ᓄᕙᓗᐊᕐᓇᙱᑦᑐᒧᑦ ᑲᐱᔭᐅᓐᓇᒧᑦ ᐃᖅᑲᐃᓯᔾᔪᑎ ᓄᓇᕗᒻᒥᐅᓄᑦ
ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᓄᓇᕗᒻᒥᐅᓂᑦ ᐃᖅᑲᐃᓯᔪᒪᕗᑦ ᐅᓄᖅᓯᕙᓪᓕᐊᑎᓪᓗᒋᑦ ᖃᓂᒻᒪᑐᐃᓐᓇᕆᐊᓖᑦ, ᓄᕙᒡᔪᐊᕐᓇᖅ-19−ᒥᑦ, ᐊᓯᖏᓐᓂᒡᓗ ᐳᕙᒃᑯᑦ ᐋᓐᓂᐊᕆᔭᐅᓲᓂᒃ ᐅᑭᐅᖑᑎᓪᓗᒍ, ᓄᕙᓗᐊᕐᓇᙱᑦᑐᒧᑦ ᑲᐱᔭᐅᔭᕆᐊᖃᓪᓚᕆᒃᐳᑎᑦ.
ᓄᕙᒡᔪᐊᕐᓇᖅ-19−ᒧᑦ ᐋᓐᓂᐊᕈᑕᐅᕙᒃᑐᑦ ᐊᔾᔨᖃᑲᓴᖕᓂᖏᓐᓄᑦ ᓄᕙᖕᓇᐅᒐᔪᒃᑐᒧᑦ ᐅᕝᕙᓘᓐᓃᑦ ᖃᓂᒪᓐᓇᒧᑦ, ᑕᐃᒃᑯᐊ ᓄᕙᒡᔪᐊᕐᓇᖅ-19−ᒧᑦ ᓄᑖᙳᕆᐊᖅᓯᒪᔪᒥᑦ ᑲᐱᔭᐅᔪᓐᓇᖅᑐᑦ ᑎᓕᐅᖅᐸᕗᑦ ᑲᐱᔭᐅᖁᓪᓗᒋᑦ ᓄᕙᓗᐊᕐᓇᙱᑦᑐᒧᑦ ᑲᐱᔭᐅᓕᖅᐸᑕ ᐅᑭᐅᖑᔪᖅ.
ᓄᕙᓗᐊᕐᓇᙱᑦᑐᑦ ᐊᒻᒪ ᓄᕙᒡᔪᐊᕐᓇᖅ−19−ᒧᑦ ᑲᐴᑎᑦ ᐊᑐᐃᓐᓇᐅᑎᑕᐅᖏᓐᓇᖅᑐᖅ ᓄᓇᕗᒻᒥᐅᓕᒫᓄᑦ ᑕᖅᑭᓕᖕᓂᑦ 6−ᒥᑦ ᐅᖓᑖᓄᓪᓗ. ᐊᑦᑕᕐᓇᙱᑉᐳᖅ ᑲᐱᔭᐅᖁᔭᐅᕗᓪᓗ ᑕᒪᐃᓐᓂᒃ ᓄᕙᓗᐊᕐᓇᙱᑦᑐᒧᑦ ᓄᕙᒡᔪᐊᕐᓇᒧᓪᓗ ᐋᓐᓂᐊᓕᕇᒃᑯᑎᒧᑦ ᐊᑕᐅᑦᑎᒃᑯᑦ. 65−ᓂᒃ ᐅᖓᑖᓂᓘᓐᓃᑦ ᐅᑭᐅᓖᑦ, ᐊᓯᐊᒍᑦ ᓄᕙᓗᐊᕐᓇᙱᑦᑐᒧᑦ ᑲᐱᔭᐅᔪᓐᓇᖅᐳᑦ ᓴᐳᔾᔭᐅᓯᒪᒃᑲᓐᓂᕐᓗᑎᒃ ᑕᐃᒪᓐᓇ ᐅᑭᐅᓖᑦ.
