ᐊᑕᐅᓯᕐᒥᒃ ᓄᑖᒥᒃ ᐱᖃᖅᑐᖃᖅᐳᖅ ᓄᕙᒡᔪᐊᕐᓇᖅ-19−ᒥᒃ ᐊᕐᕕᐊᕐᒥ
ᐱᕙᓪᓕᐊᔪᑦ ᓴᖅᑭᑦᑐᑦ
ᐊᑕᐅᓯᕐᒥᒃ ᓄᑖᒥᒃ ᐱᖃᖅᑐᖃᖅᐳᖅ ᓄᕙᒡᔪᐊᕐᓇᖅ-19−ᒥᒃ ᐊᕐᕕᐊᕐᒥ
ᐃᖃᓗᐃᑦ, ᓄᓇᕗᑦ (ᕕᕗᐊᕆ 26, 2021) – ᐅᓪᓗᒥ, ᓄᓇᕗᑦ ᐊᑕᐅᓯᕐᒥᒃ ᓄᑖᒥᒃ ᐱᖃᖅᑐᖃᖅᐳᖅ ᓄᕙᒡᔪᐊᕐᓇᖅ-19−ᒥᒃ. 26-ᖑᔪᑦ ᓇᓗᓇᐃᖅᑕᐅᓯᒪᔪᑦ ᓄᕙᕐᔪᐊᓕᖅᑐᑦ ᓄᓇᕗᒻᒥ, ᑕᒪᕐᒥᒃᓗ ᐊᕐᕕᐊᒦᖦᖢᑎᒃ.
“ᐱᒻᒪᕆᐅᕗᖅ ᓇᓗᓇᐃᖅᓯᓗᓂ ᖃᓄᖅ ᐊᒃᓱᕈᕐᓇᖅᑎᒋᓯᒪᖕᒪᖔᑦ ᑕᒪᓐᓇ ᖃᓄᕈᓘᔭᖅ ᐊᔪᓕᖅᑎᑕᐅᓂᖅ ᓄᓇᓕᖕᒥᐅᓄᑦ. ᖃᐅᔨᒪᕗᖓ ᐊᕐᕕᐊᕐᒥᐅᑦ ᖃᓄᖅ ᐊᒃᓱᕈᖅᑎᒋᓪᓗᑎᒃ ᐱᓕᕆᐊᖃᕐᓂᖏᓐᓂᒃ, ᑕᒪᕐᒥᑦᑎᐊᕐᓗ ᓄᓇᕗᒻᒥᐅᑦ ᖁᔭᓕᕗᑦ ᐃᑲᔪᖅᑐᐃᓪᓗᑎᒡᓗ ᐱᓇᔪᖕᓂᕆᔭᔅᓯᓐᓂᒃ," ᑕᐃᒪᓐᓇ ᓘᒃᑖᖅ ᒪᐃᑯᓪ ᐹᑐᓴᓐ, ᓄᓇᕗᒻᒥᐅᑦ ᐋᓐᓂᐊᖃᕐᓇᙱᑦᑐᓕᕆᔨᒻᒪᕆᖓᑦ ᐅᖃᖅᖢᓂ. “ᖃᓄᐃᓕᕙᓪᓕᐊᓂᖅ ᓱᒃᑲᐃᑦᑐᓐᓇᖅᐳᖅ, ᑭᓯᐊᓂᓗ ᓱᓕ ᖃᓄᐃᓕᕙᓪᓕᐊᓂᐅᓪᓗᓂ. ᐊᑏ ᑕᒪᑦᑕ ᑎᓕᐅᖃᑦᑕᐅᑎᑦᑎᐊᖅᑕ ᒪᓕᖕᓂᐊᕐᓂᕐᒧᑦ ᑕᒪᐃᓐᓄᑦᑎᐊᖅ ᑭᒃᑯᑐᐃᓐᓇᓄᑦ ᖃᓄᐃᙱᑎᑦᑎᓂᕐᒧᑦ ᐊᑐᖅᑕᐅᔭᕆᐊᓕᖕᓕᓂᒃ ᐊᒻᒪᓗ ᑲᐱᔭᐅᓗᑕ. ᓄᓇᕗᒻᒥᐅᓕᒫᑦ ᖁᔭᓐᓇᒦᖅᑕᐅᕗᑦ ᐱᓇᔪᖃᑦᑕᕐᓂᓕᒫᖏᓐᓄᑦ ᑕᖅᑭᐅᓵᖅᑐᓂ 12−ᓂ.
ᑖᒃᑯᐊ ᑕᒪᕐᒥᒃ ᖃᓄᐃᙱᑦᑐᑦ, ᐅᐸᒃᑕᐅᑦᑕᐃᓕᒪᓪᓗᑎᒡᓗ ᐊᖏᕐᕋᖏᓐᓂ ᑲᑎᙵᖃᑎᒋᔭᐅᓚᐅᖅᑐᓪᓗ ᓱᓕ ᖃᐅᔨᓴᖅᑕᐅᕙᓪᓕᐊᓪᓗᑎᒃ. ᕕᕗᐊᕆ 26−ᒥ ᐱᒋᐊᖅᖢᓂ, ᐊᕐᕕᐊᕐᒥ ᖃᐅᔨᓴᖅᑕᐅᔪᑦ 2292−ᖑᔪᑦ ᐱᑕᖃᙱᓐᓂᕋᖅᑕᐅᔪᑦ ᖃᐅᔨᓴᖅᑕᐅᔾᔪᑎᖏᑦ. ᓄᓇᕘᑉ ᑐᐊᕕᕐᓇᖅᑐᓕᕆᔨᒃᑯᑦ ᓱᓕ ᐃᑲᔪᖅᑐᑦ ᓄᓇᓕᖕᓂ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐱᓕᕆᔨᖏᓐᓂᒃ. ᓱᓕ ᐊᕐᕕᐊᓕᐊᖅᑐᖃᕆᐊᖃᙱᑦᑐᖅ ᐊᕐᕕᐊᓂᓪᓗ ᐊᐅᓪᓚᖅᑐᖃᕆᐊᖃᙱᖦᖢᓂ, ᑭᓯᐊᓂ ᑐᐊᕕᕐᓇᖅᑐᖃᖅᐸᑦ ᐱᔭᕆᐊᖃᓪᓚᕆᑦᑐᖃᕐᐸᓪᓘᓐᓃᑦ.
