ᐊᐅᓚᑦᑎᔨ ᑲᒪᒋᔭᐅᖏᓐᓇᕆᐊᖃᖅᑐᒃᑯᕕᖕᒥᑦ
ᑖᓐᓇ ᐃᖅᑲᓇᐃᔮᒃᓴᖅ ᒪᑐᐃᖓᔪᖅ ᐆᒃᑐᕈᒪᔪᓕᒫᓄᑦ.
ᓄᓇᕗᒻᒥ ᒐᕙᒪᒃᑯᑦ ᓂᕈᐊᖅᑕᐅᓯᒪᔪᑦ ᑲᓇᑕᒥ ᐊᔾᔨᒌᙱᑦᑐᓂᒃ ᐃᖅᑲᓇᐃᔭᖅᑎᖃᕐᓂᖅᐹᖑᓂᖓᓄᑦ, ᐃᖅᑲᓇᐃᔭᕐᕕᑦᑎᐊᕙᐅᓛᖑᓂᖓᓄᑦ ᒪᒃᑯᒃᑐᓄᑦ ᐃᓕᓐᓂᐊᖅᑕᒥᓂᒡᓗ ᐊᓂᒍᐃᓵᓚᐅᖅᑐᓄᑦ 2023-ᒥ. ᐱᕈᖅᐸᓪᓕᐊᓂᖅᐹᖑᖃᑕᐅᔪᖅ ᒪᒃᑯᒃᑐᐃᓪᓗ ᐃᓄᒋᐊᖕᓂᖅᐹᖑᓪᓗᑎᒃ ᑲᓇᑕᒥ, ᓄᓇᕗᒻᒥ ᐆᒻᒪᕆᒃᑐᖅ, ᐱᔪᒃᓯᑦᑎᐊᖅᑐᑦ, ᐊᖏᖅᓯᒪᑦᑎᐊᖅᖢᑎᒡᓗ ᐱᐅᓂᖅᓴᒥᒃ ᐃᓂᖃᖅᑎᑦᑎᖁᔨᓪᓗᑎᒃ ᑭᖑᕚᒃᓴᑎᓐᓄᑦ. ᒐᕙᒪᐅᑎᓪᓗᑕ, ᐊᐅᓚᓂᕆᔭᕗᑦ ᐊᔾᔨᐅᙱᓐᓂᖓ ᓴᙱᓂᖅᑖᖅᑎᑉᐸᓪᓕᐊᕙᕗᑦ - ᐃᓚᓕᐅᔾᔨᓪᓗᑎᒃ ᐃᓄᐃᑦ ᖃᐅᔨᒪᔭᑐᖃᖏᓐᓂ, ᐃᓄᒃᑐᑦ ᐅᖃᐅᓯᖓᓂᒃ ᐊᑐᖅᑎᑦᑎᓂᖅᓴᐅᓇᓱᒃᖢᑎᒃ, ᑭᒡᒐᖅᑐᐃᑦᑎᐊᕐᓗᓂ ᒐᕙᒪᒃᑯᓐᓂᑦ ᐱᔨᑦᑎᕋᖅᑎᓂᒃ, ᐱᓕᕆᖃᑎᖃᖃᑦᑕᕐᓗᓂᓗ ᑲᑐᔾᔨᖃᑎᒥᓂᒃ ᐊᑐᕐᓂᐊᕐᓂᕋᖅᓯᒪᔭᒥᓂᒃ ᑲᔪᓯᑎᑦᑎᖁᓪᓗᒋᑦ ᓄᓇᕗᒻᒥ. ᓂᕈᐊᖅᑕᐅᔪᑦ ᐱᓇᔪᒃᑐᑦ ᑮᓇᐅᔾᔭᒃᓴᑦᑎᐊᕐᓂᐊᖅᐳᑦ, ᐋᓐᓂᐊᕕᖕᒥ ᐊᒻᒪ ᑭᒍᑎᓕᕆᔭᐅᓂᕐᒧᑦ ᐃᑲᔫᓯᐊᓂᒃ, ᓇᓗᓇᐃᖅᓯᒪᔪᒥᑦ ᐃᑲᔫᓯᐊᒃᓴᓂᒃ ᐃᓐᓇᖅᓯᐅᑎᒃᓴᓄᑦ ᐸᕐᓇᐅᑎᒥᒃ, ᓅᑎᑕᐅᓂᕐᒧᑦ ᐱᔪᓐᓇᕐᓂᖏᑦ ᐊᒻᒪ ᐱᕕᒃᓴᖃᖅᑎᑕᐅᓗᑎᒃ ᐱᓕᒻᒪᒃᓴᕐᓂᕐᒧᑦ ᐊᒻᒪ ᐃᖅᑲᓇᐃᔮᒥ ᐱᕚᓪᓕᕈᑎᒃᓴᓂᒃ.
