ᐱᓕᕆᐊᒃᓴᖅ 7: ᑮᓇᐅᔭᓕᕆᓂᖅ ᓇᖕᒥᓂᕐᒧᑦ
ᐊᑐᖅᑕᐅᓲᑦ ᑮᓇᐅᔭᑦ
ᓇᖕᒥᓃᑦ ᐱᒋᐊᕋᓱᐊᖅᑎᓪᓗᒍ ᑮᓇᐅᔭᓂᑦ ᐊᑐᕆᐊᖃᖅᐲᑦ? ᓇᖕᒥᓂᖅᑖᓕᓵᖅᑐᑦ ᐊᑐᖅᑐᐊᖃᑦᑕᖅᐳᑦ. ᑮᓇᐅᔭᒃᑯᕕᖕᒧᐊᖃᑦᑕᖅᐳᑦ, ᐊᑭᓕᒃᓴᓄᑦ ᑲᑐᔾᔨᖃᑎᒌᑦ ᐊᓯᖏᓪᓗ ᑮᓇᐅᔭᒃᕕᖕᓂᑦ ᐊᑐᖅᑐᐊᕋᓱᒃᖢᑎᒃ ᐅᕝᕙᓘᓐᓃᑦ ᐊᑭᓕᒃᓴᓂᒍᒪᑎᓪᓗᒋᑦ. ᓄᓇᕗᒻᒥᑦ ᖃᔅᓰᓐᓇᕐᓂᑦ ᑮᓇᐅᔭᒃᕕᖃᑦᑎᓪᓗᒋᑦ ᐊᕕᒃᑐᖅᓯᒪᔪᒥᑦ ᑮᓇᐅᔭᒃᕕᖏᓐᓂᑦ, ᒐᕙᒪᒃᑯᑦ ᐃᓄᐃᓪᓗ ᑲᑐᔾᔨᖃᑎᖏᓐᓂᑦ ᐱᔨᑦᑎᕐᕕᐅᖃᑦᑕᖅᑐᓂᒡᓗ ᐃᓚᖏᓪᓗ ᐱᔾᔪᑎᖃᖅᑐᓂᑦ, ᓇᖕᒥᓂᖅᑖᓕᓵᖅᑐᓂᑦ ᑮᓇᐅᔭᓂᑦ ᐃᑲᔪᕐᐊᖃᑦᑕᖅᐳᑦ ᐅᑎᖅᑎᑦᑕᕆᐊᖃᖏᑦᑐᓂᑦ.
ᐱᔭᕆᐊᖃᖅᑕᓕᒫᑎᑦ ᑮᓇᐅᔭᑦ ᑐᓂᔭᐅᖃᑦᑕᖏᒻᒪᑕ ᐊᑐᖅᑐᐊᕕᓂᑦ. ᓂᕆᐅᓇᖏᑦᑐᒃᑯᑦ ᖃᓄᐃᓕᔪᖃᕐᓂᖅᐸᑦ ᑮᓇᐅᔭᑎᑦ ᐊᑐᐃᓐᓇᔭᕆᐊᖃᕐᒥᔪᑦᑕᐅᖅ. ᑖᒃᑯᐊ ᑮᓇᐅᔭᑦ ᓇᖕᒥᓂᖅ ᓄᐊᑦᑎᕕᒋᒐᔭᖅᑕᑎᑦ ᐅᕝᕙᓘᓐᓃᑦ ᑮᓇᐅᔭᑦ ᐱᖃᓐᓇᕆᔭᑎᑦ ᐃᓚᑎᓪᓗ ᐃᓕᖕᓄᑦ ᐊᑐᖅᑐᐊᖅᑎᑦᑎᔪᓐᓇᕐᓗᑎᑦ. ᐃᓚᖏᑦ ᓇᖕᒥᓂᖅᑖᓕᓵᖅᑐᑦ “ᐅᓪᓗᒃᑯᑦ ᐃᖅᑲᓇᐃᔮᒥᖕᓂᑦ ᐃᖅᑲᓇᐃᔭᐃᓐᓇᖃᑦᑕᖅᐳᑦ,” ᐊᒻᒪ ᐃᖅᑲᓇᐃᔭᖃᑦᑕᖅᐳᑦ ᑮᓇᐅᔭᒃᓴᖃᑦᑕᖅᐳᑦ ᐊᓯᒥᖕᓂᑦ ᓇᖕᒥᓂᕐᒥᓄᑦ ᑮᓇᐅᔭᒃᓴᕆᖃᖏᒻᒪᑕ. ᑮᓇᐅᔭᒃᓴᖅᑕᒥᓂᑦ ᐊᑐᐃᓐᓇᕆᐊᓖᑦ ᐃᑲᔫᑎᐅᖁᓗᒍ ᓇᖕᒥᓂᖅᑖᕆᕋᑖᖅᑕᖓᑦ.
