ᐋᖅᑭᐅᒪᑎᑦᑎᔨᐅᑉ ᐱᓕᕆᐊᖏᑦ

ᐋᖅᑭᐅᒪᑎᑦᑎᔨᐅᑉ ᐱᓕᕆᐊᖏᑦ

ᐋᖅᑭᐅᒪᑎᑦᑎᔨ ᑎᓕᔭᐅᓲᖑᕗᖅ ᒪᓕᒐᓕᐅᕐᕕᖕᒥᐅᓂᒃ (ᓯᕗᓕᖅᑏᑦ ᑲᑎᒪᔨᖓᑦᑕ ᑲᒥᓯᓇᖓᓐᓄᑦ) ᑮᓇᐅᔭᓕᕆᔨᒃᑯᑦ ᒥᓂᔅᑕᖓᑦᑕ ᐱᖁᔨᕗᖔᓕᐊᕆᑐᐊᖅᐸᒍ. ᓄᓇᕗᑦ ᒐᕙᒪᒃᑯᓐᓄᑦ ᐃᖅᑲᓇᐃᔭᖅᑎᐅᙱᑦᑐᖅ ᑎᑎᕋᕐᕕᖃᖅᖢᓂᓗ ᐃᖅᑲᓇᐃᔮᕇᓐᓇᖅᖢᓂᐅᒡᓗ ᐊᕐᕌᒍᓄᑦ ᑕᓪᓕᒪᓄᑦ.

ᐋᖅᑭᐅᒪᑎᑦᑎᔨᐅᑉ ᐱᔪᓐᓇᕐᓂᖏᑦ

ᐋᖅᑭᐅᒪᑎᑦᑎᔨ ᐱᔪᓐᓇᕐᓂᖃᕐᔪᐊᖅᑐᐊᓗᒃ ᖃᐅᔨᓴᕈᓐᓇᑦᑎᐊᖅᖢᓂ. ᐱᔪᓐᓇᕐᓂᖃᖃᑕᐅᔪᖅ ᐃᖅᑲᖅᑐᐃᕕᒃᑰᕆᐊᓕᖕᓂᒃ ᑎᑎᖅᑲᓂᒃ ᐅᖃᖅᓯᒪᔪᓂᒃ ᖃᐅᔨᔾᔪᑎᒃᓴᓂᒡᓗ ᑎᑎᕋᖃᑦᑕᖁᔨᓪᓗᓂ ᐱᔪᓐᓇᕐᓂᖃᖅᖢᓂᓗ ᑎᑎᖅᑲᑦ ᓴᖅᑭᑕᐅᖁᔪᓐᓇᖅᖢᓂᒋᑦ.

ᐋᖅᑭᐅᒪᑎᑦᑎᔨ ᐃᒪᐃᓕᐅᑐᐃᓐᓇᕆᐊᖃᖅᐳᖅ, ᖃᓄᑐᐃᓐᓇᖅ ᖃᐅᔨᓴᖅᑎᓪᓗᒍ, ᐃᓯᕈᓐᓇᖅᐳᖅ ᓄᓇᕗᑦ ᒐᕙᒪᒃᑯᑦ ᓇᓕᐊᑐᐃᓐᓇᖅ ᐃᖅᑲᓇᐃᔭᕐᕕᖓᓐᓄᑦ.

ᐋᖅᑭᐅᒪᑎᑦᑎᔨ ᐃᓱᒪᓕᐅᕆᖃᑦᑕᕐᓂᐊᖅᐳᖅ ᖃᐅᔨᓴᖅᑕᐅᔭᕆᐊᓕᒃ ᐱᓕᕆᐊᖑᓂᐊᕐᒪᖔᑦ ᐃᓄᑑᓗᑎᒃ ᐅᕝᕙᓘᓐᓃᑦ ᐃᓄᖕᓂᒃ ᐃᓚᖃᕐᓗᑎᒃ.