ᑐᓴᖅᑎᑦᑎᕙᒡᓗᓂ ᑐᑭᒧᐊᖅᑎᑦᑎᔨᒧᑦ, ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᓕᕆᐊᒃᓴᑦ, ᐊᐅᓚᑦᑎᔨ ᑲᒪᒋᔭᐅᖏᓐᓇᕆᐊᖃᖅᑐᒃᑯᕕᖕᒥᑦ ᑲᒪᒋᔭᖃᖃᑦᑕᕐᓂᐊᖅᑐᖅ ᑕᒪᐃᓐᓄᑦ ᐊᐅᓚᑦᑎᓂᕐᒥᑦ ᐊᒻᒪ ᓴᖅᑭᑎᑦᑎᓂᕐᒥᑦ ᐱᓕᕆᐊᒃᓴᓂᑦ ᐱᔨᑦᑎᕋᐅᑎᓄᓪᓗ ᑐᕌᖓᔪᓂᑦ ᑐᕌᒐᓂᑦ ᐊᑐᐃᓐᓇᐅᑎᑦᑎᓂᕐᒧᑦ ᐱᐅᔪᒥᑦ ᑲᒪᒋᔭᐅᖏᓐᓇᕆᐊᖃᖅᑐᓂᑦ ᑲᒪᒋᔭᐅᖏᓐᓇᕆᐊᖃᖅᑐᒃᑯᕕᖕᒥᑦ. ᐃᖅᑲᓇᐃᔮᒃᓴᖅ ᐱᕙᓪᓕᐊᑎᑦᑎᓪᓗᓂ ᐱᓕᕆᔨᒻᒪᕆᐅᓂᕐᒥᒃ ᓄᓇᓕᖕᓂᓗ ᐱᓕᕆᖃᑎᖃᕐᓂᕐᓂᑦ ᐅᖃᖃᑎᒋᓗᒋᑦ ᐱᓕᕆᖃᑎᒋᓗᒋᓪᓗ ᐱᕙᓪᓕᐊᑎᑦᑎᓂᕐᒥᒃ, ᐊᑐᓕᖅᑎᑦᑎᓂᕐᓂ ᖃᐅᔨᓴᐃᓂᕐᓂᒃᓗ ᐱᓕᕆᐊᒃᓴᓂᑦ ᐱᔨᑦᑎᕋᐅᑎᓂᒃᓗ ᑲᑎᒍᑎᔪᓂᒃ ᐱᔭᕆᐊᓕᖏᓐᓂᒃ ᑲᒪᖏᔭᐅᔪᑦ ᐸᖅᑭᔭᐅᙱᓐᓇᖅᑐᑦ ᐊᒻᒪᓗ ᒪᓕᒃᑐᑦ ᐊᑐᐊᒐᓂᑦ, ᒪᓕᒋᐊᓕᖏᓐᓂᑦ ᐊᑐᕋᓲᑎᖏᓐᓂᒃᓗ ᓄᓇᕗᒻᒥ ᒐᕙᒪᒃᑯᓐᓂ, ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ.
