ᑕᕝᕙᓂ ᐊᕐᕌᒍᒥ ᑲᓇᑕᒥ ᕿᒃᓵᓂᕐᒧᑦ ᐅᓪᓗᖓ ᐊᑦᑐᐊᓂᖃᖅᑐᖅ ᐃᖅᑲᓇᐃᔭᖅᑏᑦ ᐊᑦᑕᕐᓇᙱᑦᑐᒦᓐᓂᖏᓐᓂᒃ ᐋᓐᓂᖅᑕᐃᓕᒪᑎᑦᓯᓂᕐᒧᓪᓗ

ᐃᖃᓗᐃᑦ, ᓄᓇᕗᑦ (ᐄᐳᓗ 24, 2024) – ᒥᓂᔅᑕ ᐃᖅᑲᓇᐃᔭᖅᑐᓕᕆᔨᒃᑯᓐᓄᑦ ᑕᐃᕕᑦ ᐊᕿᐊᕈᖅ ᑐᙵᓱᒃᑎᑦᓯᕗᖅ ᒐᕙᒪᒃᑯᑦ ᐃᖅᑲᓇᐃᔭᖅᑎᓕᒫᖏᓐᓂᒃ ᐃᓚᐅᖁᓪᓗᒋᑦ ᑕᕝᕙᓂ ᐊᕐᕌᒍᒥ ᑲᓇᑕᒥ ᕿᒃᓵᓂᕐᒧᑦ ᐄᐳᓗ 28, 2024−ᒥ.

"ᑲᓇᑕᒥ ᕿᒃᓵᓂᕐᒧᑦ ᐅᓪᓗᖓᓂ ᐱᕕᖃᖅᑎᑦᓯᕗᖅ ᒐᕙᒪᒃᑯᑦ ᐃᖅᑲᓇᐃᔭᖅᑎᓕᒫᖏᓐᓂᒃ ᑲᑎᓪᓗᑎᒃ ᐃᖅᑲᐅᒪᓗᑎᓪᓗ ᐃᖅᑲᓇᐃᔭᖃᑎᒥᓂᒃ ᐋᓐᓂᖃᑦᑕᖅᓯᒪᔪᓂᒃ ᐃᖅᑲᓇᐃᔭᕐᕕᒻᒥᓂᒃ, ᐃᖅᑲᐅᒪᓗᒋᓪᓗ ᐱᒻᒪᕆᐅᔪᑦ ᐱᓕᕆᐊᖏᑦ ᐊᑦᑕᕐᓇᖅᑕᐃᓕᒪᓂᕐᒧᑦ ᐃᖅᑲᓇᐃᔭᕐᕕᑦᑎᓐᓂᑦ. "ᐃᓘᓐᓇᑕ ᐱᓕᕆᐊᒃᓴᖃᖅᑐᐃᓐᓇᐅᕗᒍᑦ ᓴᖅᑭᑎᑦᓯᓂᕐᒥᒃ ᐊᑦᑕᕐᓇᖏᑦᑐᒥᒃ ᖃᓄᐃᙱᑦᓯᐊᖅᑐᒥᓪᓗ ᐃᖅᑲᓇᐃᔭᕐᕕᒋᔭᐅᔪᓂᒃ, ᖃᓄᓕᒫᕐᓗ ᐊᑐᖃᑦᑕᖅᑕᕗᑦ ᐋᓐᓂᖅᑕᐃᓕᒪᑎᑦᓯᓂᕐᒧᑦ ᐋᓐᓂᐊᕐᓂᕐᓂᓪᓗ ᐃᖅᑲᓇᐃᔭᕐᕕᒋᔭᐅᔪᓂ ᐊᓪᓗᕆᐊᕐᓂᐅᕗᖅ ᐊᑦᑕᕐᓇᙱᓐᓂᕐᓴᒧᑦ ᓯᕗᓂᒃᓴᒧᑦ," ᐅᖃᖅᑐᖅ ᒥᓂᔅᑕ ᐊᕿᐊᕈᖅ. "ᓂᐱᖃᙱᑲᐃᓐᓇᓚᐅᖅᑕ 11-ᒨᖅᐸᑦ ᐅᓪᓛᓴᒃᑯᑦ, ᑕᕝᕙᓂ ᑲᓇᑕᒥ ᕿᒃᓵᓂᕐᒧᑦ ᐅᓪᓗᖓᓂ, ᐅᐱᒋᓗᒋᑦ ᑕᐃᒃᑯᐊ ᐊᒃᑐᖅᑕᐅᓯᒪᔪᑦ ᐃᖅᑲᓇᐃᔭᕐᕕᒻᒥᑦ ᐱᓂᕐᓗᒍᑕᐅᖃᑦᑕᖅᓯᒪᔪᑦ ᐊᒻᒪ ᐅᕙᑦᑎᓐᓄᑦ ᐊᖏᖅᓯᒪᓗᑕ ᐃᖅᑲᓇᐃᔭᕐᕕᕗᑦ ᐊᑦᑕᕐᓇᙱᓐᓂᖅᓴᐅᖁᓪᓗᒍ ᐊᒻᒪ ᖃᓄᐃᙱᑦᓯᐊᕐᓂᖅᓴᐅᖁᓪᓗᒍ ᑭᒃᑯᓕᒫᓄᑦ."

ᐃᑲᔪᖅᑕᐅᔪᒪᓗᓂ, ᐃᓚᒋᓪᓗᒍ ᖃᓄᐃᖏᑦᓯᐊᕐᓂᖅ ᐊᒻᒪ ᓇᒻᒥᓂᖅ ᐃᓅᓯᓕᕆᔭᐅᓂᖅ, ᓄᓇᕗᑦ ᒐᕙᒪᒃᑯᑦ ᐃᖅᑲᓇᐃᔭᖅᑎᖏᑦ ᐃᓚᖏᓪᓗ ᐱᔪᓐᓇᖅᐳᑦ ᐃᖅᑲᓇᐃᔭᖅᑎᓄᑦ ᐃᓚᖏᓐᓄᓪᓗ ᐃᑲᔪᖅᑕᐅᔪᒪᓂᕐᒧᑦ ᐱᓕᕆᐊᑦᓴᖅ ᐅᖄᓚᓗᑎᑦ 1-800-663-1142−ᒧ.