ᐃᖃᓗᖕᓂ ᑐᓚᒃᑕᕐᕕᒃ
ᐃᖃᓗᖕᓂ ᑐᓚᒃᑕᕐᕕᒃ ᐱᔾᔪᑎᒋᓪᓗᒍ
ᐃᖃᓗᐃᑦ ᓄᓇᕗᒻᒥ ᑐᑦᑕᕐᕕᐅᕗᖅ ᐊᒻᒪ ᐊᕕᒃᑐᖅᓯᒪᔪᓂ ᑐᑦᑕᕐᕕᐅᓪᓗᓂ ᐃᓄᒋᐊᒃᓯᕙᓪᓕᐊᓪᓗᑎᒃ ᐊᒻᒪ ᑮᓇᐅᔭᓕᐅᕈᑕᐅᕙᓪᓕᐊᔪᑦ ᐅᓄᖅᓯᕙᓪᓕᐊᓪᓗᑎᒃ. 2000 ᐱᒋᐊᕐᓂᐸᓗᐊᓂ, ᓇᓗᓇᕈᓐᓃᓚᐅᖅᑐᖅ ᑐᓗᖅᑕᕈᑏᑦ ᐅᒥᐊᕐᔪᐊᕐᒧᑦ ᐅᓯᔭᐅᓂᖏᓐᓄᑦ ᐊᒃᑐᐃᓂᖃᓕᕋᔭᕐᒪᑕ ᓄᓇᓖᑦ ᐅᒥᐊᕐᔪᐊᖃᖃᑦᑕᕐᓂᖏᑕ ᐊᐅᓚᓂᖏᓐᓄᑦ. ᐱᓗᐊᖅᑐᒥᒃ, ᐊᖏᓂᖓ ᓯᑲᐅᓄᑦ ᓯᕕᖓᔪᖅ ᑲᐃᓪᓗᐊᕈᑎᐅᑉ ᐊᒻᒪᓗ ᐅᓯᓕᖅᓱᕐᕕᖓ, ᐊᑕᐅᑦᑎᒃᑯᑦ ᐱᔾᔪᑎᖃᖃᑦᑕᓚᐅᕐᓂᖏᓐᓄᑦ ᓯᑲᐅᑦ ᐃᖃᓗᖕᓂ ᑎᓂᕐᔪᐊᖃᑦᑕᕐᓂᖓᓄᑦ, ᑐᑭᖃᓚᐅᖅᑐᖅ ᑕᐃᓐᓇ ᐃᓂᒋᔭᐅᔪᑐᖃᖅ ᑕᑖᖅᐸᓪᓕᐊᑐᐃᓐᓇᕋᔭᕐᒪᑦ. ᓂᕆᐅᓇᙱᑦᑐᑦ ᓲᕐᓗ ᓯᑯᖃᕈᓐᓃᖅᐸᑦ ᑲᖏᖅᖢᖕᒥᑦ ᒪᕐᕉᖕᓂᓪᓘᓐᓃᑦ ᐊᒥᓲᓂᖅᓴᓂᒡᓘᓐᓃᑦ ᐅᒥᐊᕐᔪᐊᓂᑦ ᓂᐅᕋᐃᓇᓱᒃᑐᖃᓕᕐᓂᖅᐸᑦ ᐊᑕᐅᑦᑎᒃᑯᑦ ᑭᖑᕙᓯᒍᑕᐅᑐᐃᓐᓇᕆᐊᖃᕐᓂᖓᓄᑦ, ᐊᒃᑐᐃᓂᖃᑐᐃᓐᓇᕆᐊᓕᒃ ᐅᒥᐊᕐᔪᐊᑕᐅᒋᐊᓕᖕᓂᑦ ᐊᓯᖏᓐᓂᑦ ᓄᓇᓕᖕᓂᑦ.
2015-ᒥ, ᑲᓇᑕᒥ ᒐᕙᒪᒃᑯᑦ ᑐᓴᒐᒃᓴᖃᓚᐅᖅᓯᒪᔪᑦ $63.7 ᒥᓕᐊᓂᒃ ᑮᓇᐅᔭᖃᖅᑎᑦᑎᓂᖏᓐᓂᒃ ᐃᖃᓗᖕᓂ ᑐᓚᒃᑕᕐᕕᖕᒧᑦ ᐊᖅᑯᑎᖃᖅᖢᑎᒃ ᑲᓇᑕᒥ ᓄᑖᒥᒃ ᐃᓪᓗᕐᔪᐊᓕᐅᕐᓂᕐᒧᑦ ᑮᓇᐅᔭᖅᑖᕐᕕᒃᑯᑦ. ᑖᓐᓇ ᑲᓇᑕᒥ ᐃᑲᔫᓯᐊᖅ ᑭᒡᒐᖅᑐᐃᔪᖅ 75 ᐳᓴᓐᑎᖓᓂ ᑲᑎᓪᓗᒋᑦ $84.9 ᒥᓕᐊᓐ ᐊᑭᖏᓐᓄᑦ ᐱᓕᕆᐊᒃᓴᒧᑦ. ᒐᕙᒪᒃᑯᑦ ᓄᓇᕗᒻᒥ ᐊᑐᐃᓐᓇᐅᑎᑦᑎᓯᒪᔪᑦ ᐊᒥᐊᒃᑯᖓᓂᑦ $21.2 ᒥᓕᐊᓂᒃ.
