ᐅᓂᒃᑲᐅᓯᖃᕐᓂᖅ ᓯᕗᒧᒋᐊᕈᑎᖃᖅᓯᒪᓂᑦᑎᓐᓂᒃ
ᑐᕌᒐᕗᑦ ᐋᖅᑭᑦᓯᒍᑕᐅᔪᖅ ᑐᕌᕐᓂᐊᖅᑕᑎᓐᓂᒃ ᓯᕗᓪᓕᐅᑎᔭᐅᖁᔭᑦᑎᓐᓂᒃ ᖃᓄᐃᓕᒋᐊᕈᑕᐅᖁᓪᓗᒋᑦ ᐊᑐᓕᖅᑎᑕᐅᓂᐊᖅᑐᑦ ᓄᓇᕗᑦ ᒐᕙᒪᒃᑯᖏᑕ ᐱᓕᕆᕕᖏᓐᓂ ᑎᒥᖁᑎᖏᓐᓂᓗ.
ᐱᖓᓲᔪᖅᑐᖓᓐᓂ ᒪᓕᒐᓕᐅᖅᑏᑦ ᐋᖅᑭᑦᓱᐃᓯᒪᔪᑦ ᒐᕙᒪᒋᔭᑦᑕ ᑐᕌᒐᑦᑎᓐᓂᒃ ᑲᑐᔾᔨᖃᑎᖃᖅᑐᑎᒃ ᓴᖅᑭᐅᒪᐃᓐᓇᑎᓪᓗᒍ ᓄᕙᔾᔪᐊᕐᓇᖅ 19 ᓯᐊᕐᒪᐸᓪᓕᐊᓂᖓ ᓇᓗᓇᓕᕈᑕᐅᓯᒪᑎᓪᓗᒍ ᑭᒃᑯᓕᒫᓄᑦ, ᒐᕙᒪᓄᑦ, ᐱᓕᕆᕕᓕᒫᓄᑦ, ᓂᐅᕕᐊᖑᖃᑦᑕᖅᑐᓂᓪᓗ ᐊᒥᒐᖅᓯᓂᖅᑕᖃᖃᑦᑕᑎᓪᓗᒍ ᓄᓇᕐᔪᐊᒥ. ᑕᐃᒪᐃᒃᑲᓗᐊᖅᑎᓗᒍ ᓇᓗᓇᖅᑐᒦᑦᑎᓪᓗᑕ, ᐊᑦᓱᕉᑎᖃᕐᓂᐊᖅᑐᒍᑦ ᓂᕆᐅᓇᕐᓂᖃᑦᓯᐊᖅᑐᓂᒃ ᓯᕗᒧᓪᓗ ᑕᑯᓐᓇᕐᓂᒃᑯᑦ ᐱᓕᕆᐊᑦᓴᑎᓐᓂᒃ. ᐅᐸᓗᖓᐃᔭᖅᓯᒪᒻᒥᔪᒍᑦ ᓱᖏᐅᑎᕙᓪᓕᐊᒍᓐᓇᓂᕐᒧᑦ ᐋᖅᑭᒋᐊᖅᓯᖃᑦᑕᕐᓗᑕᓗ ᐊᑦᓱᕈᕐᓇᖅᑐᒃᑰᑐᐃᓐᓇᕆᐊᖃᖅᑎᓪᓗᑕ.
ᒐᕙᒪᒋᔭᑦᑕ ᑐᕌᒐᖏᑦ ᕿᓚᒥᐅᓂᐊᖅᑐᒥ ᐊᕐᕌᒍᓄᑦ ᐊᑦᓱᕈᕐᓇᖅᑐᒃᑰᕈᑕᐅᑐᐃᓐᓇᕆᐊᓖᑦ ᐊᖅᑯᓵᖅᐸᓐᓂᐊᖅᑕᑎᓐᓂ. ᑭᓯᐊᓂᓕ, ᓇᓗᖅᑯᑎᙱᑦᑐᒍᑦ ᓄᓇᕗᒻᒥᐅᑦ ᑕᑯᒍᓐᓇᓪᓚᑦᑖᕐᓂᐊᕐᖓᑕ ᓯᕗᒧᒋᐊᖅᐸᓪᓕᐊᒍᑕᐅᔪᓂᒃ ᐃᓘᓐᓇᖏᓐᓂ ᓯᕗᓪᓕᐅᑎᓐᓂᐊᖅᑕᑎᓐᓂ.
ᒐᕙᒪᒃᑯᑦ ᐱᓕᕆᕕᖏᑦ ᑎᒥᖁᑎᖏᓪᓗ ᓇᐃᓈᖅᑐᓂᒃ ᐊᐅᓚᑦᓯᓂᕐᒧᑦ ᓯᕗᓪᓕᐅᑎᓐᓂᐊᖅᑕᖏᓐᓂᒃ ᓯᕗᒧᒋᐊᕈᑎᒋᓯᒪᔭᖏᓐᓂᓪᓗ ᐊᕐᕌᒍᑕᒫᑦ ᐱᓕᕆᐊᑦᓴᓄᑦ ᐸᕐᓇᐅᑎᓂ, ᐊᑐᐃᓐᓇᐅᖃᑦᑕᖅᑐᑦ ᓄᓇᕗᒻᒥᐅᓄᑦ ᑮᓇᐅᔭᓕᕆᔨᒃᑯᑦ ᐃᑭᐊᖅᑭᕕᒃᑯᑦ ᑐᑭᓯᒋᐊᕐᕕᖓᓂ. ᐊᕐᕌᒍᑕᒫᑦ ᐅᓂᒃᑳᓕᐊᑦ ᑲᒪᒋᔭᐅᖃᑦᑕᕆᐊᖃᕐᒥᔪᑦ ᓴᖅᑭᖅᑎᑕᐅᒋᐊᖃᖅᑐᑎᓪᓗ ᒪᓕᒐᓕᐅᕐᕕᒻᒥ ᐃᓚᖏᓐᓂᒃ ᐊᐅᓚᑕᖏᓐᓂᒃ.
