ᐃᓄᒋᐊᑦᑐᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᔨᑦᓯᕋᕈᑎᓄᑦ ᐊᐅᓚᑦᓯᔨ
ᐅᓇ ᐃᖅᑲᓇᐃᔮᒃᓴᖅ ᐃᖃᓗᖕᒥᐅᓄᑐᐊᖅ ᑐᕌᖓᔪᖅ.
ᐅᓂᒃᑳᖅᐸᓪᓗᓂ ᓄᓇᕗᒻᒥ ᑐᑭᒧᐊᑦᑎᑦᓯᔨᖓᓄᑦ, ᐃᓄᒋᐊᑦᑐᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ, ᐃᓄᒋᐊᑦᑐᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᔨᑦᓯᕋᕈᑎᓄᑦ ᐊᐅᓚᑦᓯᔨ (ᐊᐅᓚᑦᓯᔨ) ᐊᐅᓚᑦᓯᔨᐅᕗᖅ ᑮᓇᐅᔭᓕᕆᓕᕐᒧᓪᓗ ᐃᑲᔪᖅᑎᐅᑦᓱᓂ ᐃᓄᒋᐊᑦᑐᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᕝᕕᒻᒧᑦ (PHD) ᐱᓕᕆᐊᑦᓴᓄᑦ ᐱᔨᑦᓯᕋᐅᑎᓄᓪᓗ. ᐊᐅᓚᑦᓯᔨ ᑲᒪᒋᔭᖃᕐᓂᐊᖅᑐᖅ ᑐᑭᒧᐊᑦᑎᑦᓯᓂᕐᒧᑦ, ᐊᓪᓚᕝᕕᓕᕆᓂᕐᒧᑦ, ᑮᓇᐅᔭᓕᕆᓂᕐᒧᓪᓗ ᐋᖅᑭᑦᓯᒪᓂᖏᓐᓄᑦ ᐱᓕᕆᐊᑦᓴᐃᑦ ᐃᓄᒋᐊᑦᑐᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᕝᕕᒻᒧᑦ ᑲᔪᓯᑎᑦᓯᓂᕐᒧᑦ ᓄᓇᕗᒻᒥ. ᑖᒃᑯᐊ ᐱᓕᕆᐊᑦᓴᐃᑦ ᐃᓚᖃᖅᑐᑦ, ᑭᓯᐊᓂ ᑭᓪᓕᖃᖅᑎᑕᐅᖏᑦᑐᖅ ᑐᕝᕚᑲᓄᑦ ᓱᕐᕋᓐᓇᖅᑐᓄᓪᓗ, ᐋᓐᓂᐊᖅᑕᐃᓕᒪᓂᕐᒥᑦ ᐅᔾᔨᕐᓇᖅᓯᑎᑦᑎᓂᖅ, ᓄᓇᓕᓐᓂ ᖃᓄᐃᙱᑦᓯᐊᓂᕐᒧᑦ ᓂᕿᑦᓯᐊᕙᓕᕆᓂᕐᒧ ᑦ ᐊᒻᒪ ᓄᓇᓕᖕᓂ ᐱᔪᓐᓇᕐᓂᕆᔭᐅᔪᖅ.
ᐱᔾᔪᑎᖓ ᑖᑦᓱᒪ ᐃᖅᑲᓇᐃᔮᑉ ᓇᓗᓇᐃᖅᓯᓂᕐᒧᑦ ᐊᓪᓚᕝᕕᒻᒥ ᓱᓕᕆᓂᐅᔪᑦ ᑮᓇᐅᔭᓕᕆᓂᕐᒧᓪᓗ ᐊᑭᓕᐅᑎᐅᔪᑦ ᐃᓄᒋᐊᑦᑐᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᕝᕕᒻᒧᑦ ᑎᑎᕋᖅᑕᐅᓯᐊᕋᓗᐊᕐᒪᖔᑕ, ᑐᔾᔭᖅᑕᐅᓯᒪᔪᑦ ᖃᐅᔨᓴᖅᑕᐅᓯᒪᔪᓪᓗ. ᐊᐅᓚᑦᓯᔨ ᑲᒪᒋᔭᖃᕐᓂᐊᖅᑐᖅ ᐊᑐᐃᓐᓇᐅᑎᑦᓯᓂᕐᒧᑦ ᐊᔪᕆᖅᓱᐃᔨᐅᓂᕐᒥᒃ ᐃᓄᒋᐊᑦᑐᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᕝᕕᐅᑉ ᐊᐅᓚᑦᓯᔨᖏᓐᓄᑦ ᑮᓇᐅᔭᓄᑦ ᐊᑐᖅᑐᑦᓴᓄᑦ ᑮᓇᐅᔭᓕᕆᓂᕐᒧᓪᓗ ᑲᔪᓯᑎᑕᐅᓂᖏᓐᓄᑦ. ᐊᐅᓚᑦᓯᔨ ᑲᒪᒋᔭᖃᕐᓂᐊᖅᑐᖅ ᑎᑎᕋᖅᑕᐅᓯᒪᔪᓂᒃ, ᖃᐅᔨᒪᔭᐅᓂᖏᓐᓄᑦ ᐊᖏᕈᑎᓕᕆᓂᕐᓄᑦ ᐊᐅᓚᑦᓯᕙᓪᓗᓂᓗ ᓄᓇᕗᑦ ᓯᓚᑖᓂ ᓂᐅᕕᖅᑎᑦᑎᔨᓂᒃ ᐊᒻᒪ ᓄᓇᕘᒥ ᓄᓇᓕᓐᓂᓗ ᓂᐅᕕᖅᑎᑦᑎᔨᓂᒃ ᐊᑐᐃᓐᓇᐅᑎᑦᑎᓲᓂᒃ ᐊᖏᕈᑎᓂᒃ ᐃᑲᔪᖅᑐᐃᕙᑦᑐᑦ ᐃᓄᒋᐊᑦᑐᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᕝᕕᒻᒧᑦ.
ᐊᐅᓚᑦᓯᔨ ᑲᒪᒋᔭᖃᕐᓂᐊᕐᒥᔪᖅ ᐱᕙᓪᓕᐊᑎᑦᓯᓂᕐᒥᑦ ᐱᓕᕆᐊᑦᓴᓄᑦ ᑎᓕᓯᔾᔪᑎᓂᑦ, ᐊᑭᓕᕆᐊᓕᓐᓂᑦ, ᐊᖏᕈᑎᓕᕆᓂᕐᓄᑦ ᐊᒻᒪ LCA ᐅᖃᓕᒫᒐᕐᓂᑦ, ᕿᒥᕐᕈᓂᕐᒥᑦ ᐃᓘᓐᓇᖏᓐᓂᑦ ᐊᑭᓕᖅᑕᐅᔪᒪᔾᔪᑎᓂᑦ, ᖃᐅᔨᓴᕐᓂᕐᒥᓪᓗ PHD ᑮᓇᐅᔭᓂᑦ ᐊᑐᖅᑐᑦᓴᓂᑦ ᐊᑐᐃᓐᓇᐅᑎᑦᓯᓂᕐᒥᓪᓗ ᓄᑖᙳᕆᐊᖅᓯᒪᔪᓂᑦ, ᑭᒡᓕᓯᓂᐊᕈᑎᓂᑦ, ᐊᖓᔪᖅᑳᖃᕐᓂᕐᒥᓪᓗ ᐊᐅᓚᑦᓯᔨᒧᑦ. ᐊᓯᖏᑦ ᐱᓕᕆᐊᒃᓴᑦ ᒪᑯᐊᖑᓪᓗᑎᒃ ᓇᓗᓇᐃᖅᓯᕙᒡᓗᓂ ᐊᒻᒪ ᐊᐅᓚᑦᑎᕙᒡᓗᓂ ᐱᓕᕆᔾᔪᓯᕐᓂᒃ ᖃᐅᔨᓴᖅᐸᒡᓗᒋᑦ ᒪᓕᑦᑎᐊᖅᑐᑦ ᐊᒻᒪ ᑎᑎᕋᖅᓯᒪᔪᑦ ᑕᒻᒪᖅᓯᒪᙱᒃᑲᓗᐊᕐᒪᖔᑕ, ᖃᐅᔨᓴᖅᐸᒡᓗᒋᑦ ᐊᑭᓕᖅᓱᕆᐊᓕᑦ ᐊᒻᒪ PHD−ᒧᑦ ᐊᒃᑐᐊᓂᓖᑦ ᑮᓇᐅᔭᑦ ᐊᑐᖅᑕᐅᔪᑦ, ᐊᒻᒪ ᐋᖅᑭᒡᓗᒋᑦ PHD ᐱᓕᕆᐊᓄᑦ ᑮᓇᐅᔭᑦ ᐊᑐᖅᑐᒃᓴᑦ ᐊᒻᒪᓗ ᖃᐅᔨᓴᕋᔪᒡᓗᒋᑦ ᑮᓇᐅᔭᑦ ᑎᑎᕋᖅᓯᒪᔪᑦ ᐃᓱᒪᖅᓲᑕᐅᓗᑎᒃ ᐊᐅᓚᑦᑎᔨᒧᑦ.
