ᐊᐱᖅᑯᑕᐅᒐᔪᒃᑐᑦ− ᐸᐃᕆᕝᕕᖕᓄᑦ ᐱᖁᔭᖅᑐᓴᕆᐊᕐᕕᖃᕐᓂᖅ
ᐊᐱᖁᑎ: ᑭᓲᖕᒪᑦ ᐸᐃᕆᕕᓕᕆᓂᕐᒧᑦ ᐱᖁᔭᖅ?
ᑭᐅᔾᔪᑎ: ᒫᓐᓇ ᐸᐃᕆᕝᕕᖕᓄᑦ ᐱᖁᔭᖅ ᒪᓕᒐᓕᐅᖅᑕᐅᓲᖅ, ᐃᓛᓐᓂᒃᑯᑦ ᐱᑎᑕᐅᕙᒃᖢᓂ ᒪᓕᒐᐅᓂᕋᖅᑕᐅᓪᓗᓂ, ᐋᖅᑭᒃᓯᒪᔪᖅ ᐅᓄᙱᓛᓄᑦ ᐊᑐᖅᑕᐅᔭᕆᐊᓕᖏᓐᓂ ᓚᐃᓴᓐᓯᑖᕋᓱᖕᓂᕐᒧᑦ, ᐊᐅᓚᓂᖏᓐᓂᒃᓗ ᐸᐃᕆᕖᑦ ᓄᓇᕗᒻᒥ. ᐃᓕᓐᓂᐊᕆᐅᖅᓴᕐᕕᓐᓂ ᐸᐃᕆᕕᓐᓂᓪᓗ ᐱᓕᕆᕝᕕᖏᑦ, ᐃᓚᐅᓪᓗᑎᒃ ᖃᑕᙳᑎᒌᓄᑦ ᐊᖏᕐᕋᒥ ᐸᐃᕆᕕᑦ, ᐱᓕᕆᕝᕕᓪᓗ ᐊᐅᓚᑕᐅᔪᑦ ᑮᓇᐅᔭᓕᐅᕋᓱᐊᖅᑎᐅᙱᑦᑐᓄᑦ ᑲᑐᔾᔨᖃᑎᒌᓄᑦ, Hᐋᒻᒪᓚᓄᑦ, ᐃᓕᓐᓂᐊᕐᓂᓕᕆᔨᒃᑯᓐᓄᑦ, ᐅᕝᕙᓘᓐᓃᑦ ᐅᐃᕖᑦ ᐃᓕᓐᓂᐊᕐᕕᖏᓐᓄᑦ ᒪᓕᒋᐊᖃᖅᑐᑦ ᐊᑐᖅᑕᐅᔭᕆᐊᓕᖏᓐᓂ ᐋᖅᑭᒃᓯᒪᔪᒥ ᒪᓕᒐᕐᒥ.
ᐊᐱᖁᑎ: ᖃᓄᐃᒻᒪᑦ ᓄᓇᕗᒻᒥ ᒐᕙᒪᖓᑦ ᐋᖅᑭᒃᓱᐃᕙᑦ ᓄᑖᒥᒃ ᐸᐃᕆᕕᖕᓄᑦ ᒪᓕᒐᕐᒥᑦ?
ᑭᐅᔾᔪᑎ: ᑲᑐᔾᔨᓗᑕ, ᒐᕙᒪᕗᑦ ᑐᓂᓯᒪᔪᑦ ᐋᖅᑭᒍᑎᓂᕐᓄᑦ ᓄᓇᕘᑉ ᐃᓕᓐᓂᐊᕆᐅᖅᓴᕐᕕᓐᓂ ᐸᐃᕆᕕᓐᓂᓪᓗ ᐱᓕᕆᕝᕕᖏᑦ, ᐱᔾᔪᑎᒋᓪᓗᐊᑕᖅᖢᒍ ᐃᓄᖕᓅᖓᔪᓄᑦ ᐃᓕᑦᑎᕙᓪᓕᐊᓂᕐᒥᒃ. ᐸᐃᕆᕝᕕᖕᓄᑦ ᒪᓕᒐᖅ ᒫᓐᓇ ᐊᑐᖅᑕᐅᓲᖅ ᓄᓇᕗᒻᒥ ᑲᔪᓯᑎᑕᐅᓯᒪᓪᓗᓂ ᓄᓇᑦᓯᐊᕐᒥ ᓄᑖᙳᕆᐊᖅᑕᐅᓚᐅᖅᓯᒪᖏᑦᓱᓂᓗ ᑕᐃᒪᙵᑦ 1988. ᒐᕙᒪᕗᑦ ᑐᓂᓯᒪᔪᑦ ᐋᖅᑭᒃᓱᐃᓂᕐᓂ ᓴᓇᔭᖅ ᓄᓇᕗᒻᒥ ᒪᓕᒐᖓᓂ ᐋᖅᑭᒃᓯᓗᑎᒃ ᑐᙵᕕᒋᔭᕐᓂᑦ ᑕᒪᒃᑭᖅᑐᓂᒃ, ᐃᓄᖕᓅᖓᔪᓂᒃ ᐃᓕᓐᓂᐊᕐᓂᕐᒥᒃ ᐱᓕᕆᐊᒃᓴᑦ ᐱᔨᑦᑎᕋᐅᑎᖏᓐᓂᒃᓗ. ᑖᓐᓇ ᓄᑖᖅ ᒪᓕᒐᖅ ᐱᐅᓯᒋᐊᖅᑎᑦᑎᓂᐊᖅᑐᖅ ᐱᔪᓐᓇᕈᑎᓂᒃ, ᐊᑭᓕᖅᓱᒐᒃᓴᓂᑦ, ᐃᓚᐅᑎᑦᑎᑎᐊᖅᑐᓂᒃ, ᑕᒪᒃᑮᔪᓂᒃᓗ ᓄᑕᖅᑲᓂᒃ ᑲᒪᓂᕐᓂ, ᐊᑦᑕᕐᓇᖅᑕᐃᓕᒪᓂᕐᒥᒃ ᖃᓄᐃᙱᑦᑎᐊᖅᑎᑦᑎᓇᓱᖕᓂᕐᒥᒃᓗ ᓄᑕᕋᑦᑎᓐᓄᑦ, ᑕᑎᒋᔭᒃᓴᐅᓂᕐᒥᒃᓗ ᐱᑎᑦᑎᔨᓄᑦ ᒐᕙᒪᑦᑎᓐᓄᓪᓗ.
ᐊᐱᖁᑎ: ᖃᓄᐃᒻᒪ ᐃᓕᓐᓂᐊᕆᐅᖅᓴᓂᖅ ᐱᒻᒪᕆᐅᕙ?
ᑭᐅᔾᔪᑎ: ᐱᔪᒪᓂᖃᖅᑎᑦᑎᓂᖅ ᐱᕈᖅᐸᓪᓕᐊᓕᓵᖅᑐᑦ ᐊᑐᖅᓯᒪᔭᖏᓐᓂ ᓄᑕᕋᐅᑉ ᐱᕙᓪᓕᐊᓂᖓᓄᑦ ᐅᖃᐅᓯᕆᔭᐅᓗᐊᕈᓐᓇᖏᓚᖅ. ᑕᒪᒃᑭᖅᑐᓂᒃ ᐃᓕᓐᓂᐊᕆᐅᖅᓴᓕᓵᖅᑐᓄᑦ ᐸᐃᕆᕕᖕᓄᓪᓗ ᐱᓕᕆᐊᒃᓴᑦ ᐱᔭᕆᐊᖃᒻᒪᕆᒃᑐᑦ ᓄᑕᕋᓕᒫᕐᓄᑦ ᖃᑕᙳᑎᒌᓄᓪᓗ ᐃᑲᔪᖃᑦᑕᕐᒪᑕ ᐱᕈᖅᐸᓪᓕᐊᑎᓪᓗᒋᑦ ᓄᑕᕋᐅᑉ ᓇᒡᓕᒍᓲᑎᖓᒍᑦ ᐊᓐᓇᒍᓐᓇᕐᓂᖓᓄᓪᓗ, ᑲᒪᒋᓗᒋᓪᓗ ᐱᔪᓐᓇᖅᑕᖏᑦ ᐃᓕᑦᑎᕙᓪᓕᐊᖏᓐᓇᕐᓗᑎᒃ ᐱᕈᕐᓗᑎᒃᓗ ᖁᕕᐊᒋᔭᖏᓐᓂ ᐊᑐᖃᑦᑕᓕᖅᑎᓪᓗᒋᑦ ᐃᓅᓗᑎᒃ ᐃᓅᓯᑦᑎᐊᕙᖕᒥᑦ. ᑖᒃᑯᐊ ᐱᓕᕆᐊᒃᓴᑦ ᐱᔨᑦᑎᕋᐅᑎᓪᓗ ᐃᑲᔪᖅᓱᐃᖕᒥᔪᑦ ᓇᖕᒥᓂᖅ ᐱᔪᒪᔭᖏᓐᓂᒃ, ᐋᖅᑭᒋᐊᕈᑎᒃᓴᓂᑦ, ᐃᓕᖅᑯᓯᕐᓄᓪᓗ ᐱᓯᒪᐃᓐᓇᕈᑎᓂᒃ, ᐱᐅᑎᒋᐊᖅᑎᑦᑎᓂᒃᑯᑦ ᑐᕌᕆᔭᕐᓄᑦ ᐆᒪᑎᑦᑎᒃᑲᓐᓂᕐᓂᕐᓄᑦ ᐱᓯᒪᐃᓐᓇᕐᓗᒋᓪᓗ ᐃᓄᐃᑦ ᐅᖃᐅᓯᖏᑦ ᐃᓕᖅᑯᓯᖏᓪᓗ.
