ᓯᕗᓪᓕᐅᑎᓐᓂᐊᖅᑕᕗᑦ
ᓇᓗᓇᐃᖅᓯᓯᒪᔪᒍᑦ ᑕᓪᓕᒪᓂᒃ ᑐᐊᕕᕐᓇᖅᑐᓂᒃ ᓯᕗᓪᓕᐅᑎᒍᒪᔭᑦᑎᓐᓂᒃ ᐊᑑᑎᖃᑦᓯᐊᖅᑐᒃᑯᑦ ᐱᐅᓯᕚᓪᓕᖅᑕᐅᒍᓐᓇᖁᓪᓗᒋᑦ ᐃᓅᓯᖏᑦ ᓄᓇᕗᒻᒥᐅᑦ ᐊᕐᕌᒎᓂᐊᖅᑐᓂᒃ ᓯᑕᒪᓂᒃ ᑐᙵᕕᓕᐅᕐᓗᑕᓗ ᐋᖅᑭᒋᐊᖅᓯᓂᕐᒧᑦ ᐊᓯᔾᔨᖅᑕᐅᒍᑎᓂᒃ ᓯᕗᕚᑦᓴᑎᓐᓄᑦ:
- ᐃᓐᓇᒻᒪᕆᕈᖅᐸᓪᓕᐊᓂᖅ ᐅᐱᒋᔭᐅᓂᒃᑯᑦ ᓄᓇᕗᒻᒥ;
- ᐊᒥᓱᕐᖑᕆᐊᖅᓯᓂᖅ ᐃᓪᓗᓕᕆᓂᕐᒧᑦ ᐊᔾᔨᒌᙱᑦᑐᓂᒃ ᐊᑐᐃᓐᓇᐅᒍᓐᓇᖅᑐᓂᒃ;
- ᐱᔪᓐᓇᕐᓂᖅᑖᖅᑎᑦᓯᓂᖅ ᐋᓐᓂᐊᖃᕐᓇᖏᑦᑐᓕᕆᓂᒃᑯᑦ
- ᖃᓄᐃᑦᑕᐃᓕᑎᑦᓯᓂᕐᒧ ᒪᒥᓴᕐᓂᒧᓪᓗ;
- ᑮᓇᐅᔭᖃᖅᑎᑦᓯᒋᐊᒃᑲᓐᓂᕐᓂᖅ ᐃᓕᓐᓂᐊᖅᑐᓕᕆᓂᕐᒧᑦ; ᐊᒻᒪᓗ
- ᐊᔾᔨᒌᙱᑦᑐᓂᒃ ᓴᖅᑭᖅᑎᑦᓯᓂᖅ ᓄᓇᓕᓐᓂ ᑮᓇᐅᔭᓕᐅᕈᑕᐅᒍᓐᓇᖅᑐᓂᒃ.
ᓯᕗᒧᒋᐊᕈᑎᖃᕐᓗᑎᒃ ᖃᓄᖅᑑᕈᑕᐅᓯᒪᔪᓂᒃ ᓴᖅᑭᖅᑎᑦᓯᓂᕐᒧᑦ ᐊᑐᓂᑦ ᓯᕗᓪᓕᐅᑎᒍᒪᔭᑦᑎᓐᓄᑦ ᑲᒪᒋᔭᖃᕐᓗᑎᒃ ᐊᒥᒐᖅᓯᔪᓂᒃ ᓄᓇᕗᒻᒥ ᐃᓄᐃᑦ ᐃᖅᑲᓇᐃᔭᖅᑎᖏᓐᓂᒃ ᐊᑭᑐᔫᑎᓂᓪᓗ. ᑐᙵᕕᓕᒃ ᐊᑎᖅᑎᑦᓯᓂᕐᒧᑦ ᑐᙵᕕᓕᐅᒃᑲᓐᓂᕐᓂᕐᒧᓪᓗ ᐃᓄᐃᑦ ᑭᓇᐅᓂᖏᓐᓂᒃ. ᐅᑯᐊ ᓯᕗᓪᓕᐅᑎᓐᓂᐊᖅᑕᕗᑦ:
- ᐃᓄᐃᑦ ᐅᖃᐅᓯᖏᑦ ᐃᓕᖅᑯᓯᖏᓪᓗ ᓴᙱᓕᖅᑎᑕᐅᒋᐊᖁᓪᓗᒍ ᑐᙵᕕᕗᑦ ᓴᐱᓕᖅᑕᐃᓕᒍᓐᓇᓂᕗᓪᓗ;
- ᐃᓕᓐᓂᐊᖅᑐᓕᕆᓂᖅ ᐱᓕᒻᒪᑦᓴᐃᓂᕐᓗ ᐃᖅᑲᓇᐃᔮᓄᑦ ᑐᕌᖅᑐᓂᒃ ᓇᒻᒥᓂᕐᓗ ᒪᑭᑕᒍᓐᓇᓂᕐᒧᑦ; ᐊᒻᒪᓗ
- ᓴᓇᑐᓂᖃᕐᓗᑎᒃ ᐃᓪᓗᓕᐅᕈᓯᖏᓐᓂᒃ ᐊᐅᓚᑦᓯᐊᒃᑲᓐᓂᕐᓂᖃᖁᓪᓗᒍ ᐊᑭᑭᓪᓕᒋᐊᖁᓪᓗᒋᓪᓗ ᐊᑭᑐᔫᑎᓂᒃ ᐱᓕᕆᐊᖏᓐᓂᒃ ᖃᓄᐃᖏᑦᓯᐊᖁᓪᓗᒋᑦ ᓄᓇᓖᑦ ᐱᕙᓪᓕᐊᔪᓕᕆᓂᕐᓗ.
ᐃᓐᓇᒻᒪᕆᕈᖅᐸᓪᓕᐊᓂᖅ ᐅᐱᒋᔭᐅᓂᒃᑯᑦ ᓄᓇᕗᒻᒥ
ᑮᓇᐅᔭᖃᖅᑎᑦᓯᓂᐊᖅᑐᒍᑦ ᐃᑉᐱᒋᔭᐅᑦᓯᐊᕈᑎᓂᒃ ᐃᓐᓇᒻᒪᕆᕈᖅᐸᓪᓕᐊᔪᓄᑦ ᓄᓇᕗᒻᒥᐅᓄᑦ ᐊᓈᓇᑦᓯᐊᕗᑦ ᐊᑖᑕᑦᓯᐊᕗᑦ ᐊᖏᔪᖅᑳᕆᔭᕗᓪᓗ ᐃᓅᓯᖃᑦᓯᐊᕈᓐᓇᖁᓪᓗᒋᑦ ᑭᖑᓪᓕᖅᐹᖏᓐᓂ ᐅᐱᒍᓱᓐᓂᖃᑦᓯᐊᕐᓗᑎᒃ, ᖃᓂᓐᓂᖅᓴᐅᓗᑎᒃ ᐃᓚᒥᓐᓄᑦ ᓄᓇᕗᒻᒥ
ᖃᓄᖅᑑᕈᑕᐅᓯᒪᓗᑎᒃ ᓴᖅᑭᖅᑕᐅᒍᒪᔪᑦ
- ᐱᐅᓯᕚᓪᓕᖅᑕᐅᓗᑎᒃ ᐅᓪᓗᑕᒫᑦ ᐃᓅᓯᖏᑦ ᓄᓇᕗᒻᒥᐅᑦ ᐃᓐᓇᒻᒪᕆᕈᖅᐸᓪᓕᐊᔪᑦ
- ᐱᕚᓪᓕᖅᑕᐅᒋᐊᕐᓗᑎᒃ ᐅᑯᓂᐅᔪᒧᑦ ᓯᕗᓂᑦᓴᑎᓐᓄᑦ ᐃᓐᓇᒃᑯᕖᑦ ᐃᑲᔪᖅᑕᐅᒍᑎᖏᓪᓗ ᐃᒻᒥᒃᑯᑦ ᐊᖏᕐᕋᖅᓯᒪᒍᓐᓇᖁᓪᓗᒋᑦ
- ᖃᑦᓰᓐᓇᐅᓂᖅᓴᐃᑦ ᐃᓄᐃᑦ ᐃᓐᓇᒻᒪᕇᑦ ᓄᑦᑎᖅᑕᐅᖃᑦᑕᕐᓗᑎᒃ ᐊᖏᕐᕋᖏᓐᓂ ᓄᓇᓕᖏᓐᓂ
- ᐊᒥᓲᓂᖅᓴᐃᑦ ᐃᓄᐃᑦ ᐃᖅᑲᓇᐃᔭᖅᑎᑕᐅᓗᑎᒃ ᐃᑉᐱᒋᔭᖃᖅᑎᐅᓂᕐᒧᑦ ᐃᓐᓇᒻᒪᕆᓐᓂᒃ