ᐊᑐᖅᑐᐊᖅᑎᒐᓚᑦ ᕿᓂᖃᑦᑕᖅᐳᑦ ᑮᓇᐅᔭᓕᐅᑦᑎᐊᕋᓱᐊᓲᖑᕗᑦ.
ᑮᓇᐅᔭᒃᑯᕖᑦ ᐊᑐᖅᑐᐊᕐᕕᐅᑎᓪᓗᒋᑦ ᕿᑐᕐᖏᕈᑎᓄᑦ ᑮᓇᐅᔭᓕᐅᖃᑦᑕᖅᑐᑦ. ᐊᑐᖅᑐᐊᖅᑎᒧᑦ ᐅᑎᖅᑎᐅᕕᐅᓂᐊᕋᓗᐊᕐᒪᖔᑦ ᖃᐅᔨᒪᔭᕆᐊᖃᖅᑐᑦ. ᑖᓐᓇ ᐊᑐᖅᑐᐊᖅᑎᒧᑦ ᐊᑭᓖᖃᑦᑕᓐᓂᕐᒥᓄᑦ ᓇᓗᓇᐃᖅᓯᒪᒐᔭᕐᒪᑦ ᑭᖑᓂᐊᓃ? ᐊᑐᖅᑐᐊᕈᒪᑎᓪᓗᒋᑦ ᓇᖕᒥᓂᕆᔭᕐᓄᑦ ᐱᕙᒌᔭᖅᓯᒪᔭᑦ ᕿᒥᕐᕈᔭᐅᔪᒪᒐᔭᖅᑐᖅ ᐊᖏᖅᑕᐅᓚᐅᖏᓐᓂᕐᒥᓂᒃ.
ᐅᑯᐊ ᐃᓚᖏᑦ ᐃᓱᒪᒃᓴᖅᓯᐅᕈᑎᒃᑲᓐᓃᑦ:
- ᓄᓇᓯᓐᓂᒃ ᐃᓕᖅᑯᓯᖃᑦᑎᐊᖅᐱᑦ ᐱᓕᕆᒃᑲᐅᕖᓪᓗ?
- ᐊᑐᖅᑐᐊᖅᑕᕐᓂᑦ ᐊᑭᓖᔪᓐᓇᕋᔭᕐᒃᐲᑦ? ᐊᑐᖅᑐᐊᖅᑎᑦ ᖃᐅᔨᔪᒪᒐᔭᖅᑐᖅ ᐅᓪᓗᒥᐅᔪᖅ ᐱᓕᕆᐊᒃᓴᓄᓪᓗ ᑮᓇᐅᔭᒃᓴᖅᑕᕐᓂᖅ ᐊᒻᒪ ᑮᓇᐅᔭᐅᑉ ᐊᖏᕐᕋᓂᐊᕐᓂᔮᓂ
- ᖃᓄᑎᒋ ᑮᓇᐅᔭᒥᑦ ᐊᑐᖅᑐᐊᕈᒪᕕᑦ? ᐊᑐᖅᑐᐊᕈᒪᔭᑦ ᑐᒃᓯᕋᖅᑕᑦ ᐱᓕᕆᐊᒃᓴᓐᓄᑦ ᐊᑑᑎᖃᓕᒑᕙ ᑮᓇᐅᔭᐅᑉ ᐃᖏᕋᓂᐊᕐᓂᕆᔭᖓᓂ?
- ᓇᖕᒥᓂᕆᔭᒧᑦ ᓇᓪᓕᐅᒃᑯᒫᖅᓯᐅᔾᔪᑎᖃᖅᐱᑦ ᐊᑐᖅᑐᐊᕈᒪᔭᕐᓄᑦ ᐊᑐᐃᓐᓇᐅᔪᒥᑦ? ᑕᑯᓴᐅᒐᔪᒃᐳᖅ 10%−ᒥᑦ 30-ᒧᓪᓗᐊᖅ ᓇᖕᒥᓂᖁᑎᖃᖅᑎᐅᑉ ᓇᖕᒥᓂᖏᓐᓂᒃ.