ᐱᓕᕆᐊᖑᓪᓗᐊᑕᕐᓂᐊᖅᑐᑦ ᓂᕈᐊᖅᑕᐅᔪᒧᑦ ᐅᑯᓂᖓ ᐃᓚᖃᕐᓂᐊᕆᕗᑦ:
- ᐊᐅᓚᑦᑎᔨᐅᓗᓂ ᑲᒪᔨᐅᓗᓂᓗ ᐊᒡᓚᕝᕕᓕᕆᓂᕐᒧᑦ ᐊᐅᓚᑦᑎᕕᒃ;
- ᓇᓗᓇᐃᔭᐃᕙᒡᓗᓂ ᐱᔾᔪᑎᒃᓴᓄᑦ ᐱᔭᕆᐊᖃᖅᑐᑦ ᓴᖅᑭᑎᑦᑎᖁᓪᓗᒋᑦ ᐱᓕᕆᐊᒃᓴᓂᑦ ᐱᔨᑦᑎᕋᐅᑎᓄᓪᓗ, ᐱᓚᓕᐅᔾᔨᓂᖅ ᐃᖅᑲᓇᐃᔭᖅᑎᑖᓂᕐᒧᑦ ᐱᔭᕆᕆᐊᓖᑦ, ᐱᖁᑎᓄᑦ ᐊᒻᒪ ᐱᔾᔪᑎᒃᓴᓄᑦ ᐱᔭᕆᐊᓖᑦ ᐱᕙᒌᔭᕐᓂᕐᒧᓗ ᑕᖅᑭᑕᒫᖅ ᑮᓇᐅᔭᖅᑐᕈᑎᒃᓴᖏᑦ ᓇᓚᐅᑦᑖᖅᑕᐅᓯᒪᔪᓄᑦ;
- ᐋᕿᐅᒪᑎᑦᑎᓂᖅ ᑲᒪᒋᔭᐅᒋᓐᓇᖅᑐᒃᑯᕕᒃ ᐊᑎᓕᐅᕐᕕᖓ ᐃᓄᖕᓄᑦ ᐃᓕᔭᐅᓯᒪᔪᓄᑦ ᑲᒪᒋᔭᐅᖏᓐᓇᖅᑐᒃᑯᕕᖕᒧᑦ;
- ᐱᕙᓪᓕᐊᑎᑦᑎᓂᖅ ᐊᕐᕌᒍᑕᒫᑦ ᐱᓕᕆᔾᔪᓯᕐᓂᑦ ᑎᑭᑕᐅᓇᓱᐊᖅᑐᑦ/ᕿᒥᕐᕈᓂᖅ, ᐊᒻᒪ ᐱᓕᕆᐊᒃᓴᓄᑦ ᐸᕐᓇᒃᑕᐅᓯᒪᔪᑦ ᐃᖅᑲᓇᐃᔭᖅᑎᓄᑦ ᐃᓚᒋᔭᐅᔪᓂᑦ;
- ᐱᓕᕆᕙᒡᓗᓂ ᐃᓗᐊᖅᓴᐃᔨᑦ ᐊᐅᓚᓂᕆᕙᒃᑕᖏᓐᓂᑦ ᐱᔭᕆᐊᖃᖅᐸᑦ.
ᖃᐅᔨᒪᓂᖅ, ᐊᔪᙱᑕᖃᕐᓂᖅ ᐊᒻᒪ ᐱᔪᓐᓇᕐᓂᖃᑦᑎᐊᕆᐊᓕᒃ ᐃᖅᑲᓇᐃᔮᒃᓴᒧᑦ ᐱᔭᐅᔪᓐᓇᖅᑐᖅ ᐱᔭᕇᕈᓯᐊᖅᑖᖅᑎᑕᐅᓯᒪᓗᓂ ᐃᓗᐊᖅᓴᐃᓯᔨᐅᓂᕐᒧᑦ ᐃᖃᓯᐅᑎᓗᒋᑦ ᑕᓪᓕᒪᓄᑦ (5) ᐅᑭᐅᓄᑦ ᐊᐅᓚᑦᑎᔨᐅᓂᑰᓗᓂ, ᐊᑲᐅᒋᔭᐅᕗᖅ ᑲᒪᒋᔭᐅᒋᓐᓇᕆᐊᖃᖅᑐᒃᑯᕕᖕᒥᑦ. ᐃᖅᑲᓇᐃᔮᖅᑖᕋᓱᒃᑐᑦ ᐊᑎᓕᖅᑕᐅᖃᑕᐅᔭᕆᐊᓕᒃ ᐱᒋᐊᓚᐅᙱᑎᓪᓗᒋᑦ ᓯᓚᑦᑐᖅᓴᕐᕕᒃ ᐊᒻᒪ ᑲᑐᔾᔨᖃᑎᒌᑦ ᐃᓗᐊᖅᓴᐃᔨᐅᓂᕐᒧᑦ ᓄᓇᑦᓯᐊᑉᒥᑦ ᐊᒻᒪ ᓄᓇᕗᒻᒥᓗ (CANNN) ᐊᕐᕌᒍᑕᒫᖅ ᐃᓕᓴᕆᔭᐅᔾᔪᑎᑖᖅᑎᑕᐅᒃᑲᓐᓂᓕᖅᐸᑦ. ᐱᐊᓂᒃᒥᒧᑦ ᐊᐅᓚᑦᑎᓂᕐᒧᑦ ᐱᓕᒻᒪᒃᓴᕐᓂᖅ ᐃᓱᒪᒋᔭᐅᓂᐊᖅᑐᖅ ᐱᔭᕆᐊᖃᕐᓂᖓᓂᑦ.