- ᐱᐅᓂᖅᓴᓂᒃ ᐃᓱᒪᓕᕆᓂᕐᒧᑦ ᐃᑲᔫᑎᑦ, ᑎᒥᒥᒍᑦ ᖃᓄᐃᑦᑕᐃᓕᒍᑏᑦ, ᐃᓅᓯᖃᑦᓯᐊᕈᓐᓇᖁᓪᓗᒋᓪᓗ ᐃᓐᓇᒻᒪᕆᕈᖅᐸᓪᓕᐊᔪᑦ
- ᑲᑐᔾᔨᖃᑎᒌᖃᑎᖃᕐᓗᑎᒃ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ, ᓄᓇᓕᓐᓂᒃ, ᑮᓇᐅᔭᓕᐅᕋᓱᐊᖅᑎᐅᙱᑦᑐᓂᓪᓗ ᓄᓇᕗᒻᒥᐅᑦ ᐃᓐᓇᒻᒪᕆᕈᖅᐸᓪᓕᐊᒍᓐᓇᖁᓪᓗᒋᑦ ᐅᐱᒍᓱᓐᓂᒃᑯᑦ ᐃᑉᐱᒋᔭᐅᑦᓯᐊᕐᓂᒃᑯᓪᓗ
ᖃᓄᐃᓕᒋᐊᕈᑕᐅᓂᐊᖅᑐᖅ ᓯᕗᒧᒋᐊᕈᓐᓇᖁᓪᓗᒋᑦ ᓴᖅᑭᖅᑕᐅᖁᔭᐅᔪᓄᑦ
ᐃᒪᐃᓕᐅᕐᓂᐊᖅᑐᒍᑦ:
- ᐋᖅᑭᑦᓱᐃᓗᑎᒃ ᐊᑕᖏᖅᑐᒥᒃ ᐃᓐᓇᒻᒪᕆᓐᓂᒃ ᐃᑉᐱᒋᔭᖃᕐᓂᕐᒧᑦ ᖃᓄᖅᑑᕈᑎ ᐊᑐᓕᖅᑎᑕᐅᓗᓂᓗ ᐸᕐᓇᐅᑎ ᑐᓴᕆᐊᕐᕕᖃᖅᓯᒪᓗᑎᒃ ᐃᓐᓇᒻᒪᕆᓐᓂᒃ, ᐃᓚᒌᓂᒃ, ᓄᓇᓕᓐᓂᒃ, ᑲᑐᔾᔨᖃᑎᖏᓐᓂᓪᓗ
- ᓱᒃᑲᓕᒋᐊᖅᑎᑕᐅᓗᓂ ᓴᓇᔭᐅᒋᐊᖃᕐᓂᖏᑦ ᐊᕕᑦᑐᖅᓯᒪᓂᐅᔪᓂ ᐃᓐᓇᒃᑯᕖᑦ ᐊᖑᒻᒪᑎᒍᓐᓇᖁᓪᓗᒋᑦ ᐃᑲᔪᖅᑕᐅᒍᑎᐅᒋᐊᓖᑦ ᓄᓇᕗᒻᒥᐅᓄᑦ ᐃᑉᐱᒋᔭᐅᒋᐊᖃᓪᓚᕆᑦᑐᓄᑦ
- ᐊᖏᓪᓕᒋᐊᖅᑕᐅᓗᑎᒃ ᐊᒻᒪᓗ/ᐅᕝᕙᓗ ᓄᑖᕐᖑᕆᐊᖅᑕᐅᓗᑎᒃ ᐃᓐᓇᒃᑯᕕᐅᕙᒌᖅᑐᑦ
- ᐊᑐᐃᓐᓇᐅᑎᑦᓯᓗᑎᒃ ᐃᓕᖅᑯᓯᑦᑎᓐᓄᑦ ᑐᕌᖓᔪᓂᒃ- ᐅᖃᐅᓯᑦᑎᓄᓪᓗ ᑐᕌᖓᔪᓂᒃ ᐱᓕᒻᒪᑦᓴᐃᓂᕐᒧᑦ ᐃᖅᑲᓇᐃᔭᖅᑎᖏᓐᓂᒃ ᐃᓐᓇᒃᑯᕕᓐᓂ
- ᐱᕚᓪᓕᖅᑎᑕᐅᓗᑎᒃ ᐃᑲᔫᑎᐅᔪᑦ ᐱᐅᓯᕚᓪᓕᖅᑕᐅᖁᓪᓗᒋᑦ ᐅᓪᓗᑕᒫᑦ ᐃᓅᓯᖏᑦ ᐃᓐᓇᒃᑯᕕᓐᓂ
- ᐊᔭᐅᖅᑐᐃᒍᑎᖃᕐᓗᑎᒃ ᓄᓇᓕᓐᓂ ᐱᒋᐊᖅᑕᐅᓯᒪᔪᓂᒃ ᐱᓕᕆᐊᓂᒃ ᐃᓐᓇᒻᒪᕆᓐᓄᑦ ᐱᓕᕆᐊᑦᓴᖃᖅᑎᑦᓯᒍᑕᐅᔪᑦ ᐃᑲᔫᑎᐅᔪᓪᓗ ᐃᒻᒥᒃᑯᑦ ᐅᕝᕙᓗ ᐃᑲᔪᖅᑕᐅᓗᑎᒃ ᐊᖏᕐᕋᖅᓯᒪᒍᓐᓇᖁᓪᓗᒋᑦ
- ᐱᔪᓐᓇᖅᑎᑕᐅᓗᑎᒃ ᐃᓐᓇᒻᒪᕇᑦ ᐊᑐᐃᓐᓇᖃᖅᑎᑕᐅᒋᐊᖃᕐᓂᖏᑦ ᐃᓄᓕᖅᑕᓂᒃ ᓂᕿᓂᒃ
ᖃᓄᐃᓕᒋᐊᕈᑕᐅᓯᒪᒌᖅᑐᑦ:
ᐃᒪᐃᓕᐅᕐᓂᐊᖅᑐᒍᑦ:
- ᐱᔭᕇᖅᑕᐅᓗᑎᒃ ᓄᑖᕐᖑᕆᐊᖅᑕᐅᓂᖓ ᒪᑐᐃᖅᑕᐅᒃᑲᓐᓂᕐᓗᓂᓗ ᐃᖃᓗᓐᓂ ᐃᓐᓇᒃᑯᕕᒃ ᐅᑎᖅᑎᑕᐅᖁᓪᓗᒋᑦ ᐃᓐᓇᒻᒪᕇᑦ;
- ᓴᓇᓗᑎᒃ ᐸᕐᓇᑕᐅᓯᒪᔪᑦ ᐃᓐᓇᒃᑯᕕᒃ ᑲᖏᖅᖠᓂᕐᒥ; ᐊᒻᒪᓗ
- ᓱᒃᑲᓕᔭᐅᒋᐊᕐᓗᓂ ᐱᕙᓪᓕᐊᑎᑕᐅᓂᖏᑦ ᐱᔾᔪᑎᖃᕐᓗᑎᒃ ᐃᓪᓕᐅᖅᑕᐅᒋᐊᓖᑦ ᐃᓐᓇᒻᒪᕆᓐᓄᑦ.
ᐊᒥᓱᕐᖑᕆᐊᖅᓯᓂᖅ ᐃᓪᓗᓕᕆᓂᕐᒧᑦ ᐊᔾᔨᒌᙱᑦᑐᓂᒃ ᐊᑐᐃᓐᓇᐅᒍᓐᓇᖅᑐᓂᒃ
ᑮᓇᐅᔭᖃᖅᑎᑦᓯᓂᐊᖅᑐᒍᑦ ᓄᑖᓂᒃ ᐃᓪᓗᓕᐅᕈᓯᕐᓄᑦ ᑲᑐᔾᔨᖃᑎᖃᕐᓗᑕᓗ ᐊᒥᓱᕐᖑᕆᐊᖅᑕᐅᒍᓐᓇᖁᓪᓗᒋᑦ ᐊᔾᔨᒌᙱᑦᑑᑏᑦ ᐃᓪᓗᖃᕈᑕᐅᒍᓐᓇᖅᑐᑦ ᓇᓖᕌᕈᑎᑦᓴᐃᑦ ᐊᑐᐃᓐᓇᐅᒍᓐᓇᖅᑐᓄᑦ ᓄᓇᕗᒻᒥᐅᓄᑦ.
