ᐃᑦᑕᕐᓂᓴᑐᖃᑦ ᑲᑎᖅᓱᖅᑕᐅᔪᕕᓃᑦ
ᐃᑦᑕᕐᓂᓴᐃᑦ ᑲᑎᑕᐅᔪᕕᓃᑦ ᒥᒃᓵᓄᑦ
ᓄᓇᕗᑦ ᒐᕙᒪᖓᑦᑕ ᑲᑎᓯᒪᔭᖏᑦ ᐃᑦᑕᕐᓂᓴᐃᑦ ᐃᓚᖃᐅᕐᒪᑕ ᐱᖁᑎᓂᒃ ᑭᒡᒐᖅᑐᐃᓪᓗᑎᒃ ᐃᓄᖕᓂᒃ ᐊᒻᒪ ᓄᓇᒥᖔᖅᑐᓂᒃ ᓄᓇᕗᑦ ᓄᓇᖓᓂᖔᖅᓯᒪᓪᓗᑎᒃ. ᑲᑎᑕᐅᓯᒪᔪᐃᑦ ᐊᕐᕕᓂᓕᖕᓄᑦ ᐊᒡᒍᖅᑐᖅᓯᒪᐅᖅᑐᑦ: ᐃᑦᑕᕐᓂᓴᓕᕆᓂᖅ, ᐃᓕᖅᑯᓯᕐᒥᒃ ᐅᓂᒃᑳᑦ, ᓴᓇᙳᐊᖅᑕᐅᔪᑦ, ᓴᐅᓂᕕᓂᕐᓂᒃ ᐅᔭᕋᙳᖅᓯᒪᔪᓂᒃ ᖃᐅᔨᓴᕐᓂᖅ, ᐊᒻᒪᓗ ᐱᕈᖅᑐᓕᕆᓂᖅ ᐃᓚᐅᖃᑕᐅᒋᓪᓗᓂᑦᑕᐅᖅ ᐆᒪᔪᓂᒃ ᖃᐅᔨᓴᕐᓂᖅ. ᐃᓚᐃᓐᓇᖏᑦ ᐃᑦᑕᕐᓂᓴᓕᕆᓂᕐᒥᒃ ᑲᑎᑕᐅᓯᒪᔪᐃᑦ ᓇᖕᒥᓂᕆᔭᐅᔪᑦ ᐃᓄᐃᑦ ᐃᑦᑕᕐᓂᓴᓕᕆᔨᒃᑯᑦ ᑲᑎᒪᔨᖏᓐᓄᑦ.
ᐃᑦᑕᕐᓂᓴᐃᑦ ᑲᑎᑕᐅᓯᒪᔪᑦ ᐊᔾᔨᒌᙱᑦᑐᓂ ᑎᒥᐅᔪᓂ ᑐᖅᑯᖅᓯᒪᖃᑦᑕᓚᐅᖅᑐᑦ ᐊᔾᔨᒌᙱᑦᑐᑎᒍᑦ ᐊᖏᕈᑎᓄᑦ. ᐅᓄᕐᓂᖅᓴᐃᑦ ᑲᑎᑕᐅᓯᒪᔪᑦ ᒫᓐᓇ ᐃᓂᖃᖅᑎᑕᐅᔪᑦ ᑲᓇᑕᒥᑦ ᓄᓇᒥᙶᖅᑐᓂ ᑕᑯᔭᒐᖃᕐᕕᖓᓂ. 2015−ᖑᓚᐅᕐᓂᖓᓂᑦ, ᑕᒪᒃᑯᐊ ᓴᓇᔭᐅᓯᒪᔪᑦ ᑲᑎᑕᐅᓯᒪᔪᑦ ᐃᓂᖃᖅᑎᑕᐅᓯᒪᕗᑦ ᐅᐃᓂᐹᒡᒥ ᓴᓇᔭᐅᓯᒪᔪᓄᑦ ᑕᑯᔭᒐᕋᕐᕕᖕᒥ (WAG−ᒥ). ᑖᑯᓇᓂ ᑲᑎᓯᒪᔪᓂ ᐃᑦᑕᕐᓂᓴᐃᑦ ᑕᒪᐃᓐᓂᑲᓴᑦᑎᐊᖅ ᓄᓇᓕᖕᓂᖔᖅᑐᑦ ᓄᓇᕗᒻᒥ, ᐃᓚᖃᖅᖢᑎᒃ ᖃᓪᓗᓈᖅᑕᓂᒃ ᓴᓇᓯᒪᔪᑦ, ᓴᓇᙳᐊᒐᐃᑦ, ᑎᑎᖅᑐᒐᖅᓯᒪᔪᑦ, ᑎᑎᕋᐅᔭᒐᐃᑦ, ᓯᖁᒥᔭᑦᑐᑦ ᐊᒻᒪᓗ ᐱᐅᓴᐅᑏᑦ ᓲᕐᓗ ᓯᐅᒻᒥᖔᑦ ᓇᒡᒍᐊᕐᒦᓪᓗ.