ᐅᓇ ᐃᖅᑲᓇᐃᔮᖅ ᐱᑐᐃᓐᓇᐅᙱᑦᑐᒻᒪᕆᐅᒻᒪᑦ ᐱᕋᔭᒃᓯᒪᓂᑰᙱᒃᑲᓗᐊᖕᒪᖔᑦ ᖃᐅᔨᓴᖅᑕᐅᔭᕆᐊᓕᒃ, ᐊᑦᑕᕐᓇᖅᑐᒦᑎᑦᓯᓂᐊᙱᒃᑲᓗᐊᕐᒪᖔᑦ ᖃᐅᔨᓴᖅᑕᐅᔭᕆᐊᖃᕆᓪᓗᓂ.
ᖃᐅᔨᒪᒋᑦ ᓄᕙᒡᔪᐊᕐᓇᖅ-19−ᒧᑦ ᐋᓐᓂᐊᓕᕇᒃᑯᑎᒧᑦ ᑲᐱᔭᐅᓯᒪᔭᕆᐊᓕᒃ ᐃᖅᑲᓇᐃᔮᖅᑖᕋᓱᒃᑐᖅ. ᑐᓐᓂᖅᑯᑎᒋᓗᒍ ᓄᕙᒡᔪᐊᕐᓇᖅ-19−ᒧᑦ ᑲᐱᔭᐅᔾᔪᑎᒧᑦ ᓇᓗᓇᐃᒃᑯᑕᐃᑦ ᐃᖅᑲᓇᐃᔮᖅᑖᕋᓱᒍᑎᒋᔭᕐᓄᑦ. ᖃᖓᑕᓲᒃᑯᑦ ᓄᒃᑕᖅᑎᑦ ᑲᒪᒋᔭᒃᓴᖃᖅᐳᑦ ᐃᓱᒪᓕᐅᕆᒋᐊᖃᖅᖢᑎᒃ ᑭᓱᑦ ᐃᓕᔅᓯᓐᓄᑦ ᓈᒻᒪᖕᒪᖔᑕ ᑐᙵᕕᒋᓗᒋᑦ ᓄᓇᕘᒥ/ᑲᓇᑕᒥ ᐊᕕᒃᑐᖅᓯᒪᔪᓂᒃ ᐱᔭᐅᒋᐊᓕᑦ ᒪᓕᒡᓗᒋᑦ.