ᖃᐅᔨᒪᓂᖏᑦ, ᐊᔪᙱᓐᓂᖏᑦ, ᐱᔪᓐᓇᕐᓂᕆᔭᕆᐊᖃᖅᑕᖏᓪᓗ ᐃᖅᑲᓇᐃᔮᒧᑦ ᐱᔭᐅᒐᔪᒃᐳᑦ ᐃᓕᓴᕆᔭᐅᓯᒪᔪᒃᑯᑦ ᐊᓂᒍᐃᔾᔪᑎᑖᕐᓂᕐᒥᑦ ᓇᖕᒥᓂᕐᒥ ᐊᐅᓚᑦᑎᔨᐅᓂᕐᒧᑦ/ᑮᓇᐅᔭᓕᕆᔨᐅᓂᕐᒧᑦ, ᑮᓇᐅᔭᓕᕆᔨᐅᓂᕐᒧᑦ ᐊᔾᔨᐸᓗᖓᓂᓘᓐᓃᑦ, ᐃᓚᖃᕐᓗᒍᑦ ᐅᑭᐅᑦ ᒪᕐᕉᒃ ᐊᔾᔨᐸᓗᖓᓂ ᑮᓇᐅᔭᖅᑑᑎᓕᕆᔨᐅᓂᕐᒧᑦ, ᑮᓇᐅᔭᓕᕆᔨᐅᓂᕐᒧᑦ ᑮᓇᐅᔭᓂᒡᓗ ᐊᐅᓚᑦᑎᔨᐅᓂᕐᒧᑦ ᐃᖅᑲᓇᐃᔭᕐᓂᑰᓗᓂᑦ.
ᐅᖃᐅᓰᑦ ᐃᓕᓴᕆᔭᐅᓯᒪᔪᑦ ᓄᓇᕗᒻᒥ ᐅᑯᐊᖑᕗᑦ ᐃᓄᒃᑐᑦ, ᖃᓪᓗᓈᑎᑐᑦ ᐅᐃᕖᑎᑐᓪᓗ. ᐱᓇᔪᒃᑐᑦ ᐃᖅᑲᓇᐃᔮᖅᑖᕋᓱᐊᕈᑎᒥᑦ ᑎᑎᕋᕈᓐᓇᖅᑐᖅ ᓂᕈᐊᕆᔭᒥᓂᑦ ᐃᓕᓴᕆᔭᐅᓯᒪᔪᓂᑦ ᐅᖃᐅᓯᕐᒥᑦ ᓄᓇᕗᒻᒥ. ᐅᖃᕈᓐᓇᖅᐸᑦ ᐊᑕᐅᓯᐅᙱᑦᑐᒥᒃ ᓄᓇᕗᒻᒥ ᐅᖃᐅᓯᕐᓂᑦ ᐃᑲᔫᑎᖃᑦᑎᐊᕋᔭᖅᑐᖅ. ᖃᐅᔨᒪᒃᐸᑦ ᐃᓄᐃᑦ ᓄᓇᓕᓐᓂ, ᐃᓕᖅᑯᓯᖏᓐᓂᒃ, ᓄᓇᒥᑦ, ᐃᓄᐃᑦ ᖃᐅᔨᒪᔭᑐᖃᖏᓐᓂᑦ ᐃᓄᒃᑐᑦ ᐱᓕᕆᖃᑦᑕᖅᓯᒪᓗᓂᓪᓗ ᐅᑭᐅᖅᑕᖅᑐᒥ ᐃᓕᖅᑯᓯᖃᖃᑎᒌᙱᑦᑐᓂ ᐃᑲᔫᑎᖃᑦᑎᐊᕋᔭᕐᒥᔪᖅ.
