ᐊᐅᓚᔪᓐᓇᐅᑎᓄᑦ ᑮᓇᐅᔭᓄᑦ ᐱᓕᕆᐊᖅ

ᑮᓇᐅᔭᖅᑖᕈᒪᔪᓂᒃ ᑐᒃᓯᕋᐅᑎᓕᐅᖁᔨᓕᖅᐳᑦ:

ᐃᓕᓐᓂᐊᕐᓂᓕᕆᔨᒃᑯᑦ ᐃᓕᓐᓂᐊᕆᐅᖅᓴᓕᓵᖅᑐᓄᑦ ᓄᑕᖅᑲᓪᓗ ᑲᒪᒋᔭᐅᕙᖕᓂᖏᓐᓄᑦ ᐱᓕᕆᕝᕕᖓ ᐱᔪᓐᓇᖅᓯᕗᑦ ᑮᓇᐅᔭᓂᒃ ᑐᒃᓯᕋᐅᑎᓂᒃ ᐅᓄᖅᓯᒋᐊᖁᓪᓗᒋᑦ ᐸᐃᕆᕝᕖᑦ ᐊᑐᐃᓐᓇᐅᓂᖏᑦ ᓄᓇᕗᒻᒥ ᓄᑕᖅᑲᓄᑦ ᐅᑭᐅᓕᖕᓄᑦ 0-ᒥᑦ 6-ᒧᑦ. ᑐᕌᕆᔭᐅᔪᖅ ᓴᖅᑭᑎᑦᑎᔪᒪᓂᐅᕗᖅ ᓄᑖᓂᒃ ᓚᐃᓴᓕᖕᓂᒃ ᓄᑕᖅᑲᓂᒃ ᐃᓂᒋᔭᐅᔪᓐᓇᖅᑐᓂᒃ ᒪᑐᐃᒃᑲᓐᓂᕐᓗᒋᓪᓗ ᓚᐃᓴᖃᖅᑐᑦ ᓄᑕᖅᑲᓂᒃ ᐸᐃᕆᕝᕖᑦ ᒪᑐᓯᒪᓕᖅᑐᑦ ᐊᕐᕌᒍᓄᑦ ᐱᖓᓱᐸᓗᖕᓄᑦ.

ᑖᓐᓇ ᐱᓕᕆᐊᖅ ᐊᑐᓲᖑᕗᖅ ᑲᓇᑕᒥ ᑮᓇᐅᔭᓂᒃ ᐊᐅᓚᑕᐅᔪᓂᒃ ᓄᓇᕗᑦ ᒐᕙᒪᒃᑯᓐᓄᑦ. ᑮᓇᐅᔭᑦ ᖃᔅᓯᐅᓂᖏᑦ ᐊᔾᔨᒌᖃᑦᑕᔾᔮᙱᑦᑐᑦ ᑐᒃᓯᕋᐅᑎᒧᑦ ᑐᙵᕕᒋᔭᐅᓗᑎᒃ ᖃᐅᔨᔭᐅᖃᑦᑕᕐᓂᐊᖅᖢᑎᒡᓗ ᐊᑕᐅᓯᐅᓈᖅᑎᕐᓗᒋᑦ − ᐊᖏᓛᒥᒃ ᑮᓇᐅᔭᓂᒃ ᐃᑲᔫᓯᐊᖅᑐᖅᑕᖃᕆᐊᖃᙱᑦᑐᖅ. ᐃᓕᓐᓂᐊᕐᓂᓕᕆᔨᒃᑯᑦ ᐃᓕᓐᓂᐊᓕᒻᒪᒃᓴᔪᓕᕆᕝᕕᑦ ᐸᐃᕆᕝᕕᓪᓗ ᐱᓕᕆᕝᕕᖓ ᕿᒥᕐᕈᓂᐊᖅᑐᑦ ᑐᓐᓂᖅᑯᑕᐅᔪᓂᒃ ᐱᒋᐊᕐᓗᓂ ᒪᐃ 24, 2023. ᑐᒃᓯᕋᐅᑎᑦ ᑐᓐᓂᖅᑯᑕᐅᔪᑦ ᒪᐃ 23, 2023 ᐊᓂᒍᓚᐅᖅᑎᓪᓗᒍ ᐃᓱᒪᒋᔭᐅᓂᐊᖅᐳᑦ ᑮᓇᐅᔭᑦ ᓱᓕ ᐊᑐᐃᓐᓇᐅᒃᐸᑕ. ᓯᕗᓪᓕᐅᔾᔭᐅᓂᐊᖅᑐᑦ ᐱᔨᑦᑎᖅᑕᐅᑦᑎᐊᙱᑦᑐᑦ ᓄᓇᓖᑦ ᑭᒡᓕᖃᖅᑐᓂᑦ ᐱᑕᖃᕇᖅᑐᓂᓪᓘᓐᓃᑦ ᐱᔪᓐᓇᐅᑎᓕᖕᓂᑦ ᐸᐃᕆᕕᖕᓂᑦ.

ᑮᓇᐅᔭᓂ ᑐᒃᓯᕋᐅᑎᑦ ᐃᓚᖃᕆᐊᓕᑦ ᐅᑯᓂᖓ:

ᐱᕕᖃᖁᓪᓗᒋᑦ ᖃᐅᔨᓴᖅᑕᐅᑦᑎᐊᖃᑦᑕᖁᓪᓗᒋᑦ, ᑐᒃᓯᕋᐅᑎᑦ ᓴᖅᑭᑕᐅᔭᕆᐊᖃᖅᐳᑦ ᑐᑭᓯᓇᕐᓗᑎᒃ ᐊᒻᒪ ᐋᖅᑭᑦᑎᐊᖅᓯᒪᓗᑎᒃ. ᐃᒪᓐᓇᐅᖁᔨᔪᖃᕋᔭᖅᐳᖅ, ᐅᑯᐊ ᐋᖅᑭᒃᓯᒪᓂᕆᔭᖏᑦ ᑭᖑᓕᕇᒃᐸᓪᓕᐊᔪᓪᓗ ᒪᓕᒃᑕᐅᓗᑎᒃ ᐱᑎᑦᑎᔪᒪᓂᕐᒧᑦ ᐊᑕᐅᓰᓐᓇᒃᑰᖅᑎᑕᐅᔪᓂᒃ ᐱᓇᔪᒃᓯᒪᔪᓂᒃ ᑭᐅᓯᓂᕐᒥᒃ ᓇᓗᙱᑦᑎᐊᕈᒪᓂᕐᒧᓪᓗ ᑕᒪᕐᒥᒃ ᐊᑐᓂᑦ ᐱᓇᔫᑎᒋᔭᐅᔪᑦ ᐊᑕᖏᕐᓗᑎᒃ ᐃᓱᒪᒃᓴᖅᓯᐅᕈᑕᐅᒐᓗᐊᕐᒪᖔᑕ:

• ᑐᒃᓯᕋᐅᑎᐅᑉ ᑎᑎᖅᑲᖓ − ᑐᑭᓯᓇᑦᑎᐊᕐᓗᓂ ᓇᓗᓇᐃᖅᓯᒪᓗᓂ ᐱᓇᔪᒃᑯᕕᑦ ᓄᑖᒥᒃ ᓚᐃᓴᓐᓯᓕᖕᒥᒃ ᐸᐃᕆᕝᕕᖕᒥ, ᓄᑖᙳᕆᐊᖅᑎᑦᑎᔪᒪᓗᑎᑦ ᐸᐃᕆᕝᕕᐅᕙᒌᖅᑐᒥᒃ ᓴᖅᑭᑦᑎᔪᒪᒍᕕᑦ ᐱᔪᓐᓇᐅᑎᓕᖕᒥ ᐸᐃᕆᕕᒃᓴᒥᒃ, ᐅᕝᕙᓘᓐᓃᑦ ᐱᓇᔪᒃᑯᕕᑦ ᐊᑕᐅᓯᕐᒥᒃ ᒪᑐᓯᒪᓕᖅᑐᒥᒃ ᐅᑭᐅᓄᑦ ᐱᖓᓱᓄᑦ ᐅᖓᑖᓄᓪᓘᓐᓃᑦ.
• ᐊᒡᓚᒡᕕᖕᒥ ᓇᓗᓇᐃᖅᑕᐅᓂᖓ ᐊᒻᒪ ᖃᓄᐃᓕᖓᓂᖓ − ᐅᓂᒃᑲᐅᓯᐅᓂᖓ ᐃᓚᓕᐅᔾᔨᓯᒪᔭᕆᐊᖃᖅᐳᖅ ᐃᓛᒃᑰᕈᕕᑦ, ᑮᓇᐅᔾᔭᒃᓴᕋᓱᐊᖅᑎᐅᙱᒃᑯᕕᑦ, ᕼᐋᒻᒪᓚᒃᑯᑦ/ᓄᓇᓕᖕᓄᑦ ᒐᕙᒪᒋᔭᐅᔪᑦ, ᐃᓕᓐᓂᐊᖅᑐᓕᕆᔨᒃᑯᑦ ᐅᕝᕙᓘᓐᓃᑦ ᐅᐃᕖᑦ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ ᓄᓇᕗᒻᒥ, ᑲᑐᔾᔨᖃᑎᒌᑦ ᒪᓕᒐᖅᑎᒍᑦ ᐊᑎᖓ, ᑐᕌᕈᑎᖓ, ᐊᒻᒪ ᐅᖃᓘᑎᖓᑕ ᓈᓴᐅᑖ; ᐅᓪᓗᖅ ᐋᖅᑭᒃᑕᐅᓂᖓ ᐋᖅᑭᒃᓯᒪᓂᖓᓗ; ᐊᒻᒪ ᐱᓕᕆᖃᑎᒌᑦ ᐊᒻᒪ ᓇᖕᒥᓂᖃᖅᑎᐅᔾᔪᑎᑦ ᓇᓗᓇᐃᖅᓯᒪᔪᑦ.
• ᐃᑲᔪᖅᓱᐃᔾᔪᑎᒃᓴᖅ ᑎᑎᕋᖅᓯᒪᔪᑦ
  • ᐊᖏᖅᑕᐅᓚᐅᙱᑎᓪᓗᒋᑦ ᒪᓕᒐᖅᑎᒍᑦ, ᓄᓇᓕᖕᓂ ᒐᕙᒪᒋᔭᐅᔪᑦ, ᐊᓯᖏᓪᓗ ᐱᔪᓐᓇᕐᓂᖃᖅᑐᑦ ᑎᒥᐅᔪᑦ ᐃᓚᓕᐅᔾᔭᐅᑐᐃᓐᓇᕆᐊᓖᑦ, ᐱᔭᕆᐊᖃᖅᐸᑦ.
  • ᑎᑎᕋᖅᑕᐅᓯᒪᔪᑦ ᐱᔪᒪᓂᕆᔭᐅᔪᑦ ᓄᑕᖅᑲᓂᒃ ᑲᒪᒋᔭᖃᖅᐸᖕᓂᕐᒧᑦ ᐃᓂᒃᑲᓐᓂᕐᓂᒃ: (ᓲᕐᓗ, ᐅᑕᖅᑭᕙᒃᑐᑦ ᐱᑕᖃᖅᐸᒌᖅᑐᓂ ᓄᑕᖅᑲᓂᒃ ᑲᒪᒋᔭᖃᖅᐸᖕᓂᕐᓂ ᑎᑎᖅᑲᓂᒡᓘᓐᓃᑦ ᐊᖓᔪᖅᑳᕆᔭᐅᔪᓂᑦ ᐊᑐᕈᓐᓇᙱᑦᑐᓂᒃ ᓄᑕᖅᑲᓂᒃ ᑲᒪᒋᔭᐅᓂᕐᒥᒃ).
  • ᑎᑎᖅᑲᐃᑦ ᐃᑲᔪᖅᑐᐃᔪᑦ ᓄᓇᓕᖕᓂᑦ ᑲᑐᔾᔨᖃᑎᒌᖑᔪᓂᑦ ᐃᓚᓕᐅᔾᔭᐅᓯᒪᔪᓐᓇᖕᒥᔪᑦ. 
• ᐃᓚᓕᐅᔾᔨᓂᖅ ᐊᒻᒪ ᐊᔾᔨᒌᒃᑎᑦᑎᓂᖅ: ᐃᓂᒃᓴᐃᑦ ᐃᑲᔪᖅᑐᐃᓂᐊᖅᑐᑦ ᐃᓚᓕᐅᔾᔨᓂᖕᓂᑦ ᐊᔾᔨᒌᑎᑦᑎᓂᖕᓂᓪᓗ (ᓄᑕᖅᑲᑦ ᑎᒥᒥᒍᑦ ᐊᔪᕈᑎᓖᑦ, ᐱᐅᓯᒋᐊᕆᐊᖃᖅᑐᓪᓘᓐᓃᑦ ᐃᓅᔪᓪᓘᓐᓃᑦ ᐃᑲᔪᖅᑐᖅᑕᐅᔭᕆᐊᓖᑦ, ᐱᔭᕆᐊᑭᑦᑐᑦ ᓄᑕᖅᑲᑦ) ᓯᕗᓪᓕᐅᔾᔭᐅᓂᐊᖅᐳᑦ ᓇᓗᓇᐃᔭᐃᖁᔭᐅᓪᓗᑎᒡᓗ ᖃᓄᖅ ᑕᒪᓐᓇ ᐱᓕᕆᐊᖑᓂᐊᖕᒪᖔᑦ ᓇᒃᓯᐅᑎᔭᖏᓐᓂᑦ. 
• ᐱᓕᕆᐊᒃᓴᐅᑉ ᓇᓗᓇᐃᖅᓯᒪᓂᖓ ᐊᒻᒪ ᖃᓄᐃᓕᖓᓂᖓ − ᓇᓗᓇᐃᔭᕐᓗᒍ ᐱᓕᕆᐊᖑᔪᖅ ᐱᐊᓂᒃᑕᐅᖁᓪᓗᒍ ᐱᓕᕆᐊᒃᓴᖅ.
• ᐱᓕᕆᐊᒧᑦ ᖃᖓᒃᑰᕋᔭᕐᓂᖏᑦ ᐊᒻᒪ ᐱᒻᒪᕆᐅᔪᑦ ᐊᓂᒍᖅᑕᐅᕙᓪᓕᐊᔪᑦ − ᐊᑐᐃᓐᓇᕈᖅᑎᓪᓗᒋᑦ ᐱᕕᒃᓴᕆᑎᑕᐅᔪᑦ ᐱᐊᓂᒃᑕᐅᕝᕕᒃᓴᖏᑦ.
• ᓇᓗᓇᐃᔭᖅᓯᒪᔪᑦ ᐱᓕᕆᐊᒃᓴᒧᑦ ᑮᓇᐅᔭᑦ ᐊᑐᖅᑐᒃᓴᑦ/ᐊᑭᖏᑦ ᐊᒻᒪ ᐊᑭᓕᖅᓱᕆᐊᓖᑦ (ᐃᓚᓕᐅᔾᔭᐅᓪᓗᑎᒃ ᐊᑭᖏᑦ ᐱᓕᕆᐊᓄᑦ ᓂᐅᕕᖅᑎᑦᑎᔨᓂᙶᖅᑐᑦ). 

