ᐃᒡᓗᓕᖕᒥ

ᐃᒡᓗᓕᒃ ᐱᔾᔪᑎᒋᓪᓗᒍ

ᐃᒡᓗᓕᒃ, ᑐᑭᖃᖅᑐᖅ ᐃᓄᒃᑎᑐᑦ "ᓄᓇ ᐃᒡᓗᖃᐅᖅᑐᖅ", ᓄᓇᓕᕋᓛᖑᕗᑦ ᐃᓂᖃᖅᖢᓂ ᓄᓇᕘᑉ ᕿᑭᖅᑖᓗᐊᓂ, ᕿᑭᖅᑕᕐᒦᑦᑐᖅ ᓴᓂᕋᔭᐅᑉ ᑕᕆᐅᖓᓂ ᐃᕐᕈᕐᔭᕕᐅᑉ ᓄᓈᑦᑕ ᓯᓚᑎᑦᑎᐊᖓᓂ. ᓴᓂᕋᔭᐅᑉ ᐅᐊᖕᓇᖓᓃᑐᐃᓐᓇᖅᑐᖅ ᓄᓇᙳᐊᑎᒍᑦ ᒫᓂ ᐃᓂᖃᖅᖢᓂ N69 23' W81 48'

ᒫᓐᓇ ᓄᓇᒋᔭᐅᔪᖅ ᐃᒡᓗᓕᒃ ᑕᐃᒪᙵᓂ 1950's ᐊᑐᖅᑎᓪᓗᒋᑦ ᓄᓇᒋᔭᐅᕙᓪᓕᐊᓕᓚᐅᖅᓯᒪᔪᖅ ᐊᒻᒪ ᑲᓇᑕᒥ ᒐᕙᒪᒃᑯᑦ ᐱᕚᓪᓕᖅᑎᑦᑎᓚᐅᖅᓯᒪᓪᓗᑎᒃ ᐊᒡᓚᕝᕕᓕᕆᔪᒪᓕᖅᖢᑎᒃ ᐅᑭᐅᖅᑕᖅᑐᒥ. 1960's ᕿᑎᖅᐸᖅᑎᓪᓗᒍ ᐃᓕᓐᓂᐊᕐᕕᓕᐅᓚᐅᖅᓯᒪᔪᑦ, ᐋᓐᓂᐊᕕᓕᐅᖅᒻᖢᑎᒡᓗ, ᐊᒻᒪ ᐸᓖᓯᖃᕐᕕᓕᐅᓚᐅᖅᓯᒪᓪᓗᑎᒃ, ᐊᐅᐸᓗᒃᑐᓅᖅᑐᓪᓗ ᑐᒃᓯᐊᕐᕕᓕᐅᖅᑕᐅᓪᓗᑎᒃ (1959)−ᒥ ᐊᒻᒪ ᑯᐊᐸᓕᐅᖅᖢᑎᒃ. (1963). ᓄᓇᓖᑦ ᐱᖁᔭᑎᒍᑦ ᑎᒥᙳᖅᑎᑕᐅᓚᐅᖅᓯᒪᓪᓗᑎᒃ 1976-ᖑᑎᓪᓗᒍ.