ᐊᔾᔨᐸᓗᖏᓐᓂᒡᓘᓐᓃᑦ ᐃᓕᓐᓂᐊᖅᓯᒪᓗᓂ ᐱᓕᕆᖃᑦᑕᖅᓯᒪᓂᑰᓗᓂᓘᓐᓃᑦ ᐃᓱᒪᒋᔭᐅᓂᐊᖅᑐᑦ ᑖᑦᓱᒧᖓ ᐃᖅᑲᓇᐃᔮᖅᒧᑦ. ᑎᓕᐅᕆᑲᓐᓂᖅᑐᒍᑦ ᐱᓇᓱᐊᖁᔨᑦᓱᑕ ᐃᓕᓐᓂᑦ ᓇᓕᒧᓱᑦᑐᓂᑦ ᐊᕐᕌᒍᓂᑦ ᐃᓕᓐᓂᐊᖅᓯᒪᒍᕕᑦ ᐊᒻᒪᓗ/ᐅᕝᕙᓘᓐᓃᑦ ᐱᓕᕆᖃᑦᑕᖅᓯᒪᓂᕐᒧᑦ ᐃᓕᓐᓂᐊᖅᓯᒪᓂᕐᒧᑦ ᐱᓕᕆᖃᑦᑕᖅᓯᒪᓂᕐᒧᓪᓗ ᐱᔭᕆᐊᖃᖅᑐᓂᑦ ᖁᓛᓂᑦ ᑎᑎᕋᖅᓯᒪᔪᓂᑦ.
ᐃᖅᑲᓇᐃᔮᖅᑖᕋᓱᒃᑐᓄᑦ ᐊᑏᑦ ᐃᓚᔭᐅᑐᐃᓐᓇᕆᐊᓕᒃ ᓯᕗᓂᒃᓴᒥ ᐃᖅᑲᓇᐃᔮᒃᓴᓄᑦ ᐃᓄᒃᑕᐅᒋᐊᖃᓕᕐᓂᖅᐸᑦ ᓇᐅᑦᑎᐅᒪᖃᑕᐅᓛᕐᒪᑦ.
ᑖᔅᓱᒥᖓ ᐃᖅᑲᓇᐃᔮᒃᓴᒥᑦ ᐆᒃᑐᕈᒪᒍᕕᑦ, ᐃᕐᖐᓐᓈᖅᑕᐅᒃᑯᑦ ᑎᑎᕋᕐᓗᑎᑦ ᐃᖅᑲᓇᐃᔮᒧᑦ ᐱᔪᒥᓴᐅᑎᑦ ᓇᒃᓯᐅᑎᓗᒍ ᐅᕗᖓ @email. ᐃᓚᓕᐅᑎᓯᒪᓗᒍ ᓇᓗᓇᐃᒃᑯᑖᑕ ᓈᓴᐅᑖ ᐱᔾᔪᑎᒋᔭᖓᓄᑦ ᐃᕐᖐᓐᓈᖅᑕᐅᑎᖕᓂ.
- ᓄᓇᕗᑦ ᒐᕙᒪᒃᑯᖏᑦ ᐱᓕᕆᓇᓱᓪᓚᕆᖕᒪᑕ ᓴᖅᑭᑦᑎᓂᖅᓴᐅᓇᓱᒃᖢᑎᒃ ᑭᒡᒐᖅᑐᐃᓂᕐᒥᑦ ᐃᖅᑲᓇᐃᔭᖅᑎᓂᒃ, ᑕᐃᒪᐃᓐᓂᖓᓄᑦ ᓄᓇᕗᒻᒥ ᐃᓄᐃᑦ ᓯᕗᓪᓕᐅᔾᔭᐅᓂᐊᖅᑐᑦ ᓇᒻᒥᓂᖅ-ᓇᓗᓇᐃᖅᓯᔪᑦ ᐊᑎᓕᐅᖅᑕᐅᖃᑕᐅᓯᒪᓂᖏᓐᓂᒃ ᓄᓇᕗᒻᒥ ᐊᖏᕈᑎᒧᑦ ᒪᓕᒡᓗᒍ ᓯᕗᓪᓕᐅᔾᔭᐅᔭᕆᐊᓖᑦ ᐃᖅᑲᓇᐃᔭᑖᕐᓂᕐᒧᑦ ᐊᑐᐊᒐᐃᑦ.
- ᒐᕙᒃᑯᓐᓂᑦ ᓄᓇᕗᒻᒥ ᐃᖅᑲᓇᐃᔭᖅᑏᑦ ᖃᐅᔨᓴᖅᑕᐅᓂᕐᒦᑦᑐᑦ ᐱᔭᕆᐊᖃᖅᑐᑦ ᐊᑐᐃᓐᓇᐅᑎᑦᑎᓂᕐᒥᓪᓗ ᐱᔪᓐᓇᖅᑎᑕᐅᓂᕐᒧᑦ ᒥᓂᔅᑕᐅᑉ ᑐᒡᓕᐊᑕ ᐊᖓᔪᖅᑳᖓᓐᓂᑦ ᐃᖅᑲᓇᐃᔭᕐᕕᒋᔭᖓᑕ ᐱᓕᕆᕝᕕᖓᓂᑦ. ᐱᔪᓐᓇᖅᑎᑕᐅᓂᕐᒧᑦ ᒥᓂᔅᑕᐅᑉ ᑐᒡᓕᐊᑕ ᐊᖓᔪᖅᑳᖓᓂᙶᖅᑐᖅ ᐃᖅᑲᓇᐃᔮᖅᑖᕋᓲᑎᖕᓄᑦ ᐊᑕᔭᕆᐊᓕᒃ ᐃᓱᒪᒋᔭᐅᓂᐊᕐᒪᑦ.