ᖃᓄᖅᑑᕈᑕᐅᓯᒪᓗᑎᒃ ᓴᖅᑭᖅᑕᐅᒍᒪᔪᑦ
- ᖃᑦᓰᓐᓇᕈᕆᐊᖅᑕᐅᓗᑎᒃ ᐊᖏᕐᕋᖃᙱᑦᑐᑦ
- ᐱᑕᖃᒃᑲᓐᓂᓕᕐᓗᑎᒃ ᐃᓚᒌᓄᑦ ᐋᓐᓂᖅᑎᖅᑕᐅᕙᑦᑐᓄᑦ ᕿᒫᕖᑦ, ᒪᒃᑯᑦᑐᓄᑦ ᕿᒫᕖᑦ, ᐊᖏᕐᕋᖃᙱᑦᑐᓄᑦ ᐃᓪᓗᒋᔭᐅᑲᐃᓐᓇᕈᓐᓇᖅᑐᑦ
- 1,000 ᐃᓪᓗᐃᑦ ᖃᓄᐃᑦᑐᑐᐃᓐᓇᐃᑦ ᐃᓚᔭᐅᓗᑎᒃ ᐊᑭᑐᓗᐊᙱᑦᑐᓄᑦ ᐃᓪᓗᓕᕆᓂᕐᒧᑦ ᐊᔾᔨᒌᙱᑦᑐᓂᓪᓗ ᐃᓪᓗᖃᖅᑎᑦᓯᓂᕐᒧᑦ ᓇᓖᕌᕈᑎᑦᓴᖃᒃᑲᓐᓂᓕᕐᓗᓂ
- ᐊᒥᓲᓂᖅᓴᐃᑦ ᓄᓇᕗᒻᒥᐅᑦ ᐊᑐᖅᑐᐊᕈᓐᓇᕐᓗᑎᒃ ᓂᐅᕕᕈᓐᓇᕐᓗᑎᓪᓘᓐᓃᑦ ᓇᒻᒥᓂ ᐃᓪᓗᒥᓐᓂᒃ
- ᐊᒥᓱᕐᖑᕆᐊᖅᑕᐅᓗᑎᒃ ᐃᖅᑲᓇᐃᔭᖅᑎᑕᐅᓂᖏᑦ ᐃᓄᐃᑦ ᓄᓇᓕᓐᓂ ᐃᓪᓗᓕᐅᖅᑎᓂ ᓴᓇᒋᐊᖅᑎᐅᔪᓂᓗ
- ᑲᑐᔾᔨᖃᑎᒌᕋᑎᖃᕐᓗᑎᒃ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ, ᓇᒻᒥᓂᖃᖅᑎᐅᔪᓂᒃ, ᐊᓯᖏᓐᓂᓪᓗ ᖁᑦᑎᓐᓂᓕᕇᓂᑦ ᒐᕙᒪᓂᒃ ᐊᒥᓱᕐᖑᕆᐊᖅᑕᐅᖁᓪᓗᒋᑦ ᐃᓪᓗᖃᖅᑎᑦᓯᓂᖏᑦ
ᖃᓄᐃᓕᒋᐊᕈᑕᐅᓂᐊᖅᑐᖅ ᓯᕗᒧᒋᐊᕈᓐᓇᖁᓪᓗᒋᑦ ᓴᖅᑭᖅᑕᐅᖁᔭᐅᔪᓄᑦ
ᐃᒪᐃᓕᐅᕐᓂᐊᖅᑐᒍᑦ:
- ᓇᓗᓇᐃᔭᐃᓗᑎᒃ ᓇᓖᕌᕈᑎᑦᓴᓂᒃ ᐃᓪᓗᓕᕆᓂᕐᒧᑦ ᐊᖏᕐᕋᖃᙱᑦᑐᓄᑦ ᑲᑐᔾᔨᖃᑎᖃᕐᓗᑎᒃ ᓄᓇᓕᓐᓂ ᑲᑐᔾᔨᖃᑎᖏᓐᓂᓪᓗ ᐊᔪᖅᓴᓗᐊᕈᓐᓃᖅᑎᑦᓯᒐᓱᐊᕐᓂᕐᒧᑦ
- ᐱᐅᓯᕚᓪᓕᖅᑕᐅᓗᑎᒃ ᒪᓕᑦᑕᐅᒋᐊᓖᑦ ᐊᑐᖅᑐᐊᒐᕐᓂᒃ ᐃᓪᓗᑖᖅᑎᑦᓯᖃᑦᑕᓂᕐᒧᑦ ᓄᓇᕗᒻᒥᐅᓄᑦ
- ᕿᒥᕐᕈᐃᓗᑎᒃ ᐱᐅᓯᕚᓪᓕᖅᑎᑦᓯᓗᑎᓪᓗ ᐊᐅᓚᑕᐅᓂᖏᓐᓂᒃ ᓄᓇᕗᑦ ᒐᕙᒪᒃᑯᖏᓐᓂ ᐃᖅᑲᓇᐃᔭᖅᑎᓄᑦ ᐃᓪᓗᖃᖅᑎᑦᓯᓂᕐᒧᑦ
- ᓯᕗᓪᓕᐅᑎᔭᐅᒋᐊᓖᑦ ᓇᓗᓇᐃᔭᖅᑕᐅᓗᑎᒃ ᖃᓄᐃᓕᒋᐊᕈᑎᐅᓂᐊᖅᑐᑦ ᓄᓇᕗᒻᒥᐅᑦ ᓄᑦᑎᖃᑦᑕᕐᓂᖏᑦ ᓄᓇᕗᑦ ᒐᕙᒪᒃᑯᖏᓐᓂ ᐃᖅᑲᓇᐃᔭᖅᑎᓄᑦ ᐃᓪᓗᖏᓐᓂᒃ ᑭᒃᑯᑐᐃᓐᓇᐃᑦ ᐊᑐᖅᑐᐊᒐᖏᓐᓄᑦ ᐃᓪᓗᓄᑦ ᐊᑭᑐᓗᐊᙱᑦᑐᓄᑦ ᐊᑐᖅᑐᐊᒐᕐᓄᑦ ᐃᓪᓗᓄᑦ ᓇᒻᒥᓂᕐᓘᓐᓃᑦ ᐊᖏᕐᕋᖏᓐᓄᑦ
- ᐱᐅᓯᕚᓪᓕᖅᑕᐅᓗᑎᒃ ᑮᓇᐅᔭᖃᖅᑎᑕᐅᒃᑲᓐᓂᕐᓗᑎᓪᓗ ᓇᒻᒥᓂᖅ ᐃᓪᓗᑖᕈᓐᓇᓂᕐᒧᑦ ᐃᑲᔫᑎᑦ
- ᓄᑖᕐᖑᕆᐊᖅᑕᐅᓗᑎᒃ ᐊᓯᖏᓐᓄᓪᓗ ᐱᔾᔪᑎᑖᖅᑎᑕᐅᓗᑎᒃ ᐃᓪᓗᕐᔪᐊᑦ ᐊᑐᖅᑕᐅᒍᓐᓇᖅᓯᖁᓪᓗᒋᑦ ᐃᓪᓗᑦᓴᖃᖅᑎᑦᓯᓂᕐᒧᑦ
- ᑲᔪᖏᖅᓴᐃᓗᑎᒃ ᐊᑐᖅᑕᐅᖁᓪᓗᒋᑦ ᐃᓄᐃᑦ ᐃᖅᑲᓇᐃᔭᖅᑏᑦ ᐃᓪᓗᓕᐅᖃᑦᑕᑎᓪᓗᒋᑦ ᓴᓇᒋᐊᖃᑦᑕᑎᓪᓗᒋᓪᓗ
- ᓯᕗᓪᓕᐅᔭᐅᒋᐊᓖᑦ ᓇᓗᓇᐃᔭᖅᑕᐅᓗᑎᒃ ᐱᓕᕆᐊᑦ ᑳᓐᑐᕌᓕᕆᔾᔪᓯᐅᔪᓪᓗ ᐃᓚᒋᔭᐅᓗᑎᒃ ᑲᑐᔾᔨᖃᑎᒋᕙᑦᑕᖏᑦ, ᐃᑲᔪᖅᓱᐃᓗᑎᒃ ᓄᓇᓕᓐᓂ ᓇᒻᒥᓂᖃᖅᑎᐅᔪᓂᒃ, ᐃᓚᒋᐊᖅᓯᓗᑎᒃ ᓄᓇᓕᓐᓂ ᑮᓇᐅᔭᓕᐅᕈᑕᐅᒍᓐᓇᖅᑐᓂᒃ, ᐊᔾᔨᐅᙱᑦᑐᓂᓪᓗ ᐱᓕᕆᔾᔪᓯᑖᕐᓗᑎᒃ ᑲᒪᒋᔭᖃᖅᑎᓪᓗᒋᑦ ᓄᓇᓕᓐᓂ ᐱᔪᓐᓇᕐᓂᖏᓐᓂᒃ ᐱᔭᕆᐊᓕᖏᓐᓂᓪᓗ
ᖃᓄᐃᓕᒋᐊᕈᑕᐅᓯᒪᒌᖅᑐᑦ:
ᐃᒪᐃᓕᐅᕐᓂᐊᖅᑐᒍᑦ:
- ᑲᔪᓯᒍᑎᖃᕐᓗᑎᒃ ᐃᓚᓯᕙᓪᓕᐊᓂᖏᑦ ᐊᑭᑐᓗᐊᙱᑦᑐᓂᒃ, ᑲᑎᙵᔪᓂᒃ ᐃᓪᓗᓂᒃ ᐃᑲᔪᖅᑕᐅᓗᑎᒃ ᒐᕙᒪᑐᖃᒃᑯᓐᓂᒃ ᑮᓇᐅᔭᖃᖅᑎᑕᐅᓂᒃᑯᑦ ᐊᑭᓕᖃᓯᐅᑎᔭᐅᖃᑦᑕᕐᓗᑎᒃ ᓄᓇᑖᖃᑦᑕᕐᓂᖏᑦ ᐃᓪᓗᓕᐅᕐᕕᑦᓴᓂᒃ, ᓄᑖᕐᖑᕆᐊᖅᑕᐅᓗᑎᒃ ᐃᓪᓗᕐᔪᐊᑦ, ᓴᓇᓗᑎᓪᓗ ᐃᓪᓗᓂᒃ; ᐊᒻᒪᓗ
- ᐱᕚᓪᓕᖅᑎᑕᐅᒋᐊᕐᓗᑎᒃ ᓴᓇᔪᓕᕆᓂᕐᒧᑦ ᐱᓕᒻᒪᑦᓴᐃᖃᑦᑕᓂᕐᒥᒃ ᐃᖅᑲᓇᐃᔭᖅᓯᓐᓈᖅᑐᓂᓪᓗ ᐃᓕᓐᓂᐊᖅᑎᑦᓯᓂᕐᒧᑦ ᓄᓇᓕᓐᓂ ᐃᓪᓗᓕᐅᖃᑦᑕᕐᓂᐊᖅᑎᓪᓗᒋᑦ ᓴᓇᒋᐊᖃᑦᑕᕐᓂᐊᖅᑎᓪᓗᒋᓪᓗ.
