ᐱᓕᕆᐊᒃᓴᑦ ᐱᐅᒐᓗᐊᕐᒪᖔᑕ ᐋᖅᑭᒃᓱᐃᔨ
ᐅᓇ ᐃᖅᑲᓇᐃᔮᒃᓴᖅ ᑭᒃᑯᑐᐃᓐᓇᓄᑦ ᐱᓇᔪᒍᒪᔪᓄᑦ ᒪᑐᐃᖓᔪᖅ.
ᓄᓇᕗᒻᒥ ᒐᕙᒪᒃᑯᑦ ᓂᕈᐊᖅᑕᐅᓯᒪᔪᑦ ᑲᓇᑕᒥ ᐊᔾᔨᒌᙱᑦᑐᓂᒃ ᐃᖅᑲᓇᐃᔭᖅᑎᖃᕐᓂᖅᐹᖑᓂᖓᓄᑦ, ᐃᖅᑲᓇᐃᔭᕐᕕᑦᑎᐊᕙᐅᓛᖑᓂᖓᓄᑦ ᒪᒃᑯᒃᑐᓄᑦ ᐃᓕᓐᓂᐊᖅᑕᒥᓂᒡᓗ ᐊᓂᒍᐃᓵᓚᐅᖅᑐᓄᑦ 2023-ᒥ. ᐱᕈᖅᐸᓪᓕᐊᓂᖅᐹᖑᖃᑕᐅᔪᖅ ᒪᒃᑯᒃᑐᐃᓪᓗ ᐃᓄᒋᐊᖕᓂᖅᐹᖑᓪᓗᑎᒃ ᑲᓇᑕᒥ, ᓄᓇᕗᒻᒥ ᐆᒻᒪᕆᒃᑐᖅ, ᐱᔪᒃᓯᑦᑎᐊᖅᑐᑦ, ᐊᖏᖅᓯᒪᑦᑎᐊᖅᓱᑎᓪᓗ ᐱᐅᓂᖅᓴᒥᒃ ᐃᓂᖃᖅᑎᑦᑎᖁᔨᓪᓗᑎᒃ ᑭᖑᕚᒃᓴᑎᓐᓄᑦ. ᒐᕙᒪᐅᑎᓪᓗᑕ, ᐊᐅᓚᓂᕆᔭᕗᑦ ᐊᔾᔨᐅᙱᓐᓂᖓ ᓴᙱᓂᖅᑖᖅᑎᑉᐸᓪᓕᐊᕙᕗᑦ - ᐃᓚᓕᐅᔾᔨᓪᓗᑎᒃ ᐃᓄᐃᑦ ᖃᐅᔨᒪᔭᑐᖃᖏᓐᓂ, ᐃᓄᒃᑐᑦ ᐅᖃᐅᓯᖓᓂᒃ ᐊᑐᖅᑎᑦᑎᓂᖅᓴᐅᓇᓱᒃᖢᑎᒃ, ᑭᒡᒐᖅᑐᐃᑦᑎᐊᕐᓗᓂ ᒐᕙᒪᒃᑯᓐᓂᑦ ᐱᔨᑦᑎᕋᖅᑎᓂᒃ, ᐱᓕᕆᖃᑎᖃᖃᑦᑕᕐᓗᓂᓗ ᑲᑐᔾᔨᖃᑎᒥᓂᒃ ᐊᑐᕐᓂᐊᕐᓂᕋᖅᓯᒪᔭᒥᓂᒃ ᑲᔪᓯᑎᑦᑎᖁᓪᓗᒋᑦ ᓄᓇᕗᒻᒥ. ᐃᖅᑲᓇᐃᔮᖅᑖᖅᑐᑦ ᐊᑭᓕᖅᓱᖅᑕᐅᑦᑎᐊᕐᓂᐊᖅᑐᑦ, ᐋᓐᓂᐊᕐᕕᖕᒧᑦ ᑭᒍᑎᓕᕆᔭᐅᓂᕐᒧᓪᓗ ᐃᑲᔫᑎᖃᕐᓗᓂ, ᓇᓗᓇᐃᔭᖅᑕᐅᓯᒪᔪᓂᑦ ᐃᓐᓇᖅᓯᐅᑎᒃᓴᓄᑦ ᐃᑲᔫᑎᖃᕐᓗᓂ, ᓅᑕᐅᓂᕐᒧᑦ ᐱᔪᓐᓇᐅᑎᓂᑦ ᐃᓕᓐᓂᐊᕈᓐᓇᖅᑎᑕᐅᓗᓂ ᐃᖅᑲᓇᐃᔮᒥᓂᒡᓗ ᖁᕝᕙᖅᐸᓪᓕᐊᓗᓂ.