ᑐᑭᓯᒋᐊᒐᒃᓴᑦ ᑕᐃᔅᓱᒪᓂᐊᓗᒃ ᓄᓇᓕᖕᓄᐊᖅᐸᓪᓕᐊᓕᓚᐅᖅᓯᒪᔪᓂᒃ ᐱᔭᐅᖃᑦᑕᖅᓯᒪᔪᑦ ᖃᔅᓯᑲᓪᓛᓗᖕᓂ ᐃᑦᑕᕐᓂᓴᖃᕐᕕᖕᓂ ᕿᑭᖅᑕᕐᒦᑦᑐᓂᒃ, ᐃᓚᖏᑦ 4,000 ᐅᑭᐅᑦ ᐊᓂᒍᖅᑐᓂᒃ ᑕᐃᒪᓐᓇ ᓄᑕᐅᙱᑎᒋᓪᓗᑎᒃ. ᖃᔅᓯᑲᓪᓚᐃᓪᓗ ᐃᒡᓗᓕᖕᒥᐅᑕᑦ ᑭᖑᕚᕆᔭᐅᓪᓗᑎᒃ ᕿᓪᓚᕐᓱᐊᖅ ᓄᒃᑕᖅᑎᐅᓚᐅᖅᓯᒪᔪᖅ ᑲᓛᖦᖡᑦ ᓄᓈᓐᓂᙶᖅᑐᓂᒃ 1800's ᐊᑐᖅᑎᓪᓗᒋᑦ. ᓯᕗᓪᓕᖅᐹᒥᓪᓗ ᑕᕆᐅᕐᒥᐅᑕᓂᒃ ᑕᑯᔭᕆᐅᓚᐅᖅᓯᒪᓪᓗᑎᒃ ᐅᒥᐊᕐᔪᐊᑦ ᑎᑭᕋᖅᐸᓪᓕᐊᓕᖅᑎᓪᓗᒋᑦ Fury ᐊᒻᒪ Hecla ᐅᓇᑕᖅᑐᒃᓴᓄᑦ ᐅᒥᐊᕐᔪᐊᕆᔭᐅᔪᑦ, ᑎᓕᐅᖅᑕᐅᓪᓗᑎᒃ ᑳᐱᑕᐃ ᕕᓕᐊᒻ ᐄᑐᐊᖅ ᐱᐅᕆ−ᒧᑦ, ᐅᑮᓚᐅᖅᓯᒪᔪᑦ ᐃᒡᓗᓕᖕᒥ 1822-ᖑᑎᓪᓗᒍ.

ᕿᑭᖅᑕᖅ ᕿᓚᒥᕈᓗᒃ ᐳᓛᖅᑕᐅᓚᐅᖅᓯᒪᖕᒥᔪᖅ 1867-ᒥ ᐊᒻᒪ 1868-ᒥ ᒥᐊᓕᒐᕐᒥᐅᑕᒥᒃ ᓇᕈᓇᒃᑎᒧᑦ, ᓴᕐᓕ ᕗᕌᓐᓯᔅ ᕼᐋᓪ, ᓱᕙᓕᑭᐊᑦᑎᐊᕐᒥ Franklin Expedition−ᑯᑦ ᐅᒥᐊᕐᔪᐊᒃᑰᓚᐅᖅᓯᒪᔪᓂᒃ ᐊᓯᐅᔨᔭᐅᓂᑯᒥ ᕿᓂᕆᐊᖅᑎᑦᑎᒐᓇᓱᒃᑎᓪᓗᒍ.

1913-ᖑᑎᓪᓗᒍ, Alfred Tremblay, ᐅᐃᕖᑐᑦ ᐅᖃᐅᓯᓕᒃ ᑲᓇᑕᒥᐅᑕᖅ ᐅᔭᕋᒃᓯᐅᖅᑎ ᐱᖃᑎᖃᖅᖢᓂ ᔫᓯᐱ ᐱᕐᓈᒥ ᒥᑦᑎᒪᑕᓕᖕᒧᑦ ᓇᕈᓇᒃᑎᓪᓗᒍ, ᐅᔭᕋᒃᓯᐅᕐᓂᖓ ᐃᒡᓗᓕᖕᒧᐊᕋᓗᐊᕋᒥ ᑲᔪᓯᑏᓐᓇᓚᐅᖅᖢᓂᐅᒃ, ᐊᒻᒪ 1921-ᒥ, ᐃᓚᒋᔭᐅᓂᑰᓪᓗᓂ ᑯᓐᓄᑎ ᕌᔅᒥᐅᓴᓐ−ᑯᓐᓄᑦ ᑕᓪᓕᒪᖓᓐᓂ ᓇᕈᓇᒃᑐᓂᒃ ᕿᑭᖅᑕᕐᒧᐊᓚᐅᖅᓯᒪᖕᒥᔪᑦ. ᓯᕗᓪᓕᕐᒥ ᐃᒡᓗᓕᖕᒥᐅᑕᑐᖃᑦ ᐃᒡᓗᓕᐅᑉ ᓯᓚᑖᓂ ᓄᓇᖃᖅᑑᒐᓗᐊᑦ ᐃᒡᓗᓕᖕᒧᑦ ᑐᖅᑲᓚᐅᖅᓯᒪᕗᑦ ᓯᓚᑖᓂᙶᖅᑐᑦ ᓴᓐᓂᖓᔪᓕᐅᖅᑐᓂᒃ ᐅᒃᐱᕐᓂᓖᑦ ᑐᒃᓯᐊᕐᕕᒃᑖᓚᐅᖅᑎᓪᓗᒋᑦ 1930's−ᖏᓐᓂ. ᐅᑭᐅᑦ ᖁᓕᑦ ᐊᓂᒍᖅᑐᓂᒃ, ᓂᐅᕕᖅᑎᒃᑯᑦ ᐋᖅᑭᒃᓯᓚᐅᖅᓯᒪᖕᒥᔪᑦ ᓂᐅᕕᕐᕕᖕᒥ ᑕᒫᓂ ᕿᑭᖅᑕᕐᒥ.