ᐱᔪᓐᓇᕐᓂᖅᑖᖅᑎᑦᓯᓂᖅ ᐋᓐᓂᐊᖃᕐᓇᖏᑦᑐᓕᕆᓂᒃᑯᑦ ᖃᓄᐃᑦᑕᐃᓕᑎᑦᓯᓂᕐᒧ ᒪᒥᓴᕐᓂᒧᓪᓗ
ᑮᓇᐅᔭᖃᖅᑎᑦᓯᓂᐊᖅᑐᒍᑦ ᐱᓕᒻᒪᑦᓴᐃᖃᑦᑕᓂᕐᒧᑦ ᓄᓇᓕᓐᓂᓗ ᐱᒋᐊᖅᑎᑕᐅᓯᒪᒧᓄᑦ ᐱᓕᕆᐊᓄᑦ ᓇᓗᓇᐃᖅᓯᓯᒪᒍᑕᐅᒍᓐᓇᖅᑐᓄᑦ ᓄᓇᓕᓐᓃᖔᖅᑐᑦ ᐃᓕᖅᑯᓯᑦᑎᓄᓪᓗ ᑐᕌᖓᓂᖅᓴᐅᔪᓂᒃ ᐱᔨᑦᓯᕋᐅᑎᖃᕈᓐᓇᖁᓪᓗᑕ.
ᖃᓄᖅᑑᕈᑕᐅᓯᒪᓗᑎᒃ ᓴᖅᑭᖅᑕᐅᒍᒪᔪᑦ
- ᐃᓄᓐᓄᑦ ᑐᕌᖓᔪᓂᒃ ᐃᓱᒪᓕᕆᓂᕐᒧᑦ ᐱᓕᕆᐊᑦ ᐱᔨᑦᓯᕋᐅᑏᓪᓗ
- ᐃᓄᒃᑐᑦ ᐅᖃᕈᓐᓇᖅᑐᓂᒃ ᐃᓄᓕᕆᔨᖃᕐᓂᖅᓴᐅᓕᕐᓗᑎᒃ
- ᐃᓄᐃᑦ ᐊᒥᓲᓂᖅᓴᐃᑦ ᐃᖅᑲᓇᐃᔭᖅᑎᑕᐅᓕᕐᓗᑎᒃ ᐊᐅᓚᑦᓯᓂᕐᒧᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ, ᐃᓱᒪᓕᕆᓂᕐᒧᑦ, ᐊᔪᓕᕈᑎᖃᖅᓯᒪᔪᓄᓪᓗ ᐱᓕᕆᐊᓂ ᐱᔨᑦᓯᕋᐅᑎᓂᓗ
- ᐱᐅᓂᖅᓴᕈᕐᓗᑎᒃ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐃᓱᒪᓕᕆᓂᕐᒧᓪᓗ ᐃᓅᓕᓴᐃᖃᑦᑕᕐᓂᖅ
- ᑲᑐᔾᔨᖃᑎᖃᕐᓗᑎᒃ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ, ᑮᓇᐅᔭᓕᐅᕋᓱᐊᖅᑎᐅᙱᑦᑐᓂᒃ, ᐊᓯᖏᓐᓂᓪᓗ ᖁᑦᑎᓐᓂᓕᕇᓂᒃ ᒐᕙᒪᓂᒃ ᐱᐅᓯᕚᓪᓕᖅᑕᐅᖁᓪᓗᒍ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐃᓱᒪᓕᕆᓂᕐᒧᓪᓗ ᐱᓕᕆᐊᑦ, ᐱᔨᑦᓯᕋᐅᑏᓪᓗ ᓴᖅᑭᕈᑕᐅᖃᑦᑕᕐᓗᑎᒃ ᓄᓇᕗᒻᒥᐅᓄᑦ
ᖃᓄᐃᓕᒋᐊᕈᑕᐅᓂᐊᖅᑐᖅ ᓯᕗᒧᒋᐊᕈᓐᓇᖁᓪᓗᒋᑦ ᓴᖅᑭᖅᑕᐅᖁᔭᐅᔪᓄᑦ
ᐃᒪᐃᓕᐅᕐᓂᐊᖅᑐᒍᑦ:
- ᖃᐅᔨᓴᕐᓗᑎᒃ ᐊᑐᓕᖅᑎᑦᓯᓗᑎᓪᓗ ᖁᐊᖅᓵᖅᓯᒪᔪᓂᒃ ᐱᔾᔪᑎᖃᕐᓗᑎᒃ ᐱᓕᕆᔾᔪᓯᕐᓂᒃ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐃᓕᓐᓂᐊᖅᑐᓕᕆᓂᕐᒧᓪᓗ
- ᐊᔭᐅᖅᑐᐃᒍᑎᖃᕐᓗᑎᒃ ᐃᑲᔪᖅᓱᐃᓗᑎᓪᓗ ᐱᓕᕆᔾᔪᓯᕐᓂᒃ ᖃᓄᐃᑦᑕᐃᓕᑎᑦᓯᓂᕐᒧᑦ ᐃᓅᓯᖃᑦᓯᐊᕐᓂᒧᓪᓗ ᑐᙵᕕᖃᕐᓗᑎᒃ ᐃᓄᐃᑦ ᑭᓇᐅᓂᖏᓐᓂᒃ
- ᐱᕚᓪᓕᖅᑎᑕᐅᒋᐊᕐᓗᑎᒃ ᐃᓕᓐᓂᐊᖅᑎᑦᓯᓂᕐᒧᑦ ᐱᓕᒻᒪᑦᓴᐃᓂᕐᒧᓪᓗ ᐱᓕᕆᐊᑦ ᓄᓇᕗᒻᒥᐅᓄᑦ ᐱᔪᓐᓇᕐᓂᖅᑖᖅᐸᓪᓕᐊᒍᓐᓇᖁᓪᓗᒋᑦ ᖃᐅᔨᒪᔨᑕᓪᓚᕆᐅᓂᕐᒧᑦ ᐃᖅᑲᓇᐃᔭᖅᑎᐅᓂᕐᒧᓪᓗ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ, ᐃᓱᒪᓕᕆᓂᕐᒧᑦ, ᐊᔪᓕᕈᑎᖃᖅᓯᒪᔪᓂᓪᓗ ᒪᒥᓴᕐᓂᕐᒧᑦ
- ᐱᕚᓪᓕᖅᑎᓯᒋᐊᕐᓗᑎᒃ ᐱᕕᖃᕐᕕᑦᓴᐅᒍᓐᓇᖅᑐᓂᒃ, ᐱᓕᒻᒪᑦᓴᐃᓂᕐᒥᒃ, ᐃᓕᓴᖅᓯᓪᓚᑦᑖᕐᓂᕐᒥᒃ ᐃᓄᓐᓂᒃ ᐊᑐᐃᓐᓇᐅᑎᑦᓯᒍᓐᓇᖁᓪᓗᒋᑦ ᐃᓕᖅᑯᓯᑦᑎᓐᓄᑦ ᑐᕌᖓᔪᓂᒃ- ᐅᖃᐅᓯᑦᑎᓄᓪᓗ ᑐᕌᖓᓂᖃᑦᓯᐊᖅᑐᓂᒃ ᐃᓱᒪᓕᕆᓂᕐᒧᑦ ᐃᓅᓯᖃᑦᓯᐊᖁᔨᓂᕐᒧᓪᓗ ᐱᓕᕆᐊᓂᒃ ᐱᔨᑦᓯᕋᐅᑎᓂᓪᓗ