ᐊᖓᔪᖅᑳᓕᒃ ᑐᑭᒧᐊᒃᑎᑦᑎᔨᒻᒪᕆᖕᒥᒃ, ᐱᓕᕆᐊᒃᓴᑦ ᐱᐅᒐᓗᐊᕐᒪᖔᑦ ᐋᖅᑭᒃᓱᐃᔨ (ᑲᒪᔨ) ᑕᑎᒋᔭᐅᔪᖅ ᐱᕙᓪᓕᐊᑎᑦᑎᓂᕐᒧᑦ ᐊᑐᓕᖅᑎᑦᑎᓂᕐᒧᓪᓗ ᓈᒪᔪᓂᒃ ᐱᐅᔫᑎᑦᑎᓂᕐᒧᑦ ᐊᑦᑕᕐᓇᖅᑕᐃᓕᑎᑦᑎᓂᕐᒧᓪᓗ ᐱᓕᕆᐊᒃᓴᓕᕆᓂᕐᒥᑦ ᐃᖃᓗᖕᓂ ᐋᓐᓂᐊᖃᖅᑕᐃᓕᒪᔪᓕᕆᔨᖏᓐᓄᑦ ᐱᖃᓯᐅᑎᓪᓗᓂᑦ ᕿᑭᖅᑕᓂ ᐋᓐᓂᐊᕕᒃ ᐊᒻᒪᓗ ᐅᖁᒪᐃᓐᓂᕐᓂᐊᕐᕕᒃ. ᑖᓐᓇ ᐱᖃᓯᐅᔾᔨᕗᖅ ᐱᐅᓯᕙᓪᓕᐊᑎᑦᑏᓐᓇᕐᓂᕐᒥᒃ, ᐋᖅᑭᐅᒪᑎᑦᑏᓐᓇᕐᓂᕐᒥᒃ ᒪᓕᒋᐊᓕᖕᓄᑦ ᐋᓐᓂᐊᕕᖕᒥ ᐃᖅᑲᓇᐃᔭᑦᑎᐊᕐᓂᕐᒧᓪᓗ ᐊᑐᕈᓯᕐᓂᑦ, ᐱᓕᕆᐊᒃᓴᓕᐅᖃᑦᑕᕐᓂᕐᓗ ᐱᑎᑦᑎᑦᑕᐃᓕᓂᕐᒧᑦ ᐅᓄᕈᓐᓃᖅᓯᒋᐊᕐᓂᕐᒧᓪᓗ ᐋᓐᓂᕈᑕᐅᕙᒃᑐᓂᒃ ᐃᖅᑲᓇᐃᔭᖅᑎᓄᑦ ᐋᓐᓂᐊᕐᕕᓕᐊᖅᓯᒪᔪᓄᓪᓗ ᐊᓯᐅᔨᓂᕐᒧᓪᓘᓐᓃᑦ ᓱᕋᒃᑐᓄᓪᓘᓐᓃᑦ ᐋᓐᓂᐊᖃᕐᓇᙱᑦᑐᓕᕆᔨᒃᑯᑦ ᐃᒡᓗᕐᔪᐊᖏᓐᓂᒃ, ᐱᖁᑎᖏᓐᓂᒃ, ᐊᑐᒐᒃᓴᖏᓐᓂᒡᓘᓐᓃᑦ.