ᑖᓐᓇ ᐱᓕᕆᐊᖑᔪᖅ ᐃᓚᖃᖅᐳᖅ ᐃᑎᔪᒥᒃ ᐅᒥᐊᕐᔪᐊᓄᑦ ᐃᓂᒋᔭᐅᔪᓐᓇᖅᑐᒥᒃ ᐅᓯᔭᐅᔪᒃᓴᓄᑦ, ᐅᖅᓱᐊᓗᖕᒧᑦ, ᑲᓇᑕᒥᐅᓄᓪᓗ ᓯᑯᓯᐅᑎᓄᑦ ᐅᒥᐊᕐᔪᐊᓄᑦ ᐃᓂᒋᔭᐅᔪᑦ ᐃᓂᖃᖅᖢᑎᒃ ᐃᒫᒎᖅᑐᒥᒃ ᑐᓚᒃᑕᕐᕕᖕᒥᒃ, ᐅᓯᔭᐅᔪᒃᓴᓂᒃ, ᓯᑲᐅᓄᑦ ᓯᕕᖓᔪᖅᓯᐅᑎᒥᒃ, ᐅᖅᓱᓄᓪᓗ ᐃᓂᒋᔭᐅᕙᒃᑐᒥᒃ. ᐋᖅᑭᒋᐊᖅᑕᐅᒃᑲᓐᓂᓚᐅᖅᑐᑦ ᐅᒥᐊᕋᓛᖑᓂᖅᓴᓄᑦ ᑐᓚᒃᑕᕐᕖᑦ ᑐᓚᒃᑕᕐᕕᓕᐅᒃᑲᓐᓂᖅᖢᑎᒃ, ᐳᒃᑕᓛᓲᒥᑦ ᑐᓚᒃᑕᕐᕕᖕᒥᑦ, ᐊᒻᒪ ᑎᓂᙵᑎᓪᓗᒍ ᐅᒥᐊᓄᑦ ᓂᐅᕋᐃᕝᕕᖕᓂᑦ.
2018-ᒥ, ᐱᓕᕆᐊᒃᓴᖅ ᓴᓇᔭᐅᓂᖓᓄᑦ ᑳᓐᑐᕌᒃ ᑐᓂᔭᐅᓯᒪᔪᖅ Tower Arctic Ltd.−ᑯᓐᓄᑦ, ᓴᓇᔭᐅᓂᖓᓗ ᐱᒋᐊᓚᐅᖅᓯᒪᓪᓗᓂ ᐊᕐᕌᒎᑉ ᓄᕐᖑᐊᓂ.
2022-ᒥ, ᐱᓕᕆᐊᒃᓴᖅ ᐊᖏᔪᑲᓪᓚᖕᒥᑦ ᐱᔭᕇᖅᑕᐅᔪᓐᓇᖅᓯᓚᐅᖅᑐᖅ.
ᑖᓐᓇ ᐱᓕᕆᐊᒃᓴᖅ ᐊᐅᓚᑕᐅᔪᖅ ᓄᓇᕗᒻᒥ ᒐᕙᒪᒃᑯᓐᓄᑦ ᓄᓇᓕᖕᓂ ᒐᕙᒪᒃᑯᓂᓪᓗ ᐱᔨᑦᑎᕋᖅᑎᒃᑯᓐᓄᑦ. ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ (EDT) ᐱᓕᕆᖃᑕᐅᔪᑦ ᑲᒪᒋᔭᖃᕐᓂᐊᖅᖢᑎᓪᓗ ᐋᖅᑭᒃᓯᓂᕐᒧᑦ ᐲᔭᐃᓂᕐᒧᓪᓗ ᐳᒃᑕᓛᖅᑐᑦ ᐅᒦᕆᕝᕕᖕᓂᑦ ᐊᒻᒪ ᑲᔪᓯᑎᑦᑎᓂᕐᒧᑦ ᐊᓯᖏᓐᓂᑦ ᐊᐅᓚᓂᐅᔪᓂᑦ ᑲᒪᒋᔭᖃᕆᐊᖃᕐᓂᕐᒧᓪᓗ. ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ ᐊᐅᓚᓂᖃᖅᑐᑦ ᑲᒪᒋᔭᖃᕐᓂᕐᒧᓪᓗ ᑮᓇᐅᔭᓂᑦ ᐱᓕᕆᕝᕕᒻᒥ ᓯᕗᒧᐊᑦᑎᑦᓯᓂᕐᒧᑦ ᐱᓕᕆᐊᖃᖅᓱᑎᓪᓗ ᐱᕙᒌᔭᐃᓂᕐᒧᑦ ᐊᐅᓚᓂᐅᔪᒧᑦ ᐊᑦᑐᐊᓂᖃᖅᑐᓂᑦ ᐱᔭᕆᐊᓕᓐᓂᑦ ᐃᓂᒋᔭᐅᔪᓇᕐᓂᖓᓂᓪᓗ.