- ᐃᓚᐅᖃᑕᐅᑎᑦᓯᓗᑎᒃ ᐃᓕᓴᖅᓯᒃᑲᓐᓂᕐᓗᑎᓪᓗ ᐃᓐᓇᒻᒪᕆᓐᓂᒃ ᐊᓯᖏᓐᓂᓪᓗ ᓄᓇᓕᓐᓂ ᐅᖃᐅᔾᔨᒋᐊᖅᑎᐅᖁᓪᓗᒋᑦ ᓄᓇᓕᓐᓂ ᐃᓄᓕᕆᓂᕐᒧᑦ ᐃᓄᓐᓄᑦ, ᐱᓕᕆᐊᖃᖅᑎᑦᓯᖃᑦᑕᕐᓗᑎᓪᓗ ᓄᓇᒧᑦ ᓅᑎᑦᓯᖃᑦᑕᓂᒃᑯᑦ
- ᓴᖅᑭᔮᖅᑎᑦᓯᒋᐊᕐᓗᑎᒃ ᐊᑐᐃᓐᓇᐅᑎᑦᓯᓗᑎᓪᓗ ᐊᑯᓂᐅᔪᒧᑦ ᐊᐅᓚᔾᔪᑎᓂᒃ ᑮᓇᐅᔭᖃᖅᑎᑦᓯᖃᑦᑕᓂᕐᒧᑦ ᐃᑲᔪᖅᓱᐃᓗᑎᒃ ᐊᖏᓪᓕᒋᐊᖅᑎᑦᓯᓗᑎᓪᓗ ᐊᑑᑎᖃᑦᓯᐊᖅᑐᓂᒃ ᐱᓕᕆᔾᔪᓯᕐᓂᒃ ᓄᓇᓕᓐᓂ ᐱᒋᐊᖅᑎᑕᐅᓯᒪᔪᓂᒃ ᐱᓕᕆᐊᓂᒃ ᐱᔨᑦᓯᕋᐅᑎᓂᓪᓗ
- ᐱᓕᕆᖃᑎᖃᕐᓗᑎᒃ ᓄᓇᓕᓐᓂᒃ ᑲᑐᔾᔨᖃᑎᖏᓐᓂᓪᓗ ᐃᑲᕐᕋᑖᖅᑎᑕᐅᒃᑲᓐᓂᕐᓗᑎᒃ ᐃᓱᒪᓕᕆᓂᕐᒧᑦ ᐱᔨᑦᓯᕋᐅᑏᑦ ᐊᑐᐃᓐᓇᐅᔪᑦ
- ᑮᓇᐅᔭᖃᖅᑎᑦᓯᒋᐊᒃᑲᓐᓂᕐᓗᑎᒃ ᐃᒻᒥᓃᖅᑕᐃᓕᔪᓕᕆᓂᕐᒧᑦ ᑭᖑᓂᐊᒍᓪᓗ ᐃᑲᔫᑎᓂᒃ ᑲᑐᔾᔨᖃᑎᕗᑦ ᐱᓕᕆᖃᑎᒋᓗᒋᑦ, ᑐᕌᒐᖃᕐᓗᑎᒃ ᑲᒪᒋᔭᖃᕐᓂᕐᒧᑦ ᑐᙵᕕᖏᑎᒍᑦ ᐱᔾᔪᑎᖏᓐᓂᒃ ᓲᕐᓗ ᓱᕈᓯᐅᑎᓪᓗᒋᑦ ᖁᓄᔪᕐᓂᐊᖅᑕᐅᖃᑦᑕᕐᓂᑯᓄᑦ, ᖁᐊᖅᓵᕐᓇᖅᑐᒃᑰᖅᓯᒪᔪᓄᑦ, ᐊᖏᔪᖅᑲᐅᓵᕐᕕᖃᖃᑦᑕᖅᑐᓄᓪᓗ, ᐅᕕᓂᖃᑎᒌᙱᑦᑐᓂᓪᓗ ᐃᓚᐃᓐᓈᖃᑦᑕᕐᓂᕐᒧᑦ
- ᐊᑐᓕᖅᑎᑕᐅᒋᐊᒃᑲᓐᓂᕐᓗᑎᒃ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐃᓱᒪᓕᕆᓂᕐᒧᓪᓗ ᑐᓴᐅᒪᑎᑦᓯᒋᐊᕐᓂᕐᒧᑦ ᐱᓕᕆᐊᑦ
ᖃᓄᐃᓕᒋᐊᕈᑕᐅᓯᒪᒌᖅᑐᑦ:
ᐃᒪᐃᓕᐅᕐᓂᐊᖅᑐᒍᑦ:
- ᐋᖅᑭᑦᓱᐃᓗᑎᒃ ᐊᑯᓂᐅᔪᒧᑦ ᓯᕗᓂᑦᓴᑎᓄᑦ ᐃᓱᒪᓕᕆᓂᕐᒧᑦ ᐊᔪᓕᕈᑎᖃᖅᓯᒪᔪᓄᓪᓗ ᖃᓄᖅᑑᕈᑎᒥᒃ ᐊᑐᐊᖅᑕᐅᒍᓐᓇᖅᑐᒥᒃ ᐃᑲᔪᖅᓱᐃᒍᑕᐅᒍᓐᓇᖅᑐᒥᓪᓗ ᐊᑐᓕᖅᑎᑕᐅᕙᓪᓕᐊᓂᖓᓂᒃ ᓄᑖᒥᒃ ᐃᓱᒪᓕᕆᓂᕐᒧᑦ ᐱᖁᔭᕐᒥᒃ;
- ᓴᓇᓗᑎᒃ ᐸᕐᓇᑕᐅᓯᒪᔪᒥᒃ ᖁᐊᖅᓵᖅᓯᒪᔪᓕᕆᓂᕐᒧᑦ ᐊᔪᓕᕈᑎᖃᖅᓯᒪᔪᓄᓪᓗ ᒪᒥᓴᕐᕕᒻᒥᒃ ᐃᖃᓗᓐᓂ ᓄᓇᕗᑦ ᑐᙵᕕᒃᑯᓪᓗ ᒐᕙᒪᑐᖃᒃᑯᓪᓗ ᑮᓇᐅᔭᖃᖅᑎᑦᓯᔨᐅᔪᑦ ᑲᑐᔾᔨᖃᑎᖏᑦ; ᐊᒻᒪᓗ
- ᑲᔪᓯᒍᑎᖃᕐᓗᑎᒃ ᐱᕙᓪᓕᐊᑎᑕᐅᓂᖏᑦ ᐊᑑᑎᖃᖃᑦᑕᓂᕐᒥᒃ ᓄᑖᕐᖑᖅᐸᓪᓕᐊᔪᓂᒃ ᖃᕆᓴᐅᔭᒃᑯᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᐃᑭᐊᖅᑭᕕᒃᑯᓪᓗ ᐃᓱᒪᓕᕆᓂᕐᒧᑦ ᐃᑲᔫᑎᓂᒃ; ᐊᒻᒪᓗ
- ᐊᑐᓕᖅᑎᑦᓯᓂᖅ ᐸᕐᓇᑕᐅᓯᒪᔪᓂᒃ ᐃᖅᑲᓇᐃᔭᕐᕕᓐᓂ ᖃᓄᐃᑦᑕᐃᓕᓂᕐᒧᑦ ᐱᓕᕆᐊᑦ ᐃᑲᔫᑏᓪᓗ ᓄᓇᕗᑦ ᒐᕙᒪᒃᑯᖏᓐᓂ ᐃᖅᑲᓇᐃᔭᖅᑎᖏᓐᓄᑦ.
ᑮᓇᐅᔭᖃᖅᑎᑦᓯᒋᐊᒃᑲᓐᓂᕐᓂᖅ ᐃᓕᓐᓂᐊᖅᑐᓕᕆᓂᕐᒧᑦ
ᑮᓇᐅᔭᖃᖅᑎᑦᓯᓂᐊᖅᑐᒍᑦ ᐃᑲᔫᑎᓂᒃ ᓱᕈᓯᕐᓄᑦ ᒪᒃᑯᑦᑐᓄᓪᓗ ᐱᔭᕆᐊᓕᖏᓐᓂᒃ ᑐᙵᕕᓕᐅᖅᑕᐅᒃᑲᓐᓂᖁᓪᓗᒋᑦ ᓇᒻᒥᓂᖅ ᐅᐱᒋᕙᓪᓕᐊᒍᓐᓇᖅᓯᖁᓪᓗᒋᑦ, ᐱᕚᓪᓕᖅᑎᑦᓯᓂᕐᒧᑦ ᐃᓚᒌᖃᑎᒌᑦᓯᐊᕋᓱᐊᕐᓂᕐᒧᑦ, ᐃᓕᓐᓂᐊᕈᓐᓇᖅᓯᖁᓪᓗᒋᑦ ᐃᖅᑲᓇᐃᔮᖅᑖᕈᓐᓇᖅᓯᖁᓪᓗᒋᓪᓗ, ᑐᙵᕕᓕᐅᕐᓂᒃᑯᓪᓗ ᓯᕗᓂᑦᓴᖃᑦᓯᐊᕈᓐᓇᖁᓪᓗᒋᑦ.