ᑲᒪᔨᐅᔪᖅ ᑲᒪᒋᔭᖃᕐᓂᐊᖅᑐᖅ ᐋᖅᑭᒋᐊᖅᓯᖃᑦᑕᕐᓂᕐᒥᑦ ᐅᓐᓂᕐᓗᒍᑕᐅᔪᓂᒃ, ᖃᓄᐃᔾᔪᑕᐅᔪᓂᒃ ᕿᒥᕐᕈᓂᕐᒥᑦ, ᖃᓄᐃᔾᔪᑕᐅᔪᓂᒃ ᖃᐅᔨᓴᕐᓂᕐᒥᑦ ᐊᔾᔨᐅᖏᑦᑐᓂᒡᓗ ᐱᕙᓪᓕᐊᔪᓂᒃ, ᓇᓗᓇᐃᕆᕙᒡᓗᓂᓗ ᐊᑦᑕᕐᓇᖏᑦᑐᒥᑦ ᐃᖅᑲᓇᐃᔭᕐᕕᖃᕋᓗᐊᕐᒪᖔᑦ ᐅᓇᑕᖅᑐᖃᖅᑕᐃᓕᓗᓂᑦ. ᑲᒪᔨᐅᔪᖅ ᓇᐅᑦᑎᖅᓱᓲᖑᕗᖅ ᐊᑦᑕᕐᓇᑐᐃᓐᓇᕆᐊᓕᖕᓂᑦ ᐃᒡᓗᕐᔪᐊᒥᑦ ᐊᖓᔪᖅᑲᐅᑏᓪᓗ ᐅᔾᔨᕈᓱᒃᑎᑉᐸᒃᖢᒋᑦ ᐊᑦᑕᕐᓇᑐᐃᓐᓇᕆᐊᓕᖕᓂᑦ/ᓴᖅᑭᔮᖅᑐᓂᒃ ᐊᑐᓕᖁᔨᕙᒃᖢᓂᓗ ᐸᐸᑦᑎᓇᓱᐊᕐᓂᕐᒧᑦ ᐱᔪᒥᒋᔭᐅᔪᓂᑦ ᓄᓇᕗᑦ ᒐᕙᒪᖓᓂ. ᑲᒪᔨᐅᔪᖅ ᑲᒪᒋᔭᖃᕐᓂᐊᕆᕗᖅ ᐊᕙᑎᒥᒃ ᕿᒥᕐᕈᖃᑦᑕᕐᓂᕐᒥᑦ ᐱᔨᑦᑎᕈᑕᐅᔪᓂᑦ ᐱᓕᕆᐊᒃᓴᓂᓪᓗ ᐃᖃᓗᖕᓂ ᐋᓐᓂᐊᖃᕐᓇᖏᑦᑐᓕᕆᔨᓂᑦ ᕿᒥᕐᕈᕙᒡᓗᓂᓗ ᐊᑐᓕᖁᔨᕙᒡᓗᓂᓗ ᖃᓄᖅ ᐱᐅᓯᒋᐊᕈᓐᓇᕐᒪᖔᑦ ᐃᖏᕐᕋᓂᕆᔭᐅᔪᖅ ᓴᖅᑭᑉᐸᓪᓕᐊᔪᓪᓗ. ᑲᒪᔨᐅᔪᖅ ᐱᒻᒪᕆᖕᒥᑦ ᐱᓕᕆᐊᒃᓴᖃᖅᐳᖅ ᐃᖃᓗᖕᓂ ᐋᓐᓂᐊᖃᕐᓇᖏᑦᑐᓕᕆᔨᒃᑯᑦ ᐊᖓᔪᖅᑲᐅᑎᖏᓐᓂᑦ.
ᖃᐅᔨᒪᔭᕆᐊᓕᖏᑦ, ᐊᔪᙱᑦᑕᕆᐊᓕᖏᑦ, ᐱᔪᓐᓇᕐᓂᕆᔭᕆᐊᓕᖏᓪᓗ ᐃᖅᑲᓇᐃᔮᒧᑦ ᐱᔭᐅᖃᑦᑕᖅᐳᑦ ᐃᓕᑕᕆᔭᐅᓯᒪᔪᒃᑯᑦ ᐊᓂᒍᐃᔾᔪᑎᖃᕐᓗᓂ ᐋᓐᓂᐊᓯᐅᖅᑎᐅᓂᕐᒧᑦ; ᐃᓚᖃᕐᓗᓂ ᐅᑭᐅᑦ ᐱᖓᓱᓄᑦ ᐃᖅᑲᓇᐃᔭᒃᓂᑰᓂᕐᒥᑦ ᐱᐅᔫᑎᑦᑎᓂᕐᒥᑦ ᐊᑦᑕᕐᓇᖅᑕᐃᓕᑎᑦᑎᓂᕐᒥᒡᓗ. ᐊᑎᖃᖃᑕᐅᓗᓂ ᐅᑯᓂᖓ ᐋᓐᓂᐊᖅᓯᐅᑏᑦ ᑲᑐᔾᔨᖃᑎᒌᒃᑯᖏᑦ ᓄᓇᑦᓯᐊᕐᒥᑦ/ᓄᓇᕗᒻᒥᓪᓗ ᐱᖃᕆᐊᖃᕆᕗᖅ. ᐊᓂᒍᐃᔾᔪᑎᖃᕈᓂᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐊᐅᓚᑦᑎᔨᐅᓂᕐᒥᑦ ᖃᐅᔨᓴᖅᑎᐅᓂᕐᒧᑦ ᓇᓗᓇᐃᖅᑕᐅᓯᒪᓗᓂᑦ Accreditation Canada−ᑯᓐᓂᑦ ᐊᑲᐅᓇᔭᖅᐳᖅ.