- ᖃᓄᑎᒋ ᑮᓇᐅᔭᓕᐅᕋᓱᐊᕐᕋᕕᑦ?
ᒐᕙᒪᑐᖃᒃᑯᑦ ᓄᓇᕗᒻᒥᑦ ᒐᕙᒪᖓᓂᒡᓗ ᐊᒻᒪ ᐊᔾᔨᒌᖏᑦᑐᒥᑦ ᐃᓄᐃᑦ ᑲᑐᔾᔨᖃᑎᒌᖏᑦ ᑮᓇᐅᔭᓂ ᐃᑲᔪᖃᑦᑕᖅᐳᑦ ᐃᓄᐃᑦ ᐊᒻᒪ ᓄᓇᒻᒥᐅᓄᓪᓗ ᓇᖕᒥᓂᖃᖅᑎᓂᒃ. ᐅᓂᒃᑳᓄᑦ ᐃᓚᓕᐅᑎᓯᒪᔭᖓᓂ D ᓇᓗᓇᐃᖅᓯᒪᕗᑦ ᐃᓚᖏᑦ ᑖᒃᑯᐊ ᐱᓕᕆᐊᒃᓴᑦ.
ᑮᓇᐅᔭᑦ ᓄᐊᑦᑕᕆᐊᖃᓪᓚᒋᖕᓂᖓᓂᑦ
ᓄᓇᑦᑎᓐᓂᑦ ᓇᖕᒥᓂᖅᑎᑦ ᐊᐱᕆᔭᕌᖓᒥᑦ ᑎᑎᕋᖅᑯᔨᓪᓗᑎᒃ ᐊᑲᐅᖏᓕᐅᕈᑎᐅᓂᖅᐹᒋᔭᖏᓐᓂᑦ ᐃᓚᓕᐅᔾᔩᓇᐅᔭᖅᐳᑦ “ᐊᑭᑐᔫᑎᓄᑦ ᐱᓇᓱᐊᖅᑎᓪᓗᒋᑦ.” ᑭᓱᖕᒪᑦ ᐊᑭᑐᔫᑎ ᓇᒥᖔᖅᐸᓪᓗ? ᐊᑭᑐᔫᑎᑦ ᑕᐃᕙᕗᑦ ᐊᑐᕌᖓᑦᑎᒃᑯᑦ “ᑮᓇᐅᔭᓄᑦ ᐱᕙᓪᓕᐊᔾᔪᑎᓄᑦ’ ᑮᓇᐅᔭᑦ ᓇᖕᒥᓂᖅᑎᓄᑦ ᐱᒋᐊᕈᑎᐅᑎᓪᓗᒍ ᐱᕈᕈᓐᓇᖁᓗᒍᓗ.
ᐱᖓᓱᑐᐊᓂᖅ ᐊᑭᑐᔫᑎᑕᖃᖅᐳᖅ: ᐊᑐᖅᑐᐊᓂᖅ, ᐃᑲᔫᑎᑦ ᐊᒻᒪ ᑮᓇᐅᔭᑦ ᓄᐊᑕᐅᔪᑦ. ᐊᑐᖅᑐᐊᕐᓂᖅ ᐱᑐᐃᓐᓇᐅᖏᑦᑐᑦ, ᐅᑎᖅᑎᑕᐅᒋᐊᖃᖅᑎᓪᓗᒋᑦ ᐊᑭᓕᕆᐊᓖᑦ ᐊᒻᒪ ᐊᑭᑐᔫᑎᓕᒫᓂᑦ ᓇᖕᒥᓂᕆᔭᐅᑉ ᐱᔭᕆᐊᖃᖅᑐᓂᒃ ᐱᔭᐅᔪᐃᓐᓇᐅᖃᑦᑕᖏᓪᓚᑦ.