ᖃᓄᖅᑑᕈᑕᐅᓯᒪᓗᑎᒃ ᓴᖅᑭᖅᑕᐅᒍᒪᔪᑦ
- ᓴᙱᓂᖅᓴᓂᒃ ᓱᕈᓯᕐᓄᑦ ᑐᙵᕕᓕᐅᕐᓂᖅ ᐃᓄᐃᑦ ᑭᓇᐅᓂᖏᓐᓄᑦ, ᓴᐱᓕᖅᑕᐃᓕᒍᓐᓇᕐᓂᖏᓐᓄᑦ, ᐃᓕᓐᓂᐊᖅᐸᓪᓕᐊᖏᓐᓇᕐᓂᖏᓐᓄᓪᓗ
- ᖁᕝᕙᕆᐊᖅᑕᐅᓗᑎᒃ ᐃᓕᓐᓂᐊᕐᕕᓐᓄᑦ ᐅᐸᖃᑦᑕᕐᓂᖏᑦ ᐱᔭᕇᖃᑦᑕᕐᓂᖏᓪᓗ
- ᖁᕝᕙᓯᓐᓂᖅᓴᓂᒃ ᐃᓕᓐᓂᐊᕇᕈᑎᖃᖅᑎᑦᓯᖃᑦᑕᕐᓂᖅ
- ᐱᐅᓯᕚᓪᓕᖅᑕᐅᓂᖏᑦ ᑐᕌᖓᓂᖏᑦ ᐊᑐᐃᓐᓇᐅᔪᓄᑦ ᐃᖅᑲᓇᐃᔮᓄᑦ ᓯᓚᑦᑐᓴᕐᕕᓐᓂᓗ ᐃᓕᓐᓂᐊᕈᑎᓄᑦ ᐱᓕᒻᒪᑦᓴᐃᓂᕐᒧᓪᓗ ᓄᓇᕗᒻᒥ
- ᐊᒥᓲᓂᖅᓴᐅᓕᕐᓗᑎᒃ ᓯᓚᑦᑐᓴᕐᕕᓐᓂ ᐃᓕᓐᓂᐊᕆᐊᖅᐸᑦᑐᑦ ᐃᖅᑲᓇᐃᔭᕈᓐᓇᖅᓯᔪᓄᓪᓗ ᐱᔭᕇᖅᓯᒪᓕᖅᑎᓪᓗᒋᑦ
- ᑲᑐᔾᔨᖃᑎᖃᕐᓗᑎᒃ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ, ᐃᓕᓐᓂᐊᖅᑐᓕᕆᓂᕐᒧᑦ ᑲᑎᒪᔨᖏᓐᓂᒃ, ᐊᓯᖏᓐᓂᓪᓗ ᖁᑦᑎᓐᓂᓕᕇᓂᒃ ᒐᕙᒪᓂᒃ ᐊᔭᐅᖅᑐᐃᒋᐊᕈᑎᖃᕐᓂᕐᒧᑦ ᐃᑲᔪᖅᓱᐃᓂᕐᒧᓪᓗ ᐃᓕᓐᓂᐊᕆᐅᖅᓴᖅᑎᑦᓯᓂᕐᒧᑦ, ᐃᓕᓐᓂᐊᕇᖃᑦᑕᓂᕐᒧᑦ, ᐃᖅᑲᓇᐃᔮᖅᑖᕋᓱᐊᕐᓂᒧᓪᓗ ᐱᓕᕆᐊᓂᒃ
ᖃᓄᐃᓕᒋᐊᕈᑕᐅᓂᐊᖅᑐᖅ ᓯᕗᒧᒋᐊᕈᓐᓇᖁᓪᓗᒋᑦ ᓴᖅᑭᖅᑕᐅᖁᔭᐅᔪᓄᑦ ᐃᒪᐃᓕᐅᕐᓂᐊᖅᑐᒍᑦ:
- ᑮᓇᐅᔭᖃᖅᑎᑦᓯᓗᑎᒃ ᐱᐅᓂᖅᐹᓂᒃ, ᐊᑭᑐᓗᐊᙱᑦᑐᓂᒃ, ᐊᓯᔾᔨᖅᑕᕈᓐᓇᖅᑐᓂᒃ, ᐊᑕᖏᖅᓯᔪᓂᓪᓗ ᓱᕈᓯᓛᓄᑦ ᐃᓕᓐᓂᐊᕆᐅᖅᓴᕈᑎᓂᒃ ᐸᐃᕆᕕᓐᓂᓗ ᐱᓕᕆᐊᓂᒃ ᐱᔨᑦᓯᕋᐅᑎᓂᓪᓗ ᒐᕙᒪᑐᖃᒃᑯᓐᓂ ᑮᓇᐅᔭᖃᖅᑎᑦᓯᔨᓂᒃ ᑲᑐᔾᔨᖃᑎᖃᕐᓗᑎᒃ
- ᐋᖅᑭᑦᓱᐃᓗᑎᒃ ᓄᑖᒥᒃ ᐸᕐᓇᐅᑎᒥᒃ ᐱᕙᓪᓕᐊᑎᑕᐅᖁᓪᓗᒍ ᐋᖅᑭᒋᐊᖅᑕᐅᖁᓪᓗᒍᓗ ᓄᓇᕗᒻᒥ ᐃᓕᓐᓂᐊᕆᐅᖅᓴᖅᑎᑦᓯᒍᑎᖏᑦ ᐸᐃᕆᕕᓕᕆᓂᖏᓐᓄᓪᓗ, ᑐᕌᒐᖃᕐᓗᑎᒃ ᐃᓄᓐᓄᑦ ᑐᕌᒐᔪᓂᒃ ᐃᓕᓐᓂᐊᕆᐅᖅᓴᖅᑎᑦᓯᓂᕐᒧᑦ
- ᐊᑐᐃᓐᓇᐅᑎᑦᓯᒃᑲᓐᓂᕐᓗᑎᒃ ᑮᓇᐅᔭᖅᑎᒍᑦ, ᐊᓪᓚᕝᕕᓕᕆᓂᒃᑯᑦ, ᐱᓕᒻᒪᑦᓴᐃᓂᒃᑯᑦ, ᐃᓄᒃᑐᓪᓗ ᐃᓕᓐᓂᐊᖅᑎᑦᓯᒍᑎᓂᒃ ᐃᑲᔪᖅᓱᖅᑕᐅᓗᓂ ᐃᓕᓐᓂᐊᕆᐅᖅᓴᖅᑎᑦᓯᓂᖅ
- ᐱᒋᐊᖅᑎᑦᓯᓗᑎᒃ ᐊᑐᓕᖅᑎᑦᓯᕙᓪᓕᐊᓂᕐᒧᑦ ᐅᓪᓗᓕᒫᖅ ᐃᓕᓐᓂᐊᓕᓵᖅᑐᓂᒃ ᐃᓕᓐᓂᐊᕆᐊᖅᑎᑦᓯᖃᑦᑕᓂᕐᒧᑦ ᐱᓕᕆᐊᓂᒃ
- ᓱᒃᑲᓕᒋᐊᖅᑎᑕᐅᓗᓂ ᐱᓕᕆᐊᖑᓂᖓ ᐃᓕᓐᓂᐊᓕᓵᖅᑐᓂᒃ ᖁᑦᑎᓐᓂᓕᒃ 12-ᒧᑦ ᐃᓄᐃᑦ ᐅᖃᐅᓯᖏᓐᓂᒃ ᐃᓕᓐᓂᐊᖅᑎᑦᓯᒍᑏᑦ ᓄᓇᕗᒻᒧᓪᓗ ᑐᕌᖓᔪᓂᒃ ᐃᓕᓐᓂᐊᖅᑎᑦᓯᒍᑎᑦᓴᓂᒃ
