ᕿᓚᐅᑦ 2024-ᒥ ᓇᒃᓯᐅᔾᔭᐅᑲᑕᒃᑐᑦ ᐃᓱᓕᕝᕕᒃᓴᖓ ᐅᖓᕙᕆᐊᖅᑕᐅᔪᖅ
ᐃᓕᖅᑯᓯᓕᕆᔨᒃᑯᑦ ᐅᖓᕙᕆᐊᖅᓯᓚᐅᖅᐳᑦ ᓇᒃᓯᐅᔾᔭᐅᑲᑕᖕᓂᐊᖅᑐᓂᒃ ᐅᓪᓗᖓᓐᓂᒃ ᕿᓚᐅᑦ 2024-ᒥ ᕕᕗᐊᕆ 16, 2024−ᒧᑦ ᑎᑭᓪᓗᒍ ᐅᓐᓄᐊᒃᑯᑦ ᑲᓇᖕᓇᒥ.
ᑕᐃᒪᙵᑦ ᐱᒋᐊᓚᐅᖅᓯᒪᑎᓪᓗᒍ, ᕿᓚᐅᑦ ᖁᕕᐊᓲᑎᖃᐃᓐᓇᖅᓯᒪᕗᑦ ᓄᓇᕗᒻᒥ ᐆᒻᒪᕆᒃᑐᑦ ᐃᓄᒃᑐᑦ ᓂᔾᔭᐅᓯᔭᖅᑎᖏᑦ ᖁᕝᕙᖅᐹᓪᓕᐊᑎᑦᑎᓪᓗᑎᒡᓗ ᐅᖃᓪᓚᒃᑕᐅᔪᓐᓇᕐᓂᖓᓂᒃ ᐃᓄᒃᑎᑐᑦ. ᓵᓚᒃᓴᕋᓱᖕᓂᒃᑯᑦ ᐅᕘᓇ, ᓄᓇᕗᒥᐅᑦ ᐃᑲᔪᖅᑐᐃᕗᑦ ᐆᒻᒪᕆᖕᓂᖓᓂ, ᐊᑐᖅᑕᐅᒃᑲᓐᓂᓕᕐᓂᖓᓂ, ᐱᐅᖅᓱᐊᖅᑕᐅᓂᖓᓗ ᐃᓄᐃᑦ ᐃᓕᖅᑯᓯᖓᑦ ᐅᖃᐅᓯᖓᓪᓗ. ᐅᑭᐅᓄᑦ 91-ᓄᑦ, ᕿᓚᐅᑦ ᑲᔪᖏᖅᓴᐃᓯᒪᕗᖅ ᐃᙱᖅᑎᓂᑦ ᐃᙱᐅᓯᐅᖅᑎᓂᒡᓗ ᓄᓇᕘᑉ ᐃᓗᐊᓂ ᑎᑎᕋᖁᓪᓗᒋᑦ 91 ᐅᖓᑖᓂᑦ ᓯᕗᓪᓕᖅᐹᒥᑦ ᓴᓇᔭᐅᓯᒪᔪᓂᑦ ᐃᓄᒃᑎᑐᑦ ᐃᙱᐅᓯᕐᓂᒃ. ᑕᒪᑐᒪᓂ ᐱᔾᔪᑕᐅᓂᐊᖅᑐᖅ ‘ᓇᖕᓕᖕᓂᖅ’.
ᓄᓇᕗᒥᐅᑦ ᑐᓂᓯᖁᔭᐅᔪᑦ ᐃᓄᒃᑐᑦ ᐃᙱᐅᓯᐊᖏᓐᓂᒃ ᐱᕕᒃᓴᖃᕈᓐᓇᕐᓂᐊᕐᒪᑕ ᓵᓚᒃᓴᖃᑕᐅᓗᑎᒃ ᑮᓇᐅᔭᓂᒃ − ᓯᕗᓪᓕᖅᐹᖅ, $5,000, ᑐᒡᓕᐊ, $2,500, ᐱᖓᔪᖓᑦ, $1,500 ᐊᒻᒪᓗ 7−ᖑᓂᐊᕐᖢᑎᒃ ᓵᓚᒃᓴᐅᓯᐊᒃᓴᑦ $500 ᑭᖑᓪᓕᕐᓄᑦ. ᓴᓚᒃᓴᖅᑐᑦ ᑐᓂᓯᔪᑦ ᐱᓕᕆᔨᒻᒪᕆᖕᒧᑦ ᓂᐱᓕᐅᖅᑕᐅᓇᔭᖅᑐᑦ ᑲᑎᖅᓱᖅᑕᐅᓗᑎᑦ ᐃᙱᐅᓯᐅᖅᑕᐅᔪᑦ ᓴᖅᑭᑕᐅᓛᖅᑐᑦ 2024-ᒥ.
ᑕᑯᒋᐊᕈᓐᓇᖅᐳᑎᑦ ᓵᓚᒃᓴᕋᓱᒃᑐᓄᑦ ᒪᓕᒃᑕᐅᔭᕆᐊᓖᑦ, ᐊᑐᕆᐊᓖᑦ ᐱᓇᓱᒍᑎᓄᑦ ᑐᑭᓯᒃᑲᓂᕐᓗᒍ ᑕᒪᑐᒪ ᐊᕐᕌᒍᒥ ᐱᔾᔪᑎᒋᔭᐅᓂᐊᖅᑐᖅ, ᐅᕗᙵᑦ ᐱᔭᒃᓴᐅᔪᑦ gov.nu.ca/culture-and-heritage/information/qilaut.
ᑐᓂᔭᐅᔪᓕᒫᑦ ᐊᐅᓪᓚᖅᑎᑕᐅᔪᓐᓇᖅᑐᑦ ᐅᕗᖓ @email. ᐱᓇᔪᖕᓂᐊᕐᓗᓂ ᐃᓱᓕᕝᕕᖃᖅᑐᖅ ᕕᕗᐊᕆ 16, 2024, 5:00-ᒧᐊᖅᐸᑦ ᐅᓐᓄᒃᓴᒃᑯᑦ ᑲᓇᖕᓇᒥ.