ᐊᕐᕕᐊᕐᒥᐅᑦ ᓄᕙᕐᔪᐊᕐᓇᖅ−19ᒧᑦ ᑲᐱᔭᐅᔪᒪᔪᑦ ᐋᓐᓂᐊᕕᖕᒧᑦ ᐅᖄᓚᔪᓐᓇᖅᐳᑦ ᐃᓂᒃᓴᓕᐅᕈᒪᓗᑎᒃ. ᒫᓐᓇᒧᑦ ᑎᑭᖦᖢᒍ, 7276 ᓄᓇᕗᒻᒥᐅᑦ ᐊᑕᐅᓯᕐᒥᒃ ᑲᐱᔭᐅᓯᒪᓕᖅᐳᑦ ᒫᑐᓇ ᑲᐴᑎᒧᑦ. ᑲᐱᓯᑲᑕᖕᓂᐊᖅᑐᑦ ᑕᒫᓂ ᐅᑭᐅᖅᑕᖅᑐᒥ ᓱᓕ ᑲᔪᓯᕗᑦ.
ᑭᓇᑐᐃᓐᓇᑦᑎᐊᖅ ᐅᐸᒍᑎᓯᒪᓚᐅᕋᓱᒋᔪᖅ ᓄᕙᒡᔪᐊᕐᓇᖅ−19-ᓕᖕᒧᑦ ᐅᖄᓚᖁᔭᐅᕗᖅ ᓄᕙᕐᔪᐊᕐᓇᒧᑦ−ᐅᖄᓚᕝᕕᒃᓴᒧᑦ ᐅᕗᖓ 1-888-975-8601 10:00−ᒥᑦ ᐅᓪᓛᒃᑯᑦ ᐱᒋᐊᕐᓗᓂ 6:00−ᒧᐊᕋᓱᖕᓂᖓᓄᑦ ᐅᓐᓄᒃᑯᑦ. ᕿᑭᖅᑖᓗᖕᒥᐅᑦ ᖃᐅᔨᓴᐅᑎᖓ ᒪᓕᒡᓗᒍ, ᑐᓴᖅᑎᑦᑎᑲᐅᑎᒋᓗᓂᓘᓐᓃᑦ ᓄᓇᓕᖕᓂ ᐋᓐᓂᐊᕕᖓᓂ, ᐊᓂᑦᑕᐃᓕᒪᓯᑲᐅᑎᒋᓗᓂᓗ ᐅᓪᓗᓄᑦ 14−ᓄᑦ. ᐋᓐᓂᐊᕕᓕᐊᖅᑕᐃᓕᓗᑎᑦ ᓇᖕᒥᓂᖅ.
ᓄᑖᖑᓛᑦ ᑐᓴᒐᒃᓴᑦ ᑕᑯᔪᒪᒍᕕᒋᑦ, ᐅᑯᐊᓗ ᖃᔅᓯᐅᓂᖏᑦ ᐊᓂᒍᐃᔪᑦ ᐊᒻᒪ ᓇᓗᓇᐃᖅᑕᐅᓯᒪᔪᑦ ᐱᖃᕐᓂᖏᓐᓂ ᓄᓇᓕᒃᑎᒍᑦ, ᐅᕗᙵᕐᓗᑎᑦ: www.gov.nu.ca/health/information/covid-19-novel-coronavirus.
ᓄᑖᖑᓛᑦ ᑐᓴᒐᒃᓴᑦ ᑕᑯᔪᒪᒍᕕᒋᑦ ᒫᓐᓇᓗ ᐋᓐᓂᐊᖅᑐᓕᕆᔨᒃᑯᓐᓂ ᑭᒡᓕᖃᖅᑎᑕᐅᔪᑦ, ᐅᕗᙵᕐᓗᓯ: https://www.gov.nu.ca/health/information/nunavuts-path
ᓄᑖᖑᓛᑦ ᑐᓴᒐᒃᓴᐃᑦ ᑕᑯᔪᒪᒍᕕᒋᑦ ᓄᓇᕗᒻᒥ ᓄᕙᒡᔪᐊᕐᓇᖅ−19 ᐋᓐᓂᐊᓕᕇᒃᑯᑎᒧᑦ ᐱᓕᕆᐊᖑᔪᓄᑦ, ᐅᕗᙵᕐᓗᑎᑦ www.gov.nu.ca/health/information/covid-19-vaccination
###
ᐱᕙᓪᓕᐊᔪᓂᒃ ᖃᐅᔨᒋᐊᕐᕕᒃᓴᖅ:
ᑲᐃᑦ ᒪᒡᓚᐅᑦ
ᐱᕙᓪᓕᐊᔪᓄᑦ ᑎᑎᕋᖅᑎ ᓯᕗᓕᖅᑎ ᓴᕕᑲᑖᕐᒧᑦ
867-975-5059
@email
ᑕᐃᓇᕋᐃ ᓴᒧᕕᐅᓪ
ᑐᓴᒐᒃᓴᓕᕆᔨᓄᑦ ᖃᐅᔨᒪᔨᑕᖅ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ
867-975-5712
@email