ᐃᓄᖕᓄᑦ ᓴᓇᙳᐊᖅᑕᐅᓯᒪᔪᑦ ᑲᑎᑕᐅᓯᒪᔪᑦ
ᐃᓄᐃᑦ ᓄᓇᕗᒻᒥᐅᑦ ᐊᒃᖢᙱᑦᑑᖕᒪᑕ ᓴᓇᓯᑎᐅᔪᑐᖃᐅᓪᓗᑎᒃ ᐱᔪᓐᓇᖅᑑᓪᓗᑎᒃ. ᐃᓄᐃᑦ ᐃᓕᖅᑯᓯᖓᑦ, ᐅᓂᒃᑳᖅᑐᐊᑦ ᐊᒻᒪᓗ ᐅᑭᐅᖅᑕᖅᑐᒥᐅᑕᐅᓂᑎᒃ ᐊᔾᔨᐅᙱᑦᑑᓂᕐᒥᓄᑦ ᓴᓇᐅᒐᖏᑦ ᐱᐅᔪᐊᓘᖕᒪᑕ ᓄᓇᕐᔪᐊᓕᒫᒥᓗ ᐊᔾᔨᖃᕋᑎᒃ. ᐃᓄᐃᑦ ᐊᕙᑎᙱᓐᓂᖔᖅᑐᓂᒃ ᐊᑐᖅᖢᑎᒃ ᓴᓇᐅᒐᓕᐅᖃᑦᑕᖅᑐᑐᖃᐅᓕᖅᑐᐃᑦ ᒥᓕᐊᓐᓄᑦ ᐅᑭᐅᓄᑦ.
ᐃᓕᓴᕆᔭᐅᓯᒪᓕᓚᐅᖅᓯᒪᕗᑦ ᐃᓄᐃᑦ ᓴᓇᐅᒐᓕᐊᕆᕙᒃᑕᖏᑦ 1940 ᐅᑭᐅᖏᑦ ᐊᑐᖅᑎᓪᓗᒋᑦ. ᑕᐃᒪᙵᓂᑦ, ᖃᓪᓗᓈᖅᑕᒥᒃ ᓴᓇᐅᒐᐃᑦ, ᑎᑎᖅᑐᒐᐃᑦ, ᓴᓇᙳᐊᖅᑕᐅᓯᒪᔪᑦ, ᐱᐅᓴᐅᑏᑦ ᓲᕐᓗ ᐅᔭᒦᑦ ᓇᒡᒍᐊᕐᒦᓪᓗ, ᑕᒪᒃᑯᐊ ᐃᓕᓴᕆᔭᐅᓯᒪᓕᕐᒪᑕ ᓄᓇᕐᔪᐊᓕᒫᒥ ᐃᓄᖕᓂᖔᕐᓂᖏᓐᓂᒃ. ᐅᓂᒃᑳᖅᑐᐊᓕᕆᓂᖅ, ᑲᑕᔾᔭᕐᓂᖅ ᕿᐊᕐᕚᕐᓂᕐᓘᓃᑦ, ᐊᒻᒪ ᕿᓚᐅᔾᔭᕐᓂᖅ ᐃᓕᖅᑯᓯᑐᖃᕆᔭᐅᓂᖏᓐᓂᒃᑕᐅᖅ ᐃᓕᓴᕆᔭᐅᓯᒪᒋᕗᑦ ᓄᓇᕗᒻᒥᐅᑦ ᐃᓄᖁᑎᖏᓐᓂᖔᕐᓂᖏᓐᓂᒃ.