- ᐃᓚᒋᓕᐅᔾᔨᒃᑲᓐᓂᕐᓗᑎᒃ ᐃᓅᓯᖃᑦᓯᐊᕈᓐᓇᓂᕐᒧᑦ ᐱᒋᐅᖅᓴᒍᑎᓂᒃ ᐃᖅᑲᓇᐃᔮᖅᑖᕋᓱᐊᕐᓂᒧᓪᓗ ᐃᓕᓐᓂᐊᓕᓵᖅᑐᓂᒃ ᖁᑦᑎᓐᓂᓕᒃ 12-ᒧᑦ ᐃᓕᓐᓂᐊᖅᑎᑦᓯᒍᑎᖏᓐᓂ ᑲᔪᖏᖅᓱᐃᒍᑕᐅᓗᓂ ᓇᒻᒥᓂᖅ ᒪᑭᒪᑦᓯᐊᕈᓐᓇᓂᕐᒧᑦ, ᓇᒻᒥᓂᖅ ᐅᐱᒋᒍᓐᓇᓂᕐᒧᑦ, ᒪᒃᑯᓐᓂᖏᓐᓂᓗ ᐃᖅᑲᓇᐃᔮᑦᓴᕆᒍᒪᔭᖏᓐᓄᑦ ᑐᕌᕐᓂᖃᑦᓯᐊᖁᓪᓗᒋᑦ
- ᐃᓚᒋᓕᐅᔾᔭᐅᒃᑲᓐᓂᕐᓗᑎᒃ ᐃᑲᔪᖅᓱᕆᐊᖅᑕᐅᓗᑎᓪᓗ ᐃᓕᓐᓂᐊᕐᕕᓐᓂ ᓂᕆᐃᖃᑦᑕᓂᕐᒧᑦ ᐱᓕᕆᐊᑦ ᓄᓇᓕᓐᓃᖔᖅᑐᓂᒃ ᑲᑐᔾᔨᖃᑎᖃᕐᓗᑎᒃ
- ᐱᕕᖃᖅᑎᑦᓯᒋᐊᒃᑲᓐᓂᕐᓗᑎᒃ ᐃᖅᑲᓇᐃᔭᕆᐅᖅᓴᑎᑦᓯᓂᕐᒧᑦ ᐃᓕᓐᓂᐊᕐᕕᐊᓗᓐᓂ ᓯᓚᑦᑐᓴᕐᕕᓐᓂᓗ ᐃᓕᓐᓂᐊᖅᑎᓂᒃ ᐊᕐᕌᒎᑉ ᐃᓗᐊᓂ
- ᐱᐅᓯᕚᓪᓕᖅᑕᐅᓗᑎᒃ ᐊᐅᓚᑕᐅᓂᖓ ᐊᑑᑎᖃᕐᓂᖓᓗ ᓄᓇᕗᒻᒥ ᐃᓕᓐᓂᐊᖅᑎᓄᑦ ᑮᓇᐅᔭᖅᑎᒍᑦ ᐃᑲᔫᑎ ᐊᓯᖏᓪᓗ ᑮᓇᐅᔭᖅᑎᒍᑦ ᐃᑲᔫᑎᐅᔪᑦ ᓯᓚᑦᑐᓴᕐᕕᒻᒥ ᐃᓕᓐᓂᐊᖅᑎᓄᑦ
- ᐱᕚᓪᓕᖅᑕᐅᓗᑎᒃ ᑐᕌᖓᓪᓚᕆᙱᑐᒃᑯᑦ ᐃᑲᔫᑎᐅᔪᑦ ᓯᓚᑦᑐᓴᕐᕕᓐᓂ ᐃᓕᓐᓂᐊᖅᑎᓄᑦ
- ᐋᖅᑭᑦᓱᐃᓗᑎᒃ ᐊᑐᓕᖅᑎᑦᓯᓗᑎᓪᓗ ᐊᕐᕌᒍᕋᓴᕐᓄᑦ ᐱᓕᒻᒪᑦᓴᐃᓂᕐᒧᑦ ᖃᓄᖅᑑᕈᑎᒥᒃ ᐱᓕᕆᖃᑎᖃᕐᓗᑎᒃ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᐊᓯᖏᓐᓂᓪᓗ ᐱᕙᓪᓕᐊᑎᑕᐅᒃᑲᓐᓂᖁᓪᓗᒍ ᓄᓇᕗᒻᒥ ᐃᖅᑲᓇᐃᔭᖅᑎᖃᕈᓐᓇᕐᓂᖏᑦ ᑮᓇᐅᔭᓕᐅᕈᑎᖃᕈᓐᓇᕐᓂᖏᓪᓗ
- ᐋᖅᑭᑦᓱᐃᓗᑎᒃ ᐊᑐᓕᖅᑎᑦᓯᓗᑎᓪᓗ ᖃᓄᖅᑑᕐᓂᒃᑯᑦ ᐸᕐᓇᐅᑎᒥᒃ ᐃᓄᐃᑦ ᐅᖃᐅᓯᖏᓐᓂᒃ ᐱᓕᒻᒪᑦᓴᐃᖃᑦᑕᓂᕐᒧᑦ ᒐᕙᒪᒃᑯᑦ ᐃᖅᑲᓇᐃᔭᕐᕕᖏᓐᓂ
ᖃᓄᐃᓕᒋᐊᕈᑕᐅᓯᒪᒌᖅᑐᑦ:
ᐃᒪᐃᓕᐅᕐᓂᐊᖅᑐᒍᑦ:
- ᑐᙵᕕᓕᐅᖅᐸᓪᓕᐊᖏᓐᓇᕐᓗᑎᒃ ᐃᓄᒃᑐᑦ ᐅᖃᐅᓯᓕᕆᓂᕐᒧᑦ ᐃᓕᓐᓂᐊᖅᑎᑦᓯᓂᕐᒧᓪᓗ ᓄᓇᕗᓕᒫᒥ ᓄᓇᕗᑦ ᑐᙵᕕᒃᑯᓪᓗ ᒐᕙᒪᑐᖃᒃᑯᓐᓂᓗ ᑮᓇᐅᔭᖃᖅᑎᑦᓯᔨᓂᒃ ᑲᑐᔾᔨᖃᑎᖏᓐᓂᒃ;
- ᐊᑐᓕᖅᑎᑦᓯᓗᑎᒃ ᐱᕚᓪᓕᕆᐊᖅᑎᑦᓯᓗᑎᓪᓗ ᐱᓕᕆᐊᓂᒃ ᐱᓕᒻᒪᑦᓴᐃᓂᕐᒧᑦ, ᐃᖅᑲᓇᐃᔭᖅᑖᖃᑦᑕᓂᕐᒧᑦ ᐃᖅᑲᓇᐃᔭᖅᑎᖃᑯᑖᖃᑦᑕᓂᕐᒧᓪᓗ ᐃᓄᓐᓂᒃ ᐃᓕᓐᓂᐊᖅᑎᓯᔨᓂᒃ ᐊᔾᔨᒌᙱᑦᑐᓂᒃ ᐱᔪᓐᓇᕐᓂᓕᓐᓂᒃ;
- ᐊᑐᓕᖅᑎᑦᓯᕙᓪᓕᐊᖏᓐᓇᕐᓗᑎᒃ ᐱᐅᓯᕚᓪᓕᖅᑎᑦᓯᒋᐊᕐᓂᕐᒧᑦ ᐃᓕᓐᓂᐊᖅᑏᑦ-ᐃᓕᓐᓂᐊᖅᑎᑦᓯᔩᑦ ᖃᑦᓯᐅᓂᖏᓐᓂᒃ ᐃᓕᓐᓂᐊᕐᕖᑦ ᐃᓗᐊᓂ; ᐊᒻᒪᓗ
- ᐊᑐᓕᖅᑎᑦᓯᓗᑎᒃ ᐱᐅᓯᕚᓪᓕᖅᑕᐅᒋᐊᖅᓯᒪᔪᓂᒃ ᓄᓇᓕᓐᓂ ᐃᓕᓴᕕᓐᓂᒃ ᐊᑐᖅᑕᐅᓂᖅᓴᐅᖃᑦᑕᖁᓪᓗᒋᑦ ᓄᓇᓕᓐᓂ ᐃᓕᓐᓂᐊᕈᑎᑦᓴᓂᒃ.