ᐅᓇ ᐃᖅᑲᓇᐃᔮᖅ ᐱᑐᐃᓐᓇᐅᙱᑦᑐᒻᒪᕆᐅᖕᒪᑦ ᐱᕋᔭᒃᓯᒪᓂᑰᙱᒃᑲᓗᐊᖕᒪᖔᑦ ᖃᐅᔨᓴᖅᑕᐅᔭᕆᐊᓕᒃ, ᐊᑦᑕᕐᓇᖅᑐᒦᑎᑦᑎᓂᐊᙱᒃᑲᓗᐊᕐᒪᖔᑦ ᖃᐅᔨᓴᖅᑕᐅᔭᕆᐊᖃᕆᓪᓗᓂ.
ᖃᐅᔨᒪᒋᑦ ᓄᕙᒡᔪᐊᕐᓇᖅ-19−ᒧᑦ ᐋᓐᓂᐊᓕᕇᒃᑯᑎᒧᑦ ᑲᐱᔭᐅᓯᒪᔭᕆᐊᓕᒃ ᐃᖅᑲᓇᐃᔮᖅᑖᕋᓱᒃᑐᖅ. ᑐᓐᓂᖅᑯᑎᒋᓗᒍ ᓄᕙᒡᔪᐊᕐᓇᖅ-19−ᒧᑦ ᑲᐱᔭᐅᔾᔪᑎᒧᑦ ᓇᓗᓇᐃᒃᑯᑕᐃᑦ ᐃᖅᑲᓇᐃᔮᖅᑖᕋᓱᒍᑎᒋᔭᕐᓄᑦ.
ᐅᖃᐅᓰᑦ ᐃᓕᓴᕆᔭᐅᓯᒪᔪᑦ ᓄᓇᕗᒻᒥ ᐅᑯᐊᖑᕗᑦ ᐃᓄᒃᑐᑦ, ᖃᓪᓗᓈᑐᑦ ᐅᐃᕖᑐᓪᓗ. ᐱᓇᔪᒃᑐᑦ ᐃᖅᑲᓇᐃᔮᖅᑖᕋᓱᐊᕈᑎᒥᑦ ᑎᑎᕋᕈᓐᓇᖅᑐᖅ ᓂᕈᐊᕆᔭᒥᓂᑦ ᐃᓕᓴᕆᔭᐅᓯᒪᔪᓂᑦ ᐅᖃᐅᓯᕐᒥᑦ ᓄᓇᕗᒻᒥ. ᐅᖃᕈᓐᓇᖅᐸᑦ ᐊᑕᐅᓯᐅᙱᑦᑐᒥᒃ ᓄᓇᕗᒻᒥ ᐅᖃᐅᓯᕐᓂᑦ ᐃᑲᔫᑎᖃᑦᑎᐊᕋᔭᖅᑐᖅ. ᐃᓄᐃᑦ ᓄᓇᓕᖏᓐᓂ, ᐃᓕᖅᑯᓯᖏᓐᓂᒃ, ᓄᓇᒥᑦ, ᐃᓄᐃᑦ ᖃᐅᔨᒪᔭᑐᖃᖏᓐᓂᑦ, ᐃᓄᒃᑐᑦ ᖃᐅᔨᒪᒍᓂ ᐱᓕᕆᖃᑦᑕᖅᓯᒪᓗᓂᓗ ᐅᑭᐅᖅᑕᖅᑐᒥ ᐃᓕᖅᑯᓯᖃᖃᑎᒌᙱᑦᑐᓂ ᐃᑲᔫᑎᖃᑦᑎᐊᕋᔭᕐᒥᔪᖅ.