ᐃᓄᖕᓄᑦ ᓴᓇᐅᒐᐃᑦ ᓄᓇᕗᒻᒥ ᑲᑎᑕᐅᓯᒪᓕᖅᑐᑦ ᐃᓕᖅᑯᓯᑐᖃᕕᓂᐅᔪᖅ ᐊᒻᒪᓗ ᐅᓪᓗᒥᓯᐅᑏᑦ ᓴᓇᕐᕈᑏᑦ ᐊᑐᖅᑕᐅᕙᓕᖅᖢᑎᒃ. ᓄᑖᑦ ᐊᒻᒪ ᐃᑦᑕᕐᓂᓴᐅᓂᖅᓴᐃᑦ ᑲᑎᑕᐅᓪᓗᑎᒃ ᐃᓕᖅᑯᓯᑐᖃᐅᒋᕗᖅ ᐃᓄᑐᖃᕐᓄᑦ ᒪᒃᑯᒃᑐᓄᓪᓗ ᓴᓇᔪᓐᓇᖅᖢᑎᒃ ᐱᐅᔪᕐᔪᐊᓂᒃ ᐊᔾᔨᐅᙱᑦᑐᒻᒪᕆᐊᓗᖕᓂᒃ, ᐃᓱᒪᒋᔭᐅᓇᔭᙱᑦᑐᓂᒃ ᑕᒪᒃᑯᐊᓗ ᓄᓇᕗᒻᒥᐅᑕᓪᓚᕆᐅᓪᓗᑎᒃ ᓴᓇᐅᒐᓕᐊᖑᕙᒃᑐᑦ.
ᓴᓇᐅᒐᓕᐊᖑᖃᑦᑕᕐᓂᑯᐃᑦ 1960−ᖏᓐᓂᖔᖅᑐᑦ ᐅᓪᓗᒥᒧᑦ ᑎᑭᖦᖢᑎᒃ, ᑕᐅᓴᙱᓐᓃᑦᑐᓂᒃ ᓴᓇᙳᐊᒐᖃᖅᖢᓂ, ᑎᑎᖅᑐᒐᐃᑦ, ᑎᑎᕋᐅᔭᖅᓯᒪᔪᐃᑦ ᐊᒻᒪ ᖃᓪᓗᓈᖅᑕᒥᒃ ᓴᓇᐅᒐᐃᑦ ᓯᓚᖅᔪᐊᕐᒥᐅᓄᑦ ᐃᓕᓴᕆᔭᐅᓯᒪᓕᖅᑐᓄᑦ ᓴᓇᐅᒐᐅᓪᓗᑎᒃ ᓲᕐᓗ ᕿᓐᓅᔪᐊᖅ ᐋᓯᕙᒃ, ᐅᓱᐃᑦᑐᖅ ᐊᐃᐱᓕ, ᔭᓯ ᐅᓈᖅ, ᑲᓈᖏᓐᓇᖅ ᐳᑐᒍᖅ, ᐹ, ᐸᐅᑕ ᓴᐃᓚ, ᐊᒻᒪ ᐊᐃᕇᓐ ᐊᕚᓚᕿᐊᖅ ᑎᒃᑖᓛᕐᒧᑦ ᓴᓇᔭᐅᓚᐅᖅᓯᒪᔪᐃᑦ. ᓴᓇᐅᒐᓕᐊᖑᔪᕕᓃᑦ ᐊᑐᐃᓐᓇᐅᓕᖅᐸᑕ ᐱᕕᖃᕈᑕᐅᔪᓐᓇᖅᓯᓂᐊᕐᒪᑦ ᐱᐅᔫᑎᐊᓗᐃᑦ ᐃᓄᖕᓄᑦ ᓴᓇᐅᒐᐃᑦ ᑕᑯᔭᒃᓴᐅᓕᕐᓗᑎᒃ, ᐃᓕᓐᓂᐊᕈᑎᒃᓴᓕᐅᕈᑕᐅᔪᓐᓇᖅᓯᓗᑎᒃ, ᐊᒻᒪᑦᑕᐅᖅ ᐃᓄᖕᓄᑦ ᓴᓇᙳᐊᖅᐸᒃᑐᓄᑦ ᓴᓇᐅᒐᓕᐅᕈᓘᔭᖅᐸᒃᑐᓄᓪᓗ ᖃᐅᔨᕝᕕᐅᒃᑲᓐᓂᕈᓐᓇᖅᓯᓗᓂ ᖃᓄᒃᑲᓐᓂᖅ ᓴᓇᔪᓐᓇᕐᓂᕐᒥᒃ ᐊᒻᒪᓗ ᐃᓱᒻᒪᒍᑕᐅᒃᑲᓐᓂᕈᓐᓇᕐᓂᐊᕐᒪᑦ ᓄᑖᖑᓂᖅᓴᓄᑦ ᓴᓇᐅᒐᓕᐅᖅᑎᓄᑦ.