ᐊᐱᖁᑎ: ᖃᓄᖅ ᐱᖁᔭᐅᔪᓂ ᐊᓯᔾᔨᕈᑎᑦ ᒪᓕᒐᕐᒧᑦ ᐋᖅᑭᒃᑕᐅᓯᒪᕙᑦ?
ᑭᐅᔾᔪᑎ: ᐊᑕᖐᑦᑎᐊᖅᑐᓂᒃ ᕿᒥᕐᕈᓂᖅ ᒫᓐᓇ ᐸᐃᕆᕕᖕᓄᑦ ᐱᖁᔭᖅ ᐱᔭᐅᓪᓗᑎᒃ ᖃᐅᔨᓇᓱᒃᖢᑎᒃ ᐱᐅᓯᒋᐊᕈᑎᒃᓴᓂᑦ. ᑖᓐᓇ ᕿᒥᖁᓂᖅ ᐃᓚᐅᑎᑦᑎᓪᓗᓂ ᑲᓇᑕᓕᒫᒥ ᓄᓇᓕᐅᔪᓂᑦ ᐊᔾᔨᓕᐅᕆᓂᕐᒥᒃ ᐃᓚᐅᑎᑦᑎᓂᕐᒥᒃᓗ ᐱᓪᓗᐊᑕᓂᒃ ᐃᓕᓐᓂᐊᕆᐅᖅᓴᓕᓵᖅᑐᓄᑦ ᐸᐃᕆᕕᖕᓄᓪᓗ ᐱᓕᕆᖃᑎᒌᓂᑦ ᑎᒍᒥᐊᖅᑎᐅᖃᑕᐅᔪᓂᒃᓗ ᓄᓇᕗᒻᒥ, ᓲᕐᓗ ᓚᐃᓴᓐᓯᖃᖅᑐᑦ ᐸᐃᕆᕖᑦ ᐊᒻᒪ ᓄᓇᕗᑦ ᑐᙵᕕᒃᑯᓐᓂ.
ᐊᐱᖁᑎ: ᓄᓇᕗᑦ ᒐᕙᒪᒃᑯᑦ ᖃᓄᐃᒻᒪᑦ ᐅᖃᖃᑎᖃᐃᓐᓇᖅᐸᑦ ᓄᑖᒧᑦ ᐸᐃᕆᕕᓕᕆᓂᕐᒥ ᒪᓕᒐᖓᓂ?
ᑭᐅᔾᔪᑎ: ᐅᖃᖃᑎᒌᖕᓃᑦ ᐱᓕᕆᐊᖑᔪᑦ ᐱᖁᓪᓗᒋᑦ ᐱᐅᓯᒋᐊᕈᑎᑦ ᐃᓕᓐᓂᐊᕆᐅᖅᓴᓕᓵᖅᑐᓄᑦ ᐸᐃᕆᕝᕕᖕᓄᓪᓗ ᑭᐅᒋᐊᕈᓐᓇᕐᓗᑎᒃ ᐱᔭᕆᐊᖃᖅᑕᖏᓐᓄᑦ ᓄᓇᕗᒻᒥᐅᑦ. ᐱᒻᒪᕆᐅᖕᒥᔪᖅ ᒐᕙᒪᒃᑯᓐᓄᑦ ᓄᓇᕗᒻᒥᐅᓕᒫᑦ ᐱᕕᒃᓴᖃᕐᓗᑎᒃ ᖃᓅᖁᔭᖏᓐᓂ ᑐᓂᓯᓂᕐᒧᑦ ᓄᑖᒧᑦ ᐋᖅᑭᒋᐊᖅᑕᕐᒧᓪᓘᓐᓃᑦ ᒪᓕᒐᓕᐅᕐᓂᕐᒧᑦ.
ᐊᐱᖁᑎ: ᖃᓄᑎᒋᐊᓂᐊᖅᐸ ᐅᖃᖃᑎᒌᒍᑎᓄᑦ?
ᑭᐅᔾᔪᑎ: ᐃᓄᖕᓂᒃ ᐅᖃᖃᑎᖃᕐᓂᖅ ᐊᑐᕐᓂᐊᖅᑐᖅ ᓇᑦᓯᐊᓕᐅᑦ ᒪᐃᒧᑦ 2024.