ᐃᑲᔫᓯᐊᑦ ᒐᕙᒪᒃᑯᓐᓂᑦ ᐃᓄᐃᑦ ᑲᑐᔾᔨᖃᑎᖏᓐᓂᒡᓘᓐᓃᑦ ᐊᑕᐅᓯᐅᑐᐃᓐᓇᖅᖢᑎᒃ ᑐᓂᔭᐅᖃᑦᑕᖅᐳᑦ ᐊᒻᒪ ᐊᑭᑐᓗᐊᕐᓇᓂᑦ ᐊᑐᖅᑕᐅᔪᓐᓇᑐᐃᓐᓇᖅᑐᒥᑦ ᐱᔾᔪᑎᖃᕐᓗᓂ ᑭᓯᐊᓂ. ᑮᓇᐅᔭᑦ ᓄᐊᑕᐅᔪᑦ, ᑮᓇᐅᔭᑎᑦ ᖃᓄᑐᐃᓐᓇᖅ ᐊᑐᕈᓐᓇᖅᑕᑎᑦ. ᐊᑭᑐᔫᑎᓄᑦ ᐊᑑᑎᓂᖅᐹᖑᕗᖅ ᓇᖕᒥᓂᕆᔭᕐᓄᑦ.
ᖃᓄᖅ ᑮᓇᐅᔭᓂᑦ ᓄᐊᑦᑎᔪᓐᓇᕐᒪᖔᖅᐱᑦ?
ᓇᖕᒥᓂᖃᖅᑎᓗᓂ ᑮᓇᐅᔭᑦ ᓄᐊᑕᐅᖃᑦᑕᖅᐳᑦ ᑮᓇᐅᔭᓕᐅᖅᑐᖃᖅᑎᓪᓗᒍ − ᐊᒥᐊᒃᑯᑦ ᑮᓇᐅᔭᒃᓴᖅᑕᕐᓂᑦ ᓂᐅᕈᑎᖃᖅᑎᓪᓗᓂ ᐊᑭᓖᔭᕇᖅᑎᓪᓗᑎᑦ ᐃᖅᑲᓇᐃᔭᕇᖅᑕᕐᓄᑦ (ᑮᓇᐅᔭᓕᐊᑎᑦ) ᐊᒻᒪ ᓴᓇᔭᐅᔪᑦ ᐊᑭᖏᑦ (ᐱᖁᑎᑦ ᐊᐅᓚᔪᑎᑦ ᐊᑭᓕᒃᓴᓄᑦ). ᐱᓗᐊᖅᑐᒥᑦ ᑮᓇᐅᔭᓕᐊᑦ ᐅᖓᕙᕆᐊᖃᕐᒪᑕ ᐊᒻᒪ ᓄᐊᑕᐅᓗᑎᒃ, ᐊᑭᑐᔫᑎᓄᑦ ᓇᖕᒥᓂᕆᔭᑦ ᐱᕈᕆᐊᖃᕐᒪᑦ ᐅᕝᕙᓘᓐᓃᑦ ᐃᓚᓂᒃᑯᑦ ᐃᑲᔫᑎᐅᔪᓐᓇᖅᐳᖅ ᓯᕗᓂᒃᓴᒥᑦ ᓂᐅᕕᐊᒃᓴᖃᓗᐊᖏᑎᓪᓗᑎᑦ ᓂᕆᐅᓇᖏᑦᑐᒃᑯᑦ ᐊᑭᓕᕆᐊᖃᖅᑐᖃᓕᓲᖑᖕᒪᑦ.
ᐱᕙᓪᓕᐊᔪᓕᕆᓂᑐᖃᒃᑯᑦ, “ᑮᓇᐅᔭᒃᓴᖅᑕᑦ” ᑮᓇᐅᔭᓕᐊᑎᓪᓘᓐᓃᑦ ᐅᕝᕙᓘᓐᓃᑦ ᑲᑎᑦᑕᕕᓂᖅᑎᑦ ᐊᑐᑲᐅᑎᒋᒐᔪᒃᐳᑦ. ᑮᓇᐅᓂᑦ ᐱᕙᓪᓕᐊᔪᓂᒃ, ᑭᓯᐊᓂ ᑮᓇᐅᔭᓕᒫᑎᑦ ᐊᑐᑲᐅᑎᒋᔪᑦ ᑕᐃᔭᐅᖃᑦᑕᖅᐳᑦ “ᐆᒪᓂᖅ ᐊᒡᒐᒧᑦ ᖃᓂᕐᒧᑦ” ᓇᖕᒥᓂᕆᔭᐅᓪᓗ ᑕᐃᒪᓐᓇ ᐊᐅᓚᑦᑐᓐᓇᖏᓪᓚᑦ. ᑮᓇᐅᔭᓂᑦ ᓄᐊᑦᑎᔭᕆᐊᖃᖅᐳᑎᑦ, ᐆᒪᔪᓐᓇᖁᑎᑦ. ᐊᑭᑐᔫᑎᒧᑦ ᐊᑐᐃᓐᓇᖅᑕᖃᕆᐊᖃᐃᓐᓇᐅᔭᖅᐳᑦ.