ᐊᔾᔨᙳᐊᓄᑦ ᕿᒥᕐᕈᐊᕆᐊᖅᑐᕐᕕᒃ
ᐃᓕᖅᑯᓯᓕᕆᔨᒃᑯᑦ ᐃᑭᐊᖅᑭᕕᖓᓅᖅᑐᒃᓴᖅ, ᔮᓐᓄᐊᓕ 2017
2015−ᖑᑎᓪᓗᒍ ᐊᖏᖃᑎᒌᖕᓂᖃᓚᐅᖅᑐᖅ ᐃᓕᖅᑯᓯᓕᕆᔨᒃᑯᑦ ᐊᒻᒪ ᐅᐃᓂᐸᐃᒥ ᓴᓈᓄᑦ ᑕᑯᔭᒐᖃᕐᕕᖕᒥᐅᓂᒃ ᐃᒡᓗᒃᓴᖅᑖᕋᓱᐊᖅᖢᑎᒃ ᓴᓇᐅᒐᓕᐊᖑᓯᒪᔪᑦ ᐃᓂᒃᓴᕆᔪᓐᓇᕋᔭᖅᑕᖓᓄᑦ ᑖᒃᑯᐊ 7000−ᖑᓪᓗᐊᖅᑐᑦ ᓄᓇᕗᒻᒥᐅᓄᑦ ᓴᓇᔭᐅᖃᑦᑕᕐᓂᑯᐃᑦ. ᑕᒪᒃᑐᖃ ᓴᓇᐅᒐᐃᑦ ᐊᑯᓂᐅᔪᒧᑦ−ᐊᑐᖅᑐᐊᖅᑕᐅᓂᐊᖅᑐᑦ ᐅᐃᓂᐸᐃᒡᒥ ᑕᑯᔭᒐᖃᕐᕕᖏᓐᓂ ᐅᑭᐅᓄᑦ ᑕᓪᓕᒪᓄᑦ.
ᓯᕗᓪᓕᖅᐹᑦᑎᐊᒥ ᑕᐃᒪᙵᑦ ᓴᖅᑭᓚᐅᖅᓯᒪᑎᓪᓗᒍ ᓄᓇᕗᑦ ᑕᒪᒃᑯᐊ ᓴᓇᐅᒐᐃᑦ ᑐᖅᑯᖅᓯᒪᑐᐃᓐᓇᕈᓐᓃᖅᖢᑎᒃ ᐱᕕᒃᑖᕈᑕᐅᓯᒪᖕᒪᑕ ᐃᓄᖕᓄᑦ ᓴᓇᙳᐊᖅᑎᓄᑦ ᓴᓇᐅᒐᓕᐅᖅᐸᒃᑐᓄᓪᓗ, ᐃᓕᖅᑯᓯᓕᕆᔨᒃᑯᓐᓂ ᐊᒻᒪᓗ ᐅᐃᓂᐸᐃᒡᒥ ᑕᑯᔭᒐᖃᕐᕕᓕᕆᔨᓄᑦ ᑲᑐᔾᔨᖃᑎᒌᒍᑕᐅᓪᓗᓂ.
ᖃᐅᒪᔪᖅ, ᑕᐃᔭᐅᖃᑦᑕᓚᐅᖅᓯᒪᔪᖅ ᐅᐃᓂᐸᐃᒡᒥ ᓴᓇᔭᐅᓯᒪᔪᓄᑦ ᑕᑯᔭᒐᖃᕐᕕᒃ, ᒪᒃᐱᕐᕕᒃᓴᐅᑎᖃᕐᒪᑦ 2021−ᒥ ᐃᒡᓗᕐᔪᐊᖅᑖᕐᓗᓂᓗ 40,000-ᓂᒃ ᑭᑉᐹᕆᑦᑐᓂᒃ ᐃᓯᒐᓂᒃ ᑕᑯᕝᕕᐅᔪᓐᓇᖅᓯᓂᐊᕐᒪᑦ ᓄᓇᕗᒻᒥᐅᓄᑦ ᓴᓇᐅᒐᓕᐊᖑᔪᕕᓂᕐᓂᒃ.