- ᓄᓇᓕᖕᓂᑦ ᑐᓴᕋᓱᒡᕕᒃᓴᐃᑦ ᐅᓪᓗᖏᑦ ᓄᓇᓖᓪᓗ
- ᐱᔭᕇᕐᓗᒍ ᖃᕆᑕᐅᔭᒃᑯᑦ ᖃᐅᔨᓴᐅᑎᒃᓴᕗᑦ ᑎᑭᓚᐅᙱᑎᓪᓗᒍ ᒪᐃ 31, 2024: ᓇᕿᓪᓗᒍ ᐅᓇ
- ᐃᕐᖐᓐᓈᖅᑕᐅᒃᑯᑦ ᓇᒃᑎᓯᐅᑎᓗᒍ ᐅᖃᐅᓯᒃᓴᑎᑦ ᐅᕗᖓ @email
- ᐅᕝᕙᓘᓐᓃᑦ ᑎᑎᕋᕐᕕᒋᓗᒍ ᐅᖃᐅᓯᒃᓴᓄᑦ ᐊᐅᒃᑕᔫᖅ ᐊᑐᐃᓐᓇᐅᔪᖅ ᐅᕗᓂ ᐅᕝᕙᓘᓐᓃᑦ ᓄᓇᓕᔅᓯᓐᓂ ᒐᕙᒪᒃᑯᓐᓂᒃ ᑐᓴᐅᒪᔪᓕᕆᔨᐅᑉ ᑎᑎᕋᕐᕕᖓᓄᑦ.
ᐊᐱᖁᑎ: ᖃᓄᖅ ᓄᑖᖅ ᒪᓕᒐᖅ ᐋᖅᑭᒃᓯᓂᐊᕐᒪᑦ ᑐᙵᕕᖃᕐᓂᕐᒥᒃ ᐃᓄᖕᓅᖓᔪᓂᒃ ᐱᓕᕆᐊᒃᓴᓂᑦ ᐱᔨᑦᑎᕋᐅᑎᓂᒃᓗ?
ᑭᐅᔾᔪᑎ: ᐃᑲᔪᕐᓗᒋᑦ ᐃᓄᖕᓅᖓᔪᑦ ᐱᓕᕆᐊᒃᓴᑦ ᐱᔨᑦᑎᕋᐅᑎᓪᓗ, ᓄᑖᖅ ᒪᓕᒐᖅ ᐋᖅᑭᒃᓯᓂᐊᖅᑐᖅ ᑐᙵᕕᖃᕐᓂᕐᒥᒃ ᐃᓗᓕᖏᓐᓂ ᑐᙵᕕᒋᓗᒋᑦ:
- ᐃᓄᐃᑦ ᖃᐅᔨᒪᔭᑐᖃᖏᑕ ᑐᙵᕕᖏᑦ.
- ᐃᓄᙳᐃᓂᕐᒧᑦ ᑐᕌᒐᕆᔭᖅ "ᐃᓄᙳᐃᓂᖅ."
- ᐃᓄᖕᓄᑦ ᑐᕌᖓᔪᑦ ᐃᓕᓐᓂᐊᕆᐅᖅᓴᕕᖕᓄᑦ ᐸᐃᕆᕕᖕᓄᓪᓗ ᐱᓕᕆᐊᒃᓴᑦ ᐱᔨᑦᑎᕋᐅᑎᒃᓴᓪᓗ.
ᐊᐱᖁᑎ: ᖃᓄᖅ ᓄᑖᖅ ᒪᓕᒐᖅ ᐱᐅᓯᒋᐊᖅᑎᑦᑎᓂᐊᖅᐸ ᐱᔪᓐᓇᕈᑎᓂᒃ, ᐊᑭᓕᒐᒃᓴᓂᒃ, ᐃᓚᐅᑎᑦᑎᐊᕈᑎᓂᒃ, ᐊᒻᒪ ᑕᒪᒃᑭᖅᑐᓂᒃ ᓄᑕᕋᕐᒥᒃ ᑲᒪᑦᑎᐊᕐᓂᕐᒥᒃ?
ᑭᐅᔾᔪᑎ: ᓄᑖᖅ ᐸᐃᕆᕕᖕᓄᑦ ᒪᓕᒐᖅ ᐱᐅᓯᒋᐊᖅᑎᑦᑎᓂᐊᖅᑐᖅ ᐱᔪᓐᓇᕈᑎᓂᒃ, ᐊᑭᓕᒐᒃᓴᐅᔪᓂᒃ, ᐃᓚᐅᑎᑦᑎᑎᐊᖅᑐᓂᒃ, ᑕᒪᒃᑭᖅᑐᓂᒃᓗ ᑲᒪᑦᑎᐊᕈᑎᓂᒃ ᐆᒃᑑᑎᖃᕐᓂᒃᑯᑦ ᓲᕐᓗ ᐃᒫᒃ:
- ᓇᓗᓇᐃᖅᓯᓂᕐᒧᑦ ᒐᕙᒪᒃᑯᑦ ᐱᔪᓐᓇᕐᓂᖃᕐᓂᖏᓐᓄᑦ ᒪᓕᒐᓕᐅᕐᓂᕐᒧᑦ ᐃᓕᓐᓂᐊᕈᑎᑦᓴᓂᒃ ᐃᓕᓐᓂᐊᕐᓂᕐᒧᓪᓗ ᒪᓕᑦᑕᐅᔭᕆᐊᓕᓐᓂᒃ ᓄᑕᖅᑲᓄᑦ.