ᐅᖃᐅᓰᑦ ᐃᓕᓴᕆᔭᐅᓯᒪᔪᑦ ᓄᓇᕗᒻᒥ ᐅᑯᐊᖑᕗᑦ ᐃᓄᒃᑐᑦ, ᖃᓪᓗᓈᑐᑦ ᐅᐃᕖᑐᓪᓗ. ᐱᓇᔪᒍᒪᔪᑦ ᐃᖅᑲᓇᐃᔮᖅᑖᕋᓱᐊᕈᑎᒥᑦ ᑎᑎᕋᕈᓐᓇᖅᑐᑦ ᓂᕈᐊᕆᔭᖏᓐᓂᑦ ᐃᓕᓴᕆᔭᐅᓯᒪᔪᓂᑦ ᐅᖃᐅᓯᖅᑕᓂᒃ ᓄᓇᕗᒻᒥ. ᑐᓴᐅᒪᑎᑦᑎᔪᓐᓇᖅᐸᑦ ᓄᓇᕗᒻᒥ ᐅᖃᐅᓯᖅᑕᕆᔭᐅᔪᓂᒃ ᐊᑕᐅᓯᐅᙱᑦᑐᒥᒃ ᐃᑲᔫᑎᖃᑦᑎᐊᕋᔭᖅᐳᖅ. ᐃᓄᐃᑦ ᓄᓇᓕᖏᓐᓂ, ᐃᓕᖅᑯᓯᖓᓂᒃ, ᓄᓇᒥᑦ, ᐃᓄᐃᑦ ᖃᐅᔨᒪᔭᑐᖃᖏᓐᓂᑦ, ᐃᓄᒃᑐᑦ ᖃᐅᔨᒪᒍᓂ ᐱᓕᕆᖃᑦᑕᖅᓯᒪᓗᓂᓗ ᐅᑭᐅᖅᑕᖅᑐᒥ ᐃᓕᖅᑯᓯᖃᖃᑎᒌᙱᑦᑐᓂ ᐃᑲᔫᑎᖃᑦᑎᐊᕋᔭᕐᒥᔪᖅ.
ᐊᔾᔨᐸᓗᖏᓐᓂᒡᓘᓐᓃᑦ ᐃᓕᓐᓂᐊᖅᓯᒪᓗᓂ ᐱᓕᕆᖃᑦᑕᖅᓯᒪᓂᑰᓗᓂᓘᓐᓃᑦ ᐃᓱᒪᒋᔭᐅᓂᐊᖅᑐᖅ ᑖᔅᓱᒧᖓ ᐃᖅᑲᓇᐃᔮᒧᑦ. ᑎᓕᐅᕆᒃᑲᓐᓂᖅᑐᒍᑦ ᐱᓇᔪᖁᔨᓪᓗᑕ ᐃᓕᖕᓂᑦ ᑕᐃᒪᓐᓇᓪᓗᐊᖅ ᐅᑭᐅᓂᑦ ᐃᓕᓐᓂᐊᖅᓯᒪᒍᕕᑦ ᐊᒻᒪᓗ/ᐅᕝᕙᓘᓐᓃᑦ ᐱᓕᕆᖃᑦᑕᖅᓯᒪᒍᕕᑦ ᐃᓕᓐᓂᐊᖅᓯᒪᔭᕆᐊᓕᑦ ᐱᓕᕆᖃᑦᑕᖅᓯᒪᔭᕆᐊᓕᒡᓗ ᐊᔾᔨᖓᓂ ᖁᓛᓂᑦ ᑎᑎᕋᖅᓯᒪᔪᓂᑦ.
ᐃᖅᑲᓇᐃᔭᐃᓐᓇᖅᑐᓄᑦ, ᐊᑕᐃᓐᓇᕐᓂᐊᖅᑐᓄᑦ ᐃᓗᐊᖅᓴᐃᔨᓄᑦ, ᐃᖅᑲᓇᐃᔮᖃᐃᓐᓇᖅᑐᑦ ᐊᑭᓕᖅᑕᐅᒃᑲᓐᓂᖃᑦᑕᕐᓂᐊᖅᐳᑦ: $5,000 ᐃᖅᑲᓇᐃᔮᒥ ᐱᒋᐊᓕᓵᖅᑎᓪᓗᒋᑦ, $5,000 ᑕᖅᑭᓄᑦ 18−ᓄᑦ ᐃᖅᑲᓇᐃᔭᖅᓯᒪᓕᖅᑎᓪᓗᒋᑦ ᐊᒻᒪ $10,000 ᑕᖅᑭᓄᑦ 30−ᓄᑦ ᐃᖅᑲᓇᐃᔭᖅᓯᒪᓕᖅᑎᓪᓗᒋᑦ. ᐃᓚᒋᐊᖅᑕᐅᓗᓂ ᐊᑭᓕᐅᑎ ᐱᖃᓯᐅᑎᓗᒍ $9,000 ᐊᕐᕌᒍᑕᒫᖅ ᐱᔨᑦᑎᕋᖅᑎᐅᓂᕐᒧᑦ ᐃᑲᔪᕈᑎᒥᑦ ᐊᒻᒪ $375 ᑕᖅᑭᑕᒫᖅ ᓂᑭᑦᑖᕐᓂᕐᒧᑦ ᐃᓚᒋᐊᕈᑎ $4,500 ᐊᕐᕌᒍᑕᒫᖅ.