ᐱᓇᔪᒍᒪᒍᕕᑦ ᑐᑭᓯᒋᐊᒃᑲᓐᓂᕈᒪᒍᕕᓪᓘᓐᓃᑦ, ᐃᕐᖐᓐᓈᖅᑕᐅᒃᑯᑦ ᑎᑎᕋᕈᓐᓇᖅᐳᑎᑦ @email  - ᐃᓕᓐᓂᐊᕐᓂᓕᕆᔨᒃᑯᑦ ᐃᓕᓐᓂᐊᓕᒻᒪᒃᓴᔪᓕᕆᔨᓄᑦ ᖃᐅᔨᒋᐊᕐᕕᒃᓴᑦ:

• ᕿᑭᖅᑖᓗᖕᒥ 1-833-930-3935  − @email
• ᑭᕙᓪᓕᕐᒥᑦ: 1-833-930-3936 @email
• ᕿᑎᕐᒥᐅᓂᑦ: 1-833-930-3937 @email
• ᐃᖃᓗᐃᑦ: 1-833-930-3938 @email

ᐊᐱᖅᑯᑎᐅᒐᔪᒃᑐᑦ:

ᑭᒃᑯᑦ ᐱᓇᔪᒍᓐᓇᖅᐸᑦ?
ᓚᐃᓴᓐᓯᖃᖅᑐᑦ ᐸᐃᕆᕝᕖᑦ, ᐃᓚᒌᓄᑦ ᐊᖏᕐᕋᕆᔭᐅᔪᑦ ᐸᐃᕆᕝᕖᑦ, ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ ᐊᒻᒪ ᐅᐃᕖᑦ ᐃᓕᓐᓂᐊᖅᑐᓕᕆᔨᒃᑯᑦ ᑲᑐᔾᔨᖃᑎᒌᖏᑦ ᓄᓇᕗᒻᒥ ᐊᐅᓚᑦᑎᔪᑦ, ᕼᐋᒻᒪᓚᒃᑯᑦ, ᐅᕝᕙᓘᓐᓃᑦ ᑮᓇᐅᔾᔭᒐᓱᐊᖅᑎᐅᙱᑦᑐᑦ ᐊᒻᒪ ᒐᕙᒪᐅᙱᑦᑐᑦ ᑲᑐᔾᔨᖃᑎᒌᑦ ᐃᓕᓐᓂᐊᓕᒻᒪᒃᓴᔪᓕᕆᓂᖅ ᐸᐃᕆᕕᓕᕆᓂᕐᓗ ᐱᓕᕆᖃᑕᐅᔪᒪᔪᑦ.

 ᑐᒃᓯᕋᐅᑦ ᐊᐱᕆᕗᖅ ᐊᑭᒃᓴᖏᓐᓂᒃ ᐱᓕᕆᐊᖑᔪᒪᔪᒧᑦ. ᖃᓄᖅ ᒥᒃᓴᐅᑦᑎᓇᓱᒋᐊᖃᕋᒪ?
ᖃᔅᓯᑲᓪᓚᖕᓂᒃ ᐊᑐᖅᑕᐅᖔᓕᕈᓐᓇᖅᑐᓂᒃ ᐱᑕᖃᖅᐳᖅ ᓇᓂᓯᓂᐊᕐᓗᓂ ᑳᓐᑐᓛᖃᖅᑎᐅᔪᓂᒃ ᓂᐅᕕᖅᑎᑦᑎᕙᒃᑐᓂᒡᓘᓐᓃᑦ ᐱᑎᑦᑎᔪᓐᓇᖅᑐᓂᒃ ᒥᒃᓴᐅᓴᒃᓯᒪᔪᓂᒃ:

• ᖃᕆᑕᐅᔭᒃᑯᑦ ᕿᓂᕐᓗᑎᑦ. ᕿᓂᕈᓐᓇᖅᑐᑎᑦ ᐊᖏᖃᑎᒌᒍᑎᒃᑯᑦ ᐃᖅᑲᓇᐃᔮᖅᑖᑎᑕᓂᑦ ᓂᐅᕕᖅᑎᑦᑎᔨᓂᒡᓘᓐᓃᑦ ᖃᕆᑕᐅᔭᒃᑯᑦ ᑕᑯᒋᐊᕐᓗᒋᓪᓗ ᐃᑭᐊᖅᑭᕕᖏᑦ ᐊᑐᐃᓐᓇᐅᑎᑦᑎᖃᑦᑕᕐᒪᖔᑕ ᐱᔨᑦᑎᕋᐅᑎᓂᒃ ᐱᔭᕆᐊᖃᖅᑕᕐᓂᑦ.
• ᐃᑲᔪᖅᑕᐅᔪᒪᓗᑎᑦ ᓴᓇᕝᕕᖕᓄᑦ ᓄᓇᓕᔅᓯᓐᓂ. ᖃᐅᔨᒋᐊᕐᓗᒋᑦ ᓴᓇᕝᕕᐊᓗᖕᓂ ᑲᑐᔾᔨᖃᑎᒌᑦ ᐅᕝᕙᓘᓐᓃᑦ ᑕᐅᖅᓰᓂᕐᒧᑦ ᑲᑐᔾᔨᖃᑎᒌᑦ ᐊᒃᑐᐊᓂᓖᑦ ᐱᓕᕆᐊᕆᔭᕐᓄᑦ ᐱᐊᓂᒋᐊᖃᖅᑕᕐᓄᑦ.
• ᐊᓯᖏᓐᓄᑦ ᐱᓕᕆᔪᓐᓇᖅᑐᓄᑦ ᑕᑯᔭᐅᔪᒪᓗᑎᑦ. ᐃᖅᑲᓇᐃᔭᖃᑎᑎᑦ ᐊᐱᕆᕙᒡᓗᒋᑦ, ᐅᕝᕙᓘᓐᓃᑦ ᐊᓯᖏᑦ ᑲᑐᔾᔨᖃᑎᒌᒡᕖᑦ ᖃᐅᔨᒪᖕᒪᖔᑕ ᑳᓐᑐᓛᒃᑎᑦᑎᔨᓂᒃ ᐅᕝᕙᓘᓐᓃᑦ ᓂᐅᕕᖅᑎᑦᑎᔨᓂᒃ ᐱᔨᑦᑎᕋᓲᓂᒃ ᐱᔭᕆᐊᖃᖅᑕᕐᓂᒃ. ᑐᓐᓂᖅᑯᑕᐅᔪᑦ ᓇᓂᓯᔾᔪᑎᑦᑎᐊᕙᐅᕗᑦ ᑕᑎᒋᔭᒃᓴᐅᔪᓂᒃ ᐊᒻᒪ ᐅᒃᐱᕐᓇᖅᑐᓂᒃ ᑳᓐᑐᓛᒃᑎᑦᑎᔨᓂᒃ.