- ᐱᕋᔭᓚᐅᖅᓯᒪᓂᕐᒧᑦ ᑎᑎᖅᑲᖁᑎᓕᔭᖅᑐᑦ ᐊᔪᓕᕈᑕᐅᙱᑐᐃᓐᓇᕆᐊᓕᒃ ᐆᒃᑐᕐᓂᕆᔭᖏᑦ ᐃᓱᒪᒋᔭᐅᓂᖏᓐᓄᑦ. ᖃᐅᔨᓴᖅᑕᐅᓂᖏᑦ ᐱᕋᔭᓚᐅᖅᓯᒪᓂᕐᒧᑦ ᑎᑎᖅᑲᖁᑎᒋᔭᐅᔪᑦ ᖃᐅᔨᔭᐅᓇᓱᖕᓂᐊᖅᐳᑦ ᐱᓕᕆᐊᒃᓴᕆᔭᐅᔪᑦ ᐃᖅᑲᓇᐃᔮᒃᓴᒥ. ᑖᓐᓇ ᐱᔭᐅᔭᕆᐊᖃᖅᐳᖅ ᐃᖅᑲᓇᐃᔮᒃᓴᓄᑦ ᐱᔭᕆᐊᖃᖅᑐᓄᑦ ᓈᒻᒪᒋᔭᐅᔪᓂᒃ ᐱᕋᔭᓚᐅᖅᓯᒪᓂᕐᒧᑦ ᑎᑎᖅᑲᖁᑎᓕᔭᖅᑐᓄᑦ ᐅᕝᕙᓘᓐᓃᑦ ᐊᒃᑐᖅᑕᐅᓴᕋᐃᓐᓂᖅᓴᓂᒃ ᑲᒪᔪᓐᓇᕐᒪᖔᑦ ᖃᐅᔨᓴᖅᑕᐅᒋᐊᖃᖅᑐᖅ.
- ᐃᖅᑲᓇᐃᔭᖅᑖᕋᓱᒃᑐᑦ ᐃᖅᑲᓇᐃᔭᖅᑖᕋᓱᐊᕈᑎᒥᒃ ᑎᑎᕋᕈᓐᓇᖅᑐᑦ ᓂᕈᐊᕆᔭᖏᓐᓂᑦ ᐃᓕᓴᕆᔭᐅᓯᒪᔪᓂᑦ ᐅᖃᐅᓯᕐᒥᑦ ᓄᓇᕗᒻᒥ.
- ᐆᒃᑐᖅᑐᑦ ᓂᕈᐊᖅᑕᐅᔪᑐᐊᑦ ᐊᐱᖅᓱᖅᑕᐅᔪᒪᓗᑎᒃ ᑐᓴᖅᑎᑕᐅᓂᐊᖅᐳᑦ.
- ᑎᒍᒥᐊᖅᑐᖅ ᐱᓇᔪᒃᑐᓂᒃ ᐱᔭᐅᓚᐅᕐᓗᓂ ᑲᓇᑕᐅᑉ ᓯᓚᑖᓂ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᕈᑎᖏᑦᑕ ᓇᓕᖅᑲᖏᑦ ᑲᓇᑕᐅᑉ ᓯᓚᑖᓂ ᓇᓕᖅᑲᖏᑦ ᖃᐅᔨᓴᖅᑕᐅᓇᔭᖅᐳᑦ ᐃᓕᑕᕆᔭᐅᓯᒪᔪᒃᑯᑦ ᑲᓇᑕᒥ ᐃᓕᓐᓂᐊᕐᕕᖕᒥ. ᑕᐃᒪᐃᓕᐅᙱᒃᑯᕕᑦ ᐃᒻᒪᖄ ᐱᓇᔪᒃᑕᑦ ᐋᒃᑳᖅᑕᐅᑐᐃᓐᓇᕆᐊᓕᒃ.