ᐊᔪᙱᑎᑕᐅᔪᓐᓇᕐᓂᕐᒧᑦ ᓇᓗᓇᐃᖅᓯᒪᔪᑦ ᓴᖅᑭᑕᐅᑐᐃᓐᓇᕆᐊᓕᑦ ᐃᓐᓄᒃᓯᒪᙱᑦᑐᑦ ᓯᕗᓂᒃᓴᒥ ᐃᓐᓄᒍᓐᓇᖁᓪᓗᒋᑦ.
ᐱᓇᔪᒍᒪᒍᕕᑦ ᐃᖅᑲᓇᐃᔮᒃᓴᒧᑦ, ᓇᒃᓯᐅᑎᓗᒍ ᐃᕐᖐᓐᓈᖅᑕᐅᒃᑯᑦ ᑎᑎᖅᑲᖃᕐᓗᓂᓗ ᐃᖅᑲᓇᐃᔮᖅᑖᕋᓲᑎᑦ ᐅᑯᓄᖓ @email. ᐃᓚᓕᐅᑎᓗᒍ ᓇᓗᓇᐃᒃᑯᑖᑕ ᓈᓴᐅᑖ ᐱᔾᔪᑎᒋᔭᖓᓄᑦ ᑎᑎᕋᕐᕕᐅᔪᓐᓇᖅᑐᒥ ᐃᕐᖐᓐᓈᖅᑕᐅᒃᑯᑦ.
- ᓄᓇᕗᑦ ᒐᕙᒪᒃᑯᑦ ᐱᓕᕆᓇᓱᓪᓚᕆᖕᒪᑕ ᓴᖅᑭᑦᑎᓂᖅᓴᐅᓇᓱᒃᖢᑎᒃ ᑭᒡᒐᖅᑐᐃᔨᓂᒃ ᐃᖅᑲᓇᐃᔭᖅᑎᓂᒃ; ᑕᐃᒪᐃᒻᒪᑦ, ᓄᓇᕗᒻᒥ ᐃᓄᐃᑦ ᓯᕗᓪᓕᐅᔾᔭᐅᓂᐊᖅᑐᑦ ᓇᖕᒥᓂᖅ-ᓇᓗᓇᐃᖅᓯᔪᑦ ᐊᑎᓕᐅᖅᑕᐅᖃᑕᐅᓯᒪᓂᖏᓐᓂᒃ ᓄᓇᕗᒻᒥ ᐊᖏᕈᑎᒧᑦ ᓯᕗᓪᓕᐅᔾᔭᐅᔭᕆᐊᓖᑦ ᐃᖅᑲᓇᐃᔮᖅᑖᕐᓂᕐᒧᑦ ᐊᑐᐊᒐᖅ ᒪᓕᒡᓗᒍ.
- ᓄᓇᕗᑦ ᒐᕙᒪᖓᓂ ᐃᖅᑲᓇᐃᔭᓕᓵᖅᑐᑦ ᖃᐅᔨᓴᖅᑕᐅᔭᕆᐊᖃᖅᑐᑦ ᑐᓂᓯᓗᑎᒡᓗ ᐱᔪᓐᓇᖅᑎᑕᐅᓂᕐᒧᑦ ᑎᑎᖅᑲᒥᒃ ᒥᓂᔅᑕᐅᑉ ᑐᒡᓕᐊᑕ ᐊᖓᔪᖅᑳᖓᓂᙶᖅᑐᒥᒃ ᐃᖅᑲᓇᐃᔭᕐᕕᒋᔭᖓᑕ ᐱᓕᕆᕝᕕᖓᓂᑦ. ᐱᔪᓐᓇᖅᑎᑕᐅᓂᕐᒧᑦ ᒥᓂᔅᑕᐅᑉ ᑐᒡᓕᐊᑕ ᐊᖓᔪᖅᑳᖓᓂᙶᖅᑐᖅ ᐃᖅᑲᓇᐃᔮᖅᑖᕋᓲᑎᖕᓄᑦ ᐃᓚᓕᐅᑎᔭᕆᐊᓕᒃ ᐃᓱᒪᒋᔭᐅᓂᐊᕐᒪᑦ.