 ᓇᓗᓇᐃᖅᓯᓯᒪᓕᕈᕕᑦ ᑳᓐᑐᓛᖃᖅᑎᐅᑐᐃᓐᓇᕆᐊᓕᖕᓂᒃ ᓂᐅᕕᖅᑎᑦᑎᓲᓂᒡᓘᓐᓃᑦ, ᐊᐱᕆᔪᓐᓇᖅᐸᑎᑦ ᐱᑎᑦᑎᖁᓗᒋᑦ ᑎᑎᕋᖅᓯᒪᔪᓂᒃ ᖃᔅᓯᐅᓇᓱᒋᓐᓈᔭᑎᓪᓗ ᑕᒪᓐᓇ ᐃᓚᖃᕐᓗᓂ ᐊᒡᒍᖅᓯᒪᔪᓂᒃ ᐊᑭᖏᓐᓂᒃ ᐊᒃᑐᐊᓂᓕᖕᓂᒃ ᐱᓕᕆᐊᖑᔪᒪᔪᒧᑦ. 
ᑎᑎᕋᖅᓯᒪᔪᑦ ᐅᖃᖅᑕᐅᔪᑦ ᐃᓛᒃᑰᖅᑐᓂᑦ ᑳᓐᑐᓛᖃᖅᑎᐅᔪᓂᑦ ᐊᖏᖅᑕᐅᔪᓐᓇᖅᑐᑦ.

ᐱᒋᐊᖅᑎᑦᑎᔪᒪᒐᓗᐊᕋᒪ ᐊᖏᕐᕋᕋ ᐸᐃᕆᕕᐅᓕᖅᑎᓪᓗᒍ. ᖃᓄᕐᓕ ᖃᐅᔨᒪᓂᐊᕋᒪ ᑭᓱᑦ ᐱᓕᕆᐊᖑᔭᕆᐊᖃᕐᒪᖔᑕ ᐊᑦᑕᕐᓇᙱᑦᑐᒦᖁᓪᓗᒍ?
ᐱᒋᐊᖅᑎᑦᑎᓂᐊᕐᓗᓂ ᐊᖏᕐᕋᒥ ᐸᐃᕆᕝᕕᖕᒥᒃ ᓇᓗᙱᑦᑎᐊᕈᒪᓂᕐᒧᓪᓗ ᖁᐊᖅᓵᕐᓇᙱᓐᓂᖓᓂᒃ ᐃᓂᒋᓂᐊᕐᓗᒍ, ᒪᓕᒋᐊᖃᖅᐳᑎᑦ ᒪᓕᒃᑕᐅᕙᓪᓕᐊᕙᒃᑐᓂᒃ ᒪᓕᒋᐊᖃᖅᐸᒃᑐᓂᒡᓗ ᐋᖅᑭᒃᑕᐅᓯᒪᔪᓂᒃ ᐅᑯᓇᙵᑦ ᓄᓇᕗᒻᒥ ᓄᑕᖅᑲᑦ ᐅᓪᓗᒃᑯᑦ ᑲᒪᒋᔭᐅᕙᖕᓂᖏᓐᓄᑦ ᐱᖁᔭᕐᒥ ᐊᒃᑐᐊᓂᓕᖕᓄᓪᓗ ᒪᓕᒋᐊᖃᖅᐸᒃᑐᓄᑦ.

ᓄᑖᙳᕆᐊᖅᑕᐅᔭᕆᐊᖃᙱᑐᐃᓐᓇᕆᐊᖃᖅᐳᖅ ᓚᐃᓴᓐᓯᖃᕐᓗᑎᑦ ᐃᒡᓗᓯ ᐸᐃᕆᕕᙳᕈᒪᒍᕕᑦ. ᑐᑭᓯᒋᐊᒃᑲᓐᓂᕈᒪᔪᓄᑦ, ᖃᐅᔨᒋᐊᕐᕕᐅᔪᓐᓇᖅᑐᑦ ᐃᓕᓐᓂᐊᓕᒻᒪᒃᓴᔪᓕᕆᔨᒧᑦ ᐊᕕᒃᑐᖅᓯᒪᔪᓂᑦ ᐱᓕᕆᕝᕕᒋᔭᔅᓯᓐᓄᑦ.
https://www.gov.nu.ca/sites/default/files/ece_flowchart_eng_2.pdf 

ᑭᓲᕙᑦ ᖃᓄᐃᑦᑑᕙᑦ ᐱᓕᕆᐊᑦ ᑮᓇᐅᔭᖃᖅᑎᑕᐅᔪᓐᓇᖅᑐᑦ?
ᐊᔾᔨᒌᙱᑦᑐᑦ ᐱᓕᕆᐊᑦ ᑮᓇᐅᔭᖃᖅᑎᑕᐅᔪᓐᓇᖅᑐᑦ ᑖᔅᓱᑎᒎᓇᖅ ᐱᓕᕆᐊᒃᑯᑦ ᐃᓚᖃᖅᐳᑦ ᓇᓕᐊᖕᓂᑐᐃᓐᓇᖅ ᐊᐅᓚᔪᓐᓇᐅᑎᓄᑦ−ᐊᒃᑐᐊᔪᓂᒃ ᐊᑭᓕᖅᓱᕆᐊᓕᖕᓂᒃ ᓴᖅᑭᑦᑎᓂᐊᕐᓗᓂ ᓚᐃᓴᓐᓯᖃᖅᑐᓂᒃ ᐸᐃᕆᕕᖕᓂ ᓄᑕᖅᑲᓄᑦ ᐅᑭᐅᓕᖕᓄᑦ 0-ᒥ 6-ᒧᑦ. ᑕᒪᓐᓇ ᐃᓚᖃᑐᐃᓐᓇᕆᐊᓕᒃ ᓄᑖᙳᕆᐊᖅᑎᑦᑎᓂᕐᒥᒃ ᐃᒡᓗᓕᐅᕐᓂᕐᒥᒡᓘᓐᓃᑦ, ᐊᓯᖏᓐᓂᒡᓗ ᐊᑭᓄᑦ ᐊᒃᑐᐊᓂᓕᖕᓄᑦ ᓴᖅᑭᑎᑦᑎᓂᐊᕐᓗᓂ ᖁᐊᖅᓵᕐᓇᙱᑦᑐᒥᒃ ᒪᓕᒃᑐᒥᒡᓗ ᓄᑕᖅᑲᓂᒃ ᑲᒪᒋᔭᐅᕝᕕᒃᓴᒥᒃ. ᑐᕌᕆᔭᐅᔪᖅ ᐃᑲᔪᖅᑐᐃᔪᒪᓂᐅᕗᖅ ᐸᐃᕆᕝᕕᓕᕆᔨᓂᒃ ᐊᖑᒻᒪᑎᔪᒪᓪᓗᑎᒃ ᓚᐃᓴᖃᕐᓂᕐᒧᑦ ᐊᑐᖅᑕᐅᔭᕆᐊᖃᖅᐸᒃᑐᓄᑦ ᐊᖏᒡᓕᒋᐊᖅᑎᑦᑎᓂᕐᒧᓪᓗ ᐸᐃᕆᕝᕕᖃᕐᓂᕐᒧᑦ ᐱᔨᑦᑎᕋᕐᓂᕆᔭᐅᕙᒃᑐᓂᒃ ᐱᔨᑦᑎᕋᕐᕕᐅᙱᑦᑐᓂ ᓄᓇᓕᖕᓂ.

