ᑲᖏᖅᑐᒑᐱᖕᒥ
ᑲᖏᖅᑐᒑᐱᒃ ᐱᔾᔪᑎᒋᓪᓗᒍ
ᑲᖏᖅᑐᒑᐱᒃ, ᐃᓂᖃᖅᑐᖅ ᕿᑭᖅᑖᓘᑉ ᓯᒡᔭᖓᑕ ᑲᓇᖕᓇᖅᐸᓯᐊᓂ, ᐃᓛᓐᓂᒃᑯᑦ ᑕᐃᔭᐅᓲᖅ "ᐊᖅᑯᑎᒋᔭᐅᔪᖅ ᑲᖏᖅᖢᐊᓗᖕᓄᑦ." ᖃᓪᓗᓈᑐᑦ ᐊᑦᑎᖅᑕᐅᓚᐅᖅᓯᒪᔪᖅ ᐅᑭᐅᖅᑕᖅᑐᒧᑦ ᓇᕈᓇᒃᑎᐅᓚᐅᖅᓯᒪᔪᒧᑦ ᔮᓐ ᕌᔅ−ᒧᑦ 1818-ᖑᑎᓪᓗᒍ. ᐃᓄᒃᑎᑐᑦ ᐊᑎᖃᖅᑎᑕᐅᖕᒥᔪᖅ ᑕᐃᔭᐅᕙᒃᖢᓂ ᑲᖏᖅᑐᒑᐱᒃ, ᑐᑭᖃᖅᑐᖅ, "ᑲᖏᖅᖢᑦᑎᐊᕙᑯᓗᒃ". ᓄᓇᓕᒃ ᑰᑉ ᓴᓂᐊᓃᑉᐳᖅ ᑲᖏᖅᑐᒑᐱᐊᓂ, ᑲᖏᖅᖢᒃ 100 ᑭᓛᒥᑕᔅ ᐅᖓᑖᓂ ᑕᑭᑎᒋᔪᖅ ᑎᑭᐅᒪᓪᓗᓂ ᐊᐅᔪᐃᑦᑐᕐᒧᑦ. ᐅᖓᓯᒃᑎᒋᔪᖅ ᐃᒻᒪᖄ 4 degrees ᐅᑭᐅᖅᑕᖅᑑᑉ ᑭᒡᓕᙳᐊᖓᓄᑦ 70° 29.4' N, 68° 31.2' W, ᒥᑦᑎᒪᑕᓕᐅᑉ ᑲᓇᖕᓇᖓᓂ ᐊᒻᒪ ᕿᑭᖅᑕᕐᔪᐊᑉ ᐊᒻᒪ ᐃᖃᓗᐃᑦ ᐅᐊᖕᓇᖓᓂ.
ᐅᑭᐅᒐᓴᕐᓄᑦ, ᐃᓄᐃᑦ ᐃᓚᒌᑦ ᑕᒫᓂ ᓇᕈᓇᒃᐸᓚᐅᖅᓯᒪᔪᑦ, ᓄᒃᑕᖅᐸᒃᖢᑎᒃ ᐅᖓᓯᒌᒃᑕᖅᑎᒋᔪᓂᒃ ᓲᕐᓗ ᓇᐅᔮᓂ ᐊᒻᒪ ᐃᖃᓗᖕᓂ ᓄᓕᐊᒃᓴᖅᓯᐅᕆᐊᖅᖢᑎᒃ ᖃᑕᙳᑎᒥᓄᓪᓗ ᐳᓛᕆᐊᖅᖢᑎᒃ. ᐃᓄᐃᑦ ᐊᐅᓪᓛᖅᑐᑦ ᑲᖏᖅᖢᐊᓗᒃᑰᖅᐸᓚᐅᖅᓯᒪᕗᑦ ᐅᑭᐅᒃᑯᑦ ᐊᒻᒪ ᐅᐱᕐᖔᒃᑯᑦ ᐳᐃᔨᕕᓂᖅᓯᐅᖅᖢᑎᒃ. ᐊᐅᔭᒃᑯᑦ, ᓄᓇᖅᐸᒃᐸᒃᖢᑎᒃ ᑐᒃᑐᓯᐅᕆᐊᖅᖢᑎᒃ. ᐅᒃᐱᕆᔭᐅᖕᒥᔪᖅ ᖃᓪᓗᓈᑦ ᓯᕗᕚᖏᑦ ᓯᕗᓪᓕᖅᐸᐅᓪᓗᑎᒃ ᑲᖏᖅᑐᒑᐱᖕᒧᐊᓚᐅᖅᓯᒪᔪᑦ ᑕᕆᐅᑉ ᐊᑭᐊᓂᙶᖅᖢᑎᒃ 1000 ᐅᑭᐅᑦ ᐊᓂᒍᖅᑐᓂᒃ. ᐅᑭᐅᑦ 600 ᐊᓂᒍᖅᑎᓪᓗᒋᑦ, ᑕᕆᐅᑉ ᐊᑭᐊᓂᙶᖅᑐᑦ ᓇᕈᓇᒃᑏᑦ ᕌᐸᑦ ᐸᐃᓚᑦ ᐊᒻᒪ ᕕᓕᐊᒻ ᐹᕕᓐ ᓄᓇᙳᐊᓕᐅᓚᐅᖅᓯᒪᔪᑦ. 1820-ᐅᑎᓪᓗᒍ, ᐊᕐᕙᒐᓱᒃᑏᑦ ᐃᑳᓚᐅᖅᓯᒪᕗᑦ ᑲᓛᖦᖡᑦ ᓄᓈᓐᓄᑦ ᐊᕐᕕᖅᓯᐅᖅᖢᑎᒃ. ᐊᕐᕙᒐᓱᓗᐊᕈᓐᓃᖅᑎᓪᓗᒋᑦ 1900-ᖏᓐᓂ, ᑕᐅᖅᓰᖃᑦᑕᕐᓂᖅ ᑲᑦᑐᖅᐹᓪᓕᓚᐅᖅᓯᒪᖕᒥᔪᖅ. 1924-ᒥ, ᓂᐅᕕᖅᑎᒃᑯᑦ ᒪᒃᐱᖅᓯᓚᐅᖅᓯᒪᕗᑦ ᓂᐅᕕᕐᕕᖕᒥ ᑲᖏᖅᑐᒑᐱᖕᒥ. ᐅᓇᑕᕕᒡᔪᐊᖅᑎᓪᓗᒋᑦ ᑐᒡᓕᐊᓂ, ᒥᐊᓕᒐᕐᒥᐅᑦ ᓯᑯᓯᐅᑎᖓ ᓯᓚᓐᓂᐊᕐᕕᖓ ᓴᓇᔭᐅᓚᐅᖅᓯᒪᓪᓗᓂ ᓴᔾᔪᒋᐊᕐᒥ ᑲᖏᖅᑐᒑᐱᐅᑉ ᖃᓂᒋᔮᓂ. ᐃᓕᓐᓂᐊᕐᕆᐊᕐᕕᓕᐅᓚᐅᖅᓯᒪᒋᓪᓗᑎᒃ 1960-ᐅᑎᓪᓗᒍ, ᓄᓇᓖᓪᓗ ᓄᑖᕐᒧᑦ ᓅᖦᖢᑎᒃ ᑰᑉ ᓴᓂᐊᓂ ᐊᑲᕐᕉᑎᖃᕈᒪᓪᓗᑎᒃ ᐃᒥᖅᑕᕐᕕᑦᑎᐊᕙᖕᒥ ᐊᒻᒪ ᒥᑦᑕᕐᕕᑦᑎᐊᕆᒃᑐᒥᒃ.
ᐃᓄᒋᐊᖕᓂᖏᑦ: 1,096
ᖃᐅᔨᒋᐊᕐᕕᒃᓴᖅ
ᐃᕐᖐᓈᖅᑕᐅᑦ: @email
ᐅᖄᓚᐅᑎ: 867-924-6220
ᓱᒃᑲᔪᒃᑯᑦ: 867-924-6293