- ᐱᕋᔭᓚᐅᖅᓯᒪᓂᕐᒧᑦ ᑎᑎᖅᑲᖁᑎᓖᑦ ᐊᔪᖅᑎᑕᐅᙱᑐᐃᓐᓇᕆᐊᓕᑦ ᐃᖅᑲᓇᐃᔮᖅᑖᕋᓱᒃᑐᑦ ᐃᓱᒪᒋᔭᐅᓂᐊᖅᑐᓄᑦ. ᐱᕋᔭᓚᐅᖅᓯᒪᓂᕐᒧᑦ ᑎᑎᖅᑲᖁᑎᒋᔭᐅᔪᑦ ᖃᐅᔨᔭᐅᓇᓱᖕᓂᐊᖅᐳᑦ ᐃᖅᑲᓇᐃᔮᒃᓴᒥ ᐱᓕᕆᐊᒃᓴᕆᔭᐅᔪᓂᑦ. ᑖᓐᓇ ᐊᑐᕆᐊᖃᖅᐳᖅ ᑭᓯᐊᓂ ᐃᖅᑲᓇᐃᔮᒃᓴᓄᑦ ᐱᔭᕆᐊᖃᖅᑐᓄᑦ ᐱᕋᔭᓚᐅᖅᓯᒪᓂᕐᒧᑦ ᑎᑎᖅᑲᖁᑎᒥᑦ ᓈᒻᒪᒋᔭᐅᓗᓂ ᐅᕝᕙᓘᓐᓃᑦ ᐊᒃᑐᖅᑕᐅᓴᕋᐃᓐᓂᖅᓴᓂᒃ ᑲᒪᔪᓐᓇᕐᒪᖔᑦ ᖃᐅᔨᓴᖅᑕᐅᒋᐊᖃᖅᑐᖅ.
- ᐱᓇᔪᒍᒪᔪᑦ ᐃᖅᑲᓇᐃᔮᖅᑖᕋᓱᐊᕈᑎᒥᒃ ᑐᓂᓯᔪᓐᓇᖅᑐᑦ ᓄᓇᕗᒻᒥ ᐃᓕᓴᕆᔭᐅᓯᒪᔪᒥᑦ ᐅᖃᐅᓯᕐᒥᑦ ᓇᓕᐊᖕᓂᑐᐃᓐᓇᖅ ᐊᑐᕐᓗᓂ.
- ᐆᒃᑐᖅᑐᑦ ᓂᕈᐊᖅᑕᐅᔪᑐᐊᑦ ᐊᐱᖅᓱᖅᑕᐅᔪᒪᓗᑎᒃ ᑐᓴᖅᑎᑕᐅᓂᐊᖅᐳᑦ.
- ᑎᒍᒥᐊᖅᑐᖅ ᐱᓇᔪᒃᑐᓂᒃ ᐱᔭᐅᓚᐅᕐᓗᓂ ᑲᓇᑕᐅᑉ ᓯᓚᑖᓂ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᕈᑎᖏᑦᑕ ᓇᓕᖅᑲᖏᑦ ᑲᓇᑕᐅᑉ ᓯᓚᑖᓂ ᓇᓕᖅᑲᖏᑦ ᖃᐅᔨᓴᖅᑕᐅᓇᔭᖅᐳᑦ ᐃᓕᓴᕆᔭᐅᓯᒪᔪᒃᑯᑦ ᑲᓇᑕᒥ ᐃᓕᓐᓂᐊᕐᕕᖕᒥ. ᑕᐃᒪᐃᓕᐅᙱᒃᑯᕕᑦ ᐃᒻᒪᖄ ᐱᓇᓱᐊᖅᑕᑦ ᐋᒃᑳᖅᑕᐅᑐᐃᓐᓇᕆᐊᓕᒃ.