 ᖃᓄᕐᓕ ᑮᓇᐅᔭᓂᒃ ᑐᒃᓯᕋᕈᓐᓇᖅᐳᖓ ᐱᒋᐊᕈᑎᒃᓴᓂᒃ ᐅᕝᕙᓘᓐᓃᑦ ᑲᒪᔾᔪᑎᒃᓴᓂᒃ ᓚᐃᓴᓐᓯᖃᖅᑐᒥᒃ ᐸᐃᕆᕝᕕᖕᒧᑦ ᓄᓇᕗᒻᒥ?
ᑮᓇᐅᔭᓂᒃ ᐱᓇᔪᒍᒪᒍᕕᑦ ᐱᒋᐊᕈᑎᒃᓴᓂᒃ ᐅᕝᕙᓘᓐᓃᑦ ᑲᒪᔾᔪᑎᒃᓴᓂᒃ ᓚᐃᓴᓐᓯᖃᖅᑐᒥᒃ ᐸᐃᕆᕝᕕᖕᒧᑦ ᓄᓇᕗᒻᒥ, ᖃᐅᔨᒋᐊᕆᐊᖃᖅᐳᑎᑦ ᐃᓕᓐᓂᐊᕐᓂᓕᕆᔨᒃᑯᑦ ᐊᕕᒃᑐᖅᓯᒪᔪᓂᒃ ᑎᑎᕋᕐᕕᖕᒧᑦ ᐅᖃᖃᑎᖃᕈᒪᓗᑎᑦ ᐃᓕᓐᓂᐊᕆᐅᖅᓴᔪᓕᕆᔨᒥᒃ (ECO). ᓄᓇᓕᖕᓂᑦ ᐃᓕᓐᓂᐊᖅᑐᓕᕆᔨᒃᑯᑦ ᑲᑎᒪᔨᖏᑦ ᐃᖅᑲᓇᐃᔭᖅᑎᐅᒋᕗᑦ ᖃᐅᔨᓴᕐᕕᖕᓂᑦ, ᑎᓕᔭᐅᓯᒪᓪᓗᑎᒃ ᒪᓕᒐᖅᑎᒍᑦ ᐱᔪᓐᓇᐅᑎᖃᖅᑎᑕᐅᓪᓗᑎᒃ, ᐊᐅᓚᑦᑎᕙᒃᖢᑎᒡᓗ ᑐᒃᓯᕋᐅᑎᓂᒃ ᐊᔾᔨᒌᙱᑦᑑᑎᓄᑦ ᑮᓇᐅᔭᓄᑦ. ᐱᑎᑦᑎᔪᓐᓇᖅᐳᑦ ᑐᓴᖅᑕᐅᔪᒃᓴᓂᒃ ᒪᓂᒪᔪᓄᑦ ᑮᓇᐅᔭᖁᑎᒋᔭᐅᓂᐊᖅᑐᓄᑦ ᐱᓕᕆᐊᖑᕙᒃᑐᓄᑦ, ᓲᕐᓗ ᐊᐅᓚᑦᑎᓂᕐᒧᑦ ᑲᒪᒋᔭᖃᖅᐸᖕᓂᕐᒧᓪᓗ, ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖁᐊᖅᓵᕐᓇᖅᑕᐃᓕᒪᓂᕐᒧᓪᓗ, ᐱᒋᐊᓕᓵᕐᓂᕐᒧᓪᓗ ᑐᓐᓂᖅᑯᑕᐅᕙᒃᑐᓄᑦ, ᐊᒻᒪᓗᑦᑕᐅᖅ ᐱᓇᔫᑎᓄᑦ ᐱᔭᐅᔭᕆᐊᓕᖕᓄᑦ ᐃᓱᓕᕝᕕᒃᓴᓕᖕᓄᓪᓗ. ᐃᑲᔪᖅᑕᐅᔪᓐᓇᖅᑐᑎᑦ ᐱᓇᔪᒃᑎᓪᓗᑎᑦ ᐃᓕᓐᓂᐊᕆᐅᖅᓴᓕᓵᖅᑐᓄᑦ ᐸᐃᕆᕝᕕᖕᓄᓪᓗ ᐱᓕᒻᒪᒃᓴᓂᕐᒥᒃ ᐱᑕᖃᖅᑐᓂᒡᓗ.

 ᐃᒪᓐᓇᐅᔭᕆᐊᖃᕆᕗᓯ ᐃᓚᐅᑎᑦᑎᓗᑎᑦ ᐊᕕᒃᓯᒪᓂᕐᒥ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᑮᓇᐅᔭᖃᖃᑕᐅᓂᖏᓐᓄᑦ ᐃᑲᔪᖅᑐᐃᖃᑕᐅᓂᖏᓐᓄᓪᓗ ᐊᑐᖅᑕᐅᔪᓐᓇᖅᑐᓂᒃ ᑕᒪᒃᑯᓄᖓ ᐱᒋᐊᖅᑎᑦᑎᔪᓄᑦ ᓚᐃᓴᓕᖕᓂᒃ ᐸᐃᕆᕕᖕᓂᒃ.

 ᖃᓄᖅ ᑲᔪᓯᑦᑎᐊᖅᑐᑦ ᐸᐃᕆᕖᑦ ᑮᓇᐅᔭᖅᑖᖅᑎᑕᐅᓲᖑᕙᑦ?
ᐊᑎᓕᐅᖅᓯᒪᔪᒥᒃ ᑐᓂᕐᕈᑎᖃᕐᓂᕐᒧᑦ ᐊᖏᕈᑎᖃᓕᕈᑦᑕ ᑐᓂᓯᒐᔭᖅᑐᒍᑦ ᐊᑭᓖᔾᔪᑎᒃᓴᓂᒃ 90%-ᒥᒃ ᐊᖏᖃᑎᒌᒍᑎᒥᒃ ᐅᓪᓗᐃᑦ ᐊᕙᑎᑦ ᐃᖅᑲᓇᐃᔭᕐᓇᐅᑎᓪᓗᒍ.