ᐅᐃᓂᐸᐃᒥ ᓴᓈᓄᑦ ᑕᑯᔭᒐᖃᕐᕕᒃ ᐃᑭᐊᖅᑭᕕᖓ
ᖃᕆᓴᐅᔭᑎᒍᑦ ᑕᑯᔭᒃᓴᐅᓕᖅᑎᑦᑎᓂᖅ
ᓄᓇᕗᑦ ᒐᕙᒪᖓᑦ ᒫᓐᓇᐅᔪᖅ ᐱᒋᐊᖅᓯᒪᓕᖅᑐᑦ ᑕᑯᔭᒃᓴᐅᓕᕐᓂᐊᕐᒪᑕ ᑕᒪᒃᑯᐊ ᓴᓇᐅᒐᐃᑦ ᖃᕆᓴᐅᔭᐅᑉ ᐃᑭᐊᖅᑭᕕᖓᑎᒍᑦ ᓴᖅᑭᑦᑐᓐᓇᕐᓂᐊᕐᒪᑕ. ᓂᕆᐅᒃᐳᒍᑦ ᐃᓄᐃᑦ ᓄᓇᕗᒻᒥᐅᖑᔪᑦ ᐊᒻᒪ ᓇᒥᑐᐃᓐᓇᑦᑎᐊᖅ ᓄᓇᕐᔪᐊᕐᒥᐅᑦ ᖁᕕᐊᓲᑎᖃᖃᑕᐅᔪᓐᓇᕐᓂᐊᕐᒪᑕ ᐃᑦᑕᕐᓂᓴᖁᑎᖏᓐᓂᒃ ᓄᓇᕗᒻᒥᖔᖅᑐᓂᒃ. ᓅᑕᐅᓂᕆᔭᖓ ᐊᒻᒪ ᐊᔾᔨᙳᐊᓕᐊᖑᕙᓪᓕᐊᓂᖏᑦ ᑲᑎᑕᐅᓯᒪᔪᐃᑦ ᐃᖏᕐᕋᓂᖃᐃᓐᓇᕈᓐᓇᕐᓂᐊᕐᒪᑦ ᐊᑏ ᖃᐅᔨᒋᐊᖃᑦᑕᕐᓂᐊᖅᐳᓯ ᓄᑖᖅᑕᖃᓕᕐᒪᖔᖅ ᑕᑯᔭᒃᓴᓂ.
ᑐᓂᓯᓂᖅ
ᑐᓂᓯᔪᒪᓐᓂᕈᕕᑦ ᓴᓇᐅᒐᕐᓂᒃ ᐅᕝᕙᓘᓃᑦ ᓴᓇᙳᐊᒐᕐᓂᒃ ᐸᐸᑦᑎᒍᕕᑦ ᑐᓂᔪᒪᓗᒍᓗ, ᐊᑏ ᐅᑯᐊ ᑐᓴᖅᑎᓐᓂᐊᖅᐸᑎᑦ ᐃᑦᑕᕐᓂᓴᓕᕆᔨᒃᑯ ᐅᕙᓂ
ᑐᑭᓯᒋᐊᒃᑲᓐᓂᕈᒪᒍᕕᑦ ᑲᑎᑕᐅᓯᒪᔪᐃᑦ ᓴᓇᐅᒐᐃᑦ ᒥᒃᓵᓄᑦ ᐅᕗᖓ ᑕᑯᒋᐊᕈᓐᓇᖅᐳᑎᑦ [email protected]
ᐃᑦᑕᕐᓂᓴᓕᕆᔨᒃᑯᑦ
ᐊᐅᓚᑦᑎᔨ, ᐃᑦᑕᕐᓂᓴᓂᑦ ᑲᑎᑕᐅᓯᒪᔪᓄᑦ
ᕕᐅᓪ ᐃᓐᔅ
ᐅᖄᓚᐅᑎᖓ: 867-934-2045
ᐃᕐᖏᓇᑯᑦ: PInnes@gov.nu.ca