- ᐊᓯᔾᔨᕈᓐᓇᖅᑐᑦ ᓚᐃᓴᓐᓯᒧᑦ ᖃᖓᒃᑰᕐᓂᐊᕐᓂᖏᑦ ᐊᒻᒪ ᓚᐃᓴᓐᓯᒋᔭᐅᓚᐅᑲᒃᑐᑦ ᐱᐅᓯᒋᐊᕐᓗᒋᑦ ᐱᔪᓐᓴᕐᕕᖏᑦ.
- ᐃᓕᓐᓂᐊᕆᐅᖅᓴᓕᓵᖅᑐᓄᑦ ᐸᐃᕆᕝᕕᖕᓄᓪᓗ ᑲᑎᒪᔨᖏᑦ ᐱᑎᑦᑎᓗᑎᒃ ᐅᖃᐅᓯᐅᓯᒪᔪᓂᒃ ᒥᓂᔅᑕᖓᓄᑦ ᐃᓕᓐᓂᐊᕐᓂᓕᕆᔨᒃᑯᑦ.
- ᒐᕙᒪᒃᑯᑦ ᐱᔪᓐᓇᖅᑎᐅᑎᓪᓗᒋᑦ ᐊᑐᐊᒐᓕᐅᕐᓗᒋᑦ ᒪᓕᒋᐊᖃᖅᑕᖏᓐᓂ ᑮᓇᐅᔭᖃᖅᑎᑕᐅᓂᕐᒧᑦ ᐃᑲᔪᕈᑎᓄᑦ ᐃᓕᓐᓂᐊᕆᐅᖅᓴᓕᓵᖅᑐᓄᑦ ᐸᐃᕆᕕᖕᓄᓪᓗ.
- ᐊᔪᖅᑎᑉᐸᙱᓪᓗᒋᑦ ᓄᑕᖅᑲᑦ ᐅᑭᐅᓖᑦ 12 ᐅᖓᑖᓂ ᐃᓚᐅᔪᓐᓇᖅᑎᓪᓗᒋᑦ ᐸᐃᕆᕕᒻᒥ ᐱᓕᕆᐊᓄᑦ ᐱᔭᐅᒋᐊᖃᕌᖓᑕ.
ᐊᐱᖁᑎ: ᖃᓄᕐᓕ ᓄᑖᖅ ᒪᓕᒐᖅ ᐃᑲᔪᕐᓂᐊᕐᒪᑦ ᑕᑎᒋᔭᒃᓴᐅᓂᕐᒥᒃ?
ᑭᐅᔾᔪᑎ: ᓄᑖᖅ ᐸᐃᕆᕕᖕᓄᑦ ᒪᓕᒐᖅ ᐃᑲᔪᕐᓂᐊᖅᑐᖅ ᑕᑎᒋᔭᒃᓴᐅᓂᕐᒥᒃ ᐃᓕᓯᓂᒃᑯᑦ ᓄᑖᓂᒃ ᐆᒃᑐᕈᑎᓂᒃ ᓲᕐᓗ:
- ᖃᕆᑕᐅᔭᒃᑯᑦ ᑲᑎᖅᓱᐃᓂᖅ ᓇᓗᓇᐃᔭᐅᑎᓂᒃᓗ ᐊᒥᖅᑳᕈᑎᖃᕐᓂᖅ, ᒪᓕᖕᓂᖅ ᒐᕙᒪᒃᑯᑦ ᑐᓴᖅᑕᐅᔭᕆᐊᖃᙱᑦᑐᓄᑦ ᒪᓕᒐᖏᓐᓂ.
- ᐊᒥᓱᕈᕆᐊᕐᓗᒋᑦ ᐱᔪᓐᓇᖅᑎᑦᑎᔨᑦ ᐱᓕᕆᐊᖃᕐᓂᕐᒧᑦ ᖃᐅᔨᓴᕈᑎᓂᑦ ᐸᐃᕆᕝᕕᖕᓄᑦ.