ᖃᔅᓯᓂᒃ ᑮᓇᐅᔭᓂᒃ ᐊᑐᐃᓐᓇᖅᑕᖃᖅᐸ?
ᐊᒥᓱᑲᓪᓚᐅᖕᒪᑕ ᑲᓇᑕᐅᑉ ᒐᕙᒪᒃᑯᖏᑦ ᑮᓇᐅᔭᖃᖅᑎᑕᐅᕙᒃᑐᑦ ᐃᑲᔪᖅᐸᒃᑐᑦ $800,000 ᐅᖓᑖᓂ ᑮᓇᐅᔭᓂᒃ ᐊᑐᐃᓐᓇᐅᑎᑕᐅᔪᓂᒃ. 

ᑲᑐᔾᔨᖃᑎᒌᖑᔪᖅ ᐱᓇᔪᒍᓐᓇᖅᐸ ᑮᓇᐅᔭᓂᒃ ᐊᐅᓚᑦᑎᔪᒪᙱᑦᑐᓂᒃ ᓚᐃᓴᓕᖕᓂᒃ ᓄᑕᖅᑲᓂᒃ ᑲᒪᒋᔭᖃᖅᐸᖕᓂᕐᒧᑦ ᐃᓂᒋᔭᐅᕙᒃᑐᓂᒃ?

ᐄ, ᑲᑐᔾᔨᖃᑎᒌᒡᕕᒃᓯ ᑮᓇᐅᔭᓂᒃ ᐱᓇᔪᒃᐸᑕ ᑭᓯᐊᓂ ᐊᐅᓚᑦᑎᔪᒪᙱᑉᐸᑕ ᓚᐃᓴᓐᓯᖃᖅᑐᑦ ᐸᐃᕆᕕᖕᓂ ᐃᓂᓂᒃ, ᑐᓴᖅᑎᑦᑎᔭᕆᐊᖃᖅᐳᑎᑦ ᑲᑐᔾᔨᖃᑎᒌᒡᕕᖕᒥ ᐊᐅᓚᑦᑎᓂᐊᖅᑐᒥᒃ ᐸᐃᕆᕕᖕᒥ. ᐆᑦᑑᑎᒋᓗᒍ, ᕼᐋᒻᒪᓚᒃᑯᑦ ᐃᓪᓗᓕᐅᕈᒪᑉᐸᑕ ᑭᓯᐊᓂ ᐊᐅᓚᑕᐅᔪᒪᑉᐸᑦ ᑮᓇᐅᔭᓕᐅᕋᓱᐊᓐᖏᑦᑐᓄᑦ, ᑐᔅᓯᕋᐅᑦ ᐃᓚᓕᐅᔾᔨᒋᐊᖃᖅᐳᖅ ᓇᓗᓇᐃᖅᓱᖅᓯᒪᔪᓂᒃ ᑮᓇᐅᔭᓕᐅᕋᓱᐊᙱᑦᑐᓄᑦ ᑲᑐᔾᔨᖃᑎᒌᓄᑦ ᐊᐅᓚᑦᑎᒐᔭᖅᑐᓄᑦ ᐃᓪᓗᒥᒃ ᓴᓇᔭᐅᒌᖅᐸᑦ. ᑖᓐᓇ ᓇᓗᓇᐃᔭᐅᑎ ᖃᐅᔨᒪᒋᐊᕐᓗᓂ ᐊᐅᓚᑕᑦ ᑲᑐᔾᔨᖃᑎᒌᑦ ᒪᓕᑦᑎᐊᕐᓗᑎᒃ ᑐᕌᒐᖏᓐᓄᑦ ᐱᔭᕆᐊᓕᖏᓐᓄᓪᓗ ᑮᓇᐅᔭᖃᖅᑎᑕᐅᔾᔪᑎᓄᑦ ᐱᓕᕆᐊᒃᓴᒥ.

ᓂᕆᐅᒃᐱᑖ ᓄᑕᖅᑲᑦ ᐃᓂᒃᓴᖏᑦ ᐅᓄᖅᓯᒋᐊᖅᑕᐅᓂᐊᕋᓱᒋᓪᓗᑎᒍᑦ ᐊᕐᕌᒎᑉ ᐃᓗᐊᓂ ᑖᒃᑯᐊ ᑮᓇᐅᔭᑦ ᐊᑐᕐᓗᒋᑦ?
ᐋᒃᑲ, ᐱᓕᕆᕝᕕᒃ ᐃᓕᓴᖅᓯᔪᖅ ᐊᕐᕌᒍ ᐊᑕᐅᓯᖅ ᓈᒻᒪᙱᓐᓂᖓᓂᒃ ᐱᓕᕆᐊᒃᓴᒐᓚᖕᓄᑦ ᑎᑭᐅᑎᓇᓱᒃᓗᒍ ᑖᓐᓇ ᑮᓇᐅᔭᖃᖅᑎᑕᐅᔾᔪᑎ ᑐᕌᒐᖅ. ᐃᒪᓐᓇᖔᕐᓕ, ᐊᑐᐃᓐᓇᐅᔪᑦ ᑮᓇᐅᔭᑦ ᑐᕌᒐᖃᖅᐳᑦ ᐃᑲᔪᖅᑐᐃᔪᒪᓪᓗᑎᒃ ᐱᓕᕆᐊᖑᐃᓐᓇᖅᑐᓂᒃ ᐅᕝᕙᓘᓐᓃᑦ ᐱᒋᐊᖅᑎᑦᑎᓗᑎᒃ ᓄᑖᓂᒃ ᐱᔪᓐᓇᐅᑎᓕᖕᓂᒃ ᐸᐃᕆᕝᕕᖕᓂ ᐃᓂᒃᓴᓂᒃ ᐃᑲᔪᕐᓗᒋᓪᓗ ᓚᐃᓴᓐᓯᖃᖅᑐᑦ ᐸᐃᕆᕝᕖᑦ ᒪᑐᓯᒪᔪᑦ ᐃᒻᒪᖄ ᐅᑭᐅᓄᑦ ᐱᖓᓱᓄᑦ ᒪᒃᐱᒃᑲᓐᓂᕈᓐᓇᖅᓯᖁᓪᓗᒍ.

ᑭᓲᕙᑦ ᐅᓂᒃᑳᖃᑦᑕᕆᐊᖃᕐᓂᕐᒧᑦ ᑮᓇᐅᔭᖅᑖᖅᑎᑕᐅᒃᐸᑕ?
ᐊᐃᑦᑐᖅᑕᐅᔪᑦ ᐃᑲᔫᑎᓂᒃ ᑐᓂᓯᒋᐊᓖᑦ ᐊᕐᕌᒎᑉ ᓄᙳᐊᓂ ᑕᒻᒪᖅᓯᒪᔪᖅᓯᐅᖅᑕᐅᓯᒪᓐᖏᑦᑐᓂᒃ ᑮᓇᐅᔭᓄᑦ ᓇᓕᖅᑲᓂᒃ, ᐱᖃᓯᐅᑎᑦᓱᑎᒃ ᑎᑎᕋᖅᓯᒪᔪᑦ ᐃᑖᔪᑦ, ᐊᑭᓕᖅᑐᕆᐊᓖᑦ, ᐊᒻᒪᓗ ᐃᑲᔪᖅᓯᔪᑦ ᑎᑎᖅᑲᐃᑦ ᐃᓘᓐᓇᖏᓐᓄᑦ ᐊᐅᓚᓂᐅᔪᓄᑦ ᐊᑭᓕᖅᑐᕆᐊᓕᓐᓄᑦ (ᓲᕐᓗ., ᐊᑭᓕᕋᑦᓴᐃᑦ ᐱᔨᑦᓯᕋᐅᑎᓄᑦ ᑳᑦᑐᓛᑦᑎᓄᑦ). ᑖᒃᑯᐊ ᑎᑎᕋᖅᓯᒪᔪᑦ ᑐᓂᔭᐅᒋᐊᓖᑦ ᐃᓗᐊᓐᓂ ᐅᓪᓗᐃᑦ 90 ᐊᐅᓚᓂᐅᔪᖅ ᐃᓱᓕᓚᐅᖅᑎᓪᓗᒍ ᐅᕝᕙᓗ ᒐᕙᒪᒃᑯᑦ ᓄᓇᕗᒻᒥ ᑮᓇᐅᔭᑎᒍᑦ ᐊᕐᕌᒍᖓᑦ ᓇᓗᓇᐃᖅᑕᐅᓯᒪᓂᐊᖅᓱᑎᓪᓗ ᐃᓗᐊᓐᓂ ᐊᐃᑦᑐᐃᓂᕐᒧᑦ ᐊᖏᖃᑎᒌᒍᑎᓂ.