ᐊᔾᔨᒌᙱᑦᑐᓂᒃ ᓴᖅᑭᖅᑎᑦᓯᓂᖅ ᓄᓇᓕᓐᓂ ᑮᓇᐅᔭᓕᐅᕈᑕᐅᒍᓐᓇᖅᑐᓂᒃ
ᖃᓄᖅᑑᕈᑕᐅᓯᒪᓗᑎᒃ ᓴᖅᑭᖅᑕᐅᒍᒪᔪᑦ
- ᐊᒥᓲᓂᖅᓴᐃᑦ ᓄᓇᓖᑦ ᐱᕚᓪᓕᕈᑎᖃᕈᓐᓇᖅᓯᓗᑎᒃ ᐃᖃᓗᓕᕆᓂᕐᒧᑦ, ᐊᖑᓇᓱᓐᓂᒃᑯᑦ, ᐳᓚᕋᑦᑐᓕᕆᓂᕐᒧᓪᓗ
- ᐊᒥᓲᓂᖅᓴᐅᓕᕐᓗᑎᒃ ᓄᓇᓕᓐᓂ ᐃᖅᑲᓇᐃᔮᑦᓴᐃᑦ ᒥᑭᔫᑎᓂᓪᓗ ᓇᒻᒥᓂᖃᖅᑎᐅᔪᑦ
- ᐱᕚᓪᓕᖅᑎᑕᐅᒋᐊᕐᓗᓂ ᑭᓱᑐᐃᓐᓇᕐᓂᒃ ᓴᓇᖃᑦᑕᕐᓂᖅ ᓄᓇᕗᒻᒥ
- ᐊᒥᓱᕐᖑᕆᐊᖅᑕᐅᓗᑎᒃ ᐃᖅᑲᓇᐃᔭᖅᑎᑕᐅᓂᖏᑦ ᐃᓄᐃᑦ ᐅᔭᕋᕐᓂᐊᕐᕕᓐᓂ ᐅᔭᕋᕐᓂᐊᕐᓂᕐᒧᓪᓗ ᑐᕌᖓᔪᓂ ᐱᔨᑦᓯᕋᐅᓂ
- ᐊᑭᑦᑐᕆᐊᖅᑕᐅᓗᑎᒃ ᑮᓇᐅᔾᔭᑦᓴᒍᑎᖃᕐᓂᖏᑦ ᓴᓇᙳᐊᖅᑏᑦ ᒥᖅᓱᖅᑏᓪᓗ
- ᑲᑐᔾᔨᖃᑎᖃᕐᓗᑎᒃ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ, ᓇᒻᒥᓂᖃᖅᑎᐅᔪᓂᒃ, ᐊᓯᖏᓐᓂᓪᓗ ᖁᑦᑎᓐᓂᓕᕇᓂᒃ ᒐᕙᒪᓂᒃ ᐱᕙᓪᓕᐊᔪᓕᕆᓂᕐᒧᑦᐃᖅᑲᓇᐃᔭᖅᑎᑦᓯᒋᐊᕐᓂᒧᓪᓗ
ᖃᓄᐃᓕᒋᐊᕈᑕᐅᓂᐊᖅᑐᖅ ᓯᕗᒧᒋᐊᕈᓐᓇᖁᓪᓗᒋᑦ ᓴᖅᑭᖅᑕᐅᖁᔭᐅᔪᓄᑦ
ᐃᒪᐃᓕᐅᕐᓂᐊᖅᑐᒍᑦ:
- ᓄᑖᕐᖑᕆᐊᖅᑕᐅᓗᑎᒃ ᖃᓄᖅᑑᕈᑕᐅᓯᒪᔪᑦ ᐸᕐᓇᐅᑏᑦ ᐱᕙᓪᓕᐊᔪᓕᕆᓂᕐᒧᑦ ᐊᔾᔨᒌᙱᑦᑐᓂᓪᓗ ᑮᓇᐅᔭᓕᐅᕈᑕᐅᒍᓐᓇᖅᑐᑦ ᑭᓱᑐᐃᓐᓇᕐᓄᑦ
- ᐱᓕᒻᒪᑦᓴᐃᒋᐊᒃᑲᓐᓂᕐᓗᑎᒃ ᐃᖅᑲᓇᐃᔮᓄᑦ ᑐᕌᖅᑐᓂᒃ ᓲᕐᓗ ᐅᔭᕋᕐᓂᐊᖅᑐᓕᕆᓂᕐᒧᑦ, ᓴᓇᐅᒐᓕᐅᕐᓂᕐᒧᑦ ᒥᖅᓱᒐᓕᐅᕐᓂᕐᒧᓪᓗ, ᐳᓚᕋᑦᑐᓕᕆᓂᕐᒧᑦ, ᒥᑭᔫᑎᓄᓪᓗ ᓇᒻᒥᓂᖃᖅᑎᐅᔪᓄᑦ ᑲᑐᔾᔨᖃᑎᖃᕐᓗᑎᒃ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᓇᒻᒥᓂᖃᖅᑎᐅᔪᓂᓪᓗ
- ᓇᓗᓇᐃᔭᐃᓗᑎᒃ ᓴᖅᑭᔮᖅᑎᑦᓯᒋᐊᕐᓗᑎᓪᓗ ᐱᕕᖃᕐᕕᐅᒍᓐᓇᖅᑐᓂᒃ ᓄᑖᓄᑦ ᓄᓇᓕᓐᓂ ᓇᒻᒥᓂᖃᖅᑎᐅᔪᓄᑦ ᐱᔨᑦᓯᕋᖅᑎᐅᔪᓄᓪᓗ
- ᖃᐅᔨᓴᕐᓗᑎᒃ ᐊᔾᔨᐅᙱᑦᑐᓂᒃ ᐃᓪᓗᓕᐅᕈᓯᕐᓂᒃ ᐊᑐᖅᑕᐅᒍᓐᓇᖅᑐᓂᒃ ᓴᓇᔭᐅᒍᓐᓇᖅᑐᓂᓪᓗ ᓄᓇᕗᒻᒥ, ᑐᕌᒐᖃᕐᓗᑎᒃ ᐆᒻᒪᖅᑯᑎᑐᓗᐊᙱᑦᑐᓂᒃ ᓯᓚᐅᓪᓗ ᐊᓯᔾᔨᖅᐸᓪᓕᐊᓂᖓᓄᑦ ᐱᕙᓪᓕᐊᑦᑕᐃᓕᒍᑕᐅᔪᓂᒃ ᐃᓪᓗᓕᐅᕈᓯᕐᓂᒃ
- ᐊᑎᖅᑎᑕᐅᓗᑎᒃ ᐃᖃᓗᓕᕆᓂᕐᒧᑦ ᓚᐃᓴᓐᓰᑦ ᓂᐅᕕᕐᓗᑎᓪᓗ ᐊᖏᓂᖅᓴᓂᒃ ᐃᖃᓗᒐᓱᑦᑕᐅᒍᓐᓇᖅᑐᓂᒃ
- ᐱᕚᓪᓕᖅᑎᑕᐅᓗᑎᒃ ᐃᑲᔫᑎᐅᔪᑦ ᐊᖑᓇᓱᑦᑎᓄᑦ
- ᐋᖅᑭᑦᓯᓗᑎᒃ ᐃᑭᐊᖅᑭᕕᒃᑯᑦ ᓂᐅᕐᕈᑎᖃᕐᕕᒻᒥᒃ ᓄᓇᕗᒻᒥ ᓴᓇᐅᒐᕐᓄᑦ ᒥᖅᓱᒐᕐᓄᓪᓗ
- ᕿᒥᕐᕈᔭᐅᓗᑎᒃ ᐱᐅᓯᕚᓪᓕᖅᑕᐅᓗᑎᓪᓗ ᓄᓇᕗᑦ ᒐᕙᒪᒃᑯᖏᓐᓂ ᑎᒥᐅᓂᖓᑕ ᐋᖅᑭᑦᓯᒪᓂᖓ ᐊᖑᒻᒪᑎᒍᓐᓇᖅᓯᖁᓪᓗᒋᑦ ᐊᑐᖅᑕᐅᒍᒪᕙᓪᓕᐊᑐᐃᓐᓇᕐᓂᖏᓐᓄᑦ ᐱᓕᕆᐊᑦ ᐱᔨᑦᓯᕋᐅᑏᓪᓗ ᓇᓗᓇᐃᔭᐃᓗᑎᓪᓗ ᐱᕕᑦᓴᖃᕐᕕᐅᒍᓐᓇᖅᑐᓂᒃ ᓄᓇᓕᓐᓄᑦ ᓄᑦᑎᖅᑎᕆᕙᓪᓕᐊᓂᕐᒧᑦ
ᖃᓄᐃᓕᒋᐊᕈᑕᐅᓯᒪᒌᖅᑐᑦ:
ᐃᒪᐃᓕᐅᕐᓂᐊᖅᑐᒍᑦ:
- ᓇᓗᓇᐃᔭᐃᓗᑎᒃ ᐃᑲᔪᕐᓗᑎᓪᓗ ᑲᒪᒋᔭᖃᕐᓂᕐᒧᑦ ᐱᔭᕆᐊᓕᓐᓂᒃ ᐱᑕᖃᕆᐊᖃᓪᓚᕆᑦᑐᓄᑦ ᐊᑭᑐᔫᑎᓂᒃ ᐊᐅᓚᔾᔪᑎᓂᒃ ᑎᑭᑎᑦᓯᖃᑦᑕᓂᕐᒧᓪᓗ ᐱᖁᑎᓂᒃ ᐊᕕᑦᑐᖅᓯᒪᓂᐅᔪᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ, ᒐᕙᒪᑐᖃᒃᑯᓐᓂ ᑮᓇᐅᔭᖃᖅᑎᑦᓯᔨᓂᒃ ᑲᑐᔾᔨᖃᑎᖏᓐᓂᒃ, ᖃᖓᑕᔫᓕᕆᔨᓂᓪᓗ ᐱᔪᓐᓇᕐᓂᖅᑖᖅᑎᑕᐅᖁᓪᓗᒋᑦ ᐃᑲᔪᖅᓱᖅᑕᐅᖁᓪᓗᒋᓪᓗ ᐱᕙᓪᓕᐊᔪᓕᕆᓂᕐᒧᑦ ᑭᓱᑐᐃᓐᓇᕐᓂᒃ; ᐊᒻᒪᓗ
- ᑲᔪᓯᒍᑎᖃᕐᓗᑎᒃ ᐋᖅᑭᑦᓱᐃᕙᓪᓕᐊᓂᕐᒧᑦ ᓇᒻᒥᓂᖅᓱᕐᓂᕐᒧᑦ ᑎᒍᓯᕙᓪᓕᐊᓂᕐᒥᒃ ᒐᕙᒪᑐᖃᒃᑯᑦ ᓄᓇᖁᑎᖏᓐᓂ ᐱᕚᓪᓕᕈᑎᑦᓴᐅᔪᓂᓪᓗ ᓄᓇᒦᖔᖅᑐᓂᒃ