ᖃᐅᔨᒪᔭᒃᓴᑦ
ᐅᕝᕙ ᐃᓱᒪᒃᓴᖅᓯᐅᕈᑎᑦ ᑐᑭᓯᔭᕆᐊᖃᖅᑕᑎᑦ ᑮᓇᐅᔭᓕᕆᓂᐊᖅᑎᓪᓗᑎᑦ ᓇᖕᒥᓂᕆᔭᓄ.ᑦ
ᐊᑭᑐᔪᒧᐊᕋᓲᑎᑦ ᑮᓇᐅᔭᑦ ᐊᑐᖃᑦᑕᖅᑕᑎᑦ ᐊᐅᓚᓇᓱᐊᖅᑎᓪᓗᒍ ᓇᖕᒥᓂᕆᔭᓄᑦ ᖃᐅᑕᒫᖅ. ᓇᖕᒥᓂᖃᖅᑎᑦ ᐊᑭᓕᓴᓅᖓᔪᓂᒃ ᑮᓇᐅᔭᒃᕕᖕᒥᑦ ᐊᑐᒐᔪᒃᐳᑦ ᑕᔅᓱᒧᖓ.
ᐊᑭᓕᒃᓴᐅᕗᑦ ᓇᖕᒥᓂᕆᔭᑦ ᐊᑭᓕᕆᐊᖃᖅᑕᖏᑦ ᐊᓯᖏᓐᓄᑦ. (ᐃᖃᐅᒪᒋᑦ ᐊᑭᓕᒃᓴᑦ ᕿᑐᕐᖏᐅᕈᑎᖃᕐᒥᔪᑦ).
ᓇᖕᒥᓂᖁᑎᖃᖅᑎᐅᑉ ᓇᖕᒥᓂᖏᑦ ᐊᑭᓕᒃᓴᓕᒫᑎᑦ ᐊᑭᓕᕇᖅᓯᒪᓕᖅᑎᓪᓗᒋᑦ ᓇᖕᒥᓂᕆᔭᕐᓄᑦ ᐊᑭᒋᕚ. ᐱᖃᓯᐅᔾᔨᕗᖅ ᓇᖕᒥᓂᖅᐱᑦ ᑮᓇᐅᔭᒃᓴᖅᑕᕕᓂᖅᑎᓪᓗ ᐊᒻᒪ ᑮᓇᐅᔭᑦ ᓄᐊᑕᕕᓂᖅᑎᑦ ᐊᕐᕌᒍᒐᓴᖏᓂᑦ ᓇᖕᒥᓂᕐᓄᑦ.
ᑮᓇᐅᔭᓕᕆᒃᑲᓂᕈᑎᐅᕗᖅ ᓇᖕᒥᓂᕆᔭᑎᑦ ᐊᐅᓚᔪᓐᓇᖅᑎᓪᓗᒋᑦ. ᓇᖕᒥᓂᕆᔭᑦ ᐊᐅᓚᓐᓇᖁᓗᒍ ᐅᕝᕙᓘᓐᓃᑦ ᓇᖕᒥᓂᖁᑎᓪᓚᕆᖕᓂᑦ ᓂᕆᐅᓇᖏᑦᑐᒃᑯᑦ ᖃᓄᐃᓕᔪᖃᑳᓪᓚᖕᓂᖅᐸᑦ ᑲᒪᒋᔪᓐᓇᕐᓗᒍ ᐊᐅᓚᑦᑎᐊᕈᓐᓇᖏᑎᓪᓗᒍ ᓇᖕᒥᓂᕆᔭᑦ - ᐅᔾᔨᖅᓱᑦᑎᐊᕐᓗᑎᑦ ᖃᐅᔨᓴᑦᑎᐊᐸᒡᓗᑎᒡᓗ!