ᐅᑯᐊ ᒪᓕᒃᑕᐅᑦᑎᐊᑐᐊᖅᐸᑕ ᐊᐃᑦᑐᕐᓗᐃᙱᓐᓂᖅᓴᐅᔪᓐᓇᖅᐳᑦ ᖃᓂᒪᓐᓇᒥ, ᓄᕙᒡᔪᐊᕐᓇᖅ-19−ᒥ, ᐊᓯᖏᓐᓂᒡᓗ ᐳᕝᕕᕆᓐᓇᖅᑐᑦ ᖃᓂᒪᓐᓇᓂᑦ:
- ᐊᖏᕐᕋᖅᓯᒪᑐᐃᓐᓇᕐᓗᑎᑦ ᖃᓂᒪᒍᕕᑦ.
- ᖁᐃᖅᓱᖅᐸᒡᓗᑎᑦ ᑕᒋᐅᒃᐸᒡᓗᑎᓪᓗ ᑕᓕᕐᓄᑦ.
- ᐊᒡᒐᑎᑦ ᐅᐊᓴᕋᔪᒡᓗᒋᑦ ᐊᒻᒪ ᐊᒡᒐᒧᑦ ᐆᒪᔪᐃᔭᐅᑎᒥᒃ ᐊᑐᖅᐸᒡᓗᑎᑦ ᐊᑐᐃᓐᓇᐅᔪᖃᖅᐸᑦ
- ᑮᓇᐃᑦ ᐊᒃᑐᖅᑕᐃᓕᓗᒍ.
- ᑲᒃᑭᐅᑎᒋᐊᓂᒃᑕᓯ ᐃᕐᖐᓐᓇᖅ ᐊᒃᑕᑰᓯᕝᕕᖕᒧᑦ ᐃᒋᑉᐸᒡᓗᒋᑦ.
- ᐃᓅᖃᑎᓯ ᖃᓂᒋᓗᐊᖅᐸᙱᓪᓗᒋᑦ ᐊᓂᓯᒪᑎᓪᓗᓯ.
- ᐃᒡᓗᒥ ᓱᐴᖅᑐᖅᐸᙱᓪᓗᑎᑦ ᐅᕝᕙᓘᓐᓃ ᐃᓅᖃᑎᓯ ᖃᓂᒋᔮᓂ, ᐱᓗᐊᖅᑐᒥ ᓄᑕᕋᓛᑦ ᖃᓂᒋᔭᖏᓐᓂ.
- ᐃᓄᒋᐊᓂᑦ ᒪᑐᐊᖅᓯᒪᕙᒡᓗᑎᑦ ᓴᐳᔾᔨᓯᒪᔪᓐᓇᖅᐳᑎᑦ ᐊᓂᖅᑎᕆᔾᔪᑎᒃᑯᑦ ᖃᓂᒪᓐᓇᓂᑦ.
ᐃᓕᖕᓂᒃ ᓄᓇᖅᑲᑎᑎᓪᓗ ᓴᐳᔾᔭᐅᓯᒪᖁᓪᓗᒋᑦ, ᐋᓐᓂᐊᕕᖕᒥ ᓱᓕ ᒪᑐᐊᖅᓯᒪᔭᕆᐊᖃᐃᓐᓇᖃᑦᑕᖅᐳᑦ.
ᐋᓐᓂᐊᕐᕕᖕᒧᑦ ᐅᖁᒪᐃᓐᓂᕐᓂᐊᕐᕕᖕᒧᓪᓘᓐᓃᑦ ᐅᖃᓛᑐᐃᓐᓇᕐᓗᓯ ᐃᓂᒃᓴᓕᐅᕈᒪᓗᓯ. ᐃᖃᓗᖕᓂ ᐅᖁᒪᐃᓐᓂᕐᓂᐊᕐᕕᖕᒧᑦ ᓱᓕ ᐃᓯᑐᐃᓐᓇᕈᓐᓇᖅᑐᑦ ᓄᕙᓗᐊᕐᓇᙱᑦᑐᒧᑦ ᓄᕙᒡᔪᐊᕐᓇᖅ-19−ᒧᓪᓗ ᑲᐱᔭᐅᔪᒪᔪᓄᑦ ᐅᓪᓗᑐᐃᓐᓇᑕᒫ 9−ᒥᑦ ᐅᓪᓛᒃᑯᑦ 4:30−ᒧᑦ ᑎᑭᓪᓗᒍ.