ᐊᔾᔨᐸᓗᖏᓐᓂᒡᓘᓐᓃᑦ ᐃᓕᓐᓂᐊᖅᓯᒪᓗᓂ ᐱᓕᕆᖃᑦᑕᖅᓯᒪᓂᑰᓗᓂᓘᓐᓃᑦ ᐃᓱᒪᒋᔭᐅᓂᐊᖅᑐᖅ ᑖᔅᓱᒧᖓ ᐃᖅᑲᓇᐃᔮᒧᑦ. ᑎᓕᐅᕆᑲᓐᓂᖅᑐᒍᑦ ᐱᓇᔪᖁᔨᓪᓗᑕ ᐃᓕᔅᓯᓐᓂᒃ ᐊᔾᔨᑲᓴᖓᓂ ᐊᕐᕌᒍᓂᑦ ᐃᓕᓐᓂᐊᖅᓯᒪᒍᕕᑦ ᐊᒻᒪᓗ/ᐅᕝᕙᓘᓐᓃᑦ ᐱᓕᕆᖃᑦᑕᖅᓯᒍᕕᑦ ᐊᔾᔨᖓᓂᒃ ᐃᓕᓐᓂᐊᖅᓯᒪᔭᕆᐊᓕᖕᓂ ᐱᓕᕆᖃᑦᑕᖅᓯᒪᔭᕆᐊᓕᖕᓂ ᖁᓛᓂᑦ ᑎᑎᕋᖅᓯᒪᔪᓂᑦ
ᐊᔪᙱᑎᑕᐅᔪᑦ ᓇᓗᓇᐃᖅᓯᒪᔪᑦ ᓴᖅᑭᑕᐅᑐᐃᓐᓇᕆᐊᓖᑦ ᐃᓐᓄᒃᓯᒪᙱᑦᑐᑦ ᓯᕗᓂᒃᓴᒥ ᐃᓐᓄᒍᓐᓇᖁᓪᓗᒋᑦ.
ᐃᖅᑲᓇᐃᔮᒃᓴᒧᑦ ᐱᓇᔪᖃᑕᐅᔪᒪᒍᕕᑦ, ᐃᕐᖐᓐᓈᖅᑕᐅᒃᑯᑦ ᓇᒃᓯᐅᑎᔪᓐᓇᖅᐸᑎᑦ ᑎᑎᕋᖅᑕᕕᑦ ᖄᖓ ᐊᒻᒪ ᐃᖅᑲᓇᐃᔮᕆᖃᑦᑕᖅᓯᒪᔭᑎᑦ ᑎᑎᕋᖅᓯᒪᔪᑦ ᐅᕗᖓ @email. ᐃᓚᓕᐅᑎᓗᒍ ᓇᓗᓇᐃᒃᑯᑕᖓᑕ ᓈᓴᐅᑖ ᐱᔾᔪᑎᒋᔭᖓᓄᑦ ᑎᑎᕋᕐᕕᐅᔪᓐᓇᖅᑐᒥ ᐃᕐᖐᓐᓈᖅᑕᐅᒃᑯᑦ.
- ᓄᓇᕗᑦ ᒐᕙᒪᒃᑯᑦ ᐱᓕᕆᓇᓱᓪᓚᕆᖕᒪᑕ ᓴᖅᑭᑦᑎᓂᖅᓴᐅᓇᓱᒃᖢᑎᒃ ᑭᒡᒐᖅᑐᐃᔨᓂᒃ ᐃᖅᑲᓇᐃᔭᖅᑎᓂᒃ; ᑕᐃᒪᐃᒻᒪᑦ, ᓄᓇᕗᒻᒥ ᐃᓄᐃᑦ ᓯᕗᓪᓕᐅᔾᔭᐅᓂᐊᖅᑐᑦ ᓇᖕᒥᓂᖅ-ᓇᓗᓇᐃᖅᓯᔪᑦ ᐊᑎᓕᐅᖅᑕᐅᖃᑕᐅᓯᒪᓂᖏᓐᓂᒃ ᓄᓇᕗᒻᒥ ᐊᖏᕈᑎᒧᑦ ᓯᕗᓪᓕᐅᔾᔭᐅᔭᕆᐊᓖᑦ ᐃᖅᑲᓇᐃᔭᑖᕐᓂᕐᒧᑦ ᐊᑐᐊᒐᖅ ᒪᓕᒡᓗᒍ.