ᐊᐱᖁᑎ: ᖃᓄᕐᓕ ᓄᑖᖅ ᒪᓕᒐᖅ ᐱᐅᓯᒋᐊᖅᑎᑦᑎᓂᐊᕐᒪᑦ ᐊᑦᑕᕐᓇᖅᑕᐃᓕᒪᓂᕐᒥᒃ ᖃᓄᐃᙱᑦᑎᐊᖅᑎᑦᑎᓇᓱᒍᑎᓂᒃᓗ ᓄᑕᖅᑲᓂᑦ?
ᑭᐅᔾᔪᑎ: ᓲᖃᐃᒻᒪ ᐸᐃᕆᕝᕕᖕᓄᑦ ᐱᖁᔭᖅ ᐃᓱᒪᒋᔭᐅᖕᒪᑦ ᒪᓕᒐᐅᓂᖓᓂᒃ, ᖃᐅᔨᒪᒋᐊᓲᖅ ᐃᓕᓐᓂᐊᕆᐅᖅᓴᓕᓵᖅᑐᓄᑦ ᐸᐃᕆᕕᖕᓄᓪᓗ, ᐃᓚᐅᓗᑎᒃ ᖃᑕᙳᑎᒌᓄᑦ ᐊᖏᕐᕋᒥ ᐸᐃᕆᕖᑦ, ᐱᓕᕆᕝᕖᓪᓗ ᑲᒪᒋᔭᐅᔪᑦ ᑮᓇᐅᔭᓕᐅᕋᓱᐊᖅᑎᐅᙱᑦᑐᓄᑦ ᑲᑐᔾᔨᖃᑎᒌᓄᑦ, Hᐋᒻᒪᓚᒃᑯᓐᓄᑦ, ᐃᓕᓐᓂᐊᕐᓂᓕᕆᔨᒃᑯᓐᓄᑦ, ᐅᕝᕙᓘᓐᓃᑦ ᐅᐃᕖᑦ ᐃᓕᓐᓂᐊᕐᕕᖏᓐᓄᑦ ᓄᓇᕗᒻᒥ ᒪᓕᒐᖅᑎᒍᑦ ᐱᔭᕆᐊᖃᖅᑎᑕᑦ ᒪᓕᒃᐸᒃᓗᒋᑦ ᒪᓕᒋᐊᖃᖅᑎᑕᐅᔪᑦ ᐆᒃᑐᕈᑎᓪᓗ ᐋᖅᑭᒃᑕᐅᓯᒪᔪᑦ ᐃᓗᓕᖏᓐᓂ.
ᓄᑖᖅ ᐸᐃᕆᕕᖕᓄᑦ ᒪᓕᒐᖅ ᐃᑲᔪᕐᓂᐊᖅᑐᖅ ᑕᑎᒋᔭᒃᓴᐅᓂᕐᒥᒃ ᐃᓕᓯᓂᒃᑯᑦ ᓄᑖᓂᒃ ᐆᒃᑐᕈᑎᓂᒃ ᓲᕐᓗ:
- ᓄᓇᕗᒻᒥ ᐊᖏᖅᓯᒪᓂᖃᖅᑐᖅ ᓄᓇᕐᔪᐊᕐᒥ ᑲᑎᒪᔨᖏᑦ ᓄᑕᖅᑲᑦ ᐱᔪᓐᓇᐅᑎᖏᓐᓄᑦ.
- ᐱᕋᔭᒃᓯᒪᓂᑰᙱᒃᑲᓗᐊᕐᒪᖔᑦ ᐊᒻᒪ ᐊᑦᑕᕐᓇᖅᑐᒦᑎᑦᑎᓂᐊᙱᒃᑲᓗᐊᕐᒪᖔᑦ ᖃᐅᔨᓴᖅᑕᐅᔭᕆᐊᕋᔭᖅᑐᖅ.
- ᐱᔭᕆᐊᖃᓪᓚᕆᒃᓗᓂ ᐳᕙᒃᓗᖕᓇᒧᑦ ᖃᐅᔨᓴᖅᑕᐅᓂᕐᒥᒃ ᐃᖅᑲᓇᐃᔭᖅᑎᓕᒫᓄᑦ.
- ᒥᑭᓛᖑᔪᓐᓇᖅᑕᖓᒍᑦ ᐱᔨᑦᑎᕋᕐᓂᖅ ᖃᓄᐃᓕᐅᕈᑕᐅᔪᒪᔪᓂᒃ ᐱᙳᐊᖅᑐᓕᕆᓂᕐᒧᑦ ᐅᓪᓗᖓᓂ ᐊᓃᕐᓗᑎᒃ ᐱᓕᕆᐊᒃᓴᓪᓗ ᐱᑎᑕᑦ Hᐋᒻᒪᓚᒃᑯᓐᓄᑦ ᑮᓇᐅᔭᓕᐅᕋᓱᐊᖅᑎᐅᙱᑦᑐᓄᓪᓗ ᑲᑐᔾᔨᖃᑎᒌᓄᑦ ᐃᓕᓐᓂᐊᓪᓗᐊᓕᖅᑐᓄᑦ ᐅᑭᐅᓕᖕᓄᑦ.