ᐊᓯᖏᑎᑐᑦ ᓄᓇᓕᒃᑐᑦ ᐅᑭᐅᖅᑕᖅᑑᑉ ᑲᓇᖕᓇᖓᓂ, ᐃᒡᓗᓕᒃ ᕿᓚᒥᐊᓗᒃ ᐃᓄᒋᐊᒃᓯᕙᓪᓕᐊᓚᐅᖅᐳᖅ ᐃᓅᓪᓗᑎᒃ ᐃᓚᒌᑦ ᐊᕙᑖᓂ ᓄᓇᓕᕋᓛᖃᐅᖅᑐᑦ ᓅᓚᐅᖅᓯᒪᑎᓪᓗᒋᑦ ᐃᒡᓗᓕᖕᒧᑦ ᒐᕙᒪᒃᑯᓐᓂ ᐱᔨᑦᑎᕋᕈᑕᐅᔪᓂᒃ ᐱᓇᔪᖃᑕᐅᔪᒪᓪᓗᑎᒃ.

ᐃᒡᓗᓕᒃ ᓄᓇᒋᔭᐅᔪᖅ ᒪᕐᕉᖕᓄᑦ ᑕᕐᕆᔭᐅᓯᐅᖅᑎᑦ ᑲᑐᔾᔨᖃᑎᒌᓄᑦ. ᐃᒡᓗᓕᒃ ᐃᓱᒪᒃᑯᑦ, ᐃᓛᒃᑰᖅᖢᓂ ᑲᒻᐸᓂᒋᔭᐅᔪᖅ ᐃᓄᐃᑦ ᐃᓕᖅᑯᓯᖏᓐᓂᒃ ᐱᓕᕆᑎᑦᑎᕙᒃᖢᑎᒃ ᓄᓇᓕᖕᓂᓪᓗ ᑎᑎᕋᕐᕕᖃᖅᖢᑎᒃ ᐃᓄᐃᑦ ᑕᑯᓐᓈᒐᒃᓴᓕᕆᔨᒃᑯᖏᓐᓂᒃ. ᑕᕐᕆᔭᐅᓯᐊᖅ, ᐊᑕᓈᕐᔪᐊᑦ: ᐅᖃᓚᔪᒻᒪᕆᐊᓗᒃ ᑕᕐᕆᔭᐅᓯᐅᖅᑕᐅᓚᐅᖅᓯᒪᔪᖅ ᐃᒡᓗᓕᐅᑉ ᓯᓚᑖᓂ.

ᐃᓄᒋᐊᖕᓂᖏᑦ: 1,948

ᖃᐅᔨᒋᐊᕐᕕᒃᓴᖅ

ᐃᕐᖐᓈᖅᑕᐅᑦ: @email
ᐅᖄᓚᐅᑎ: 867-934-8940
ᓱᒃᑲᔪᒃᑯᑦ: 867-934-8757