ᐊᖓᔪᖅᑳᑉ ᑐᒡᓕᐊ ᐃᓚᐅᑦᑎᐊᕆᐊᖃᖅᐳᖅ ᖃᐅᔨᒪᔨᒋᔭᐅᓂᐊᕐᒪᑦ ᐃᖅᑲᓇᐃᔭᖅᑎᖓ ᐃᓚᐅᑦᑎᐊᕋᓗᐊᕐᒪᖔᑦ ᐋᖅᑭᐅᒪᑎᑦᑎᔨ ᖃᐅᔨᓴᖅᐸᓪᓕᐊᑎᓪᓗᒍ. ᐃᓚᐅᙱᑐᐊᖅᐸᑦ ᐱᕋᔭᖕᓂᐅᓇᔭᕐᒪᑦ ᐊᑭᓖᑎᑕᐅᔭᕆᐊᖃᕋᔭᖅᖢᓂᓗ $10,000.-ᒧᑦ ᑎᑭᓪᓗᒍ.

ᐃᖅᑲᓇᐃᔭᖅᑎᒥᒃ ᑐᑭᓯᒋᐊᒐᒃᓴᖅᑕᖃᑦᑎᐊᕆᐊᖃᖅᐳᖅ ᐋᖅᑭᐅᒪᑎᑦᑎᔨᒧᑦ ᑐᒃᓯᕋᐅᑕᐅᓯᒪᔪᓂᒃ. ᑐᑭᓯᒋᐊᕈᑎᒃᓴᖃᙱᑉᐸᑦ ᐱᕋᔭᖕᓂᐅᓇᔭᕐᒪᑦ ᐊᑭᓖᑎᑕᐅᒃᑲᓐᓂᕆᐊᖃᕋᔭᖅᐳᕐᓗ $5,000.-ᒧᑦ ᑎᑭᓪᓗᒍ.

ᒫᓐᓇ ᐋᖅᑭᐅᒪᑎᑦᑎᔨ ᔫᓯᐱ ᐹᓪ ᒨᑖᒃ−ᕙᓚᐅᔅ−ᕙᓚᐅᔅ.  ᐊᕐᕌᒍᓄᑦ ᑕᓪᓕᒪᓄᑦ ᑎᒃᑯᐊᖅᑕᐅᓂᖓ ᐊᑐᓕᓚᐅᖅᐳᖅ ᕕᕗᐊᕆ 20, 2024−ᒥ.  ᒪᓕᒐᓕᕆᔨᐅᓂᕐᒧᑦ ᐃᓕᓐᓂᐊᖅᑕᒥᓂᒃ ᐊᓂᒍᐃᓯᒪᔪᖅ ᒪᒋᐅᓪ ᓯᓚᑦᑐᖅᓴᕐᕕᒡᔪᐊᕐᒥ ᐊᒻᒪ ᒪᓕᒐᓕᕆᔨᐅᓂᕐᒥᒃ ᐊᔪᕈᓐᓃᖅᓴᖅᖢᓂ, ᒨᑖᒃ−ᕙᓚᐅᔅ ᐱᓕᕆᔭᕆᐅᖅᓴᑎᑦᑎᑦᑎᐊᓲᖑᕗᖅ ᐊᒻᒪ ᓄᓇᕗᒻᒥ ᓄᓇᖃᖅᖢᓂ. ᒫᓐᓇᒫᖑᓚᐅᖅᑐᖅ, ᒨᑖᒃ-ᕙᓚᐅᔅ ᐃᖅᑲᓇᐃᔭᖅᓯᒪᕗᖅ ᑲᓇᑕᒥ ᐃᖅᑲᖅᑐᐃᕕᒃᑯᑎᒎᖅᑐᓂᒃ, ᑲᓇᑕᒥ ᒐᕙᒪᒃᑯᓐᓄᑦ. ᓯᕗᓂᐊᒍᑦ, ᐃᖅᑲᓇᐃᔭᖃᑦᑕᖅᓯᒪᔪᖅ ᐃᖅᑲᖅᑐᐃᕕᒃᑯᑎᒎᖅᑎᑦᑎᓪᓗᓂ ᒪᓕᒐᓕᕆᓂᕐᒧᑦ ᑲᑎᒪᔨᖏᓐᓄᑦ ᓄᓇᕗᒻᒥ ᐊᒻᒪᓗ ᐃᖅᑲᖅᑐᐃᔨᒻᒪᕆᐅᑲᐃᓐᓇᖅᑐᓂ ᓄᓇᕗᒻᒥ ᐃᖅᑲᖅᑐᐃᔨᒃᑯᓐᓄᑦ.