- ᐊᖏᒡᓕᑎᒋᐊᕐᓗᒍ ᐱᔪᓐᓇᕐᓂᕆᔭᐅᔪᑦ ᐊᒻᒪ ᐋᕿᒃᓱᐃᓗᓂ ᖃᐅᔨᓴᕐᓂᕐᒥᑦ ᐱᔪᓐᓇᐅᑎᖃᖅᑐᓄᑦ ᐃᓕᓐᓂᐊᕆᐅᖅᓴᓂᕐᒧᑦ ᐸᐃᕆᕝᕕᖕᓄᓗ ᐊᒻᒪ ᐃᓛᒃᑰᖅᑐᓄᑦ ᐸᓴᒍᓱᒃᑐᓄᑦ ᐊᐅᓚᑦᑎᓂᕐᒧᑦ ᐱᔪᓐᓇᐅᑎᖃᙱᑦᑐᓄᑦ ᐸᐃᕆᕝᕕᖕᓂᑦ. ᓲᕐᓗ, ᖃᐅᔨᓴᕈᓐᓇᕐᓂᐊᕐᓗᓂ ᓚᐃᓴᓐᓯᖃᖅᑐᒥᒃ ᐸᐃᕆᕕᖕᒥ ᒪᓕᖕᒪᑦ ᑲᑎᒪᔨᓄᑦ ᐊᖏᖅᑕᐅᓯᒪᔪᑦ ᐊᑐᐊᒐᕐᓄᑦ.
ᐊᐱᖁᑎ: ᓄᑖᑦ ᒥᑭᓛᖑᔪᓐᓇᖅᑕᖓᒍᑦ ᐱᔨᑦᑎᕋᕐᓂᖅ ᖃᓄᐃᓕᐅᕈᑕᐅᔪᒪᔪᓂᒃ ᐱᙳᐊᖅᑐᓕᕆᓂᕐᒧᑦ ᐅᓪᓗᖓᓂ ᐊᓃᕐᓗᑎᒃ ᐃᓱᖃᖅᑎᓐᓂᐊᖅᐸᖓ ᐊᑐᐃᓐᓇᐅᕝᕕᖏᑦ ᑖᒃᑯᐊ ᐱᓕᕆᐊᒃᓴᑦ?
ᑭᐅᔾᔪᑎ: ᑐᒃᓯᕋᖅᑕᐅᔪᓄᑦ ᓄᑖᑦ ᖃᓄᐃᓕᐅᕈᑕᐅᔪᒪᔪᑦ ᐱᑎᑕᐅᓇᓱᙱᑦᑐᑦ ᐋᖅᑭᒃᓯᓗᑎᒃ ᑐᓗᕈᑎᒃᓴᓂᑦ Hᐋᒻᒪᓚᐅᔪᓄᑦ ᑮᓇᐅᔭᓕᐅᕋᒥᐊᖅᑎᐅᙱᑦᑐᓄᓪᓗ ᑲᑐᔾᔨᖃᑎᒌᓄᑦ ᐱᑎᑦᑎᔪᓄᑦ ᐱᙳᐊᕐᓂᕐᒧᑦ ᐅᓪᓗᕐᒥᒃ ᓯᓚᒦᓪᓗᑎᒃ ᐊᓯᖏᓐᓄᓪᓘᓐᓃᑦ ᐊᔾᔨᕐᓚᖏᓐᓄᑦ ᐱᓕᕆᐊᒃᓴᓄᑦ. ᒥᑭᓛᖓᓄᑦ ᒪᓕᒋᐊᖃᖅᑎᑕᕐᓅᖓᔪᑦ ᓲᕐᓗ ᐅᑭᐅᖏᑎᒍᑦ ᐱᔪᓐᓇᖅᑎᑕᐅᔾᔪᑎᓄᑦ ᐃᖅᑲᓇᐃᔭᖅᑎᓄᑦ ᐋᖅᑭᒃᓯᒪᔪᑦ ᖁᕝᕙᕆᐊᖅᑐᓪᓗᒍ ᐊᑦᑕᕐᓇᖅᑕᐃᓕᒪᓂᖅ ᖃᓄᐃᙱᑦᑎᐊᖅᑎᑦᑎᓇᓱᖕᓂᕐᓗ ᓄᑕᖅᑲᓄᑦ ᐅᐸᒃᓯᒪᔪᓄᑦ ᑖᒃᑯᓂᖓ ᐱᓕᕆᐊᒃᓴᓄᑦ.