- ᓄᓇᕗᑦ ᒐᕙᒪᖓᓂ ᐃᖅᑲᓇᐃᔭᓕᓵᖅᑐᑦ ᖃᐅᔨᓴᖅᑕᐅᔪᑦ ᐱᔭᕆᐊᖃᖅᑐᑦ ᑐᓂᓯᓗᑎᒡᓗ ᐱᔪᓐᓇᖅᑎᑕᐅᓂᕐᒧᑦ ᑎᑎᖅᑲᒥᒃ ᒥᓂᔅᑕᐅᑉ ᑐᒡᓕᐊᑕ ᐊᖓᔪᖅᑳᖓᓂᙶᖅᑐᒥᒃ ᐃᖅᑲᓇᐃᔭᕐᕕᒋᔭᖓᑕ ᐱᓕᕆᕝᕕᖓᓂᑦ. ᐱᔪᓐᓇᖅᑎᑕᐅᓂᕐᒧᑦ ᒥᓂᔅᑕᐅᑉ ᑐᒡᓕᐊᑕ ᐊᖓᔪᖅᑳᖓᓂᙶᖅᑐᖅ ᐃᖅᑲᓇᐃᔮᖅᑖᕋᓲᑎᖕᓄᑦ ᐊᑕᔭᕆᐊᓕᒃ ᐃᓱᒪᒋᔭᐅᓂᐊᕐᒪᑦ.
- ᐱᕋᔭᓚᐅᖅᓯᒪᓂᕐᒧᑦ ᑎᑎᖅᑲᖁᑎᓖᑦ ᐊᔪᖅᑎᑕᐅᙱᑐᐃᓐᓇᕆᐊᓕᑦ ᐃᖅᑲᓇᐃᔮᖅᑖᕋᓱᒃᑐᑦ ᐃᓱᒪᒋᔭᐅᓂᐊᖅᑐᓄᑦ. ᐱᕋᔭᓚᐅᖅᓯᒪᓂᕐᒧᑦ ᑎᑎᖅᑲᖁᑎᒋᔭᐅᔪᑦ ᖃᐅᔨᔭᐅᓇᓱᖕᓂᐊᖅᐳᑦ ᐃᖅᑲᓇᐃᔮᒃᓴᒥ ᐱᓕᕆᐊᒃᓴᕆᔭᐅᔪᓂᑦ. ᑖᓐᓇ ᐱᔭᐅᔭᕆᐊᖃᖅᐳᖅ ᐃᖅᑲᓇᐃᔮᒃᓴᓄᑦ ᐱᔭᕆᐊᖃᖅᑐᓄᑦ ᐱᕋᔭᓚᐅᖅᓯᒪᓂᕐᒧᑦ ᑎᑎᖅᑲᖁᑎᒥᑦ ᓈᒻᒪᒋᔭᐅᓗᓂ ᐅᕝᕙᓘᓐᓃᑦ ᐊᒃᑐᖅᑕᐅᓴᕋᐃᓐᓂᖅᓴᓂᒃ ᑲᒪᔪᓐᓇᕐᒪᖔᑦ ᖃᐅᔨᓴᖅᑕᐅᒋᐊᖃᖅᑐᖅ.
- ᐱᓇᔪᒍᒪᔪᑦ ᐃᖅᑲᓇᐃᔮᖅᑖᕋᓱᐊᕈᑎᒥᒃ ᑐᓂᓯᔪᓐᓇᖅᑐᑦ ᐃᓕᓴᕆᔭᐅᓯᒪᔪᒥᑦ ᐅᖃᐅᓯᕐᒥᑦ ᓇᓕᐊᖕᓂᑐᐃᓐᓇᖅ ᐊᑐᕐᓗᓂ.
- ᐆᒃᑐᖅᑐᑦ ᓂᕈᐊᖅᑕᐅᔪᑐᐊᑦ ᐊᐱᖅᓱᖅᑕᐅᔪᒪᓗᑎᒃ ᑐᓴᖅᑎᑕᐅᓂᐊᖅᐳᑦ.
- ᑎᒍᒥᐊᖅᑐᖅ ᐱᓇᔪᒃᑐᓂᒃ ᐱᔭᐅᓚᐅᕐᓗᓂ ᑲᓇᑕᐅᑉ ᓯᓚᑖᓂ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᕈᑎᖏᑦᑕ ᓇᓕᖅᑲᖏᑦ ᑲᓇᑕᐅᑉ ᓯᓚᑖᓂ ᓇᓕᖅᑲᖏᑦ ᖃᐅᔨᓴᖅᑕᐅᓇᔭᖅᐳᑦ ᐃᓕᑕᕆᔭᐅᓯᒪᔪᒃᑯᑦ ᑲᓇᑕᒥ ᐃᓕᓐᓂᐊᕐᕕᖕᒥ. ᑕᐃᒪᐃᓕᐅᙱᒃᑯᕕᑦ ᐃᒻᒪᖄ ᐱᓇᔪᒃᑕᑦ ᐋᒃᑳᖅᑕᐅᑐᐃᓐᓇᕆᐊᓕᒃ.