ᓴᖅᑭᖅᑎᑦᓯᓂᐊᖅᑐᒍᑦ ᖄᒃᑲᓐᓂᖓᒍᑦ ᐅᓂᒃᑳᓕᐅᖃᑦᑕᓂᐊᕐᓂᕐᒧᑦ ᓄᓇᕗᒻᒥᐅᓄᑦ ᖃᓄᐃᓕᒋᐊᕈᑎᒋᓯᒪᔭᑦᑎᓐᓂᒃ ᓯᕗᒧᒋᐊᕈᑎᒋᓯᒪᔭᑦᑎᓐᓂᓪᓗ ᖃᓄᖅᑑᕈᑕᐅᓯᒪᔪᓂᒃ ᓴᖅᑭᖅᑕᐅᔪᓂᒃ ᓂᕆᐅᒋᖃᑦᑕᓂᐊᖅᑕᑎᓐᓂᒃ. ᐊᑐᐃᓐᓇᐅᑎᑦᓰᓐᓇᕐᓂᐊᕐᒥᔪᒍᑦ ᑐᑭᓯᒋᐊᕈᑎᓂᒃ ᐊᐅᓚᑦᓯᓂᕐᒧᑦ ᓯᕗᓪᓕᐅᑎᔭᐅᖁᔭᐅᓯᒪᔪᓂᒃ ᐱᓕᕆᐊᑦᓴᓄᑦ ᐸᕐᓇᐅᑎᓂ ᐊᕐᕌᒍᑕᒫᓪᓗ ᐅᓂᒃᑳᓕᐊᓂ, ᑐᓴᖅᑎᑦᓯᒋᐊᖃᑦᑕᕐᓂᐊᖅᑐᒍᑦ ᒐᕙᒪᒃᑯᑦ ᐱᓕᕆᐊᕆᓯᒪᔭᖏᓐᓂᒃ ᓄᑖᖑᓂᖅᐹᒃᑯᑦ ᐊᑐᐃᓐᓇᐅᓂᖅᐹᒃᑯᓪᓗ.
ᐅᓂᒃᑲᐅᓯᖃᕐᓂᐊᑎᓪᓗᑕ ᓯᕗᒧᒋᐊᕈᑎᖃᖅᓯᒪᓂᑦᑎᓐᓂᒃ, ᐃᒪᐃᓕᐅᕐᓂᐊᖅᑐᒍᑦ:
- ᓇᓗᓇᐃᖅᓯᖃᑦᑕᕐᓗᑕ ᐊᑐᓂᑦ ᐱᔭᕇᖅᑕᐅᕙᓪᓕᐊᔪᓂᒃ ᐱᒋᐊᖅᑎᑕᐅᔪᓂᓪᓗ ᑭᖑᕙᖅᓯᒪᙱᑦᑐᒃᑯᑦ:
- ᓇᓗᓇᐃᔭᐃᓗᑎᒃ ᐅᓂᒃᑲᐅᓯᖃᖃᑦᑕᕐᓗᑎᓪᓗ ᐊᑑᑎᖃᖅᑐᓂᒃ ᓇᓗᓇᐃᕈᑎᓂᒃ ᓴᖅᑭᖅᓯᕙᓪᓕᐊᓪᓚᑦᑖᕐᓂᖏᓐᓂᒃ ᐊᕐᕌᒍᐃᑦ ᐃᓗᐊᓂ; ᐊᒻᒪᓗ
- ᓴᖅᑭᖅᑎᓯᓗᑎᒃ ᑐᓴᖅᑎᑦᓯᒍᑎᖃᕐᓗᑎᓪᓗ ᐅᓂᒃᑳᓕᐊᓂᒃ ᓯᕗᒧᒋᐊᕈᑎᖃᖅᐸᓪᓕᐊᓂᑦᑎᓐᓄᑦ ᐱᔭᕇᖅᐸᓪᓕᐊᓯᒪᔭᑦᑎᓐᓂᓪᓗ ᕿᑎᐊᒍᑦ ᓄᙳᐊᓂᓗ ᐱᖓᓲᔪᖅᑐᖓᓐᓂ ᒪᓕᒐᓕᐅᖅᑏᑦ ᓂᕈᐊᖅᑕᐅᓯᒪᓂᖏᓐᓂ.
ᑐᙵᓱᑦᑎᑦᓯᔪᒍᑦ ᐱᕕᖃᖅᑎᑕᐅᓂᕐᒥᒃ ᓇᓗᓇᐃᖅᓯᒍᓐᓇᓂᕐᒧᑦ ᓵᑕᒃᓴᐅᒍᑎᖃᕐᓂᑎᓐᓄᑦ ᓄᓇᕗᒻᒥᐅᓄᑦ, ᑮᓇᐅᔭᖃᖅᑎᑦᓯᔨᓄᓪᓗ ᑲᑐᔾᑐᔨᖃᑎᑦᑎᓐᓄᑦ ᐱᒋᐊᕈᑎᖃᕐᓂᐊᓕᖅᑎᓪᓗᑕ ᐊᖅᑯᓵᖅᐸᓪᓕᐊᓂᐊᖅᑕᑎᓐᓂᒃ ᐊᓯᔾᔨᖅᐸᓪᓕᐊᑎᑦᓯᓂᕐᒧᑦ ᐊᑲᐅᓈᖅᑐᓄᑦ ᓄᓇᕗᒻᒥ.