ᐊᐱᖁᑎ: ᖃᐅᔨᓇᓱᖕᓂᕐᒧᑦ ᐅᖃᐅᓯᐅᔪᑦ ᖃᓄᖅ ᐊᑐᖅᑕᐅᑦᑎᐊᖃᑦᑕᖅᐸᑦ?
ᑭᐅᔾᔪᑎ: ᐅᖃᖃᑎᒌᒍᑎᓕᒫᓂ ᐃᒪᓐᓇᐅᖁᔭᐅᔪᑦ ᖃᐅᔨᓴᖅᑕᐅᓂᐊᖅᑐᑦ, ᐃᓱᒪᒋᔭᐅᓂᐊᖅᑐᑦ, ᐊᒻᒪ ᐃᓚᒋᓕᐅᑎᓗᒋᑦ ᓄᑖᒧᑦ ᐃᓕᓐᓂᐊᓕᓵᖅᑐᓄᑦ ᐸᐃᕆᕝᕕᖕᓄᓪᓗ ᒪᓕᒐᖓᓄᑦ, ᐊᔪᕐᓇᙱᓐᓂᓕᒫᖓᒍᑦ.
ᐊᐱᖁᑎ: ᖃᓄᐃᓐᓂᐊᖅᐸᑦ ᐅᖃᖃᑎᒌᒍᑎᑦ ᐱᔭᕇᖅᑕᐅᒃᐸᑕ?
ᑭᐅᔾᔪᑎ: ᐅᖃᖃᑎᒌᒍᑎᑦ ᐱᔭᕇᖅᑕᐅᒃᐸᑕ, ᐃᓕᓐᓂᐊᕐᓂᓕᕆᔨᒃᑯᑦ ᓴᖅᑭᑎᑦᑎᓂᐊᖅᑐᑦ ᐅᓂᒃᑳᒥᒃ ᑎᑎᕋᖅᓯᒪᓗᑎᒃ ᐅᖃᐅᓯᐅᓯᒪᔪᓂᒃ ᐱᔭᐅᔪᓂᑦ. ᐃᖅᑲᓇᐃᔭᕐᕕᒃ ᐱᓇᓱᓕᕐᒥᓗᓂ ᐊᖏᖅᑕᐅᓂᕐᒧᑦ ᑎᑎᕐᖓᖅᑕᐅᓯᒪᔪᒥᒃ ᐱᖁᔭᕐᔪᐊᒥᑦ, ᓯᕗᓪᓕᖅᐹᖓᓂ ᑐᒃᓯᕋᐅᑕᐅᔪᖅ ᓄᑖᒧᑦ ᐋᖅᑭᒋᐊᖅᑕᕐᒧᓪᓘᓐᓃᑦ ᒪᓕᒐᓕᐊᒧᑦ. ᐱᖁᔭᕐᔪᐊᖅ ᑐᓐᓂᖅᑯᑕᐅᓕᕐᒥᓗᓂ ᒪᓕᒐᓕᐅᕐᕕᖕᒧᑦ ᐅᖃᖃᑎᒌᒍᑕᐅᒃᑲᓐᓂᕐᓂᕐᒧᑦ ᐋᔩᖃᑎᒌᒍᑕᐅᓗᓂᓗ.
ᐊᐱᖁᑎ: ᑲᔪᓯᑎᑕᐅᒃᐸᑦ, ᖃᖓᓕ ᓄᑖᖅ ᒪᓕᒐᖅ ᐱᒋᐊᖅᑎᑕᐅᓂᐊᖅᐸ?
ᑭᐅᔾᔪᑎ: ᑲᔪᓯᑎᑕᐅᒃᐸᑦ, ᓄᑖᖅ ᒪᓕᒐᖅ ᐊᑐᓕᑲᐅᑎᒋᓇᔭᖅᑐᖅ. ᐃᓚᖏᓐᓄᑦ ᐱᔾᔪᑕᐅᔪᓄᑦ, ᑭᖑᕙᕆᐊᑐᐃᓐᓇᕆᐊᖃᖅᑐᑦ ᐱᕕᖃᖁᓪᓗᒍ ᐊᑐᓕᖅᑎᑦᑎᓂᕐᒧᑦ ᖃᖓᒃᑰᕐᕕᒃᓴᖓ ᐱᖁᓪᓗᒋᑦ ᒪᓕᑦᑎᐊᕈᑎᑦ ᐃᓚᖏᓐᓄᑦ ᒪᓕᒋᐊᓕᖕᓄᑦ. ᓄᓇᕗᒻᒥᐅᑦ ᑐᓴᐅᒪᑎᑕᐅᖏᓐᓇᕋᔭᖅᑐᑦ ᖃᓄᓕᒫᖅ.