani Maligaliqijikkut Katimajiit, uvalu aalat ajuittiaqhimajut. Nunallaani maligaliqijikkut katimapkaiblutik nunallaani ulapqivingni naalautikkutlu.

Tamna kangiqhidjutikhat katitiqtauhimajut hmani katimajuni katitiqtauhimajut uvani Inungnun Ilauqatigiingnikkut Unniudjutit haffumunga Ihuinaaqtailinikkut Hanaqidjutit (2015). Katimadjutit naunaijaqhimajut hapkua unniudjutaujut pidjutaujut ihuinaarnirmun Nunavunmi:

• Iglumi inaittut                                   
• havaakhailliurlutin                                          
• ikitunik taiguarnirmun uvunalu iliharnirmun nallautakgakhimajunik                   
• piqalluangilluni maniliqinirmut niqikhailliurnaittumiklu   
• nuliqinikkut ihuinaarutit uvalu ilagiit ningarnikkut (imingahunginiq idjuaqtaujullu)
• tammaqhimajaat pitquhikkut kinaunijakhamingnik, inmikkut-pijaarnirmik, havaanginun uvalu hivuliqhungnirmun
• piqalluanginmat angajuqqaangunirmik piqatigiingnirmiklu ajuitakhamingnik
• Aangajaarnaqtunik ajuqhautiqarnirmik

 

Ikajuqtigiiniq Havaakhaq

Ikajuqtigiiniq ihuinaaqtailinikkut havaakhaq pihimajuq pivallialiurnikkut nunallaani ihuinaaqtailinikkut piniarhimadjutikhanik hailihimapkainikkullu nunaptingni havaqatigiingnikkut qanuriliurutikhainnik tuninikkut ikajurutikhanik nunallaanun talvannga Nunallaani maligaliqijikkut havagvia inungnun miitirutainni.

Tamna havaakhaq pijuq naunaijaqtamingnik uumannga Inungnut Ilaupkainiq Unniudjutit piliuriami Ihuinaaqtailinikkut Qanuriliurutikhat (2015) ihuaqhijait nunallaat ilitarijaujut ihuinaaqtailiniq havauhikhat unalu nunallaani nakurudjutingit hivulliutijakhat.

Havaqatigiplugit nunamingni tigumiaqtiujut havaakhanut ilaujut, ihuinaaqtailinikkut makpiraaq piliuqtauhimajuq ikajuutikhat atulirnikhanut havaakhamut.

Atajuq Ikajuqtigiiniq Maliktakhaq

 

ihuinaaqtailiqinikkut Maniliqtuutikhat

Nunavunmi Ihuinaaqtailinirmut Maniqautit hailihimajut maniqautit ikajuutikhat ihuinaaqtailinirmut ilaujut havaakhaunimut/uukturumajanut tamainni Nunavnumi. Havaktauhimajuq amigaigjuumilugit nunallaat inuuhiqattiangniq uvalu mikhijuumirlugu pijaaqtut atauttit nakuuluangitut pijakhat tapkua pidjutiqangniaqtut ihuinaangnikkut idjuhiit uvaluuniin hulidjutit.

Manngit tunijauhimajut ukunanngat aulapkainingit tikkuaqtauhimajut ukiunnguraangat kitunuliqaak kiuvikhangit ukunanngat kavamangit hivullirijakhaat unalu/uuminngaluuniit nunalingni pijumajainnit. Imaa ittuq Nunavunmi Kavamangat naunaijaittaaqtut hivulliujukhanik, ihuanngitpat nunallaarnut nalaumanngiitutik hivulliutijukhanut, uukturutit pijaunginnarniaqtuq taapkunanga naunaiqhaijukhanit katimajiujunit. Maniliqtuutikhat tuniuqhaqpagait Havagviata Maligaliqijikkut.

Pijumajun tukhirutikhanik havaktaujukhanun piniarhimadjutikhainnunlu tunijauvaktuq ukiuq tamaat.

Tukhiutit ihivriuqtauhimajut katimajiinin ilaujut Kavamatkut Nunavunmi havaktit kitut kangiqhimajut ihuinaaqtailinikkut uvalu anginiqaqtumik havauhiit inungnun pivallianirmun nunallaani. Tamna Tuglia Ministaujup Maligaliqijikkut iihumagijaqaqtuq atuliqujaujunik kamitiujuup pipkaivlunilu kingulirmik angirunmik havaakhanik manikhaqtitaujaagani.

 

Qukiutiliritsiarniq Nunavunmi – Hiqquutinun Qajangnaitkutikhaq Nunavunmi

 

Nunallaat Maliqaliqijkkut havaliqtut ikirlijuumiriami aannirnikkut qanuriliurutiplutiklu hiqquutinik talvuunatigut Hiqquqtiutit Ihuaqtumik Nunavunmi – Hiqquqtiutit Aturnikhanik Qajarnaittumik Nunavut akhuuqhaigutaa.

Atuliqtauhimajuq Hikutirvia 2022, una iliharutikhanut akhuurutaa akhuuqhaidjutit qaujimanirmik pitqulutiklu qajangnaittumik atuqpauhikhanik, tutqungnahuagumikik hiqquqtiutit Nunavunmi. Talvuuna akhuuqhainia, ikajutikhat tunijauniaqtut akhuurutigiplugu qajarnaittumik ikirlijuummiriamilu aannirnikkut hulaqutijunilu hiqquuhiqinirmin.

Hiqquqtiutit Qajagidjutikhat Nunavunmi pinahuaqtut hakugikhijuumirlugit atuqtaujut hiqquqtiutit qajangnautikkut ilihagahat uvalu ihuaqhijuumirlugit pijaangnirit ilihaidjutit.

Paatnaqatigiplugit Hiqquuhiliqinirmun Qajarnaittumik Havagvia, Iqittiaqhimalugu Inuuhiq Katimajiita, Nunagijaujumi Apirhuijiliqiijitigut Havaktiit, Havagviit Munaqhiliqiijitkuti Ilinniaqtuliriijitkutlu, Pirurvik Katimajiitalu, hiqquuhiliqinirmun kanggiqhimajuqhat huliniaqtuni imaa piniaqtut:

• Tuniqhailutik ilihagutiqhanik kangiqhipkaidjutiqhaniklu titiqqanik tamaani Nunavunmi;
• Nunallaami hulilukaarlutik uqaqatigiiklutiklu, paatnaqatilugit Paliihimatkut nunallaamilu maligatigut tiguumidjutiqaqtunut;
• pihimaniq niuvirnikkullu laisikhaq (PAL) ilihautikhat piqatigilugin kangiqhipkaidjutin ikajuutikhat hulilukaarutin Nunavun nunallaanginni;
• hiqquutinun Qajangnaitkutikhanun Qaujihimajakhanun akitaqutautin ukununga nukakhinun angajukhinullu ilihaqtunun;
• hiqquutimun hiqurnaittumik kiluutaqaqtunik tuniuqhailutik, paanarilugin ukuat Hiqquutinun Qajangnaitkhanun Havagvia, tamainni Nunavunmi.

NAUNAIQHITTIARUMAGUVIT:

Qaritaujakkut: @email