ᑖᒃᑯᐊ ᑮᓇᐅᔭᐃᑦ ᐊᑯᓂᒧᑦ ᐊᑐᖅᑕᐅᓂᐊᖅᐹᑦ?
ᐱᓕᕆᐊᒃᓴᐃᑦ ᐊᕐᕌᒍᓄᑦ ᐅᓄᖅᑐᓄᑦ ᐱᓕᕆᐊᖑᔪᓐᓇᖅᑐᑦ; ᑭᓯᐊᓂ, ᐱᓕᕆᕝᕕᖕᒥ ᑮᓇᐅᔭᑦ ᐊᑭᓕᐅᑕᐅᓛᖅᑐᑦ ᐄᐳᕈ 1, 2023 ᐊᒻᒪ ᒫᔾᔨ 31, 2024 ᐊᑯᓐᓂᖓᓂ. ᐱᓇᔪᒃᑐᑦ ᑐᙵᓱᒃᑎᑕᐅᕗᑦ ᐱᓇᔪᒃᑲᓐᓂᕆᐊᒃᓴᖅ ᑖᒃᑯᓂᖓ ᑮᓇᐅᔭᓂᒃ ᐊᕐᕌᒍᒃᑲᓐᓂᐅᓕᖅᐸᑦ.

ᑕᒪᓐᓇ ᐃᓚᓕᐅᔾᔭᐅᔪᓐᓇᖅᐹ ᐊᓯᖏᓐᓄᑦ ᑮᓇᐅᔭᓄᑦ ᐊᖏᖃᑎᒌᒍᑎᓄᑦ?
ᐄ, ᑖᒃᑯᐊ ᑮᓇᐅᔭᐃᑦ ᑲᑎᑕᐅᔪᓐᓇᖅᑐᑦ ᐊᓯᖏᓐᓄᑦ ᑮᓇᐅᔭᓄᑦ ᐊᖏᖃᑎᒌᒍᑎᓄᑦ. ᖃᐅᔨᒃᑲᓐᓂᕈᒪᒍᕕᑦ ᑮᓇᐅᔭᒃᑲᓐᓂᕐᓂᒃ ᐱᕕᒃᓴᓂᒃ ᖃᐅᔨᒋᐊᕐᕕᒋᓗᒋᑦ ᐊᕕᒃᓯᒪᓂᕐᓂ ᐃᓕᓐᓂᐊᕆᐅᖅᓴᓕᓵᖅᑐᓄᑦ ᐱᓕᕆᔨᒋᔭᓯ, ᖃᐅᔨᒋᐊᕈᒪᑐᐃᓐᓇᕆᐊᖃᕆᕗᑎᑦᑕᐅᖅ ᐊᕕᒃᓯᒪᓂᕐᓂ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ.

ᐃᓕᓐᓂᐊᕐᓂᓕᕆᔨᒃᑯᑦ ᐃᓕᓐᓂᐊᓕᒻᒪᒃᓴᔪᓕᕆᔨᓄᑦ ᖃᐅᔨᒋᐊᕐᕕᒃᓴᑦ:

• ᕿᑭᖅᑖᓗᖕᒥ 1-833-930-3935  − @email
• ᑭᕙᓪᓕᕐᒥᑦ: 1-833-930-3936 @email
• ᕿᑎᕐᒥᐅᓂᑦ: 1-833-930-3937 @email
• ᐃᖃᓗᐃᑦ: 1-833-930-3938 @email

ᐃᓄᐃᑦ ᑲᑐᔾᔨᖃᑎᒌᓪᓗ ᒫᓐᓇ ᓴᖅᑭᑦᑎᓇᓱᒃᐸᓪᓕᐊᔪᑦ ᓄᑖᓂᒃ ᐱᔪᓐᓇᐅᑎᓕᖕᓂᒃ ᐸᐃᕆᕕᖕᓂ ᐃᓂᒃᓴᓂᒃ ᐊᒻᒪ/ᐅᕝᕙᓘᓐᓃᑦ ᒪᑐᐃᖅᓯᓂᕐᒥᒃ ᐸᐃᕆᕝᕕᖕᒥᒃ ᒪᑐᓯᒪᔪᒥᒃ ᐃᒻᒪᖄ ᐅᑭᐅᓄᑦ ᐱᖓᓱᓄᑦ ᐱᓇᔪᒍᓐᓇᕐᒥᔪᑦ.

ᖃᓄᖅ ᑐᒃᓯᕋᐅᑎᑦ ᐊᖏᖅᑕᐅᖃᑦᑕᖅᐸᑦ?
ᑐᒃᓯᕋᐅᑎᑦ ᖃᐅᔨᓴᖅᑕᐅᖃᑦᑕᕐᓂᐊᖅᐳᑦ ᓯᕗᓪᓕᐅᔾᔭᐅᓗᑎᒡᓗ ᐅᑯᐊ ᒪᓕᒃᑕᐅᓗᑎᒃ ᓂᕈᐊᕐᓂᕐᒧᑦ ᒪᓕᒐᒃᓴᑦ:

• ᐱᔨᑦᑎᕋᖅᑕᐅᙱᑦᑐᓂᑦ ᓄᓇᓕᖕᓂᑦ: ᓯᕗᓪᓕᐅᔾᔭᐅᓂᐊᖅᑐᑦ ᓄᓇᓖᑦ ᐱᔪᓐᓇᐅᑎᖃᙱᑦᑐᑦ ᐅᓪᓗᓕᒫᖅ ᐸᐃᕆᕝᕕᖕᒥᑦ ᓄᑕᖅᑲᓄᑦ ᐅᑭᐅᓕᖕᓄᑦ 0-ᒥᑦ 6-ᒧᑦ.
• ᑎᑎᕋᖅᑕᐅᓯᒪᔪᑦ ᐱᔪᒪᓂᕆᔭᐅᔪᑦ ᓄᑕᖅᑲᓂᒃ ᑲᒪᒋᔭᖃᖅᐸᖕᓂᕐᒧᑦ ᐃᓂᒃᑲᓐᓂᕐᓂᒃ: ᑕᒪᓐᓇ ᑕᑯᒃᓴᐅᑎᑕᐅᔪᓐᓇᖅᐳᖅ ᐅᑕᖅᑭᔪᑎᒍᑦ ᐱᑕᖃᖅᐸᒌᖅᑐᓂ ᓄᑕᖅᑲᓂᒃ ᑲᒪᒋᔭᖃᖅᐸᖕᓂᕐᒥ, ᑎᑎᖅᑲᓂᒃ ᐊᖓᔪᖅᑳᕆᔭᐅᔪᓂᑦ ᐊᑐᕈᓐᓇᙱᑦᑐᓂᒃ ᓄᑕᖅᑲᓂᒃ ᑲᒪᒋᔭᐅᓂᕐᒥᒃ ᑕᐃᒪᐃᔾᔪᑎᖃᖅᖢᑎᒃ ᒪᓂᒪᔪᓂᒃ ᐃᓂᓂᒃ ᐱᑕᖃᑦᑎᐊᙱᓐᓂᖓᓄᑦ, ᐅᕝᕙᓘᓐᓃᑦ ᐱᔪᒪᔪᖃᙱᖦᖢᓂ ᐃᓄᓕᕆᔨᒃᑯᓐᓂᒃ ᓄᑕᖅᑲᓂᒃ ᑲᒪᒋᔭᖃᖅᐸᖕᓂᕐᒧᑦ ᐃᓂᒋᔭᐅᕙᒃᑐᓂᒃ.
• ᐃᓂᒃᓴᑦ ᐃᑲᔪᖅᑐᐃᔪᑦ ᐃᓚᓕᐅᔾᔨᓂᕐᒥᒃ ᐊᒻᒪ ᐊᔾᔨᒌᒃᑎᑦᑎᓂᕐᒥᒃ: ᑐᒃᓯᕋᐅᑎᑦ ᑲᒪᒋᔭᐅᔾᔪᑎᒃᓴᑦ ᓄᑕᖅᑲᓄᑦ ᐅᑭᐅᓕᖕᓄᑦ 0-ᒥ 6-ᒧᑦ ᐊᔪᕈᑎᓖᑦ ᐅᕝᕙᓘᓐᓃᑦ ᑕᐃᒃᑯᐊ ᐱᐅᓯᒋᐊᖅᑕᐅᔭᕆᐊᓖᑦ ᐅᕝᕙᓘᓐᓃᑦ ᐃᓄᑐᐊᓄᑦ ᐃᑲᔪᖅᓱᖅᑕᐅᒋᐊᓕᑦ, ᐱᔭᕆᐊᑭᑦᑐᑦ ᓄᑕᖅᑲᑦ (ᓲᕐᓗ, ᐃᓄᓕᕆᔨᒃᑯᑦ ᐃᓚᐅᓂᖏᑦ), ᓄᓇᖃᖅᑳᖅᓯᒪᔪᑦ ᓄᑕᖅᑲᑦ, ᐊᒻᒪ ᓄᑕᖅᑲᑦ ᓇᑭᙶᕈᓘᔭᖅᑐᑦ ᓯᕗᓪᓕᐅᔾᔭᐅᖃᑦᑕᕐᓂᐊᖅᑐᑦ.

ᐊᒃᓱᕈᕐᓂᐊᖅᐳᑦ ᑕᒪᕐᒥᒃ ᐊᕕᒃᑐᖅᓯᒪᔪᑦ ᑮᓇᐅᔭᖅᑖᖅᑎᑕᐅᑦᑎᐊᖁᓪᓗᒋᑦ ᖁᓛᓂ ᐱᔭᐅᔭᕆᐊᓖᑦ ᒪᓕᒡᓗᒋᑦ. ᖃᐅᔨᓴᕐᓂᖅ ᑐᕌᒐᖃᖅᑐᖅ ᓴᖅᑭᔮᑦᓯᐊᕐᓂᕐᒥᑦ ᐊᔾᔨᒌᑎᑦᓯᓂᕐᒥᓪᓗ ᐅᖃᐅᓯᖃᕐᓂᕐᒥᑦ ᐊᔾᔨᒌᖏᑦᑐᓂᑦ ᐱᔭᕆᐊᓕᓐᓂᑦ ᓄᓇᓕᓐᓂᑦ ᐃᓚᒋᔭᐅᔪᓂᑦ.

ᑕᑕᑎᕆᐊᓕᒻᒥᑦ ᐱᑕᖃᖅᑳ ᐅᕝᕙᓘᓐᓃᑦ ᐊᑐᖅᑕᐅᔪᔅᓴᒥᑦ?

ᑐᕌᖓᓪᓚᕆᒃᑐᒥᒃ ᐱᓇᔫᑎᒥᒃ ᑎᑎᕋᕆᐊᓕᖕᒥᒃ ᐅᕝᕙᓘᓐᓃᑦ ᐊᑐᖅᑕᐅᖃᑦᑕᕐᓂᐊᖅᑐᒥᒃ ᐱᑕᖃᙱᑦᑐᖅ. ᐱᓕᕆᕝᕕᒃ ᐊᑐᐃᓐᓇᐅᑎᑦᓯᔪᖅ ᐊᓯᔾᔨᕈᓐᓇᓂᕐᒥᑦ ᑐᑦᓯᕋᐅᑎᓂᑦ ᑐᓂᔭᐅᔪᓂᑦ, ᐃᑭᐊᖅᑭᕕᕗᑦ ᓇᓗᓇᐃᖅᓯᓯᒪᔪᖅ ᓇᓗᓇᐃᖅᑕᐅᓯᒪᔪᓂᑦ ᐃᓚᒍᑕᖏᓐᓂᑦ ᐃᓚᒋᔭᐅᑎᑦᓯᓂᕐᒥᑦ ᑐᑦᓯᕋᐅᑎᓐᓂᑦ. ᓲᕐᓗ ᐃᒪᓐᓇ, ᑐᓐᓂᖅᑯᑕᐅᔪᑦ ᐃᒪᐃᑦᑑᔪᓐᓇᖅᐳᑦ, ᖃᕆᑕᐅᔭᒃᑯᑦ ᑎᑎᕋᕈᑎ ᑎᑎᕋᖅᓯᒪᓗᑎᒃ ᐅᐃᒍᑕᖃᕐᓗᑎᒃ ᖃᕆᑕᐅᔭᒃᑯᓪᓘᓐᓃᑦ ᑎᑎᕋᖃᑦᑕᐅᑎᕝᕕᒃᑯᑦ ᐃᓚᓕᐅᑎᓯᒪᓗᑎᒃ.

ᐃᓱᒫᓘᑎᖃᕈᕕᑦ ᐱᓇᔫᑎᓄᑦ ᐱᕙᓪᓕᐊᓂᕐᓄᑦ, ᖃᐅᔨᒋᐊᕐᓗᒍ @email.

ᐃᑲᔫᑕᐅᔪᓐᓇᖅᑐᑦ:

ᐃᓕᓐᓂᐊᕐᓂᓕᕆᔨᒃᑯᑦ ᐊᐃᑦᑑᑎᑦ ᐃᑲᔫᑏᓪᓗ ᐊᑐᐊᒐᖓ (English)